“2251-modda. Chet el fuqarolarini va fuqaroligi boʻlmagan shaxslarni Oʻzbekiston Respublikasi hududidan maʼmuriy tarzda chiqarib yuborish toʻgʻrisidagi sud qarorini bajarmaslik

Chet el fuqarolari va fuqaroligi boʻlmagan shaxslar tomonidan ularga nisbatan Oʻzbekiston Respublikasi hududidan maʼmuriy tarzda chiqarib yuborish toʻgʻrisida qabul qilingan sud qarorlarini bajarmaslik —

eng kam ish haqining yetmish besh baravaridan yuz baravarigacha miqdorda jarima solishga yoxud oʻn besh sutkagacha muddatga maʼmuriy qamoqqa olishga sabab boʻladi”;

15) 239-modda:

sanksiyalaridagi “ellik baravaridan yuz baravarigacha” va “yuz baravaridan yuz ellik baravarigacha” degan soʻzlar tegishincha “oʻn besh baravaridan oʻttiz baravarigacha” va “oʻttiz baravaridan ellik baravarigacha” degan soʻzlar bilan almashtirilsin;

ikkinchi qismi dispozitsiyasi quyidagi tahrirda bayon etilsin;

“Bosh tashkiloti Oʻzbekiston Respublikasidan tashqarida joylashgan xalqaro nodavlat notijorat tashkilotlarining hamda chet el nodavlat notijorat tashkilotlarining vakolatxonalari va filiallari hamda ular xodimlarining biror-bir siyosiy faoliyatda hamda vakolatxonaning yoki filialning ustavdagi maqsad va vazifalariga javob bermaydigan boshqa faoliyatda qatnashishi, ularning siyosiy partiyalar va ommaviy harakatlar tomonidan oʻtkaziladigan amaliy harakatlar hamda tadbirlarni moliyalashtirishi, shuningdek bunday tashkilotlarni tuzish tashabbusi bilan chiqishi va shunday tashkilotlarni tuzishni qoʻllab-quvvatlashi”;

toʻrtinchi qismi dispozitsiyasi “Nodavlat notijorat tashkilotlari” degan soʻzlardan keyin “(siyosiy partiyalar bundan mustasno)” degan soʻzlar bilan toʻldirilsin;

quyidagi mazmundagi beshinchi qism bilan toʻldirilsin:

“Nodavlat notijorat tashkilotlarining chet davlatlardan, xalqaro va chet el tashkilotlaridan, chet davlatlar fuqarolaridan yoki ularning topshirigʻiga binoan boshqa shaxslardan roʻyxatdan oʻtkazuvchi organning roziligisiz pul mablagʻlari va mol-mulk olishi —

mansabdor shaxslarga eng kam ish haqining oʻn besh baravaridan oʻttiz baravarigacha miqdorda jarima solishga sabab boʻladi”;

beshinchi qismi oltinchi qism deb hisoblansin;

oltinchi qismi dispozitsiyasi “etishi” degan soʻzdan keyin “oʻz faoliyati toʻgʻrisida bila turib notoʻgʻri maʼlumotlar taqdim etishi” degan soʻzlar bilan toʻldirilsin;