“Tovar va transport vositalarini davlat bojxona xizmati organi xodimlari tomonidan koʻzdan kechirish hamda bojxona koʻrigidan oʻtkazish boʻyicha yoʻriqnomani tasdiqlash haqida”gi qarorga oʻzgartirish va qoʻshimchalar kiritish toʻgʻrisida (2714-1-son)

14.04.2016

Oʻzbekiston Respublikasi Davlat bojxona qoʻmitasining

Qarori

[Oʻzbekiston Respublikasi Adliya vazirligi tomonidan 2016-yil 14-aprelda 2714-1-son bilan davlat roʻyxatidan oʻtkazilgan]

Oʻzbekiston Respublikasining Bojxona kodeksi va Oʻzbekiston Respublikasi “Davlat bojxona xizmati toʻgʻrisida”gi Qonunining 6-moddasiga muvofiq Oʻzbekiston Respublikasi Davlat bojxona qoʻmitasi qaror qiladi:

1. “Tovar va transport vositalarini davlat bojxona xizmati organi xodimlari tomonidan koʻzdan kechirish hamda bojxona koʻrigidan oʻtkazish boʻyicha yoʻriqnomani tasdiqlash haqida”gi qarorga (roʻyxat raqami 2714, 2015-yil 11-sentabr) (Oʻzbekiston Respublikasi qonun hujjatlari toʻplami, 2015-y., 36-son, 482-modda) ilovaga muvofiq oʻzgartirish va qoʻshimchalar kiritilsin.

2. Mazkur qaror 2016-yil 21-apreldan eʼtiboran kuchga kiradi.

Rais Z. DUSANOV

Toshkent sh.,

2016-yil 1-aprel,

01-02/12-14-son

Oʻzbekiston Respublikasi Davlat bojxona qoʻmitasining 2016-yil 1-apreldagi 01-02/12-14-son qaroriga ILOVA

“Tovar va transport vositalarini davlat bojxona xizmati organi xodimlari tomonidan koʻzdan kechirish hamda bojxona koʻrigidan oʻtkazish boʻyicha yoʻriqnomani tasdiqlash haqida”gi qarorga kiritilayotgan oʻzgartirish va qoʻshimchalar

1. Qarorda:

a) nomi quyidagi tahrirda bayon etilsin:

“Tovar va transport vositalarining bojxona koʻzdan kechiruvi hamda ularni bojxona koʻrigidan oʻtkazish boʻyicha yoʻriqnomani tasdiqlash haqida”;

b) 1-band quyidagi tahrirda bayon etilsin:

“1. Tovar va transport vositalarining bojxona koʻzdan kechiruvi hamda ularni bojxona koʻrigidan oʻtkazish boʻyicha yoʻriqnoma ilovaga muvofiq tasdiqlansin.”.

2. Yoʻriqnomada:

a) nomi quyidagi tahrirda bayon etilsin:

“Tovar va transport vositalarining bojxona koʻzdan kechiruvi hamda ularni bojxona koʻrigidan oʻtkazish boʻyicha YOʻRIQNOMA”;

b) muqaddimadagi “davlat bojxona xizmati organi (bundan buyon matnda bojxona organi deb ataladi) xodimlari tomonidan koʻzdan kechirish” degan soʻzlar “bojxona koʻzdan kechiruvidan” degan soʻzlar bilan almashtirilsin;

v) 1-bandning ikkinchi va uchinchi xatboshilari quyidagi tahrirda bayon etilsin:

“bojxona koʻzdan kechiruvi — bojxona organining mansabdor shaxsi tomonidan transport vositalarining boʻlimlarini, tovarlarning oʻrov-idishini ochmagan, koʻzdan kechirilayotgan obyektlarni va ularning qismlarini boʻlaklarga ajratmagan va boshqa yoʻllar bilan ularning butligini buzmagan holda tovarlarning va (yoki) transport vositalarining, xalqaro pochta va kuryerlik joʻnatmalarining hamda jismoniy shaxslar bagajining, shuningdek yuk ortilgan idishlarni, konteynerlarni, bojxona identifikatsiyalash vositalarining tashqi koʻrinishini koʻzdan kechirish orqali amalga oshiriladigan bojxona nazoratining shakli;

bojxona koʻrigi — qoʻyilgan plombalarni, muhrlarni yoki bojxona identifikatsiyalashining boshqa vositalarini buzgan xolda, tekshirilayotgan obyektlarni va ularning qismlarini boʻlaklarga ajratib, demontaj qilib yoki boshqa yoʻllar bilan ularning butligini buzib, tovarlarning oʻramini yoki transport vositasining yuk joylanadigan boʻlimini yoxud idishlarini, konteynerlarni va tovarlar boʻlgan yoki boʻlishi ehtimoli boʻlgan boshqa joylarni ochish orqali amalga oshiriladigan bojxona nazoratining shakli;”;

g) 2-band quyidagi tahrirda bayon etilsin:

“2. Bojxona koʻzdan kechiruvi bojxona nazorati ostidagi tovarlar va (yoki) transport vositalari toʻgʻrisidagi maʼlumotlarni, tovarlarda, yuk ortilgan idishlarda, transport vositalarida va transport vositalarining boʻlimlarida plombalar, muhrlar va boshqa bojxona identifikatsiyalash vositalari mavjudligini tasdiqlash maqsadida amalga oshiriladi.

Bojxona koʻrigi tovarlar, transport vositalarini bojxona chegarasi orqali olib oʻtishning qonuniyligini aniqlash, ularni hisobga olish, boj, soliqlar, yigʻimlar undirish, shuningdek olib kirish, olib chiqish hamda tranzit qilish taqiqlangan tovarlarni bojxona chegarasi orqali oʻtishining oldini olish uchun amalga oshiriladi.”;

d) quyidagi mazmundagi 21-band bilan toʻldirilsin:

“21. Bojxona koʻzdan kechiruvi vakolatli shaxslar ishtirokisiz oʻtkazilishi mumkin, bundan mazkur shaxslar bojxona koʻzdan kechiruvida hozir boʻlish istagini bildirgan hollar mustasno.

Bojxona organi xodimining talabiga koʻra vakolatli shaxslar tovarlarning va transport vositalarining bojxona koʻrigi oʻtkazilayotganda hozir boʻlishi va ularga zarur koʻmak koʻrsatishi shart. Vakolatli shaxslar boʻlmaganda koʻrikdan oʻtkazilayotgan transport vositasini boshqarayotgan jismoniy shaxs vakolatli shaxs hisoblanadi.

Bojxona organi xodimi bojxona koʻrigini Bojxona kodeksining 195-moddasi toʻrtinchi qismida nazarda tutilgan holatlarda vakolatli shaxslar ishtirokisiz, ikki nafar xolis hozirligida oʻtkazishga haqli.”;

e) 3 va 11-bandlardagi “Bojxona organi xodimi tomonidan koʻzdan kechirish” degan soʻzlar “Bojxona koʻzdan kechiruvi” degan soʻzlar bilan almashtirilsin;

j) 4-banddagi “Koʻzdan kechirish” degan soʻzlar va “53” raqami tegishincha “Bojxona koʻzdan kechiruvi” degan soʻzlar va “202” raqami bilan almashtirilsin;

z) quyidagi mazmundagi 41-band bilan toʻldirilsin:

“41. Bojxona koʻzdan kechiruvi natijalariga koʻra:

toʻgʻri deklaratsiyalangan taqdirda — tegishli tovarning kuzatuv hujjatlari rasmiylashtiriladi;

tovarning notoʻgʻri deklaratsiyalanganligi fakti aniqlangan taqdirda — bojxona koʻrigi amalga oshiriladi.”;

i) 6 va 14-bandlar oʻz kuchini yoʻqotgan deb topilsin;

k) 7-banddagi “bojxona organi xodimi tomonidan koʻzdan kechirish” degan soʻzlar “yoki ushbu transport vositasiga tovarlar qayta yuklanayotganda bojxona koʻzdan kechiruvi” degan soʻzlar bilan almashtirilsin;

l) 2-bobning nomidagi “koʻzdan kechirish” degan soʻzlar “bojxona koʻzdan kechiruvi” degan soʻzlar bilan almashtirilsin;

m) 8-bandning birinchi xatboshisidan “bojxona organi xodimlari tomonidan koʻzdan kechirish va” degan soʻzlar chiqarib tashlansin;

n) 9-banddagi “bojxona organi xodimlari tomonidan koʻzdan kechirilishi” degan soʻzlar “bojxona koʻzdan kechiruvidan oʻtkazilishi” degan soʻzlari bilan almashtirilsin;

o) 10-bandning yettinchi xatboshisidagi “koʻzdan kechirish” degan soʻzlar “bojxona koʻrigi” degan soʻzlar bilan almashtirilsin;

p) 12 va 13-bandlar quyidagi tahrirda bayon etilsin:

“12. Transport vositalarining bojxona chegarasi orqali harakatlanishida bojxona koʻzdan kechiruvi hamkorlikdagi texnologik sxemalarda belgilangan vaqtdan oshmasligi lozim.

Fuqarolar qoʻl yuklari va bagajlarining bojxona koʻzdan kechiruvi ularga tegishli hujjatlar bojxona organi xodimiga taqdim qilingan vaqtda oʻtkaziladi.

13. Transport vositalarini bojxona koʻzdan kechiruvidan oʻtkazishda transport vositasining tashqi tomoni hamda yuk joylashtirilishi mumkin boʻlgan boʻlimlari va qismlari bojxona koʻzdan kechiruvidan oʻtkaziladi.”;

r) 16 — 18-bandlar quyidagi tahrirda bayon etilsin:

“16. Bojxona koʻrigi natijalari boʻyicha mazkur Yoʻriqnomaning 8-bandida koʻrsatilgan holatlar aniqlanmasa transport vositasining harakatini davom ettirish uchun tovarni yetkazib berishning nazorat hujjati rasmiylashtiriladi (nazoratdan chiqariladi).

17. Chegara bojxona postida bojxona koʻzdan kechiruvi va bojxona koʻrigi natijalari boʻyicha mazkur Yoʻriqnomaning 8-bandida koʻrsatilgan holatlar bilan bogʻliq bojxona qoidabuzarligi aniqlangan taqdirda qonun hujjatlarida belgilangan choralar koʻriladi. Boshqa holatlarda bojxona koʻzdan kechiruvidan yoki bojxona koʻrigidan oʻtkazilgan tovarlar va transport vositalari manzil bojxona postiga yuboriladi.

18. Davlat bojxona qoʻmitasining “Temir yoʻl” yoki “Avto” yagona avtomatlashtirilgan axborot tizimiga tovarni yetkazib berishning nazorat hujjatini rasmiylashtirgan bojxona xodimi tomonidan transport vositasini bojxona koʻzdan kechiruvidan oʻtkazgan bojxona organi xodimining familiyasi, ismi va otasining ismi toʻgʻrisidagi maʼlumotlar kiritiladi.”;

s) ilova belgisi quyidagi tahrirda bayon etilsin:

“Tovar va transport vositalarining bojxona koʻzdan kechiruvi hamda ularni bojxona koʻrigidan oʻtkazish boʻyicha yoʻriqnomaga ilova”.