Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomni tasdiqlash haqida (107-son)

07.04.2016

Oʻzbekiston Respublikasi Vazirlar Mahkamasining

qarori

“Taʼlim toʻgʻrisida”gi Oʻzbekiston Respublikasi Qonuniga muvofiq hamda pedagog kadrlarni attestatsiyadan oʻtkazish tartibini yanada takomillashtirish maqsadida Vazirlar Mahkamasi qaror qiladi:

1. Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizom ilovaga muvofiq tasdiqlansin.

2. Belgilansinki:

attestatsiyadan oʻtdi deb eʼtirof etilgan maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlari (keyingi oʻrinlarda — pedagog kadrlar) belgilangan namunadagi sertifikatlar bilan taʼminlanadi;

pedagog kadrlarni attestatsiyadan oʻtkazish jarayoni bilan bogʻliq, shu jumladan test sinovlari materiallarini tayyorlash va sertifikatlarni nashr etish bilan bogʻliq xarajatlar Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi tomonidan taqdim etiladigan xarajatlar smetasiga muvofiq Oʻzbekiston Respublikasi Davlat budjeti mablagʻlari hisobidan qoplanadi.

3. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda tasarrufida taʼlim muassasalari boʻlgan vazirliklar va idoralar bilan birgalikda har yili 20-yanvarga qadar attestatsiyadan oʻtish muddati kelgan pedagog kadrlarni attestatsiyadan oʻtkazish jadvalini ishlab chiqsin hamda tasdiqlash uchun Vazirlar Mahkamasining Yoshlar siyosati, taʼlim, madaniyat va sport masalalari kompleksiga kiritsin.

4. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Xalq taʼlimi vazirligi, Mehnat vazirligi, Vazirlar Mahkamasi huzuridagi Davlat test markazi bilan birgalikda bir oy muddatda:

attestatsiya natijalarini baholash mezonlarini ishlab chiqsinlar va belgilangan tartibda tasdiqlasinlar;

oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.Y. Xodiyev zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2016-yil 7-aprel,

107-son

Vazirlar Mahkamasining 2016-yil 7-apreldagi 107-son qaroriga ILOVA

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisida

nizom

I. Umumiy qoidalar

1. Ushbu Nizom “Taʼlim toʻgʻrisida”gi Oʻzbekiston Respublikasi Qonunining 25-moddasiga muvofiq maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini (keyingi oʻrinlarda — pedagog kadrlar) attestatsiyadan oʻtkazish tartibini belgilaydi.

2. Pedagog kadrlarning malaka tavsiflariga muvofiqligi Oʻzbekiston Respublikasi Maktabgacha taʼlim vazirligi (keyingi oʻrinlarda Maktabgacha taʼlim vazirligi deb ataladi), Oʻzbekiston Respublikasi Xalq taʼlimi vazirligi (keyingi oʻrinlarda — Xalq taʼlimi vazirligi), Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi (keyingi oʻrinlarda — Oʻrta maxsus, kasb-hunar taʼlimi markazi) hamda tasarrufida taʼlim muassasalari boʻlgan vazirliklar va idoralar tomonidan belgilangan tartibda tasdiqlangan xodimlarning asosiy lavozimlari malaka tavsiflaridagi (keyingi oʻrinlarda — malaka tavsiflari) talablar asosida oʻrganiladi.

3. Quyidagilar pedagog kadrlarni attestatsiyadan oʻtkazishning asosiy vazifalari hisoblanadi:

oʻquv fani boʻyicha malakasi, dars oʻtish mahorati, mehnati samaradorligi va ijtimoiy-siyosiy bilimlarini oshirgan pedagog kadrlarni ragʻbatlantirish;

ish haqi miqdorini oshirish imkoniyatlarini yaratish;

xorijiy tillarni oʻrganishni qoʻllab-quvvatlash;

kompyuter texnikasi va axborot-kommunikatsiya texnologiyalari, shu jumladan Internet jahon axborot tarmogʻidan foydalanish boʻyicha amaliy koʻnikmalarga ega boʻlishning majburiyligini taʼminlash.

4. Attestatsiyaning asosiy prinsiplari majburiylik, davriylik, oshkoralik, kengashib ish koʻrish hamda xolislik hisoblanadi.

5. Attestatsiya maktabgacha, umumiy oʻrta va maktabdan tashqari taʼlim muassasalari pedagog kadrlari uchun har besh yilda, oʻrta maxsus, kasb-hunar taʼlimi muassasalari pedagog kadrlari uchun har uch yilda bir marta oʻtkaziladi.

Pedagog kadrlarning attestatsiyasini tashkil etish va oʻtkazish ushbu Nizomga 1-ilovaga muvofiq sxema boʻyicha amalga oshiriladi.

6. Attestatsiyadan belgilangan muddatda malaka oshirish kursini tugatganlik toʻgʻrisidagi sertifikatga ega boʻlgan:

maktabgacha va maktabdan tashqari taʼlim muassasalarining oliy va oʻrta maxsus, kasb-hunar maʼlumotli;

umumiy oʻrta taʼlim muassasalarining oliy maʼlumotli;

oʻrta maxsus, kasb-hunar taʼlimi muassasalarining umumtaʼlim, chuqurlashtirilgan va kasbiy taʼlim fanlari boʻyicha oliy maʼlumotli;

oʻrta maxsus, kasb-hunar taʼlimi muassasalarining oliy va oʻrta maxsus, kasb-hunar maʼlumotli pedagog kadrlari (ishlab chiqarish taʼlimi ustalari) oʻtkazilishi shart.

7. Ishga yangi qabul qilingan pedagog kadrlar bir yildan soʻng, oliy yoki oʻrta maxsus, kasb-hunar taʼlimi muassasalarini bitirib birinchi bor ishga kirganlar kasbiy faoliyatiga uch yil toʻlgandan soʻng attestatsiyaga jalb etiladi.

8. Tuzilmasida umumtaʼlim boʻgʻinlari mavjud boʻlgan oʻrta maxsus, kasb-hunar taʼlimi muassasalarining umumiy oʻrta taʼlim bosqichida umumtaʼlim, chuqurlashtirilgan va kasbiy taʼlim fanlaridan dars berayotgan pedagog kadrlar attestatsiyadan oʻrta maxsus, kasb-hunar taʼlimi muassasalari uchun belgilangan tartibda oʻtkaziladi.

9. Mehnatga layoqatsizlik varaqasi rasmiylashtirilgan holda uzoq muddat (uch oydan ortiq) davolanayotgan, homiladorlik, tugʻish hamda bolani parvarish qilish taʼtilidagi pedagog kadrlar ish faoliyatiga qaytganlariga bir yil toʻlgandan soʻng attestatsiyaga jalb etiladi.

10. Attestatsiya har yili mart-iyun oylarida oʻtkaziladi.

11. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi (keyingi oʻrinlarda — Davlat inspeksiyasi) Maktabgacha taʼlim vazirligi, Xalq taʼlimi vazirligi, Oʻrta maxsus, kasb-hunar taʼlimi markazi hamda tasarrufida taʼlim muassasalari boʻlgan vazirliklar va idoralar bilan birgalikda har yili 20-yanvarga qadar attestatsiyadan oʻtish muddati kelgan pedagog kadrlarni attestatsiyadan oʻtkazish jadvalini tasdiqlash uchun Vazirlar Mahkamasining Taʼlim, sogʻliqni saqlash, jismoniy tarbiya, sport va turizm masalalari kompleksiga taqdim etadi.

Attestatsiyadan oʻtish muddati kelgan pedagog kadrlarni attestatsiyadan oʻtkazish jadvali taqdim etilgan kundan eʼtiboran bir oy ichida Vazirlar Mahkamasining Taʼlim, sogʻliqni saqlash, jismoniy tarbiya, sport va turizm masalalari kompleksi rahbari tomonidan tasdiqlanadi.

12. Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari (keyingi oʻrinlarda — taʼlim muassasalari) rahbarlari attestatsiya muddatini bir oy oldin eʼlon qiladi va pedagog kadrlarni attestatsiyadan oʻtkazish tartibi bilan tanishtiradi.

13. Attestatsiyaga doir tashkiliy masalalar taʼlimni boshqarish boʻyicha maxsus vakolat berilgan davlat organlari va taʼlim muassasalari rahbarlari tomonidan amalga oshiriladi.

14. Oʻzbekiston Respublikasi Mehnat vazirligi oʻrnatilgan tartibda attestatsiyaning mehnat toʻgʻrisidagi qonun hujjatlarida belgilangan tartibda, pedagog kadrlarning huquqlari taʼminlangan holda oʻtishini nazorat qiladi.

15. Attestatsiya oʻtkazishda taʼlimni boshqarish boʻyicha maxsus vakolat berilgan davlat organlari hamda mahalliy davlat hokimiyati organlari faoliyatini muvofiqlashtirish va attestatsiyani nazorat qilish Davlat inspeksiyasi tomonidan amalga oshiriladi.

Muvofiqlashtirish ishlari attestatsiya jadvallarini ishlab chiqish va attestatsiyaga oid faoliyatni tashkil etish boʻyicha qoʻshma qarorlar loyihalarini tayyorlashda ishtirok etishdan, birinchi, oliy malaka toifali va yetakchi, bosh oʻqituvchi lavozimidagi hamda mazkur malaka toifalari va lavozimlariga talabgor pedagog kadrlar uchun test (yozma, ijodiy ish) sinovlarini oʻtkazishdan hamda ularning natijalarini eʼlon qilishdan, pedagog kadrlarning attestatsiyadan oʻtganligi toʻgʻrisida sertifikatlar topshirilishini taʼminlashdan iborat.

Attestatsiyani nazorat qilish uning natijalarini tahlil qilish, baholash hamda mazkur Nizom talablari buzilgan holda qabul qilingan qarorlarga oid maʼlumotnomalarni Vazirlar Mahkamasining Taʼlim, sogʻliqni saqlash, jismoniy tarbiya, sport va turizm masalalari kompleksiga, tasarrufida taʼlim muassasalari boʻlgan vazirliklar va idoralarga yuborish orqali amalga oshiriladi.

II. Attestatsiyani tashkil etish va attestatsiya komissiyalarini tuzish tartibi

16. Pedagog kadrlar asosiy ish joyi boʻyicha attestatsiyaga jalb etiladi. Taʼlim muassasalarida oʻrindoshlik asosida dars beradigan va asosiy ish joyi boʻyicha pedagogik faoliyat bilan shugʻullanmaydigan pedagog kadrlar oʻrindoshlik asosida faoliyat yuritayotgan taʼlim muassasida attestatsiyadan oʻtadi.

17. Maktabgacha, umumiy oʻrta va oʻrta maxsus, kasb-hunar hamda maktabdan tashqari taʼlim muassasalari pedagog kadrlarining malaka toifalari yoki lavozimlari mazkur taʼlim muassasalarining bir turidan boshqasiga ishga oʻtganda saqlanadi.

Bunda maktabgacha taʼlim va xalq taʼlimi tizimlari pedagog kadrlarining ikkinchi malaka toifasi oʻrta maxsus, kasb-hunar taʼlimi tizimining katta oʻqituvchi lavozimiga, birinchi malaka toifasi — yetakchi oʻqituvchi lavozimiga, oliy malaka toifasi — bosh oʻqituvchi lavozimiga tenglashtiriladi.

18. Pedagog kadrlar oʻrta maxsus, kasb-hunar, oliy maʼlumotli, ilmiy daraja olganligi yoki qayta tayyorlash kurslaridan oʻtganligi haqidagi diplomda (keyingi oʻrinlarda — diplom) koʻrsatilgan tayyorlov, taʼlim yoʻnalishlari, mutaxassislik yoki ixtisosliklariga mos keladigan fanlar boʻyicha attestatsiyadan oʻtadi.

Pedagog kadrlarning diplomida bittadan ortiq tayyorlov yoki taʼlim yoʻnalishi, mutaxassislik yoki ixtisoslik koʻrsatilgan boʻlsa, ular dars berayotgan har bir oʻquv fani boʻyicha alohida attestatsiyadan oʻtadi.

19. Taʼlim muassasalari rahbarlari attestatsiyadan oʻtuvchilarning har biri uchun alohida hujjatlar yigʻmajildi tayyorlaydi.

Hujjatlar yigʻmajildida attestatsiyadan oʻtuvchining pasporti, diplomi, attestatsiyadan oʻtganligi toʻgʻrisida olgan va amalda foydalanayotgan sertifikati (agar mavjud boʻlsa), malaka oshirganligi haqidagi sertifikati nusxalari, maʼlumotnoma, soʻnggi bir yil davomida oʻtgan darslarining tahlillari, ochiq darslar oʻtganligi haqidagi maʼlumotlar, taʼlim oluvchilari reytingi va erishgan yutuqlari (agar mavjud boʻlsa) toʻplanadi.

20. Pedagog kadrlar attestatsiyasi ularning malaka tavsiflarida belgilangan vazifalarga muvofiq faoliyat koʻrsatishini tasdiqlovchi maktabgacha taʼlim boshqarmalari va xalq taʼlimi boshqarmalari attestatsiya komissiyalari, tuman (shahar), muassasalar va oʻrta maxsus, kasb-hunar taʼlimi hududiy boshqarmalari attestatsiya komissiyalari (keyingi oʻrinlarda — attestatsiya komissiyalari) tomonidan amalga oshiriladi.

201. Qoraqalpogʻiston Respublikasi Maktabgacha taʼlim vazirligida, viloyatlar maktabgacha taʼlim boshqarmalarida, Toshkent shahar maktabgacha taʼlim bosh boshqarmasida (keyingi oʻrinlarda — maktabgacha taʼlim boshqarmalari) oliy malaka toifasiga talabgor pedagog kadrlarni attestatsiyadan oʻtkazish uchun Maktabgacha taʼlim boshqarmalari attestatsiya komissiyalari tuziladi.

Maktabgacha taʼlim boshqarmalari attestatsiya komissiyalari tarkibi Maktabgacha taʼlim vazirligi va Davlat inspeksiyasining qoʻshma qarori bilan tasdiqlanadi.

Maktabgacha taʼlim boshqarmalari attestatsiya komissiyalari tarkibi maktabgacha taʼlim boshqarmalari boshligʻi (komissiya raisi), Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining taʼlim sohasiga masʼul xodimi, Oʻzbekiston Kasaba uyushmalari Federatsiyasi (keyingi oʻrinlarda — kasaba uyushmasi) vakili, ikki nafar attestatsiyadan oʻtgan, oliy toifali pedagog kadrlardan (bir nafari komissiya kotibi) iborat boʻladi.

202. Quyidagilar maktabgacha taʼlim boshqarmalari attestatsiya komissiyalarining vazifalari hisoblanadi:

oliy malaka toifasiga talabgor pedagog kadrlarni attestatsiyadan oʻtkazish;

tuman (shahar) va muassasalar attestatsiya komissiyalarining birinchi va ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

oliy, birinchi va ikkinchi malaka toifali pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

203. Tuman (shahar) maktabgacha taʼlim boʻlimlarida birinchi malaka toifasiga talabgor pedagog kadrlar attestatsiyasini oʻtkazish uchun tuman (shahar) attestatsiya komissiyalari tuziladi.

Tuman (shahar) attestatsiya komissiyalari tarkibi maktabgacha taʼlim boshqarmalarining buyrugʻi bilan tasdiqlanadi.

Tuman (shahar) attestatsiya komissiyalari tarkibi tuman (shahar) maktabgacha taʼlim boʻlimi mudiri (komissiya raisi), tuman (shahar) hokimligining taʼlim sohasiga masʼul xodimi, kasaba uyushmasi vakili, ikki nafar attestatsiyadan oʻtgan, oliy toifali pedagog kadrlardan (bir nafari komissiya kotibi) iborat boʻladi.

204. Quyidagilar tuman (shahar) attestatsiya komissiyalarining vazifalari hisoblanadi:

birinchi malaka toifasiga talabgor pedagog kadrlarni attestatsiyadan oʻtkazish;

muassasalar attestatsiya komissiyalarining ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

birinchi va ikkinchi malaka toifali pedagog kadrlarga sertifikatlar olish uchun maktabgacha taʼlim boshqarmalari komissiyalariga buyurtmanoma berish.

205. Taʼlim muassasalarida ikkinchi malaka toifasiga talabgor pedagog kadrlar attestatsiyasini oʻtkazish uchun muassasalar attestatsiya komissiyalari tuziladi.

Muassasalar attestatsiya komissiyalari tarkibi tuman (shahar) maktabgacha taʼlim boʻlimlarining buyruqlari bilan tasdiqlanadi.

Muassasalar attestatsiya komissiyalari tarkibi taʼlim muassasalari rahbari (komissiya raisi), tuman (shahar) maktabgacha taʼlim boʻlimi xodimi (komissiya raisining oʻrinbosari), kasaba uyushmasi va ota-onalar qoʻmitasi vakillari, uch nafar attestatsiyadan oʻtgan, birinchi yoki oliy toifali pedagog kadrlardan (bir nafari komissiya kotibi) iborat boʻladi.

206. Quyidagilar muassasalar attestatsiya komissiyalarining vazifalari hisoblanadi:

ikkinchi malaka toifasiga talabgor pedagog kadrlarni attestatsiyadan oʻtkazish;

ikkinchi malaka toifali pedagog kadrlarga sertifikatlar olish uchun tuman (shahar) attestatsiya komissiyasiga buyurtmanoma berish.

21. Qoraqalpogʻiston Respublikasi Xalq taʼlimi vazirligi, viloyatlar xalq taʼlimi boshqarmalarida, Toshkent shahar xalq taʼlimi bosh boshqarmasida (keyingi oʻrinlarda — xalq taʼlimi boshqarmalari) oliy malaka toifasiga talabgor pedagog kadrlar attestatsiyasini oʻtkazish uchun Xalq taʼlimi boshqarmalari attestatsiya komissiyalari tuziladi.

Xalq taʼlimi boshqarmalari attestatsiya komissiyalari tarkibi Xalq taʼlimi vazirligi, tasarrufida taʼlim muassasalari boʻlgan vazirliklar va idoralar hamda Davlat inspeksiyasining qoʻshma qarori bilan tasdiqlanadi.

Xalq taʼlimi boshqarmalari attestatsiya komissiyalari tarkibi xalq taʼlimi boshqarmalari boshligʻi (komissiya raisi), Xalq taʼlimi xodimlarini qayta tayyorlash va ularning malakasini oshirish institutlarining rahbar xodimi (komissiya raisi oʻrinbosari), Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining taʼlim sohasiga masʼul xodimi, kasaba uyushmasi vakili, uch nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

22. Quyidagilar Xalq taʼlimi boshqarmalari attestatsiya komissiyalarining vazifalari hisoblanadi:

oliy malaka toifasiga talabgor pedagog kadrlarni attestatsiyadan oʻtkazish;

tuman (shahar) va muassasalar attestatsiya komissiyalarining birinchi va ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

oliy, birinchi va ikkinchi malaka toifali pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

23. Xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarida birinchi malaka toifasiga talabgor pedagog kadrlar attestatsiyasini oʻtkazish uchun tuman (shahar) attestatsiya komissiyalari tuziladi.

Tuman (shahar) attestatsiya komissiyalari tarkibi xalq taʼlimi boshqarmalari buyrugʻi bilan tasdiqlanadi.

Tuman (shahar) attestatsiya komissiyalari tarkibi xalq taʼlimi muassasalari faoliyatini metodik taʼminlash va tashkil etish boʻlimi mudiri (komissiya raisi), Xalq taʼlimi xodimlarini qayta tayyorlash va ularning malakasini oshirish institutlarining masʼul xodimi (komissiya raisi oʻrinbosari), tuman (shahar) hokimligining taʼlim sohasiga masʼul xodimi, kasaba uyushmasi vakili, uch nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

24. Quyidagilar tuman (shahar) attestatsiya komissiyalarining vazifalari hisoblanadi:

birinchi malaka toifasiga talabgor pedagog kadrlarni attestatsiyadan oʻtkazish;

muassasalar attestatsiya komissiyalarining ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

birinchi va ikkinchi malaka toifali pedagog kadrlarga sertifikatlar olish uchun Xalq taʼlimi boshqarmalari komissiyalariga buyurtmanoma berish.

25. Taʼlim muassasalarida ikkinchi malaka toifasiga talabgor pedagog kadrlar attestatsiyasini oʻtkazish uchun muassasalar attestatsiya komissiyalari tuziladi.

Muassasalar attestatsiya komissiyalari tarkibi xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining buyruqlari bilan tasdiqlanadi.

Muassasalar attestatsiya komissiyalari tarkibi taʼlim muassasalari rahbari (komissiya raisi), xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi xodimi (komissiya raisining oʻrinbosari), kasaba uyushmasi va ota-onalar qoʻmitasi vakillari, uch nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

26. Quyidagilar muassasalar attestatsiya komissiyalarining vazifalari hisoblanadi:

ikkinchi malaka toifasiga talabgor pedagog kadrlarni attestatsiyadan oʻtkazish;

ikkinchi malaka toifali pedagog kadrlarga sertifikatlar olish uchun tuman (shahar) attestatsiya komissiyasiga buyurtmanoma berish.

27. Oʻrta maxsus, kasb-hunar taʼlimi hududiy boshqarmalarida umumtaʼlim, chuqurlashtirilgan va kasbiy taʼlim fanlari pedagog kadrlarini (ishlab chiqarish taʼlimi ustalarini) attestatsiyadan oʻtkazish uchun oʻrta maxsus, kasb-hunar taʼlimi hududiy boshqarmalari attestatsiya komissiyalari tuziladi.

Oʻrta maxsus, kasb-hunar taʼlimi hududiy boshqarmalari attestatsiya komissiyalari tarkibi Oʻrta maxsus, kasb-hunar taʼlimi markazi, tasarrufida oʻrta maxsus, kasb-hunar taʼlimi muassasalari boʻlgan vazirliklar va idoralar hamda Davlat inspeksiyasining qoʻshma qarori bilan tasdiqlanadi.

Oʻrta maxsus, kasb-hunar taʼlimi hududiy boshqarmalari attestatsiya komissiyalari tarkibi hududiy oʻrta maxsus, kasb-hunar taʼlimi boshqarmasi rahbar xodimlari (komissiya raisi), Oʻrta maxsus, kasb-hunar taʼlimi tizimi kadrlarining malakasini oshirish va ularni qayta tayyorlash institutining masʼul xodimi yoki oliy taʼlim muassasalarining sohaga masʼul prorektorlari (komissiya raisining oʻrinbosari), Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining taʼlim sohasiga masʼul xodimi, kasaba uyushmasi vakili, uch nafar attestatsiyadan oʻtgan, oliy toifali pedagog yoki bosh oʻqituvchidan (bir nafari — komissiya kotibi) iborat boʻladi.

28. Quyidagilar oʻrta maxsus, kasb-hunar taʼlimi hududiy boshqarmalari attestatsiya komissiyalarining vazifalari hisoblanadi:

ikkinchi, birinchi va oliy malaka toifalari, katta, yetakchi va bosh oʻqituvchi lavozimlariga talabgor pedagog kadrlarni attestatsiyadan oʻtkazish;

ikkinchi, birinchi va oliy malaka toifalari, katta, yetakchi va bosh oʻqituvchi lavozimidagi pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

29. Attestatsiyadan oʻtuvchi pedagog kadrlar attestatsiya komissiyalari tarkibiga kiritilmaydi.

30. Attestatsiya komissiyalari raislari va aʼzolari attestatsiya ushbu Nizom talablariga hamda attestatsiya jadvaliga muvofiq oʻtkazilishi uchun masʼul hisoblanadilar.

31. Attestatsiyadan oʻtuvchi pedagog kadrlarning malaka tavsiflarida va baholash mezonlarida belgilangan talablarni bajarganliklari haqidagi tavsiyalarni tayyorlash uchun taʼlim muassasalari rahbarlari buyrugʻi bilan ekspert guruhi tuziladi.

32. Ekspert guruhi tarkibi besh nafar aʼzodan iborat boʻladi.

Ekspert guruhi aʼzolari tarkibiga taʼlim muassasalari rahbarining oʻquv ishlari boʻyicha oʻrinbosari (maktabgacha taʼlim muassasasi metodistlari) va tajribali pedagog kadrlar kiritiladi.

33. Taʼlim muassasalari rahbarlari ekspert guruhi tomonidan tayyorlangan tavsiya va hujjatlar yigʻmajildlarini tegishli attestatsiya komissiyalariga taqdim etadi.

III. Attestatsiyadan oʻtkazish, sertifikatlar berish hamda taʼlim olganlik toʻgʻrisidagi maʼlumotlarga qoʻyilgan talablarni belgilash tartibi

34. Attestatsiya ikki bosqichda oʻtkaziladi:

birinchi bosqichda — attestatsiyadan oʻtuvchilarning oʻquv fani boʻyicha malaka sinovi natijalari, dars oʻtish mahorati va mehnati samaradorligi ekspert guruhi tomonidan oʻrganiladi hamda tegishli tavsiyalar tayyorlanadi;

ikkinchi bosqichda — attestatsiya komissiyalari tomonidan pedagog kadrlarning xorijiy tillar, kompyuter texnikasi va axborot-kommunikatsiya texnologiyalarini bilishi hamda ijtimoiy-siyosiy bilimlarini aniqlash yuzasidan suhbat oʻtkaziladi. Suhbat jarayoni videotasvirga olinadi va berilgan savollar va javoblar maxsus (sahifalangan, tikilgan va muhrlangan) daftarda qayd etiladi.

35. Attestatsiya quyidagi baholash mezonlari boʻyicha oʻtkaziladi:

a) dars oʻtish mahorati — dars tahlillari, ochiq darslar oʻtganligi, taʼlim oluvchilarining reyting koʻrsatkichlari, taʼlim berish vositalari hamda shakllarini maqbul ravishda tanlashi, tavsiya etilgan ilgʻor pedagogik uslub va texnologiyalarni (“case study” uslubi, loyihalar uslubi, hamkorlikda oʻqitish, “amaliy oʻyin”, interfaol taʼlim uslubi va boshqalar) qoʻllashlari;

b) mehnati samaradorligi — taʼlim oluvchilarning tayyorlaganligi, taʼlim oluvchilar va attestatsiyadan oʻtuvchilarning tuman, shahar, viloyat, respublika, xalqaro koʻrik-tanlovlar, fan olimpiadalari va turli musobaqalarda erishgan yutuqlari;

v) oʻquv fani boʻyicha malaka sinovlari — diplomida koʻrsatilgan tayyorlov, taʼlim yoʻnalishlari, mutaxassisligi yoki ixtisosliklari boʻyicha davlat taʼlim standartlari yoki davlat talablari mazmuni asosida oʻtkaziladigan test, yozma yoki ijodiy ish natijalari;

g) xorijiy tillar, kompyuter texnikasi va axborot-kommunikatsiya texnologiyalarini bilishi hamda ijtimoiy-siyosiy bilimlarini aniqlash yuzasidan oʻtkazilgan suhbat yakunlari.

36. Pedagog kadrlarning attestatsiya natijalarini baholash mezonlari Oʻrta maxsus, kasb-hunar taʼlimi markazi, Maktabgacha taʼlim vazirligi va Xalq taʼlimi vazirligi tomonidan Mehnat vazirligi, Davlat inspeksiyasi bilan birgalikda ishlab chiqiladi va belgilangan tartibda tasdiqlanadi.

361. Birinchi va oliy malaka toifali, yetakchi va bosh oʻqituvchi lavozimidagi hamda mazkur malaka toifalari va lavozimlarga talabgor pedagog kadrlarni attestatsiyadan oʻtkazganlik uchun eng kam oylik ish haqining 100 foizi miqdorida yigʻim undiriladi.

Attestatsiyadan oʻtkazganlik uchun yigʻim Oʻzbekiston Respublikasining Davlat budjeti daromadiga oʻtkaziladi.

Ariza beruvchi berilgan arizadan voz kechgan taqdirda hamda pedagog kadrga nisbatan “Attestatsiyadan oʻtmadi, tegishli malaka toifasi yoki lavozimi tushirilsin”, mutaxassis, oliy yoki oʻrta maxsus, kasb-hunar maʼlumotli oʻqituvchi lavozimi boʻyicha “Attestatsiyadan oʻtmadi, mutaxassis (oliy yoki oʻrta maxsus, kasb-hunar maʼlumotli oʻqituvchi) lavozimiga muvofiq emas” qarori qabul qilinganda toʻlangan yigʻim summasi qaytarilmaydi.

Pedagog kadrlar attestatsiyaning biror bosqichida uzrli sababga (mehnatga layoqatsizlik varaqasi, taʼlimni boshqarish boʻyicha maxsus vakolat berilgan davlat organi yoki taʼlim muassasalari rahbarlari maʼlumotnomasi) koʻra kelmagan boʻlsa, ularning attestatsiyasi boshqa muddatga koʻchirilgan taqdirda yigʻim summasi takroran undirilmaydi.

37. Birinchi va oliy malaka toifali, yetakchi va bosh oʻqituvchi lavozimidagi hamda mazkur malaka toifalari va lavozimlarga talabgor pedagog kadrlar uchun test materiallari mazmunini shakllantirish, nashr etish va mazkur jarayonni oʻtkazish Davlat inspeksiyasi tomonidan Maktabgacha taʼlim vazirligi, Xalq taʼlimi vazirligi, Oʻrta maxsus, kasb-hunar taʼlimi markazi bilan kelishilgan holda amalga oshiriladi.

38. Oʻquv fani boʻyicha malaka sinoviga oid yozma va ijodiy ish hamda ikkinchi malaka toifasiga va katta oʻqituvchi lavozimiga daʼvogar pedagog kadrlarning test sinovlarini oʻtkazish tasarrufida taʼlim muassasalari boʻlgan vazirliklar va idoralari bilan kelishilgan holda taʼlim turlari boʻyicha Xalq taʼlimi vazirligi yoki Oʻrta maxsus, kasb-hunar taʼlimi markazi tomonidan amalga oshiriladi.

39. Attestatsiya komissiyalari pedagog kadrlarning dars oʻtish mahorati va mehnati samaradorligi hamda oʻquv fani boʻyicha malaka sinovi natijalarini tahlil qiladi, xorijiy tillar, kompyuter texnikasi va axborot-kommunikatsiya texnologiyalarini bilishi hamda ijtimoiy-siyosiy bilimlarini aniqlash yuzasidan suhbat oʻtkazadi va tegishli qaror qabul qiladi.

40. Attestatsiya komissiyasi aʼzolarining uchdan ikki qismi ishtirok etgan yigʻilish vakolatli hisoblanadi.

41. Attestatsiya komissiyalari quyidagi qarorlardan birini qabul qiladi:

a) oliy malaka toifali yoki bosh oʻqituvchi lavozimidagi pedagog kadr baholash mezonlarining har biridan:

75 foizdan yuqori koʻrsatkichga ega boʻlsa — “Attestatsiyadan oʻtdi, oliy malaka toifasi (bosh oʻqituvchi lavozimi) saqlansin”;

75 foizdan past koʻrsatkichga ega boʻlsa — “Attestatsiyadan oʻtmadi, birinchi malaka toifasi (yetakchi oʻqituvchi lavozimi)ga tushirilsin”;

b) birinchi malaka toifali yoki yetakchi oʻqituvchi lavozimidagi pedagog kadr baholash mezonlarining har biridan:

75 foizdan yuqori koʻrsatkichga ega boʻlsa — “Attestatsiyadan oʻtdi, oliy malaka toifasi (bosh oʻqituvchi lavozimi) berilsin”;

75 foizdan 65 foizgacha koʻrsatkichga ega boʻlsa — “Attestatsiyadan oʻtdi, birinchi malaka toifasi (yetakchi oʻqituvchi lavozimi) saqlansin”;

65 foizdan kam koʻrsatkichga ega boʻlsa — “Attestatsiyadan oʻtmadi, ikkinchi malaka toifasi (katta oʻqituvchi lavozimi)ga tushirilsin”;

v) ikkinchi malaka toifali yoki katta oʻqituvchi lavozimidagi pedagog kadr baholash mezonlarining har biridan:

65 foizdan yuqori koʻrsatkichga ega boʻlsa — “Attestatsiyadan oʻtdi, birinchi malaka toifasi (yetakchi oʻqituvchi lavozimi) berilsin”;

65 foizdan 60 foizgacha koʻrsatkichga ega boʻlsa — “Attestatsiyadan oʻtdi, ikkinchi malaka toifasi (katta oʻqituvchi lavozimi) saqlansin”;

60 foizdan kam koʻrsatkichga ega boʻlsa — “Attestatsiyadan oʻtmadi, mutaxassis (oliy yoki oʻrta maxsus, kasb-hunar maʼlumotli oʻqituvchi) lavozimiga tushirilsin”;

g) mutaxassis, oliy yoki oʻrta maxsus, kasb-hunar maʼlumotli oʻqituvchi lavozimidagi pedagog kadr baholash mezonlarining har biridan:

60 foizdan yuqori koʻrsatkichga ega boʻlsa — “Attestatsiyadan oʻtdi, ikkinchi malaka toifasi (katta oʻqituvchi lavozimi) berilsin”;

60 foizdan 55 foizgacha koʻrsatkichga ega boʻlsa — “Attestatsiyadan oʻtdi, mutaxassis (oliy yoki oʻrta maxsus, kasb-hunar maʼlumotli oʻqituvchi) lavozimi saqlansin”;

55 foizdan kam koʻrsatkichga ega boʻlsa — “Attestatsiyadan oʻtmadi, mutaxassis (oliy yoki oʻrta maxsus, kasb-hunar maʼlumotli oʻqituvchi) lavozimiga muvofiq emas”.

42. Attestatsiya komissiyalari mutaxassis, oliy yoki oʻrta maxsus, kasb-hunar maʼlumotli oʻqituvchi lavozimidagi pedagog kadrlar boʻyicha “Attestatsiyadan oʻtmadi, mutaxassis (oliy yoki oʻrta maxsus, kasb-hunar maʼlumotli oʻqituvchi) lavozimiga muvofiq emas” qarorini qabul qilsa, ular navbatdan tashqari malaka oshirish kurslariga yuboriladi hamda keyingi yilda qayta attestatsiyaga jalb etiladi.

Attestatsiya komissiyalari qayta attestatsiyaga jalb etilgan pedagog kadrlar boʻyicha “Attestatsiyadan oʻtmadi, mutaxassis (oliy yoki oʻrta maxsus, kasb-hunar maʼlumotli oʻqituvchi) lavozimiga muvofiq emas” qarorini qabul qilsa, ish beruvchi tomonidan ular bilan tuzilgan mehnat shartnomasi mehnat qonunchiligida belgilangan tartibda bekor qilinadi.

43. Baholash mezonlari boʻyicha oʻrtacha koʻrsatkich chiqarilmaydi hamda baholash mezonlarining birortasi boʻyicha belgilangan koʻrsatkichdan past baholansa “attestatsiyadan oʻtmadi” degan qaror qabul qilinadi.

44. Pedagog kadrlar attestatsiyaning biror bosqichida uzrli sababga (mehnatga layoqatsizlik varaqasi, taʼlimni boshqarish boʻyicha maxsus vakolat berilgan davlat organi yoki taʼlim muassasalari rahbarlari maʼlumotnomasi) koʻra kelmagan boʻlsa, ularning attestatsiyasi boshqa muddatga koʻchiriladi.

45. Pedagog kadr uzrsiz sababga koʻra attestatsiyaning biror bosqichida ishtirok etmagan boʻlsa attestatsiyadan oʻtmagan hisoblanadi hamda unga nisbatan “Attestatsiyadan oʻtmadi, tegishli malaka toifasi yoki lavozimi tushirilsin”, mutaxassis, oliy yoki oʻrta maxsus, kasb-hunar maʼlumotli oʻqituvchi lavozimi boʻyicha “Attestatsiyadan oʻtmadi, mutaxassis (oliy yoki oʻrta maxsus, kasb-hunar maʼlumotli oʻqituvchi) lavozimiga muvofiq emas” qarori qabul qilinadi.

46. Attestatsiya komissiyalari qarori ushbu Nizomga 2-ilovaga muvofiq shaklda rasmiylashtiriladi hamda komissiya raisi, rais oʻrinbosari va kotib tomonidan imzolanadi.

47. Attestatsiya komissiyalari qarori asosida ushbu Nizomga 3-ilovaga muvofiq shakldagi attestatsiya varaqasi rasmiylashtiriladi hamda attestatsiya komissiyasi raisi, rais oʻrinbosari, yigʻilishda ishtirok etgan aʼzolar va kotib tomonidan imzolanadi.

Attestatsiya varaqasi ikki nusxada toʻldiriladi va bir nusxasi pedagog kadrlarning ish joyidagi shaxsiy hujjatlari yigʻmajildida, ikkinchi nusxasi attestatsiya komissiyasida saqlanadi.

48. Pedagog kadrlarning attestatsiyasiga oid hujjatlarining toʻplangan yigʻmajildi navbatdagi attestatsiyagacha taʼlim muassasasida saqlanadi.

49. Attestatsiya komissiyalarining qaroriga koʻra oliy, birinchi, ikkinchi malaka toifasiga yoki bosh, yetakchi, katta oʻqituvchi lavozimiga ega boʻlgan pedagog kadrlarga ushbu Nizomga 4-ilovaga muvofiq shakldagi pedagog kadrning attestatsiyadan oʻtganligi toʻgʻrisidagi sertifikat (keyingi oʻrinlarda — sertifikat) attestatsiya oʻtkazilgandan soʻng bir oy muddat ichida topshiriladi.

Sertifikatlarning xatosiz toʻldirilishi uchun attestatsiya komissiyasi raislari masʼul hisoblanadi.

50. Sertifikat qatʼiy hisobda turadigan hujjat hisoblanib, unda hisob seriyasi, raqami va himoya darajasi boʻladi. Sertifikat blankalari Davlat inspeksiyasi buyurtmasi boʻyicha Oʻzbekiston Respublikasi Markaziy banki huzuridagi “Davlat belgisi” davlat-ishlab chiqarish birlashmasi bosmaxonasida tayyorlanadi.

51. Davlat inspeksiyasi boshligʻi, maktabgacha taʼlim boshqarmalari, xalq taʼlimi boshqarmalari va hududiy oʻrta maxsus, kasb-hunar taʼlimi boshqarmalari boshliqlari, tuman (shahar) maktabgacha taʼlim boʻlimi mudirlari, xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi mudirlari va taʼlim muassasalari rahbarlari sertifikatlarning hisobi, saqlanishi hamda maqsadli ishlatilishi yuzasidan shaxsan javobgar hisoblanadi.

52. Attestatsiya komissiyalari sertifikatlarning pedagog kadrlarga tarqatilishini roʻyxatga olish uchun maxsus daftar (sahifalangan, tikilgan va muhrlangan) yuritadi va unda quyidagilarni qayd etadi:

tartib raqami;

pedagog kadrlarning familiyasi, ismi, otasining ismi;

sertifikatning tartib raqami, seriyasi;

sertifikat berilishiga asos boʻlgan komissiya qarorining sanasi va tartib raqami;

sertifikatni bergan komissiyaning nomi;

sertifikatning amal qilish muddati;

sertifikat nusxasi (dublikati)ning berilishi asosi va sanasi.

53. Pedagog kadrlarning bazaviy tarif stavkalari miqdori, ularning malaka toifasi yoki lavozimi sertifikat asosida belgilanadi.

54. Sertifikatning amal qilish muddati tugagan pedagog kadrlarga mutaxassis, oliy yoki oʻrta maxsus, kasb-hunar maʼlumotli oʻqituvchi lavozimi boʻyicha haq toʻlanadi.

55. Sertifikatning amal qilish muddati tugab, mutaxassis, oliy yoki oʻrta maxsus, kasb-hunar maʼlumotli oʻqituvchi lavozimi boʻyicha haq toʻlanayotgan pedagog kadrlar navbatdagi attestatsiyaga oxirgi sertifikatida koʻrsatilgan malaka toifasi yoki lavozimi boʻyicha jalb qilinadi.

56. Davlat inspeksiyasi Maktabgacha taʼlim vazirligi, Xalq taʼlimi vazirligi va Oʻrta maxsus, kasb-hunar taʼlimi markazi bilan kelishgan holda sertifikatlarni hisobga olish, saqlash va topshirish tartibini belgilaydi.

57. Attestatsiyadan oʻtganligi toʻgʻrisida sertifikatga ega boʻlmagan ishga yangi qabul qilingan pedagog kadrlarga yoxud oliy yoki oʻrta maxsus, kasb-hunar taʼlimi muassasalarini bitirib birinchi bor ishga kirgan pedagog kadrlarga quyidagi tartibda malaka toifasi (lavozimi) beriladi:

oʻrta maxsus, kasb-hunar maʼlumotli pedagog kadrlarga — oʻrta maxsus, kasb-hunar maʼlumotli oʻqituvchi lavozimi;

bakalavr darajasiga — mutaxassis yoki oliy maʼlumotli oʻqituvchi lavozimi;

magistr darajasiga ega mutaxassislarga, shuningdek oliy maʼlumot darajasi boʻyicha akademik darajalar joriy etilgunga qadar olingan oliy maʼlumotli pedagog kadrlarga — ikkinchi malaka toifasi yoki katta oʻqituvchi lavozimi (ushbu malaka toifasi yoki lavozimi attestatsiya natijasiga koʻra oʻzgarishi mumkin);

fan nomzodi yoki fan doktori ilmiy darajasiga ega boʻlgan pedagog kadrlarga — oliy malaka toifasi yoki bosh oʻqituvchi lavozimi (mazkur malaka toifasi yoki lavozimi attestatsiya natijasiga koʻra oʻzgarishi mumkin).

IV. Attestatsiya natijalari yuzasidan murojaat qilish tartibi

58. Attestatsiya komissiyalari qaroridan norozi boʻlgan pedagog kadrlar attestatsiya natijalari eʼlon qilingan kundan boshlab oʻn kun mobaynida apellatsiya komissiyasiga yozma ravishda ariza (shikoyat) berishlari mumkin.

59. Apellatsiya komissiyasi attestatsiya boshlangandan keyin uch kun ichida pedagog kadrlarning arizalarini koʻrib chiqish uchun tegishliligiga koʻra, Maktabgacha taʼlim vazirligi, Xalq taʼlimi vazirligi, Oʻrta maxsus, kasb-hunar taʼlimi markazining buyrugʻi bilan besh kishidan iborat tarkibda xalq taʼlimi boshqarmalarida va oʻrta maxsus, kasb-hunar taʼlimi hududiy boshqarmalarida tashkil etiladi.

Apellatsiya komissiyasi tarkibi Xalq taʼlimi xodimlarini qayta tayyorlash va ularning malakasini oshirish hududiy instituti yoki Oʻrta maxsus, kasb-hunar taʼlimi tizimi kadrlarining malakasini oshirish va ularni qayta tayyorlash institutining rahbar xodimi, kasaba uyushmasi vakili, uch nafar attestatsiyadan oʻtgan, oliy toifali (bosh oʻqituvchi) pedagog kadrlardan (bir nafari — komissiya kotibi) iborat boʻladi.

60. Apellatsiya komissiyasining ish tartibi apellatsiya komissiyasini tashkil etish toʻgʻrisidagi buyruqda belgilanadi.

61. Apellatsiya komissiyasi tarkibiga attestatsiya komissiyalari tarkibidan aʼzo kiritilmaydi.

62. Apellatsiya komissiyasi muammoli holatlarga aniqlik kiritish maqsadida jamoatchilik asosida malakali mutaxassislarni jalb etishi mumkin.

63. Apellatsiya komissiyasi yigʻilishida komissiya aʼzolarining uchdan ikki qismi ishtirok etsa, uning qabul qilgan qarori qonuniy kuchga ega boʻladi.

64. Ariza (shikoyat) roʻyxatga olingan kundan boshlab oʻn besh kun muddatda koʻrib chiqiladi.

65. Murojaat etuvchi pedagog kadrlar apellatsiya komissiyasi tomonidan arizasi (shikoyati) koʻrib chiqilishi jarayonida ishtirok etishi mumkin.

66. Apellatsiya komissiyasi attestatsiya komissiyasi qarorini oʻzgartirishsiz qoldirish yoki uni bekor qilib, qayta attestatsiya tashkil etish haqida qaror chiqaradi.

67. Apellatsiya komissiyasi qarori nusxasi murojaat etuvchi pedagog kadrga va tegishli attestatsiya komissiyasiga apellatsiya komissiyasi qarori chiqqan kundan eʼtiboran besh kun muddatda taqdim etiladi.

V. Yakunlovchi qoidalar

68. Attestatsiya komissiyasi yoki apellatsiya komissiyasi qarori yuzasidan qonun hujjatlarida belgilangan tartibda sudga shikoyat qilinishi mumkin.

69. Ushbu Nizom talablarining buzilishida aybdor boʻlgan shaxslar qonun hujjatlariga muvofiq javob beradilar.

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomga 1-ILOVA

Pedagog kadrlarning attestatsiyasini tashkil etish va oʻtkazish

SXEMASI

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomga 2-ILOVA

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisida nizomga 3-ILOVA

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisida nizomga 4-ILOVA

(Oʻzbekiston Respublikasi qonun hujjatlari toʻplami, 2016-y., 15-son, 146-modda; 2017-y., 29-son, 698-modda; Qonun hujjatlari maʼlumotlari milliy bazasi, 09.01.2018-y., 09/18/10/0533-son, 25.08.2018-y., 09/18/680/1791-son)