Qurilish sohasidagi huquqbuzarliklar uchun yuridik shaxslarga solinadigan jarimalarni undirish tartibini tasdiqlash haqida (106-son)

02.03.2001

Oʻzbekiston Respublikasi Vazirlar Mahkamasining

qarori

“Qurilish sohasidagi huquqbuzarliklar uchun yuridik shaxslarning javobgarligi toʻgʻrisida”gi Oʻzbekiston Respublikasi Qonunini roʻyobga chiqarish maqsadida Vazirlar Mahkamasi qaror qiladi:

1. Qurilish sohasidagi huquqbuzarliklar uchun yuridik shaxslarga solinadigan jarimalarni undirish tartibi ilovaga muvofiq tasdiqlansin.

2. Oʻzbekiston Respublikasi Vazirlar Mahkamasining “Qurilish sohasidagi qonun buzishlar uchun moliyaviy sanksiyalar toʻgʻrisida” 1995-yil 25-noyabrdagi 443-son qarori (Oʻzbekiston Respublikasi QT, 1995-y., 11-son, 46-modda) oʻz kuchini yoʻqotgan deb hisoblansin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N.Isayev zimmasiga yuklansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2001-yil 2-mart,

106-son

Vazirlar Mahkamasining 2001-yil 2-martdagi 106-son qaroriga ILOVA

QURILISh SOHASIDAGI HUQUQBUZARLIKLAR UChUN YuRIDIK ShAXSLARGA SOLINADIGAN JARIMALARNI UNDIRISh

TARTIBI

1. Mazkur Tartib “Qurilish sohasidagi huquqbuzarliklar uchun yuridik shaxslarning javobgarligi toʻgʻrisida”gi Oʻzbekiston Respublikasi Qonuniga muvofiq yuridik shaxslarga solinadigan jarimalarni undirish mexanizmini belgilaydi.

2. Qurilish sohasidagi huquqbuzarliklar uchun jarimalar Davlat arxitektura-qurilish nazorati organlarining “Qurilish sohasidagi huquqbuzarliklar uchun yuridik shaxslarning javobgarligi toʻgʻrisida”gi Oʻzbekiston Respublikasi Qonunining 8-bandida koʻrsatib oʻtilgan mansabdor shaxslari tomonidan maʼmuriy tartibda solinadi.

3. Jarimalar jarima solish toʻgʻrisidagi qaror qabul qilingan kundan boshlab kechi bilan oʻn besh kunda yuridik shaxslar tomonidan toʻlanadi.

Jarima solish toʻgʻrisidagi qaror uni qabul qilingan organ (yuridik shaxs) tomonidan bajarishga kirishiladi.

4. Jarima solish toʻgʻrisidagi qarorni tezlik bilan bajarish mumkin boʻlmagan holatlar mavjud boʻlganda uni qabul qilgan mansabdor shaxs, bu haqda tegishli yuridik shaxsni yozma ravishda xabardor qilgan holda, qarorning bajarilishini bir oy muddatgacha uzaytirishi mumkin.

5. Jarima solish toʻgʻrisidagi qaror ustidan shikoyat qilinganda yoki norozi boʻlinganda shikoyat yoki norozilik qoniqarsiz qoldirilgandan soʻng u belgilangan tartibda bajarilishi kerak. Bunday hollarda jarima shikoyat va norozilik qoniqarsiz qoldirilganligi toʻgʻrisida xabardor qilingan kundan boshlab kechi bilan oʻn besh kunda toʻlanishi kerak.

6. Jarima yuridik shaxslar tomonidan pul oʻtkazish yoʻli bilan toʻlanadi, ular quyidagi tartibda taqsimlanadi:

jarimalarning 60 foizi respublika budjetiga;

30 foizi — mahalliy budjetga;

10 foizi — Oʻzbekiston Respublikasi Davlat arxitektura va qurilish qoʻmitasi, Davlat arxitektura-qurilish nazorati bosh boshqarmasi va uning tasarrufidagi organlarning moddiy-texnika negizini rivojlantirish uchun Oʻzbekiston Respublikasi Davlat arxitektura va qurilish qoʻmitasiga yoʻnaltiriladi.

7. Jarima muddatida toʻlanmagan taqdirda u aybdor yuridik shaxslardan jarima solish toʻgʻrisidagi qarorga asosan soʻzsiz undirib olinadi.