Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalarini tasdiqlash haqida (2772-son)

30.03.2016

Oʻzbekiston Respublikasi Moliya vazirining

buyrugʻi

[Oʻzbekiston Respublikasi Adliya vazirligi tomonidan 2016-yil 30-martda 2772-son bilan davlat roʻyxatidan oʻtkazilgan]

Oʻzbekiston Respublikasining Budjet kodeksi, Oʻzbekiston Respublikasi Prezidentining 2007-yil 28-fevraldagi PQ-594-son “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida”gi, 2008-yil 29-dekabrdagi PQ-1024-son “Oʻzbekiston Respublikasining 2009-yilgi asosiy makroiqtisodiy koʻrsatkichlari va davlat budjeti parametrlari toʻgʻrisida”gi, 2010-yil 15-martdagi PQ-1302-son “Oʻzbekiston Respublikasi Xalq taʼlimi vazirligi huzuridagi Bolalar sportini rivojlantirish jamgʻarmasi budjetini hamda 2010-yilda bolalar sporti obyektlari, suzish havzalari va bolalar musiqa hamda sanʼat maktablarini qurish, rekonstruksiya qilish va kapital taʼmirlashning manzilli dasturlarini tasdiqlash toʻgʻrisida”gi qarorlari va Oʻzbekiston Respublikasi Vazirlar Mahkamasining 2007-yil 20-martdagi 53-son “Oʻzbekiston Respublikasi Moliya vazirligining Gʻaznachiligi toʻgʻrisidagi nizomni tasdiqlash haqida”gi qaroriga muvofiq buyuraman:

1. Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalari ilovaga muvofiq tasdiqlansin.

2. Oʻzbekiston Respublikasi moliya vazirining 2012-yil 17-dekabrdagi 86-son “Oʻzbekiston Respublikasi Moliya vazirligi va uning hududiy boʻlinmalarida budjetdan mablagʻ oluvchilarning shaxsiy gʻazna hisobvaraqlarini ochish, yopish va yuritish qoidalarini tasdiqlash toʻgʻrisida”gi buyrugʻi (roʻyxat raqami 2414, 2013-yil 18-yanvar) (Oʻzbekiston Respublikasi qonun hujjatlari toʻplami, 2013-y., 3-son, 42-modda) oʻz kuchini yoʻqotgan deb topilsin.

3. Mazkur buyruq rasmiy eʼlon qilingan kundan eʼtiboran kuchga kiradi.

Vazir R. AZIMOV

Toshkent sh.,

2016-yil 24-mart,

21-son

Oʻzbekiston Respublikasi moliya vazirining 2016-yil 24-martdagi 21-sonli buyrugʻiga ILOVA

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish

QOIDALARI

Mazkur Qoidalar Oʻzbekiston Respublikasi Iqtisodiyot va moliya vazirligining (bundan buyon matnda Iqtisodiyot va moliya vazirligi deb yuritiladi) axborot tizimida (bundan buyon matnda “OʻRIMV” AT deb yuritiladi) shaxsiy gʻazna hisobvaraqlarini yuritish tartibini belgilaydi.

1-bob. Umumiy qoidalar

1. Budjet tizimi budjetlarining hamda boshqa maqsadli jamgʻarmalar budjetlarining daromadlari va xarajatlari hisobi boʻyicha operatsiyalarni yuritish maqsadida budjet tizimi budjetlarining tegishli darajalari, budjet tashkilotlari, budjet mablagʻlari oluvchilar, boshqa maqsadli jamgʻarmalar budjetlaridan mablagʻ oluvchilar uchun iqtisodiyot va moliya organlari hamda davlat maqsadli jamgʻarmalari (bundan buyon matnda DMJ deb yuritiladi) va boshqa maqsadli jamgʻarmalarni taqsimlovchi organlar tomonidan, shuningdek, budjet tashkilotlari va DMJning chet el valyutasidagi mablagʻlari uchun Iqtisodiyot va moliya vazirligi huzuridagi Gʻaznachilik xizmati qoʻmitasi (bundan buyon matnda Gʻaznachilik xizmati qoʻmitasi deb yuritiladi) va uning hududiy boshqarmalari tomonidan “OʻRIMV” ATda Oʻzbekiston Respublikasining Davlat budjeti budjet tasnifining tegishli kodlari boʻyicha shaxsiy gʻazna hisobvaraqlari ochiladi.

2. Mazkur Qoidalarda quyidagi asosiy tushunchalar qoʻllaniladi:

boshqa maqsadli jamgʻarmalar (bundan buyon matnda BMJ deb yuritiladi) — mablagʻlari qonunchilikda nazarda tutilgan manbalar hisobidan shakllantiriladigan, muayyan sohalarni moliyalashtirish uchun qonunchilik hujjatlari bilan tashkil etiladigan, davlat maqsadli jamgʻarmalari va budjet tashkilotlarining budjetdan tashqari jamgʻarmalariga kirmaydigan jamgʻarmalar;

xarajatlarni toʻlash uchun ruxsatnoma (bundan buyon matnda XTR deb yuritiladi) — budjet tashkilotiga yoki budjet mablagʻlari oluvchiga Gʻaznachilik xizmati qoʻmitasi, uning hududiy boshqarmalari va tuman (shahar) boʻlimlari (bundan buyon matnda gʻaznachilik xizmati boʻlinmalari deb yuritiladi) tomonidan beriladigan, XTRda koʻrsatilgan vaqt davridan boshlab budjet tashkiloti yoki budjet mablagʻlari oluvchi uning doirasida moliyaviy majburiyatlar qabul qila oladigan va kassa xarajatlarini amalga oshira oladigan budjetdan ajratilgan mablagʻlar summasini aks ettiruvchi hujjat;

“OʻRIMV” AT — tegishli budjetlarning budjet jarayonini kompleks avtomatlashtirish, shu jumladan budjet tizimi budjetlari va BMJ budjetlari ijrosi bilan bogʻliq operatsiyalarni aks ettirish uchun moʻljallangan axborot tizimi;

“UzASBO” DM — budjet tashkilotlari tomonidan budjet hisobi va hisobotining yuritilishini kompleks avtomatlashtirish uchun moʻljallangan dasturiy majmua.

2-bob. Shaxsiy gʻazna hisobvaraqlari

1-§. Shaxsiy gʻazna hisobvaraqlarining turlari

3. Shaxsiy gʻazna hisobvaraqlari quyidagi turlarga boʻlinadi:

budjet tizimi budjetlari va BMJ budjetlari darajalari boʻyicha shaxsiy gʻazna hisobvaraqlari (bundan buyon matnda darajalar boʻyicha shaxsiy gʻazna hisobvaraqlari deb yuritiladi);

Oʻzbekiston Respublikasining Davlat budjeti, DMJ va BMJ daromadlari boʻyicha shaxsiy gʻazna hisobvaraqlari (bundan buyon matnda daromadlar boʻyicha shaxsiy gʻazna hisobvaraqlari deb yuritiladi);

budjet tashkilotlari, budjet mablagʻlari oluvchilar, BMJ budjetidan mablagʻ oluvchilarning shaxsiy gʻazna hisobvaraqlari (bundan buyon matnda xarajatlar boʻyicha shaxsiy gʻazna hisobvaraqlari deb yuritiladi).

2-§. Darajalar boʻyicha shaxsiy gʻazna hisobvaraqlari

4. Darajalar boʻyicha shaxsiy gʻazna hisobvaraqlari budjet tizimi budjetlarining tegishli darajalari va turlarining tasdiqlangan budjet mablagʻlari hajmlari boʻyicha maʼlumotlarni, turli darajadagi budjet tizimi budjetlari oʻrtasida taqsimlangan oʻzaro hisob-kitob mablagʻlari boʻyicha operatsiyalarni, budjet tizimi budjetlari va BMJ budjetlarining gʻazna ijrosi jarayonida budjet tizimi tegishli budjetlarining kassa daromadlari va xarajatlari summalari hajmini oʻzida aks ettirishga moʻljallangan analitik hisob registrlari hisoblanadi.

5. Darajalar boʻyicha shaxsiy gʻazna hisobvaragʻi raqami oʻn yetti razryaddan iborat:

1 dan 6 gacha boʻlgan razryadlar — tasdiqlangan Budjet tizimi budjetlari mablagʻlarining manbalari va darajalari tasnifiga muvofiq mablagʻlar manbasi va tegishli budjetlar darajalari kodi;

7 dan 9 gacha boʻlgan razryadlar — tasdiqlangan Valyutalar tasnifiga muvofiq valyuta kodi;

10 dan 14 gacha boʻlgan razryadlar — tasdiqlangan Hududiy tasnifga muvofiq hududiy tegishlilik kodi;

15 dan 17 gacha boʻlgan razryadlar — “OʻRIMV” ATda avtomatik tarzda beriladigan shaxsiy gʻazna hisobvaragʻining noyob raqami.

3-§. Daromadlar boʻyicha shaxsiy gʻazna hisobvaraqlari

6. Daromadlar boʻyicha shaxsiy gʻazna hisobvaraqlari budjet tizimi tegishli budjetlarining tasdiqlangan daromadlari miqdori boʻyicha maʼlumotlarni, budjet tizimi budjetlari va BMJ budjetlari daromadlarining gʻazna ijrosi jarayonida daromadlarning kassa tushumlari hajmini va tegishli budjetlarga va budjetlardan daromadlar turlari va manbalari boʻyicha qaytarish (hisobga olish) summalarini oʻzida aks ettirishga moʻljallangan analitik hisob registrlari hisoblanadi.

7. Daromadlar boʻyicha shaxsiy gʻazna hisobvaraqlari kelib tushayotgan daromadlarning tegishli budjetlarga mablagʻlar kirimi amalga oshirilgan tegishli hududga mansubligini aniqlaydi.

8. Daromadlar boʻyicha shaxsiy gʻazna hisobvaragʻi raqami yigirma besh razryaddan iborat:

1 dan 6 gacha boʻlgan razryadlar — tasdiqlangan Budjet tizimi budjetlari mablagʻlarining manbalari va darajalari tasnifiga muvofiq mablagʻlar manbasi va tegishli budjetlar darajalari kodi;

7 dan 9 gacha boʻlgan razryadlar — tasdiqlangan Valyutalar tasnifiga muvofiq valyuta kodi;

10-razryad — nazorat kaliti;

11 dan 15 gacha boʻlgan razryadlar — tasdiqlangan Hududiy tasnifga muvofiq hududiy tegishlilik kodi;

16 dan 22 gacha boʻlgan razryadlar — daromad turi;

23 dan 25 gacha boʻlgan razryadlar — Tashkiliy tasnifning tegishli kodi.

4-§. Xarajatlar boʻyicha shaxsiy gʻazna hisobvaraqlari

9. Xarajatlar boʻyicha shaxsiy gʻazna hisobvaraqlari tasdiqlangan (aniqlangan) rejali budjetdan ajratiladigan mablagʻlarni, roʻyxatdan oʻtkazilgan yuridik va moliyaviy majburiyatlarni, XTRlarni, amalga oshirilgan kassa xarajatlarini oʻzida aks ettirishga moʻljallangan analitik hisob registrlari hisoblanadi.

10. Xarajatlar boʻyicha shaxsiy gʻazna hisobvaraqlari raqami yigirma yetti razryaddan iborat:

1 dan 6 gacha boʻlgan razryadlar — tasdiqlangan Budjet tizimi budjetlari mablagʻlarining manbalari va darajalari tasnifiga muvofiq mablagʻlar manbasi va tegishli budjetlar darajalari kodi;

7 dan 9 gacha boʻlgan razryadlar — tasdiqlangan Valyutalar tasnifiga muvofiq valyuta kodi;

10 dan 14 gacha boʻlgan razryadlar — tasdiqlangan Hududiy tasnifga muvofiq hududiy tegishlilik kodi;

15 dan 21 gacha boʻlgan razryadlar — Vazifa jihatdan tasnifining tegishli kodi;

22 dan 24 gacha boʻlgan razryadlar — Tashkiliy tasnifning tegishli kodi;

25 dan 27 gacha boʻlgan razryadlar — “OʻRIMV” ATda avtomatik tarzda beriladigan shaxsiy gʻazna hisobvaragʻining noyob raqami.

11. Xarajatlar boʻyicha shaxsiy gʻazna hisobvaraqlari ikki turga boʻlinadi: budjet va budjetdan tashqari.

12. Xarajatlar boʻyicha budjet shaxsiy gʻazna hisobvaraqlarida quyidagilarning hisobi olib boriladi:

ularning faoliyatini yuritishni taʼminlash va markazlashgan tadbirlarini amalga oshirish uchun xarajatlar smetasida nazarda tutilgan rejali budjetdan ajratiladigan mablagʻlar va BMJ mablagʻlari;

yuridik shaxs maqomiga ega boʻlmagan quyi tashkilotlar uchun nazarda tutilgan rejali budjetdan ajratiladigan mablagʻlar;

kapital qurilish obyektlari boʻyicha xarajatlarning oylik yoyilmasida nazarda tutilgan rejali budjetdan ajratiladigan mablagʻlar va DMJ mablagʻlari;

Oʻzbekiston Respublikasi Vazirlar Mahkamasi Zaxira jamgʻarmasi, Qoraqalpogʻiston Respublikasi respublika budjetining, viloyatlar viloyat budjetlarining va Toshkent shahri shahar budjetining zaxira jamgʻarmalari mablagʻlari boʻyicha xarajatlar smetasida nazarda tutilgan mablagʻlar;

yuridik va moliyaviy majburiyatlar;

XTR;

kassa xarajatlari.

13. Xarajatlar boʻyicha budjetdan tashqari shaxsiy gʻazna hisobvaraqlarida quyidagilarning hisobi olib boriladi:

budjet tashkilotlari, budjet mablagʻlari oluvchilari va BMJ budjetidan mablagʻ oluvchilarning tegishli smetalarida nazarda tutilgan rejali budjetdan tashqari mablagʻlari, budjetdan tashqari mablagʻlarning tushumi va sarflanish yoʻnalishlari chegaralanmagan turlari bundan mustasno;

kelib tushayotgan budjetdan tashqari mablagʻlar;

yuridik va moliyaviy majburiyatlar;

kassa xarajatlari;

budjet tashkilotlari va DMJning chet el valyutasidagi tushumlari va xarajatlari.

3-bob. Shaxsiy gʻazna hisobvaraqlarini ochish, yuritish va yopish

1-§. Darajalar boʻyicha shaxsiy gʻazna hisobvaraqlarini ochish, yuritish va yopish

14. Darajalar boʻyicha shaxsiy gʻazna hisobvaraqlarini ochish va yopish “OʻRIMV” ATda quyidagicha amalga oshiriladi:

Oʻzbekiston Respublikasi respublika budjeti boʻyicha — Iqtisodiyot va moliya vazirligi tomonidan;

Qoraqalpogʻiston Respublikasi respublika budjeti, viloyatlar viloyat budjetlari va Toshkent shahri shahar budjeti boʻyicha — tegishlicha Qoraqalpogʻiston Respublikasi Iqtisodiyot va moliya vazirligi, viloyatlar va Toshkent shahar iqtisodiyot va moliya bosh boshqarmalari tomonidan;

tumanlar va shaharlar budjetlari boʻyicha — tumanlar va shaharlar iqtisodiyot va moliya boʻlimlari tomonidan;

DMJ budjetlari boʻyicha — DMJ taqsimlovchi organlar tomonidan;

BMJ budjetlari boʻyicha — BMJ taqsimlovchi organlar tomonidan.

15. Darajalar boʻyicha shaxsiy gʻazna hisobvaraqlari ochilganidan yoki oʻzgartirilganidan soʻng hududiy iqtisodiyot va moliya organlari hamda DMJ va BMJ taqsimlovchi organlar bu haqda gʻaznachilik xizmati boʻlinmalari, soliq xizmati organlari va bojxona organlariga xabar beradilar.

16. Darajalar boʻyicha shaxsiy gʻazna hisobvaraqlarida tegishli budjetlarning darajalari va turlarining tasdiqlangan budjet mablagʻlari hajmlari, turli darajadagi budjet tizimi budjetlari oʻrtasida taqsimlangan oʻzaro hisob-kitob mablagʻlari boʻyicha operatsiyalar, budjet tizimi budjetlari va BMJ budjetlarining gʻazna ijrosi jarayonida tegishli budjetlarning kassa daromadlari va xarajatlari summalarining hajmi boʻyicha maʼlumotlar hisobi yuritiladi.

17. Darajalar boʻyicha shaxsiy gʻazna hisobvaraqlarining yopilishi tegishli budjetga mansub boʻlgan hudud qayta tashkil etilgan yoki tugatilgan (birlashtirilgan) hollarda amalga oshiriladi. Boshqa hollarda, darajalar boʻyicha shaxsiy gʻazna hisobvaraqlari yopilmaydi.

18. Ochilgan va yopilgan darajalar boʻyicha shaxsiy gʻazna hisobvaraqlari toʻgʻrisidagi maʼlumotlar hisobi “OʻRIMV” ATda Darajalar boʻyicha shaxsiy gʻazna hisobvaraqlarni roʻyxatdan oʻtkazish kitobida elektron koʻrinishda mazkur Qoidalarning 1-ilovasiga muvofiq shaklda yuritiladi.

2-§. Daromadlar boʻyicha shaxsiy gʻazna hisobvaraqlarini ochish, yuritish va yopish

19. Daromadlar boʻyicha shaxsiy gʻazna hisobvaraqlarining ochilishi va yopilishi Iqtisodiyot va moliya vazirligi tomonidan “OʻRIMV” ATda amalga oshiriladi.

20. Daromadlar boʻyicha shaxsiy gʻazna hisobvaraqlari tegishli yuridik va jismoniy shaxslar tomonidan tegishli hududda toʻlanadigan, budjet tasnifiga muvofiq har bir soliqlar, yigʻimlar, maʼmuriy jarimalar va moliyaviy sanksiyalar (bundan buyon matnda toʻlovlar deb yuritiladi) boʻyicha har bir budjet uchun ochiladi.

21. Daromadlar boʻyicha shaxsiy gʻazna hisobvaraqlari ochilgandan yoki oʻzgartirilgandan soʻng Iqtisodiyot va moliya vazirligi bu haqda tegishli hududiy iqtisodiyot va moliya organlari, gʻaznachilik xizmati boʻlinmalari, DMJ va BMJ taqsimlovchi organlari, Oʻzbekiston Respublikasi Markaziy banki, shuningdek toʻlovlarni undiruvchi vakolatli organlarga xabar beradi.

22. Toʻlovlarni undiruvchi vakolatli organlar toʻlovchilarga daromadlar boʻyicha shaxsiy gʻazna hisobvaraqlari toʻgʻrisidagi maʼlumotni yetkazadilar.

23. Oʻzbekiston Respublikasi Markaziy banki toʻlovchilarning hisob raqamlari ochilgan barcha tijorat banklariga daromadlar boʻyicha shaxsiy gʻazna hisobvaraqlari toʻgʻrisidagi maʼlumotni yetkazadi.

24. Daromadlar boʻyicha shaxsiy gʻazna hisobvaraqlarida tegishli budjetlar daromadlarining tasdiqlangan rejaviy hajmi, haqiqiy tushumlar hajmlari, Oʻzbekiston Respublikasi Davlat budjeti, DMJ va BMJ budjetlari daromadlarining gʻazna ijrosi jarayonida darajalar boʻyicha shaxsiy gʻazna hisobvaraqlariga amalga oshirilgan ajratmalar (taqsimotlar) hamda tegishli budjetlarga yoki tegishli budjetlardan daromadlar turlari va manbasi boʻyicha qaytarilgan (hisobga olingan) summalar toʻgʻrisidagi maʼlumotlar hisobi yuritiladi.

25. Daromadlar boʻyicha shaxsiy gʻazna hisobvaraqlarining yopilishi tegishli budjetga oʻtkazilishi lozim boʻlgan toʻlov turi bekor qilingan hollarda amalga oshiriladi.

26. Ochilgan va yopilgan daromadlar boʻyicha shaxsiy gʻazna hisobvaraqlari toʻgʻrisidagi maʼlumotlar hisobi “OʻRIMV” ATda Daromadlar boʻyicha shaxsiy gʻazna hisobvaraqlarni roʻyxatdan oʻtkazish kitobida elektron koʻrinishda mazkur Qoidalarning 2-ilovasiga muvofiq shaklda yuritiladi.

3-§. Xarajatlar boʻyicha shaxsiy gʻazna hisobvaraqlarini ochish, yuritish va yopish

27. Xarajatlar boʻyicha shaxsiy gʻazna hisobvaraqlari ularning belgilangan maqsadiga koʻra mazkur Qoidalarning 3-ilovasiga muvofiq tegishli turlar boʻyicha:

Oʻzbekiston Respublikasi respublika budjetidan moliyalashtiriladigan tashkilotlar boʻyicha — Iqtisodiyot va moliya vazirligi tomonidan;

Qoraqalpogʻiston Respublikasi respublika budjeti, viloyatlar viloyat budjetlari va Toshkent shahri shahar budjetidan moliyalashtiriladigan tashkilotlar boʻyicha — tegishlicha Qoraqalpogʻiston Respublikasi Iqtisodiyot va moliya vazirligi, viloyatlar va Toshkent shahar iqtisodiyot va moliya bosh boshqarmalari tomonidan;

tumanlar va shaharlar budjetlaridan moliyalashtiriladigan tashkilotlar boʻyicha — tumanlar va shaharlar iqtisodiyot va moliya boʻlimlari tomonidan;

DMJ budjetlaridan moliyalashtiriladigan tashkilotlar boʻyicha — DMJ taqsimlovchi organlar tomonidan;

BMJ budjetlaridan moliyalashtiriladigan tashkilotlar boʻyicha — BMJ taqsimlovchi organlar tomonidan;

budjet tashkilotlari va DMJning chet el valyutasidagi xarajatlari boʻyicha — Gʻaznachilik xizmati qoʻmitasi va uning hududiy boshqarmalari tomonidan ochiladi.

28. Xarajatlar boʻyicha budjet shaxsiy gʻazna hisobvaraqlari quyidagilarga asosan ochiladi:

mazkur Qoidalarning 4-ilovasiga muvofiq shakldagi shaxsiy gʻazna hisobvaragʻi ochish uchun ariza. Bunda, agar budjet tashkiloti bir vaqtning oʻzida yuridik shaxs maqomiga ega boʻlmagan, quyi budjet tashkilotining budjet mablagʻlarini taqsimlovchisi boʻlsa, tegishli shaxsiy gʻazna hisobvaraqlari ochish uchun shaxsiy gʻazna hisobvaragʻi ochish toʻgʻrisidagi arizaga mazkur Qoidalarning 5-ilovasiga muvofiq shaklda xizmat koʻrsatiladigan quyi budjet tashkilotlarining roʻyxati ilova qilinadi;

xarajatlar smetasi. Bunda, yuridik shaxs maqomiga ega boʻlmagan quyi budjet tashkilotlarining xarajatlariga xizmat koʻrsatish va hisobini yuritishni amalga oshiradigan budjet tashkilotlari uchun oʻz xarajatlari hisobini yuritish uchun (xarajatlar smetasi asosida) alohida shaxsiy gʻazna hisobvaraqlari va xizmat koʻrsatiladigan quyi budjet tashkilotlarining xarajatlari hisobini yuritish uchun (jamlanma xarajatlar smetalari asosida) budjet tasnifining har bir kichik boʻlimi boʻyicha alohida shaxsiy gʻazna hisobvaraqlari ochiladi;

kapital qurilish buyurtmachilari uchun — kapital qurilish obyektlari boʻyicha xarajatlarning oylik yoyilmasi, qurilishlarning manzilli roʻyxati, loyiha-tadqiqot ishlarining manzilli roʻyxati, qurilishlarning titul roʻyxati.

29. Oʻzbekiston Respublikasi Vazirlar Mahkamasi Zaxira jamgʻarmasi, Qoraqalpogʻiston Respublikasi respublika budjetining, viloyatlar viloyat budjetlarining va Toshkent shahri shahar budjetining zaxira jamgʻarmalari mablagʻlari uchun xarajatlar boʻyicha shaxsiy gʻazna hisobvaraqlari har bir xarajatlar smetasi boʻyicha alohida ochiladi.

30. Xarajatlar boʻyicha budjetdan tashqari shaxsiy gʻazna hisobvaraqlari quyidagilarga asosan ochiladi:

mazkur Qoidalarning 4-ilovasiga muvofiq shakldagi shaxsiy gʻazna hisobvaragʻi ochish uchun ariza. Bunda, agar budjet tashkiloti bir vaqtning oʻzida yuridik shaxs maqomiga ega boʻlmagan, quyi budjet tashkilotining budjet mablagʻlarini taqsimlovchisi boʻlsa, tegishli shaxsiy gʻazna hisobvaraqlari ochish uchun shaxsiy gʻazna hisobvaragʻi ochish toʻgʻrisidagi arizaga mazkur Qoidalarning 5-ilovasiga muvofiq shaklda xizmat koʻrsatiladigan quyi budjet tashkilotlarining roʻyxati ilova qilinadi;

budjetdan tashqari mablagʻlarning limitlangan tushumi va xarajatlari boʻyicha xarajatlar smetasi (tushumi va xarajat yoʻnalishi limitlanmagan budjetdan tashqari mablagʻlar bundan mustasno). Bunda, yuridik shaxs maqomiga ega boʻlmagan quyi budjet tashkilotlarining xarajatlariga xizmat koʻrsatish va hisobini yuritishni amalga oshiradigan budjet tashkilotlari uchun oʻz xarajatlari hisobini yuritish uchun (xarajatlar smetasi asosida) alohida shaxsiy gʻazna hisobvaraqlari va xizmat koʻrsatiladigan quyi budjet tashkilotlarining xarajatlari hisobini yuritish uchun (jamlanma xarajatlar smetalari asosida) budjet tasnifining har bir kichik boʻlimi boʻyicha alohida shaxsiy gʻazna hisobvaraqlari ochiladi.

31. Xarajatlar boʻyicha shaxsiy gʻazna hisobvaraqlari budjet tashkilotlari, budjet mablagʻlari oluvchilar va BMJ budjetidan mablagʻ oluvchilar tomonidan mazkur Qoidalarning 28 va 30-bandlarida koʻrsatilgan hujjatlar taqdim qilingan kundan boshlab bir ish kuni mobaynida ochiladi.

Agar taqdim etilgan hujjatlar mazkur Qoidalarda nazarda tutilgan talablarga muvofiq boʻlmasa, ular qayta ishlash va kamchiliklarni bartaraf etish uchun ikki ish kuni mobaynida qaytariladi.

32. Shaxsiy gʻazna hisobvaraqlarini ochish uchun asos boʻlgan taqdim etilgan hujjatlar qaytarib berilmaydi va iqtisodiyot va moliya organlari hamda DMJ va BMJ taqsimlovchi organlarda saqlanadi.

33. Iqtisodiyot va moliya organlari hamda DMJ va BMJ taqsimlovchi organlar xarajatlar boʻyicha shaxsiy gʻazna hisobvaraqlari ochilgandan yoki oʻzgartirilgandan soʻng keyingi kundan kechiktirmasdan bu haqda budjet tashkilotlari, budjet mablagʻlari oluvchilar va BMJ budjetidan mablagʻ oluvchilarni xabardor qiladilar. Oʻz navbatida budjet tashkilotlari, budjet mablagʻlari oluvchilar va BMJ budjetidan mablagʻ oluvchilar ikki ish kuni mobaynida ochilgan yoki oʻzgartirilgan xarajatlar boʻyicha shaxsiy gʻazna hisobvaraqlari rekvizitlarini tegishli davlat soliq xizmati organlari hamda Iqtisodiyot va moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlariga yetkazadilar.

34. Budjet tashkiloti, budjet mablagʻlari oluvchi va BMJ budjetidan mablagʻ oluvchining boʻysunishining yoki tashkiliy-huquqiy maqomining oʻzgarishi bilan bogʻliq boʻlmagan tarzda uning nomi oʻzgarganda, budjet tashkiloti, budjet mablagʻlari oluvchi va BMJ budjetidan mablagʻ oluvchi yangi nom olganidan soʻng, bir ish kuni mobaynida bu haqda tegishli iqtisodiyot va moliya organi yoki DMJ va BMJ taqsimlovchi organga yozma ravishda xabar beradi.

Budjet tashkiloti, budjet mablagʻlari oluvchi va BMJ budjetidan mablagʻ oluvchining yozma xabarnomasi asosida iqtisodiyot va moliya organi va DMJ yoki BMJ taqsimlovchi organlar tomonidan budjet tashkiloti, budjet mablagʻlari oluvchi yoki BMJ budjetidan mablagʻ oluvchining nomi oʻzgarganligi munosabati bilan xarajatlar boʻyicha shaxsiy gʻazna hisobvaragʻiga shaxsiy gʻazna hisobvaraqning noyob raqamini oʻzgartirmagan holda tegishli oʻzgartirishlar kiritiladi.

35. Budjet tashkiloti, budjet mablagʻlari oluvchi yoki BMJ budjetidan mablagʻ oluvchining birlashishi, boʻlinishi, ajralib chiqishi, qayta tashkil etilishida, yangidan vujudga kelgan tashkilot davlat roʻyxatidan oʻtgandan soʻng, qoʻshilish shaklida qayta tashkil etilganda esa, tashkilot faoliyatini toʻxtatish toʻgʻrisidagi yozuv yagona davlat reyestriga kiritilgandan soʻng qayta tashkil etilganligi haqidagi hujjatlarning nusxalarini ilova qilgan holda iqtisodiyot va moliya organiga yoki DMJ va BMJ taqsimlovchi organga xarajatlar boʻyicha shaxsiy gʻazna hisobvaraqlarini yopish uchun ariza taqdim etadi.

36. Budjet tashkiloti, budjet mablagʻlari oluvchi yoki BMJ budjetidan mablagʻ oluvchi tugatilganda, tugatilayotgan tashkilotning rahbari tomonidan tugatish jarayoni boshlangan kundan boshlab ikki ish kuni mobaynida iqtisodiyot va moliya organiga yoki DMJ va BMJ taqsimlovchi organga yuqori turuvchi tashkilot yoki notarial tasdiqlangan tugatish toʻgʻrisidagi va tugatish komissiyasining tayinlanishi toʻgʻrisidagi hujjatlarning nusxalarini tugatish komissiyasining faoliyat yuritish muddatlarini koʻrsatgan holda taqdim etiladi.

37. Budjet tashkiloti, budjet mablagʻlari oluvchi yoki BMJ budjetidan mablagʻ oluvchilarning qayta tashkil etilishi, boʻysunuvdagi oʻzgarishlar, tugatish komissiyasi ish faoliyatining tugatilishi, boshqa gʻaznachilik xizmati boʻlinmasi tomonidan xizmat koʻrsatilishiga oʻtish munosabati bilan yoki qonunchilik hujjatlarida nazarda tutilgan boshqa hollarda xarajatlar boʻyicha shaxsiy gʻazna hisobvaraqlarini yopilishi iqtisodiyot va moliya organlari yoki DMJ va BMJ taqsimlovchi organlar tomonidan mazkur Qoidalarning 6-ilovasiga muvofiq shakldagi xarajatlar boʻyicha shaxsiy gʻazna hisobvaragʻini yopish uchun arizaga asosan amalga oshiriladi.

38. Iqtisodiyot va moliya organi, DMJ va BMJ taqsimlovchi organ tomonidan qayta tashkil etish jarayoni tugallangandan soʻng, shuningdek budjet tashkiloti, budjet mablagʻlari oluvchi yoki BMJ budjetidan mablagʻ oluvchining budjet darajasi oʻzgarganda yoki boshqa gʻaznachilik xizmati boʻlinmasiga xizmat koʻrsatilishiga oʻtganda yangi xarajatlar boʻyicha shaxsiy gʻazna hisobvaraqlarini ochish mazkur Qoidalarning 28 — 30-bandlariga muvofiq amalga oshiriladi.

39. Ochilgan va yopilgan xarajatlar boʻyicha shaxsiy gʻazna hisobvaraqlari toʻgʻrisidagi maʼlumotlar hisobi “OʻRIMV” ATda Xarajatlar boʻyicha shaxsiy gʻazna hisobvaraqlarini roʻyxatdan oʻtkazish kitobida elektron koʻrinishda mazkur Qoidalarning 7-ilovasiga muvofiq shaklda yuritiladi.

40. Iqtisodiyot va moliya organlarining vakolatli xodimlari xarajatlar boʻyicha shaxsiy gʻazna hisobvaraqlarining tegishli satrlarida quyidagilarni aks ettiradilar:

a) budjet mablagʻlari boʻyicha:

budjet tashkiloti va budjet mablagʻlari oluvchilarning xarajatlar smetalari, shuningdek kapital qurilish obyektlari boʻyicha xarajatlarning oylik yoyilmalari, Oʻzbekiston Respublikasi Vazirlar Mahkamasi Zaxira jamgʻarmasi, Qoraqalpogʻiston Respublikasi respublika budjetining, viloyatlar viloyat budjetlarining va Toshkent shahri shahar budjetining zaxira jamgʻarmalari mablagʻlari boʻyicha xarajatlar smetalarida koʻrsatilgan mablagʻlar;

xarajatlar smetalariga, shuningdek kapital qurilish obyektlari boʻyicha xarajatlarining oylik yoyilmalariga kiritilgan oʻzgartirishlar;

b) budjetdan tashqari mablagʻlar boʻyicha:

budjet tashkilotlarining tegishli xarajatlar smetalarida koʻrsatilgan mablagʻlar, tushumi va xarajat yoʻnalishlari cheklanmaydigan budjetdan tashqari mablagʻlar turlari bundan mustasno;

xarajatlar smetalariga kiritilgan oʻzgartirishlar.

41. DMJ va BMJ taqsimlovchi organlarning vakolatli xodimlari xarajatlar boʻyicha shaxsiy gʻazna hisobvaraqlarining tegishli satrlarida quyidagilarni aks ettiradilar:

a) jamgʻarma mablagʻlari boʻyicha:

DMJ va BMJ budjetidan mablagʻ oluvchilarning xarajatlar smetalari, shuningdek kapital qurilish obyektlari boʻyicha xarajatlarning oylik yoyilmalarida koʻrsatilgan mablagʻlar;

xarajatlar smetalariga, shuningdek kapital qurilish obyektlari boʻyicha xarajatlarining oylik yoyilmalariga kiritilgan oʻzgartirishlar;

b) budjetdan tashqari mablagʻlar boʻyicha:

DMJ va BMJ budjetidan mablagʻ oluvchilarning tegishli xarajatlar smetalarida koʻrsatilgan mablagʻlar;

xarajatlar smetalariga kiritilgan oʻzgartirishlar.

42. Gʻaznachilik xizmati boʻlinmalarining vakolatli xodimlari xarajatlar boʻyicha shaxsiy gʻazna hisobvaraqlarining tegishli satrlarida quyidagilarni aks ettiradilar:

a) budjet mablagʻlari boʻyicha:

budjet tashkilotlari va budjet mablagʻlari oluvchilarga berilgan XTR;

gʻaznachilik xizmati boʻlinmalarida roʻyxatga olingan yuridik majburiyatlar;

gʻaznachilik xizmati boʻlinmalarida roʻyxatga olingan moliyaviy majburiyatlar;

gʻaznachilik xizmati boʻlinmalari tomonidan toʻlangan (oʻtkazilgan) xarajatlar, shuningdek naqd pul shaklidagi toʻlangan mablagʻlar;

b) budjetdan tashqari mablagʻlar boʻyicha:

kelib tushayotgan budjetdan tashqari mablagʻlar;

gʻaznachilik xizmati boʻlinmalarida hisobga olingan yuridik majburiyatlar;

gʻaznachilik xizmati boʻlinmalarida hisobga olingan moliyaviy majburiyatlar;

gʻaznachilik xizmati boʻlinmalari tomonidan toʻlangan (oʻtkazilgan) xarajatlar, shuningdek naqd pul shaklidagi toʻlangan mablagʻlar;

v) DMJ va BMJ mablagʻlari boʻyicha:

gʻaznachilik xizmati boʻlinmalarida roʻyxatga olingan yuridik majburiyatlar;

gʻaznachilik xizmati boʻlinmalarida roʻyxatga olingan moliyaviy majburiyatlar;

gʻaznachilik xizmati boʻlinmalari tomonidan toʻlangan (oʻtkazilgan) xarajatlar, shu jumladan naqd pul shaklidagi toʻlangan mablagʻlar;

g) DMJ va BMJ budjetdan tashqari mablagʻlari boʻyicha:

kelib tushayotgan budjetdan tashqari mablagʻlar;

gʻaznachilik xizmati boʻlinmalarida roʻyxatga olingan yuridik majburiyatlar;

gʻaznachilik xizmati boʻlinmalarida roʻyxatga olingan moliyaviy majburiyatlar;

gʻaznachilik xizmati boʻlinmalari tomonidan toʻlangan (oʻtkazilgan) xarajatlar, shuningdek naqd pul shaklidagi toʻlangan mablagʻlar.

43. Gʻaznachilik xizmati boʻlinmalari budjet tashkilotlari, budjet mablagʻlari oluvchilar hamda BMJ budjetidan mablagʻ oluvchilarning soʻroviga koʻra ularning tegishli xarajatlar boʻyicha shaxsiy gʻazna hisobvaraqlaridan operatsiyalar amalga oshirilgan kundan keyingi ish kunidan kechiktirmagan holda ulardan koʻchirmalarni mazkur Qoidalarning 8-ilovasiga muvofiq shaklda taqdim etadilar.

“UzASBO” DMga ulangan budjet tashkilotlari “UzASBO” DMdan elektron hujjat koʻrinishdagi koʻchirmalarni olishlari mumkin. Elektron hujjat koʻrinishda taqdim qilingan koʻchirmalar va ularga ilovalar qogʻoz hujjatlarga tenglashtiriladi va ular bilan bir xil yuridik kuchga ega boʻladi.

4-bob. Yakuniy qoidalar

44. Mazkur Qoidalar talablari buzilishida aybdor boʻlgan shaxslar qonunchilik hujjatlariga muvofiq javob beradi.

45. Mazkur Qoidalar Oʻzbekiston Respublikasi Markaziy banki, Davlat soliq qoʻmitasi va Davlat bojxona qoʻmitasi bilan kelishilgan.

Markaziy bank raisi F. MULLAJONOV

2016-yil 24-mart

Davlat soliq qoʻmitasi raisi B. PARPIYEV

2016-yil 24-mart

Davlat bojxona qoʻmitasi raisi Z. DUSANOV

2016-yil 24-mart

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 1-ILOVA

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 2-ILOVA

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 3-ILOVA

Budjet tashkilotlari, budjet mablagʻlari oluvchilar va boshqa maqsadli jamgʻarmalar budjetidan mablagʻ oluvchilarning shaxsiy gʻazna hisobvaraqlari

TURLARI

Davlat budjetiT/rMablagʻlar manbasiYoyilmaXarajatlar smetasiYuridik majburiyatlarTushumlarXTR100 % XTRI va II guruh xarajatlari boʻyicha soʻrovnomaToʻlov hujjatlariBir satrdagi xarajatlarMaʼlumotShaxsiy gʻazna hisobvaragʻi turi1.1 000Davlat budjeti (budjet tashkilotlari uchun)+++-++++--12.1 000Davlat budjeti (bir satrda moliyalashtiriladigan budjet tashkilotlari uchun)+++-+++++-133.1 000Maxfiy xarajatlarni bir satrda moliyalashtirish++---+-++-44.1 000Maxfiy boʻlmagan xarajatlarni moliyalashtirish (Davlat budjetining gʻazna ijrosiga oʻtmagan budjet tashkilotlari)+++--+-+--95.1 000Oʻzaro hisob-kitoblar uchun++---+-+-+56.1 000Subvensiya+++--+-+--97.1 000Dotatsiya+++--+-+--98.1 000Oʻtkazib beriladigan daromadlar+++--+-+--99.1 000Rejali ssuda+++----+--1510.1 000Rejadan tashqari ssuda--+----+--1211.1 000Erkin qoldiqlar hisobiga oʻtkazib beriladigan mablagʻlar+++-++++--2012.1000Daromadlarni oshirib bajarilgan qismi hisobiga oʻtkazib beriladigan mablagʻlar-++-++++--2113.1 000Xususiylashtirish hisobiga oʻtkazib beriladigan mablagʻlar-++-++++--21Davlat maqsadli va boshqa maqsadli jamgʻarmalariT/rMablagʻlar manbasiYoyilmaXarajatlar smetasiYuridik majburiyatlarTushumlarXTR100 % XTRI va II guruh xarajatlari boʻyicha soʻrovnomaToʻlov hujjatlariBir satrdagi xarajatlarMaʼlumotShaxsiy gʻazna hisobvaragʻi turi1.2 001Oʻzbekiston Respublikasi Iqtisodiyot va moliya vazirligi huzuridagi Budjetdan tashqari Pensiya jamgʻarmasi++--+-++--102.2 002Oʻzbekiston Respublikasi Bandlikka koʻmaklashish davlat jamgʻarmasi+++---++--183.2 004Davlat aktivlarini boshqarish, transformatsiya va xususiylashtirish jamgʻarmasi--+----+--124.2 001 — 2 003Daromadlarni oshirib bajarilgan qismi hisobiga oʻtkazib beriladigan mablagʻlar-++-++++--215.2 006Oʻzbekiston Respublikasi Iqtisodiyot va moliya vazirligi huzuridagi Taʼlim kreditini moliyalashtirish jamgʻarmasi++++--+++-186.3 002Oʻzbekiston Respublikasi Iqtisodiyot va moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi+++---++--187.3 028Ilm-fanni moliyalashtirish va innovatsiyalarni qoʻllab-quvvatlash jamgʻarmasi++++--++--188.3 036Oʻzbekiston Respublikasi Prezidenti huzuridagi Istiqbolli kadrlarni tayyorlash boʻyicha “El-yurt umidi” jamgʻarmasi++++--++--189.3 093Oʻzbekiston Respublikasi Fanlar akademiyasi jamgʻarmasi++++--++--1810.3 800Boshqa maqsadli jamgʻarmalarning depozit mablagʻlari-+++---+--2511.3 999Boshqa maqsadli jamgʻarmalarning boshqa mablagʻlari-+++---+--2512.3 001 — 3 093Daromadlarni oshirib bajarilgan qismi hisobiga oʻtkazib beriladigan mablagʻlar-++-++++--21Budjet tashkilotlarining budjetdan tashqari jamgʻarmalari№Mablagʻlar manbasiYoyilmaXarajatlar smetasiYuridik majburiyatlarTushumlarXTR100 % XTRI va II guruh xarajatlari boʻyicha soʻrovnomaToʻlov hujjatlariBir satrdagi xarajatlarMaʼlumotShaxsiy gʻazna hisobvaragʻi turi1.4 001Budjet tashkilotlarining rivojlantirish jamgʻarmasi---+---+-112.4 002Oʻzbekiston Respublikasi Iqtisodiyot va moliya vazirligi huzuridagi budjetdan tashqari Pensiya jamgʻarmasining ijtimoiy nafaqalarni toʻlash uchun mablagʻlari---+--++-33.4 003Tibbiyot tashkilotlarining moddiy ragʻbatlantirish va rivojlantirish jamgʻarmasi---+---+-114.4 004Oʻtgan yillar debitorlik qarzlarining tushgan summasi---+---++145.4 005Maktabgacha taʼlim muassasalarida bolalar taʼminoti uchun ota-onalardan tushumlar-+-+---++316.4 006Qoʻshimcha taʼlim tashkilotlarida bolalar taʼminoti uchun ota-onalardan tushumlar (musiqa va sanʼat maktablari)-+-+---+-337.4 007Xodimlardan, ular ishlayotgan joyida ovqatlanganligi boʻyicha hisob-kitoblardan tushadigan tushumlar---+---++328.4 008Maktab-internatlar va litseylarda bolalarning taʼminoti uchun ota-onalardan tushumlar-+-+---++319.4 009Oʻquv muassasalarida oʻqitishdan tushayotgan mablagʻlar-+-+---+-3310.4 010Ajratmalar hisobiga shakllanadigan vazirlik va idoralarning budjetdan tashqari jamgʻarmalari-+++--++-211.4 011Umumtaʼlim muassasalarida darsliklar ijarasi uchun toʻlovlardan tushgan mablagʻlar---+---++1412.4 012Kapital qoʻyilma mablagʻlari boʻyicha depozitlar-+++--++-213.4 013Turgʻun davolash-profilaktika muassasalarida davolanayotgan bemorlardan ovqatlanish uchun undiriladigan toʻlovlar---+---++3214.4 014Taqsimlanishi nazarda tutilgan mablagʻlar (tibbiyot muassasalari uchun)---+---+-1115.4 014Taqsimlanishi nazarda tutilgan mablagʻlar (tranzit)---+---+-1116.4 015Boshqa taʼlim muassasalarida bolalar taʼminoti uchun ota-onalar toʻlovi-+-+---+-3317.4 016Boshqa mablagʻlar boʻyicha depozitlar-+-+---+-3318.4 018Mahallalar qiyofasini yaxshilash jamgʻarmasi-+++--++-219.4 028Bojxona toʻlovlarini toʻlashdan tushgan tushumlar---+---+-11

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 4-ILOVA

(4-ilovaning matni Oʻzbekiston Respublikasi iqtisodiyot va moliya vazirining 2023-yil 18-iyuldagi 62-sonli buyrugʻi (roʻyxat raqami 2772-2, 23.08.2023-y.) tahririda — Qonunchilik maʼlumotlari milliy bazasi, 24.08.2023-y., 10/23/2772-2/0650-son)

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 5-ILOVA

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 6-ILOVA

(6-ilovaning matni Oʻzbekiston Respublikasi iqtisodiyot va moliya vazirining 2023-yil 18-iyuldagi 62-sonli buyrugʻi (roʻyxat raqami 2772-2, 23.08.2023-y.) tahririda — Qonunchilik maʼlumotlari milliy bazasi, 24.08.2023-y., 10/23/2772-2/0650-son)

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 7-ILOVA

Oʻzbekiston Respublikasi Iqtisodiyot va moliya vazirligining axborot tizimida shaxsiy gʻazna hisobvaraqlarini yuritish qoidalariga 8-ILOVA

(8-ilovaning matni Oʻzbekiston Respublikasi iqtisodiyot va moliya vazirining 2023-yil 18-iyuldagi 62-sonli buyrugʻi (roʻyxat raqami 2772-2, 23.08.2023-y.) tahririda — Qonunchilik maʼlumotlari milliy bazasi, 24.08.2023-y., 10/23/2772-2/0650-son)