Oʻzbekiston Respublikasi Markaziy banki tomonidan 5000 (besh ming) soʻmlik banknotlarning chiqarilishi toʻgʻrisida (KQ-74-II-son)

18.06.2013

Oʻzbekicton Respublikasi Oliy Majlisi Senati Kengashining

qarori

Oʻzbekiston Respublikasi Markaziy bankining 5000 (besh ming) soʻmlik banknotlar chiqarish toʻgʻrisidagi taklifini koʻrib chiqib hamda “Oʻzbekiston Respublikasining Markaziy banki toʻgʻrisida”gi Oʻzbekiston Respublikasi Qonunining 33-moddasiga muvofiq, Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Markaziy banki tomonidan taqdim etilgan 5000 (besh ming) soʻmlik banknotning namunasi hamda dizayni maʼqullansin.

2. Oʻzbekiston Respublikasi Markaziy banki 5000 (besh ming) soʻmlik banknotlarning muomalaga chiqarilishi toʻgʻrisidagi axborotni, shuningdek banknot tavsifini ommaviy axborot vositalarida eʼlon qilsin.

Oʻzbekiston Respublikasi Oliy Majlisi Senatining Raisi I. SOBIROV

Toshkent sh.,

2013-yil 18-iyun,

KQ-74-II-son

5000 SOʻM QIYMATDAGI BANKNOTNING TAVSIFI

QISQAChA TAʼRIF

5000 soʻm qiymatdagi banknotning bosma loyihasi tarkibida koʻk va och yashil rangdagi koʻrinmas tolalarning tartibsiz singdirilishi orqali himoyalangan qogʻozda tayyorlangan boʻlib, ultrabinafsha nur berilganda koʻrinadi. Banknot oʻlchami 144 x 78 mm.

Banknotning oʻng tomonidagi keng oq rangli sathda Oʻzbekiston Respublikasi Gerbi va 5000 bahoning raqamli ishorasi koʻrinishidagi lokal suv belgisi mavjud.

Oq rangli sathning chap tarafidan qogʻoz qatlamida eni 2 mm boʻlgan, banknot yuzasida yoʻl-yoʻl tasma koʻrinishini hosil qiluvchi, yuzaga chiqib, ichkariga botuvchi, mahkamlangan kumushsimon ip oʻtkazilgan boʻlib, yorugʻlik berilganda xuddi yaxlit himoya ipidek koʻrinadi.

Old va orqa tomonlarida och yashil, koʻk va jigar ranglar ustunlikni tashkil qiladi.

OLD TOMONINING TAVSIFI

Banknot old tomonining yuqori qismida qora tasma fonida och tusdagi “OʼZBEKISTON RESPUBLIKASI MARKAZIY BANKI” matni mavjud. Giloshirlangan bezak markazida koʻk rangda ishlangan Oʻzbekiston Respublikasi Gerbi joylashgan. Rangli ostki fonda banknotning oʻng tarafidan va pastki qismi boʻylab jigar rangdagi, oʻz kompozitsiyasi boʻyicha yaxlit bir butunlikni tashkil etuvchi naqshinkor rasmlar joylashtirilgan.

Kupyuraning ostki foni va Gerb atrofini hoshiyalagan giloshirlangan bezaklar rangi oʻz rangini bir rangdan boshqasiga (och yashil rangdan sargʻish rangga) ohista oʻzgartiradi, yaʼni “irisli silliqlik” usulida bajarilgan.

Naqshinkor ramkaning pastki qismida qoramtir jigar rang fonda “OʼZBEKISTON SOʼMI RESPUBLIKA NUDUDIDA NAMMA TOʼLOVLAR UCNUN OʼZ QIYMATI BOʼYICNA QABUL QILINISNI SNART” matni joylashgan.

Banknotning jigar rang naqshinkor ramkasi, “OʼZBEKISTON RESPUBLIKASI MARKAZIY BANKI” yozuvi, Gerb, oʻng va chap tomonlardagi 5000 raqamlari, shuningdek banknot oq rangli sathining yuqori qismida joylashgan naqsh metallografik bosma usulida bajarilgan boʻlib, barmoq uchlari bilan ushlab koʻrilganida, boʻyoqning boʻrtib turganligi seziladi.

Naqshinkor ramkaning chap qismida banknot yorugʻlik manbaiga nisbatan muayyan qiyalik burchagida qaralganda koʻrinadigan “UZB” qisqartma soʻz shaklidagi “latent” (yashirin) tasvir tushirilgan.

Maxsus belgi – banknotning yuqori chap burchagida joylashgan boʻlib, tasvirning bir qismi old tomonda, boshqa qismi orqa tomonda tushilgan, bir-biriga toʻlaligicha mos tushadi. Yorugʻlikda bu qismlar birgalikda umumiy naqshli tasvirni hosil qilib, bir-birining ustiga toʻliq mos tushishi lozim.

Banknotning oʻng tomoni, yaʼni keng oq rangli sath markazida Oʻzbekiston Respublikasi Gerbi va 5000 raqami tasviridagi lokal suv belgisi mavjud boʻlib, yorugʻlikda yaqqol koʻrinadi.

Oq rangli sathning yuqori qismida rangli boʻyoqda ishlangan banknot chiqarilgan yil joylashgan boʻlib, uning tagida rangini oʻzgartiruvchi (OVI) boʻyoqda ishlangan tilla-bronza rangli va koʻrish burchagi holatiga qarab rangini oʻzgartiruvchi naqsh mavjud.

Banknotning lotin alifbosidagi ikki harfli seriyasi va yettita raqamdan iborat nomeri qora rangda ikki joyda bosilgan boʻlib, pastki oʻng qismidagi ferromagnit xususiyatga, chap tarafdagi rangli maydon boʻyicha lyuminessensiyalanish xususiyatiga ega.

Ultrabinafsha nurlari taʼsir ettirilganda banknotning old tomonida qogʻozda tartibsiz joylashtirilgan yashil va koʻk rangli tuksimon koʻrinishdagi tolalar, Oʻzbekiston Respublikasi Gerbidan oʻng tomondagi “5000” raqamidan iborat koʻrinmas tasvir va giloshirlangan bezaklar koʻrinadi.

ORQA TOMONINING TAVSIFI

Banknot chap tomonida lokal suv belgilarni koʻrish imkoniyatiga ega boʻlgan oq rangli sath mavjud. Oq rangdagi sathning yuqori va pastki qismida turli shakldagi binafsha va yashil rangli naqshinkor bezaklar joylashgan. Pastki naqshli bezak fonida jigar rangda “5000” raqami tushirilgan.

Banknot oʻrtasida jigar rangda ishlangan “OLIY MAJLIS” meʼmoriy binosining tasviri joylashgan. Ostki fon turli qalinlikdagi va qiyalik burchagidagi nafis chiziqlarni qoʻllash orqali ishlangan naqshinkor rasmlarni oʻz ichiga oladi. Banknot oʻng tomonining foni turli balandlikdagi koʻp marotaba takrorlanadigan “5000” raqamlaridan tashkil topgan.

Banknot pastki chekkasi boʻylab hoshiyalangan qoramtir fonda “OʼZBEKISTON SOʼMINI QALBAKILASNTIRISN QONUNGA MUVOFIQ TAQIB QILINADI” matni joylashgan.

Fon setkasida bir-birini kesib oʻtuvchi “5000” va “SOʼM” yozuvlari mavjud. Yozuvlar va fon setkasi “irisli silliqlik” usulida tayyorlangan boʻlib, bir rangdan boshqasiga ohista oʻzgarish xususiyatiga ega.

Ultrabinafsha nurlari taʼsir ettirilganda banknotning orqa tomonida ham qogʻozda tartibsiz joylashtirilgan yashil va koʻk rangli tuksimon koʻrinishdagi tolalar koʻrinadi.