Oʻzbekiston Respublikasi Mehnat vazirligi faoliyatini tashkil etishni takomillashtirish chora-tadbirlari toʻgʻrisida (PQ-2498-son)

24.02.2016

Oʻzbekiston Respublikasi Prezidentining

Qarori

Oʻzbekiston Respublikasi Prezidentining “Aholining hojatmand qatlamlarini ijtimoiy qoʻllab-quvvatlash hamda tibbiy-ijtimoiy yordam koʻrsatish tizimini yanada takomillashtirish chora-tadbirlari toʻgʻrisida” 2016-yil 22-fevraldagi PF-4782-son Farmoni ijrosini taʼminlash hamda mehnat organlari faoliyatini tashkil etish samaradorligini oshirish, ularning aholining, avvalambor yoshlarning bandligini taʼminlash va mehnat resurslaridan oqilona foydalanish boʻyicha javobgarligini kuchaytirish maqsadida:

1. Quyidagilar:

Oʻzbekiston Respublikasi Mehnat vazirligining tashkiliy tuzilmasi va boshqaruv xodimlarining cheklangan umumiy soni 34 kishidan iborat markaziy apparatining tuzilmasi 1 va 2-ilovalarga* muvofiq;

Qoraqalpogʻiston Respublikasi Mehnat vazirligining tuzilmasi, viloyatlar va Toshkent shahri mehnat bosh boshqarmalarining namunaviy tuzilmasi 3 va 4-ilovalarga* muvofiq;

bandlikka koʻmaklashuvchi tuman (shahar) markazlarining namunaviy tuzilmasi 5-ilovaga* muvofiq tasdiqlansin.

* 1 — 5-ilovalar rus tilidagi matnda berilgan.

Oʻzbekiston Respublikasi mehnat vaziriga markaziy apparatning, viloyatlar va Toshkent shahri mehnat bosh boshqarmalari, Bandlikka koʻmaklashuvchi tuman (shahar) markazlari, shuningdek, idoraviy tashkilotlarning tasdiqlangan tuzilmasiga zarur hollarda belgilangan xodimlar soni va ish haqi fondi doirasida oʻzgartirishlar kiritish huquqi berilsin.

2. Belgilab qoʻyilsinki:

Qoraqalpogʻiston Respublikasi mehnat vazirini lavozimga tayinlash Qoraqalpogʻiston Respublikasi Joʻqorgʻi Kengesi tomonidan Oʻzbekiston Respublikasi mehnat vaziri bilan kelishilgan holda amalga oshiriladi;

viloyatlar va Toshkent shahri mehnat bosh boshqarmalarining rahbarlari Oʻzbekiston Respublikasi mehnat vaziri tomonidan viloyatlar va Toshkent shahri hokimlari bilan kelishilgan holda tayinlanadi;

aholi bandligiga koʻmaklashuvchi tuman (shahar) markazlarining rahbarlari Qoraqalpogʻiston Respublikasi mehnat vaziri, Toshkent shahri va viloyatlarning mehnat bosh boshqarmalarining boshliqlari tomonidan tuman va shaharlar hokimlari hamda Oʻzbekiston Respublikasi mehnat vaziri bilan kelishilgan holda lavozimlarga tayinlanadilar.

3. Oʻzbekiston Respublikasi Vazirlar Mahkamasi (R. Azimov) ikki oy muddatda Oʻzbekiston Respublikasi Mehnat vazirligi va unga qarashli tashkilotlarning rahbar xodimlarini attestatsiyadan oʻtkazishni tashkil qilsin, uning natijalariga koʻra xodimning egallab turgan lavozimiga muvofiqligi darajasini belgilasin hamda vazirlikni zamon talablariga javob beradigan yuqori malakali rahbar kadrlar va mutaxassislar bilan toʻldirish choralarini koʻrsin.

4. Oʻzbekiston Respublikasi Mehnat vazirligi bir oy muddatda Mehnat bosh boshqarmalari hamda Aholi bandligiga koʻmaklashuvchi tuman (shahar) markazlari toʻgʻrisidagi yangilangan namunaviy nizomlarni belgilangan tartibda tasdiqlasin.

5. Oʻzbekiston Respublikasi Vazirlar Mahkamasining “Budjet tashkilotlarini moliyalash tartibini takomillashtirish toʻgʻrisida” 1999-yil 3-sentabrdagi 414-sonli qarorining 4-bandida nazarda tutilgan imtiyozlar Bandlik va mehnatni muhofaza qilish Respublika ilmiy markaziga joriy etilishi maʼlumot uchun qabul qilinsin.

6. Oʻzbekiston Respublikasi Mehnat vazirligi Toshkent shahri, Mirobod tumani, Mirobod koʻchasi, 15-uyga joylashtirilsin.

7. Oʻzbekiston Respublikasi Prezidentining “Oʻzbekiston Respublikasi Mehnat va aholini ijtimoiy muhofaza qilish vazirligi tuzilmasini takomillashtirish chora-tadbirlari toʻgʻrisida” 2009-yil 30-dekabrdagi PQ-1251-sonli qarori, uning 4-bandi istisno qilingan holda, oʻz kuchini yoʻqotgan deb hisoblansin.

8. Oʻzbekiston Respublikasi Mehnat vazirligi:

oʻn kun muddatda Oʻzbekiston Respublikasi Mehnat vazirligi toʻgʻrisidagi nizomni tasdiqlash uchun Vazirlar Mahkamasiga kiritsin;

Oʻzbekiston Respublikasi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

9. Ushbu qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.Azimov zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2016-yil 24-fevral,

PQ-2498-son