Toshkent shahrida yoshlar taʼlim-tarbiyasi va xotin-qizlar oʻrtasida ijtimoiy-maʼnaviy muhitni yanada yaxshilash, mahalla fuqarolar yigʻinlari faoliyatini qoʻllab-quvvatlash boʻyicha qoʻshimcha chora-tadbirlar toʻgʻrisida (30-son)

05.02.2016

Oʻzbekiston Respublikasi Vazirlar Mahkamasining

qarori

Toshkent shahrida yoshlarning ijtimoiy faolligini oshirish, milliy gʻoya targʻibotini kuchaytirish orqali taʼlim-tarbiyasini yanada yaxshilash, oilada maʼnaviy-axloqiy muhitni shakllantirish, yoshlarni milliy va umuminsoniy qadriyatlar ruhida tarbiyalashda mahalla fuqarolar yigʻinlari rolini oshirish, xotin-qizlar va oila muammosini izchil oʻrganish hamda maʼnaviy dunyoqarashni sogʻlomlashtirishga doir tadbirlarni yanada kuchaytirish maqsadida Vazirlar Mahkamasi qaror qiladi:

1. Toshkent shahar hokimligi, Oʻzbekiston Respublikasi Xalq taʼlimi vazirligi, Oʻrta maxsus, kasb-hunar taʼlim markazi, “Mahalla” xayriya jamoat fondi, Respublika Maʼnaviyat targʻibot markazi va Oʻzbekiston “Kamolot” yoshlar ijtimoiy harakatining Moliya vazirligi bilan kelishilgan taklifi maʼqullansin.

Taklifga koʻra joriy yilda eksperiment tariqasida:

Toshkent shahrining Olmazor va Shayxontohur tumanlarida joylashgan umumtaʼlim maktablari, oʻrta maxsus, kasb-hunar taʼlimi muassasalaridagi “Kamolot” yoshlar ijtimoiy harakati boshlangʻich tashkiloti yetakchilariga “Kamolot” yoshlar ijtimoiy harakati mablagʻlari hisobidan umumtaʼlim maktablarida mehnatga haq toʻlashning eng kam miqdorining 2,46 barobari miqdorida, akademik litsey va kasb-hunar kollejlarida mehnatga haq toʻlashning eng kam miqdorining 2,81 barobari miqdorida ustama ish haqi toʻlanishini belgilash;

Toshkent shahridagi yuqori natijalarga erishgan, samarali mehnat qilgan mahalla fuqarolar yigʻinlari raislarini Toshkent shahar mahalliy budjetining qoʻshimcha manbalari hisobidan bir lavozim maoshi miqdorida, lekin yiliga lavozim maoshining 5 barobaridan oshmaydigan miqdorda qoʻshimcha ravishda ragʻbatlantirish;

“Mahalla” xayriya jamoat fondi huzurida Olmazor, Shayxontohur va Uchtepa tumanlarida tashkil etilgan Ayollar maslahat markazlari faoliyatining ijobiy natijalaridan kelib chiqib, Toshkent shahar mahalliy budjetining qoʻshimcha manbalari hisobidan Toshkent shahrining boshqa tumanlarida ham ushbu markazlarni tashkil etish va ularning faoliyatini taʼminlash.

2. Oʻzbekiston “Mahalla” xayriya jamoat fondi, Oʻzbekiston Xotin-qizlar qoʻmitasi, Ichki ishlar vazirligi va Moliya vazirligining oʻz vazifalarini vijdonan va masʼuliyat bilan bajarayotgan respublikadagi tuman (shahar) xotin-qizlar qoʻmitalarining xotin-qizlar bilan ishlash va oilalarda maʼnaviy-axloqiy qadriyatlarni mustahkamlash boʻyicha mutaxassislarini, profilaktika (katta) inspektorining jamoat tartibini saqlash boʻyicha yordamchilarini Oʻzbekiston Respublikasi Davlat budjetida fuqarolarning oʻzini oʻzi boshqarish organlari uchun ajratilgan mablagʻlar doirasida bir yilda:

bir oylik mehnat haqi fondi miqdoridagi mablagʻlarni yoʻnaltirgan holda mukofotlash;

bir oylik ish haqi fondining 50 foizi miqdoridagi mablagʻlarni yoʻnaltirgan holda moddiy yordam koʻrsatish toʻgʻrisidagi taklifiga rozilik berilsin.

3. Belgilab qoʻyilsinki, fuqarolarning oʻzini oʻzi boshqarish organlari xodimlarini mukofotlash va ularga moddiy yordam koʻrsatish fuqarolarning oʻzini oʻzi boshqarish organlari raislarining takliflariga binoan, raislarini esa — “Mahalla” xayriya jamoat fondi tuman boʻlinmasi raisi takliflariga koʻra fuqarolarning oʻzini oʻzi boshqarish organlari faoliyatini muvofiqlashtirish tuman kengashlari qarori asosida amalga oshiriladi.

4. “Kamolot” yoshlar ijtimoiy harakati Oʻzbekiston Respublikasi Xalq taʼlimi vazirligi, Oʻrta maxsus, kasb-hunar taʼlim markazi bilan birgalikda:

eksperiment oʻtkazilayotgan taʼlim muassasalaridagi “Kamolot” yoshlar ijtimoiy harakati boshlangʻich tashkiloti yetakchilarini yoshi 35 yoshgacha boʻlgan, oliy maʼlumotli, ish faoliyatida yuqori natijalarga erishgan, yetakchilik va tashkilotchilik qobiliyatiga ega boʻlgan iqtidorli yoshlar orasidan belgilangan tartibda saylash boʻyicha vaqtinchalik tartibni ikki hafta muddatda ishlab chiqsin va tasdiqlasin;

boshlangʻich tashkilotlar yetakchilari tomonidan amalga oshirilayotgan ishlar yuzasidan tizimli monitoring tashkil etib, yosh avlod qalbi va ongiga ona Vatanga muhabbat, milliy istiqlol gʻoyasiga sadoqat ruhini singdirish borasidagi ishlar samaradorligini oshirish boʻyicha zarur chora-tadbirlarni amalga oshirsin.

5. Toshkent shahar hokimligi va “Mahalla” xayriya jamoat fondi:

ikki hafta muddatda mahalla fuqarolar yigʻinlari raislarining ish faoliyati samaradorligini baholash mezonlarini belgilashni va ular asosida mahalla fuqarolar yigʻinlari raislari umumiy sonining 75 foizidan koʻp boʻlmagan qismini fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman kengashlari qarorlari asosida qoʻshimcha ragʻbatlantirishni nazarda tutuvchi tartibni ishlab chiqsin;

budjetdan ajratilayotgan mablagʻlar hisobidan mahalla fuqarolar yigʻinlarining faol va tashabbuskor raislari hamda boshqa xodimlariga mukofot va ustamalar belgilashning amaldagi mexanizmlaridan keng foydalansin.

6. Toshkent shahar hokimligi va Respublika Maʼnaviyat targʻibot markazi:

maʼnaviyat targʻibot markazi Toshkent shahar va tuman boʻlimlarini Toshkent shahar mahalliy budjetining qoʻshimcha manbalari hisobidan qoʻllab-quvvatlash;

markazning Toshkent shahar tuman boʻlimlarining xodimlarini bir oylik maoshi miqdorida qoʻshimcha ragʻbatlantirish hamda samarali targʻibot va tashviqot ishlarini amalga oshirishlari uchun yetarli shart-sharoitlar yaratish, ularni uslubiy qoʻllanmalar bilan taʼminlash choralarini koʻrsinlar.

7. Toshkent shahar hokimligining Toshkent shahrining 2016-yilgi mahalliy budjetining qoʻshimcha manbalari hisobidan jami 2,2 mlrd soʻm, shu jumladan:

“Mahalla” xayriya jamoat fondining Toshkent shahar boʻlimiga — Toshkent shahridagi mahalla fuqarolar yigʻinlari raislarini qoʻshimcha ragʻbatlantirish uchun 1,0 mlrd soʻmgacha va Ayollar maslahat markazlari faoliyatini qoʻllab-quvvatlash uchun 700,0 mln soʻmgacha;

Maʼnaviyat targʻibot markazi shahar boʻlimiga — shahar va tuman boʻlimlari faoliyatini qoʻllab-quvvatlash uchun 500,0 mln soʻmgacha mablagʻlarni ajratish toʻgʻrisidagi taklifiga rozilik berilsin.

8. Toshkent shahrida eksperiment tarzida oʻtkaziladigan tadbirlarni moliyalashtirish hisob-kitobi ilovaga* muvofiq tasdiqlansin.

* Ilova berilmaydi.

9. Toshkent shahar hokimligi, Oʻzbekiston Respublikasi Xalq taʼlimi vazirligi, Oʻrta-maxsus, kasb-hunar taʼlimi markazi, “Kamolot” yoshlar ijtimoiy harakati, “Mahalla” xayriya jamoat fondi va Maʼnaviyat targʻibot markazi 2016-yil 1-avgustgacha eksperiment natijalarini oʻrganib, tegishli xulosa va takliflarni Vazirlar Mahkamasiga kiritsinlar.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.Y. Xodiyev va Toshkent shahar hokimi R.J. Usmanov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2016-yil 5-fevral,

30-son