Buyuk ajdodlarimizning Oʻzbekiston Respublikasi hududidan tashqarida dafn etilgan joylarini aniqlash va obodonlashtirishga doir chora-tadbirlar toʻgʻrisida (495-II-son)

02.05.2003

Oʻzbekiston Respublikasi Oliy Majlisi KENGAShIning

Qarori

Oʻzbekiston Respublikasi Prezidenti I.A. Karimovning ikkinchi chaqiriq Oliy Majlisning oʻn birinchi sessiyasida buyuk ajdodlarimiz xotirasiga hurmat-ehtiromni yanada kuchaytirish hamda ularning Oʻzbekiston Respublikasi hududidan tashqarida dafn etilgan joylarini obodonlashtirish toʻgʻrisidagi takliflarini amalga oshirish maqsadida Oʻzbekiston Respublikasi Oliy Majlisining Kengashi qaror qiladi:

1. Oʻzbekiston Respublikasi Hukumati (Oʻ. Sultonov) buyuk ajdodlarimizning tarixiy va maʼnaviy nuqtai nazardan muhim ahamiyatga molik, Oʻzbekiston Respublikasi hududidan tashqarida dafn etilgan joylarini aniqlash va obodonlashtirish yuzasidan zarur choralar koʻrsin.

2. Oʻzbekiston Respublikasi Tashqi ishlar vazirligi buyuk ajdodlarimizning dafn etilgan joylarini taʼmirlash va obodonlashtirish toʻgʻrisida kelishuvlarga erishish maqsadida tegishli chet davlatlarning vakolatli organlari bilan maslahatlashuvlar oʻtkazsin.

3. Vazirliklar, davlat qoʻmitalari va idoralar nodavlat notijorat tashkilotlariga buyuk ajdodlarimizning dafn etilgan joylarini taʼmirlash va obodonlashtirish ishlarini amalga oshirishda koʻmaklashsin.

4. Oʻzbekiston Respublikasi Fanlar akademiyasi, ilmiy muassasalar va oʻquv yurtlari buyuk ajdodlarimiz nomi bilan bogʻliq yodgorliklarni aniqlash hamda ularning tarixiy ahamiyatini asoslab berishga qaratilgan chuqur tadqiqotlar oʻtkazsin.

5. Bobur nomli xalqaro jamgʻarmaning buyuk ajdodlarimiz xotirasini tiklash va abadiylashtirishga doir faoliyati maʼqullansin hamda nodavlat notijorat tashkilotlariga buyuk ajdodlarimizning dafn etilgan joylarini taʼmirlash va obodonlashtirish borasidagi ishlarni kuchaytirish, ularning maʼnaviy merosini aholi orasida keng yoyishga qaratilgan axborot-maʼrifiy va tarbiyaviy ishlar darajasini oshirish tavsiya etilsin.

6. Oʻzbekiston Milliy axborot agentligi, Teleradio kompaniyasi, Matbuot va axborot agentligi, “Xalq soʻzi” va “Narodnoye slovo” gazetalari tahririyatlari tegishli davlat organlari hamda nodavlat notijorat tashkilotlarining buyuk ajdodlarimiz dafn etilgan joylarini taʼmirlash va obodonlashtirish masalalari bilan bogʻliq faoliyatini keng yoritib borsin.

Oʻzbekiston Respublikasi Oliy Majlisining Raisi E. XALILOV

Toshkent sh.,

2003-yil 2-may,

495-II-son