Vazirlar Mahkamasining “Meva-sabzavot mahsulotlari, kartoshka, poliz mahsulotlari va uzumni eksport qilishni tartibga solish mexanizmini yanada takomillashtirish chora-tadbirlari toʻgʻrisida” 2015-yil 28-avgustdagi 249-son qaroriga oʻzgartirish kiritish haqida (13-son)

20.01.2016

Oʻzbekiston Respublikasi Vazirlar Mahkamasining

qarori

2016-yilda meva-sabzavot mahsulotlari, kartoshka, poliz mahsulotlari va uzumni eksport qilishni samarali tashkil etish maqsadida Vazirlar Mahkamasi qaror qiladi:

1. Vazirlar Mahkamasining “Meva-sabzavot mahsulotlari, kartoshka, poliz mahsulotlari va uzumni eksport qilishni tartibga solish mexanizmini yanada takomillashtirish chora-tadbirlari toʻgʻrisida” 2015-yil 28-avgustdagi 249-son qarori 1-bandining ikkinchi xatboshi (Oʻzbekiston Respublikasi QT, 2015-y., 8-son, 75-modda) quyidagi tahrirda bayon qilinsin:

“Belgilansinki, 2016-yil 1-iyulga qadar avtotransport vositalaridan foydalangan holda meva-sabzavot mahsulotlari, kartoshka, poliz mahsulotlari va uzumni (TIF TN kodi 07-08) eksport qilishga Vazirlar Mahkamasining “2016-yilda meva-sabzavot mahsulotlari, kartoshka, poliz mahsulotlari va uzum yetishtirish hamda ulardan foydalanishning prognoz parametrlari toʻgʻrisida” 2016-yil 4-yanvardagi 1-son qarori bilan tashkil etilgan Respublikaning ichki bozorida mevalar, sabzavotlar, poliz mahsulotlari, kartoshka va uzumdan, shu jumladan dukkakli mahsulotlardan oqilona foydalanish, shuningdek eksportga yetkazib berishni samarali tashkil etish bilan bogʻliq masalalarni hal etish boʻyicha Ishchi guruh tomonidan tasdiqlanadigan roʻyxatga kiritilgan yuridik shaxslarga ruxsat beriladi”.

2. Respublikaning ichki bozorida mevalar, sabzavotlar, poliz mahsulotlari, kartoshka va uzumdan, shu jumladan dukkakli mahsulotlardan oqilona foydalanish, shuningdek eksportga yetkazib berishni samarali tashkil etish bilan bogʻliq masalalarni hal etish boʻyicha Ishchi guruh 2016-yil 1-iyulga qadar avtotransport vositalaridan foydalangan holda meva-sabzavot mahsulotlari, kartoshka, poliz mahsulotlari va uzum (TIF TN kodi 07-08) eksportini amalga oshirishga ruxsat beriladigan Yuridik shaxslar roʻyxatini (yangilab turgan holda) tasdiqlasin.

3. Vazirlar Mahkamasining “Meva-sabzavot mahsulotlari, kartoshka, poliz mahsulotlari va uzumni eksport qilishni tartibga solish mexanizmini yanada takomillashtirish chora-tadbirlari toʻgʻrisida” 2015-yil 28-avgustdagi 249-son qaroriga qoʻshimcha kiritish haqida” 2015-yil 9-oktabrdagi 288-son qarori oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Bosh vazir oʻrinbosari B.I. Zakirov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2016-yil 20-yanvar,

13-son