Orolboʻyi genofondini muhofaza qilish xayriya jamgʻarmasini tashkil etish toʻgʻrisida (162-son)

03.04.2004

Oʻzbekiston Respublikasi Vazirlar Mahkamasining

qarori

Orolboʻyi ekologiyasini yaxshilash, aholisi sogʻligʻini mustahkamlash va atrof tabiiy muhitini muhofaza qilish maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vazirligi, Davlat tabiatni muhofaza qilish qoʻmitasi, Iqtisodiyot vazirligi, Mehnat va aholini ijtimoiy muhofaza qilish vazirligi, 1-ilovaga* muvofiq boshqa manfaatdor vazirliklar va idoralar, banklar, xalqaro tashkilotlar, jamoat tashkilotlari va tuzilmalarning Orolboʻyi genofondini muhofaza qilish xayriya jamgʻarmasini tashkil etish hamda ularning Jamgʻarma muassislari sifatida qatnashishi toʻgʻrisidagi taklifi qabul qilinsin.

* 1-ilova berilmaydi.

2. Quyidagilar Jamgʻarmaning asosiy vazifalari etib belgilansin:

mintaqani barqaror rivojlantirishning asosiy sharti sifatida Orolboʻyi aholisi sogʻligʻini saqlash va atrof tabiiy muhitini muhofaza qilish masalalari boʻyicha tizimli dasturlar va loyihalar ishlab chiqishni tashkil etish va ularni amalga oshirish;

sogʻliqni saqlash mintaqaviy tizimini takomillashtirishda, aholining, ayniqsa bolalar va ayollarning sogʻligʻi darajasini oshirishda, sanitariya-epidemiologiya vaziyatini yaxshilashda, kundalik hayotga oilaviy salomatlik madaniyatini joriy etishda yordam koʻrsatish;

atrof tabiiy muhit, shu jumladan Orolboʻyi nabotot va hayvonot dunyosini sogʻlomlashtirish hamda muhofaza qilish muammolarini hal etishga jamoatchilikni jalb etish;

mintaqaning biologik rangbarangligini saqlashda va tiklashda faol ishtirok etish;

yuqorida koʻrsatib oʻtilgan muammolar va vazifalarni hal qilishga xalqaro tashkilotlarni keng jalb etish.

3. Quyidagilar:

Orolboʻyi genofondini muhofaza qilish xayriya jamgʻarmasining Homiylik kengashi tarkibi 2-ilovaga* muvofiq;

* 2-ilova berilmaydi.

Jamgʻarmaning xodimlari soni 5 nafar boʻlgan ijro etuvchi direksiyasi tuzilmasi 3-ilovaga muvofiq maʼqullansin.

4. Belgilab qoʻyilsinki:

budjetdan tashqari mablagʻlar hamda Oʻzbekiston Respublikasi rezidentlari va norezidentlari boʻlgan yuridik va jismoniy shaxslarning, Hukumatga qarashli va Hukumatga qarashli boʻlmagan xalqaro tashkilotlarning, homiylarning homiylik mablagʻlari, qonunchilikda taqiqlanmagan boshqa manbalar Jamgʻarma mablagʻlarini shakllantirish manbalari hisoblanadi;

5. Yaponiya, Janubiy Koreya, Hindiston va Turkiya hukumatlaridan Orolboʻyidagi ekologik ahvolni yaxshilash uchun tushgan 513854 AQSH dollari miqdoridagi mablagʻlarning Oʻzbekiston Respublikasi Iqtisodiyot vazirligi, Moliya vazirligi, Davlat tabiatni muhofaza qilish qoʻmitasi, manfaatdor vazirliklar va idoralarning taklifiga koʻra belgilangan tartibda Jamgʻarmaga berilishi maʼlumot uchun qabul qilinsin.

6. Quyidagilarga:

a) Jamgʻarma muassislariga — bir oy muddatda Jamgʻarma ustavini ishlab chiqish va belgilangan tartibda tasdiqlash tavsiya etilsin;

b) Jamgʻarmaning Homiylik kengashiga:

Jamgʻarma oldida turgan vazifalarni hal etishga manfaatdor davlat, jamoat tuzilmalarining va Hukumatga qarashli boʻlmagan tuzilmalarning, shuningdek xalqaro tashkilotlarning jalb etilishini taʼminlash;

Orol dengizi va Orolboʻyi zonasining biologik rangbarangligini saqlash, aholi sogʻligʻini mustahkamlash, bolalarni sport bilan shugʻullanishga keng jalb qilish, onalik va bolalikni muhofaza qilish, mintaqada tarqalgan kasalliklarning oldini olish, aholining yashash va turmush sharoitlarini yaxshilash, davlatning maqsadli dasturlarini bajarish boʻyicha vazifalarning bajarilishini taʼminlovchi aniq chora-tadbirlarni amalga oshirish;

Jamgʻarmaning moddiy-texnik va moliyaviy bazasini mustahkamlashda uni har tomonlama qoʻllab-quvvatlash;

Jamgʻarma mablagʻlaridan maqsadli, qonuniy va samarali foydalanilishi ustidan qatʼiy nazoratni taʼminlash;

Jamgʻarmani Hukumatga qarashli boʻlmagan tashkilot sifatida belgilangan tartibda roʻyxatdan oʻtkazishda koʻmaklashish;

Nukus va Urganch shaharlarida, Qoraqalpogʻiston Respublikasi Vazirlar Kengashi Raisining va Xorazm viloyati hokimining iqtisodiyot va ijtimoiy rivojlantirish masalalari boʻyicha oʻrinbosarlariga Jamgʻarma boʻlimlariga jamoatchilik asosida rahbarlik qilishni yuklagan holda, Jamgʻarma boʻlimlarini ochish tavsiya etilsin.

7. Jamgʻarmaning ijro etuvchi direksiyasi Oʻzbekiston Respublikasi Moliya vazirligi, boshqa manfaatdor vazirliklar va idoralar, jamoat tashkilotlari bilan birgalikda Jamgʻarma mablagʻlarini shakllantirish va ulardan maqsadli foydalanish tartibini bir oy muddatda ishlab chiqsin va tasdiqlasin.

8. Oʻzbekiston Respublikasi Sogʻliqni saqlash vazirligi, Davlat tabiatni muhofaza qilish qoʻmitasi, Mehnat va aholini ijtimoiy muhofaza qilish vazirligi, “Sogʻlom avlod uchun” xalqaro xayriya jamgʻarmasi, UzGEF agentligi Orolboʻyi genofondini muhofaza qilish xayriya jamgʻarmasi faoliyatini tashkil etishda faol ishtirok etsinlar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va A.A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 3-aprel,

162-son

Vazirlar Mahkamasining 2004-yil 3-apreldagi 162-son qaroriga 3-ILOVA

Orolboʻyi genofondini muhofaza qilish xayriya jamgʻarmasi ijro etuvchi direksiyasining tuzilmasi