Ochiq maʼlumotlarni shakllantirish, ularni joylashtirish va qayta ishlash reglamentini tasdiqlash toʻgʻrisida (2746-son)

28.12.2015

Oʻzbekiston Respublikasi Axborot texnologiyalari va kommunikatsiyalarini rivojlantirish vazirining

buyrugʻi

[Oʻzbekiston Respublikasi Adliya vazirligi tomonidan 2015-yil 28-dekabrda 2746-son bilan davlat roʻyxatidan oʻtkazilgan]

Oʻzbekiston Respublikasi Vazirlar Mahkamasining 2015-yil 7-avgustdagi 232-son “Ochiq maʼlumotlar taqdim etilishi hisobga olingan holda Internet tarmogʻida Oʻzbekiston Respublikasining Hukumat portalini yanada takomillashtirish chora-tadbirlari toʻgʻrisida”gi qaroriga muvofiq buyuraman:

1. Ochiq maʼlumotlarni shakllantirish, ularni joylashtirish va qayta ishlash reglamenti ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir X. MIRZAXIDOV

Toshkent sh.,

2015-yil 27-noyabr,

141-mh-son

Oʻzbekiston Respublikasi axborot texnologiyalari va kommunikatsiyalarini rivojlantirish vazirining 2015-yil 27-noyabrdagi 141-mh-sonli buyrugʻiga ILOVA

Ochiq maʼlumotlarni shakllantirish, ularni joylashtirish va qayta ishlash

reglamenti

Ushbu Reglament Oʻzbekiston Respublikasining “Davlat hokimiyati va boshqaruvi organlari faoliyatining ochiqligi toʻgʻrisida”gi Qonuni va Oʻzbekiston Respublikasi Vazirlar Mahkamasining 2015-yil 7-avgustdagi 232-sonli “Ochiq maʼlumotlar taqdim etilishi hisobga olingan holda Internet tarmogʻida Oʻzbekiston Respublikasining Hukumat portalini yanada takomillashtirish chora-tadbirlari toʻgʻrisida”gi qaroriga muvofiq ochiq maʼlumotlarni shakllantirish, ularni joylashtirish va qayta ishlash tartibini belgilaydi.

1-bob. Umumiy qoidalar

1. Ushbu Reglamentda quyidagi asosiy tushunchalardan foydalaniladi:

Oʻzbekiston Respublikasi Ochiq maʼlumotlar portali (bundan buyon matnda Portal deb yuritiladi) — Internet tarmogʻidagi Oʻzbekiston Respublikasining Hukumat portali doirasida faoliyat koʻrsatuvchi hamda davlat va xoʻjalik boshqaruvi organlari, mahalliy davlat hokimiyati organlarining (bundan buyon matnda davlat organlari deb yuritiladi) ochiq maʼlumotlarini joylashtirish uchun moʻljallangan, ochiq maʼlumotlarni eʼlon qilishda va ulardan foydalanishda Portal operatori, ochiq maʼlumotlarni yetkazib beruvchilar va foydalanuvchilar oʻrtasidagi oʻzaro hamkorlikni taʼminlovchi dasturiy va apparat vositalarining yigʻindisidan iborat axborot resursi;

ochiq maʼlumotlar — koʻp marotaba, erkin va bepul foydalanish maqsadida mashinada oʻqiladigan formatda Internet tarmogʻida joylashtirilgan davlat organlarining faoliyati toʻgʻrisidagi axborot;

mashinada oʻqiladigan format — maʼlumotlarni dasturiy qayta ishlanishini taʼminlovchi, ushbu maʼlumotlarni taqdim etishning elektron formati;

ochiq maʼlumotlar toʻplami — ochiq maʼlumotlarning bir turdagi elementlari va ularni tavsiflovchi atributlar majmui;

ochiq maʼlumotlar toʻplamining pasporti — ochiq maʼlumotlar toʻplamini bir xil identifikatsiya qilish imkonini beruvchi ushbu toʻplam toʻgʻrisidagi maʼlumotlar majmui;

Portal operatori — Portaldan foydalanish boʻyicha faoliyatni, shu jumladan Portal maʼlumotlar bazalaridagi axborotni qayta ishlashni amalga oshiruvchi yuridik shaxs — Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi “Elektron hukumat” tizimini rivojlantirish markazi;

ochiq maʼlumotlarni yetkazib beruvchi (bundan buyon matnda yetkazib beruvchi deb yuritiladi) — Portal operatoriga Portalda joylashtirish uchun ochiq maʼlumotlar toʻplamlarini taqdim etuvchi davlat organi;

foydalanuvchilar — Portaldan foydalanib ochiq maʼlumotlardan foydalana oluvchi jismoniy va yuridik shaxslar;

ochiq maʼlumotlar toʻplamlarining reyestri — avtomatlashtirilgan rejimda ochiq maʼlumotlar toʻplamlarini qidirish va ularning asosiy parametrlarini, shu jumladan ochiq maʼlumotlar toʻplamlaridan foydalanish uchun zarur boʻlgan havolalarni olish imkonini beradigan ochiq maʼlumotlar toʻplamlarining tizimlashtirilgan roʻyxati;

“Ochiq maʼlumotlar” boʻlimi — faqat ochiq maʼlumotlar toʻplamlari eʼlon qilinishi amalga oshiriladigan davlat organlarining rasmiy veb-saytidagi boʻlimi.

2. Ochiq maʼlumotlar davlat organlari tomonidan, oʻz funksiya va vakolatlarini bajarishlari munosabati bilan yaratiladi, jamlanadi va saqlanadi.

2-bob. Portal operatorining asosiy vazifalari

3. Quyidagilar Portal operatorining asosiy vazifalari hisoblanadi:

Portalning uzluksiz ishlashini, shu jumladan axborot xavfsizligi sohasidagi talablarga muvofiq ochiq maʼlumotlarning Portalda saqlanishi va himoyalanishini taʼminlash;

yetkazib beruvchilar tomonidan shakllantirilgan ochiq maʼlumotlar toʻplamlari Portalda mashinada oʻqiladigan formatda, ochiq maʼlumotlardan takror foydalanishga toʻsqinlik qiladigan cheklovlarsiz joylashtirilishini taʼminlash;

Portalda joylashtirilgan ochiq maʼlumotlar foydalanuvchilari uchun doimiy ravishda foydalanish imkoniyatini taʼminlash;

ochiq maʼlumotlar toʻplamlarining pasportlarini tuzish, rasmiylashtirish va Portalda eʼlon qilish;

Portalning dasturiy-texnik vositalari yordamida tushgan foydalanuvchilarning axborot xabarlarini tegishli yetkazib beruvchilarga, xabarlar foydalanuvchidan olingan kundan keyingi kundan kechiktirmay qayta ishlash va koʻrib chiqish uchun yuborish;

Portalda eʼlon qilingan ochiq maʼlumotlar toʻplamlari dolzarbligining doimiy monitoringini olib borish;

Portaldagi talab kuchli boʻlgan ochiq maʼlumotlar toʻplamlari statistikasining eʼlon qilinishini taʼminlash;

Portaldagi ochiq maʼlumotlar toʻplamini yangilash muddati kechiktirilgan taqdirda yetkazib beruvchini xabardor qilish.

3-bob. Ochiq maʼlumotlar toʻplamlarini rasmiylashtirish formatlari va qoidalariga, shuningdek ularga kiritiladigan axborotning tarkibiga qoʻyiladigan talablar

4. Ochiq maʼlumotlar toʻplamlari lotin alifbosidan foydalanilgan holda davlat tilida taqdim etiladi. Ochiq maʼlumotlar toʻplamlari ularni joylashtirish imkoniyati va texnik vositalar mavjud boʻlganda qoʻshimcha ravishda boshqa tillarda ham taqdim etilishi mumkin.

5. Ochiq maʼlumotlar toʻplamlari ularni rasmiylashtirish formatlari va qoidalarining quyidagi talablariga javob berishi kerak:

mashinada oʻqiladigan formatda (XLSX, CSV, XML, JSON, PDF) eʼlon qilinishi kerak. CSV formatida yassi jadval shakliga ega maʼlumotlar eʼlon qilinishi kerak, bunda yozuv tarkibida satrni koʻchirish simvolidan foydalanishga yoʻl qoʻyilmaydi. Murakkab iyerarxiyali maʼlumotlarni XML formatida eʼlon qilish zarur;

katta hajmlar, tez-tez yangilanishlar yoki spetsifik tanlovlarni shakllantirish zarur boʻlgan hollarda, eʼlon qilingan spetsifikatsiyaga ega boʻlgan dasturiy interfeys orqali taqdim etilishi kerak. Bunda ochiq maʼlumotlar toʻplamidan avtomatik foydalana olishni amalga oshirish uchun yetarli boʻlgan ochiq maʼlumotlar toʻplami sahifasida dasturiy interfeysning toʻliq tavsifi (bayonnomalar spetsifikatsiyalari, maʼlumotlar formati, servisdan foydalana olishning birlamchi parametrlari va boshqalar) keltirilishi kerak;

ochiq maʼlumotlar toʻplamlaridagi maʼlumotlar ulardan dasturiy interfeys orqali avtomatik foydalana olish imkoniyati bilan taʼminlanishi kerak;

ochiq maʼlumotlar toʻplamining saqlanadigan versiyalari soni foydalanuvchilarning ehtiyojlarini hisobga olgan holda, saqlash uchun resurs imkoniyatlaridan kelib chiqib belgilanadi;

ochiq maʼlumotlar toʻplamlarining tuzilmasi ochiq maʼlumotlar toʻplamining har bir axborot maydoni tavsifini namoyish etishi kerak;

ochiq maʼlumotlar toʻplamining tuzilmasi oʻzgartirilganda tuzilmaning versiyaliligi va bu versiyaning ochiq maʼlumotlarning keyingi toʻplamlariga mos kelishi taʼminlanishi kerak. Ochiq maʼlumotlar toʻplamlari tuzilmasining har bir saqlanadigan versiyasi havolaga ega boʻlishi kerak;

ochiq maʼlumotlar toʻplami har bir tuzilmasining atributlari ingliz tilidagi nomlar yoki qisqa transliteratsiya matni koʻrinishida ingliz tilida koʻrsatilishi kerak.

6. Portalda ochiq maʼlumotlar toʻplamlarida eʼlon qilinadigan maʼlumotlar “Davlat hokimiyati va boshqaruvi organlari faoliyati ochiqligi toʻgʻrisida”gi Oʻzbekiston Respublikasi Qonunining talablari asosida shakllantiriladi.

7. Ochiq maʼlumotlar toʻplamiga kiritiladigan axborot quyidagi talablarga javob berishi kerak:

jismoniy shaxslarning shaxsiy maʼlumotlaridan foydalana olishni taʼminlamasligi kerak;

davlat, bank, tijorat, soliq yoki qonun bilan muhofaza qilinadigan boshqa sirni oʻz ichiga olgan maʼlumotlarni, shuningdek maxfiy axborotni oshkor qilmasligi kerak;

notoʻgʻri maʼlumotlarni oʻz ichiga olmasligi kerak;

qonunchilik hujjatlari bilan taqiqlangan boshqa maʼlumotlarni oʻz ichiga olmasligi kerak.

4-bob. Ochiq maʼlumotlar toʻplamining pasportini rasmiylashtirish formatlari va qoidalariga qoʻyiladigan talablar

8. Eʼlon qilinadigan ochiq maʼlumotlar toʻplamlariga Portal operatori tomonidan 2010-yil versiyasidan past boʻlmagan MS Word formatida tuziladigan va rasmiylashtiriladigan ochiq maʼlumotlar toʻplamining pasporti ilova qilinishi kerak.

9. Ochiq maʼlumotlar toʻplamining pasporti lotin alifbosidan foydalanilgan holda davlat tilida tuzilgan boʻlishi kerak. Ochiq maʼlumotlar toʻplamining pasporti qoʻshimcha ravishda boshqa tillarda ham tuzilishi mumkin.

10. Ochiq maʼlumotlar toʻplamining pasporti quyidagi axborotni oʻz ichiga olishi kerak:

Portal operatori tomonidan beriladigan ochiq maʼlumotlar toʻplamining identifikatsiya raqami (kodi);

ochiq maʼlumotlar toʻplamining toʻliq nomi;

ochiq maʼlumotlar toʻplamining tavsifi;

yetkazib beruvchining nomi;

ochiq maʼlumotlarning toʻplamlarini Portalda eʼlon qilish masalalari boʻyicha yetkazib beruvchining masʼul shaxsi (bundan buyon matnda masʼul shaxs deb yuritiladi) bilan bogʻlanish maʼlumotlari (F.I.O., telefon raqami, “UZ” domenli elektron pochta manzili);

boshqa veb-resurslardagi ochiq maʼlumotlar toʻplamiga havola;

ochiq maʼlumotlar toʻplamining formati;

ochiq maʼlumotlar toʻplami tuzilmasining tavsifi. Bunda ochiq maʼlumotlar toʻplami tuzilmasining tavsifini oʻz ichiga olgan faylga havola kiritilishi lozim;

ochiq maʼlumotlar toʻplamining birinchi eʼlon qilingan sanasi, shu jumladan boshqa veb-resurslarda;

oxirgi kiritilgan oʻzgartirishlar sanasi;

oxirgi kiritilgan oʻzgartirish mazmuni;

ochiq maʼlumotlar toʻplamining avvalgi versiyasiga havola;

ochiq maʼlumotlar toʻplamini yangilash davriyligi;

ochiq maʼlumotlar toʻplamining mazmuniga mos keluvchi kalit soʻzlari.

11. Ochiq maʼlumotlar toʻplamining pasporti quyidagi uni rasmiylashtirish formatlari va qoidalariga qoʻyiladigan talablarga javob berishi kerak:

shrifti — “Times New Roman”;

shrift oʻlchami — 14;

joylashishi — sahifaning chap tomoni boʻyicha.

12. Ochiq maʼlumotlar toʻplamining pasportini toʻldirish namunasi ushbu Reglamentga ilovada keltirilgan.

5-bob. Ochiq maʼlumotlarni Portalda joylashtirish va Portalda joylashtirilgan ochiq maʼlumotlar bilan ishlash maqsadida Portal operatori, yetkazib beruvchilar va foydalanuvchilarning oʻzaro hamkorligi, shuningdek ochiq maʼlumotlarni Portalda joylashtirish tartibi

13. Ochiq maʼlumotlarni Portalda joylashtirish va Portalda joylashtirilgan ochiq maʼlumotlar bilan ishlash maqsadida Portal operatori va yetkazib beruvchilarning oʻzaro hamkorligi Vazirlar Mahkamasining 2015-yil 7-avgustdagi 232-sonli “Ochiq maʼlumotlar taqdim etilishi hisobga olingan holda Internet tarmogʻida Oʻzbekiston Respublikasining Hukumat portalini yanada takomillashtirish chora-tadbirlari toʻgʻrisida”gi qaroriga muvofiq amalga oshiriladi.

14. Ochiq maʼlumotlar toʻplamlarini Portalda eʼlon qilish uchun masʼul shaxs data.gov.uz veb-saytida roʻyxatdan oʻtadi.

15. Masʼul shaxs roʻyxatdan oʻtgandan keyin yetkazib beruvchi Portal operatoriga ochiq maʼlumotlar toʻplamini Portalda eʼlon qilish uchun masʼul shaxsning maʼlumotlarini koʻrsatgan va zarur materiallarni ilova qilgan holda rasmiy soʻrov yuboradi.

16. Etkazib beruvchidan rasmiy soʻrovni olgandan keyin Portal operatori masʼul shaxsga ochiq maʼlumotlar toʻplamlarini eʼlon qilish uchun Portalda shaxsiy kabinetga kirish imkoniyatini taqdim etadi.

17. Masʼul shaxs roʻyxatdan oʻtib, shaxsiy kabinetga kirish imkoniyatiga ega boʻlganidan soʻng Portalda ochiq maʼlumotlar toʻplamlarini eʼlon qiladi.

18. Har bir foydalanuvchi Internet tarmogʻi orqali data.gov.uz veb-saytida Portaldagi ochiq maʼlumotlardan foydalanish huquqiga ega.

19. Foydalanuvchilar Portal operatoriga Portalning dasturiy-texnik vositalaridan foydalangan holda uning faoliyat koʻrsatish masalalari boʻyicha va yetkazib beruvchilarga Portalda joylashtirilgan ochiq maʼlumotlar toʻplamlari yuzasidan axborot xabarlarini yuborishga haqlidir.

20. Ochiq maʼlumotlar toʻplamini Portalda joylashtirishda majburiy tartibda ochiq maʼlumotlardan foydalanish shartlari yoki ularga boʻlgan havolani koʻrsatish zarur. Bunda ochiq maʼlumotlardan foydalanish shartlari foydalanuvchilardan yetkazib beruvchilar bilan biror-bir shartnoma tuzilishini talab qilmasligi va foydalanuvchilarni ochiq maʼlumotlarni notijorat va (yoki) tijorat maqsadlarida qoʻllashini cheklamasligi kerak.

21. Ochiq maʼlumotlardan foydalanish bepul asosda amalga oshiriladi.

6-bob. Ochiq maʼlumotlar toʻplamini va ochiq maʼlumotlar toʻplamining pasportini Internet tarmogʻida joylashtirish qoidalari

22. Ochiq maʼlumotlar toʻplamini va ochiq maʼlumotlar toʻplamining pasportini Internet tarmogʻida joylashtirish, Portalda joylashtirishdan tashqari, davlat organining rasmiy veb-saytida amalga oshiriladi.

23. Ochiq maʼlumotlar toʻplamini va ochiq maʼlumotlar toʻplamining pasportini davlat organining rasmiy veb-saytida joylashtirish uchun quyidagilar zarur:

ochiq maʼlumotlar toʻplamlarini mashinada oʻqiladigan formatda eʼlon qilish uchun “Ochiq maʼlumotlar” boʻlimini yaratish;

veb-saytning bosh sahifasida “Ochiq maʼlumotlar” boʻlimiga vizual farqlanadigan havolani kiritish;

“Ochiq maʼlumotlar” boʻlimida ochiq maʼlumotlar toʻplamlarining alohida sahifalariga havolalardan iborat ochiq maʼlumotlar toʻplamlarining reyestrini koʻrsatish.

24. Ochiq maʼlumotlar toʻplamini va ochiq maʼlumotlar toʻplamining pasportini Internet tarmogʻida joylashtirish qoʻshimcha ravishda boshqa veb-resurslarda ham ixtiyoriy shaklda amalga oshirilishi mumkin.

7-bob. Yakuniy qoida

25. Ushbu Reglament talablarini buzganlikda aybdor shaxslar qonunchilik hujjatlariga muvofiq javobgar boʻladilar.

Ochiq maʼlumotlarni shakllantirish, ularni joylashtirish va qayta ishlash reglamentiga ILOVA

Ochiq maʼlumotlar toʻplamining pasportini toʻldirish

namunasi

Ochiq maʼlumotlar toʻplamining pasporti T/r Xarakteristikasi Tavsifi 1. Ochiq maʼlumotlar toʻplamining identifikatsiya raqami (kodi) 17-16 2. Ochiq maʼlumotlar toʻplamining nomi Oliy taʼlim muassasalari toʻgʻrisida axborot 3. Ochiq m�ʼlumotlar toʻplamining tavsifi Oʻzbekiston Respublikasi oliy taʼlim muassasalari toʻgʻrisidagi asosiy axborot 4. Ochiq maʼlumotlarni yetkazib beruvchining nomi Oʻzbekiston Respublikasi Oliy va oʻrta maxsus taʼlim vazirligi 5. Masʼul shaxs bilan bogʻlanish maʼlumotlari F.I.O., Telefon: +99800-000-00-00, Elektron pochta manzili: [email protected] 6. Ochiq maʼlumotlar toʻplamiga havola http://edu.uz/___________________ 7. Ochiq maʼlumotlar toʻplamining formati XML, CSV 8. Ochiq maʼlumotlar toʻplami tuzilmasining tavsifi http://edu.uz/___________________ 9. Ochiq maʼlumotlar toʻplamining birinchi eʼlon qilingan sanasi kk.oo.yyyy 10. Oxirgi oʻzgartirish kiritilgan sana kk.oo.yyyy 11. Oxirgi oʻzgartirish mazmun� Ayrim oliy oʻquv yurtlarining nomi oʻzgartirilgan 12. Ochiq maʼlumotlar toʻplamining avvalgi versiyasiga havola http://data.gov.uz/___________________ 13. Ochiq maʼlumotlar toʻplamini yangilash davriyligi Har oy 14. Ochiq maʼlumotlar toʻplami mazmuniga mos keluvchi kalit soʻzlar Oliy oʻquv yurti, institut, universitet, kafedra