Ishni koʻrish ish yuritishni tugatish toʻgʻrisidagi ajrim bilan yakunlanganda davlat boji qaytarilmaydi, toʻlanmagan davlat boji esa daʼvogardan undiriladi (18-01003/5599-son)

02.08.2010

Oʻzbekiston Respublikasi Oliy xoʻjalik sudi sudlov hayʼatining

Qarori

[Koʻchirma]

Daʼvogar — “LYUKS-LTD” xususiy firmasi tugatish boshqaruvchisi sudga daʼvo ariza bilan murojaat qilib, javobgar — Qashqadaryo viloyat hokimligi “Injiniring kompaniyasi”dan jami 271803939 soʻm undirishni soʻragan.

Birinchi instansiya sudining 2010-yil 6-apreldagi ajrimi bilan ish yuritish tugatilgan.

Apellatsiya instansiyasi sudining 2010-yil 26-maydagi qarori bilan hal qiluv qarori oʻzgarishsiz qoldirilgan.

Kassatsiya shikoyatida sud hujjatlarini bekor qilib, daʼvo talablarini qanoatlantirish soʻralgan.

Sudlov hayʼati kassatsiya shikoyatida keltirilgan vajlarni ish hujjatlari bilan birgalikda muhokama qilib, quyidagilarga koʻra kassatsiya shikoyatini qanoatlantirmasdan, hal qiluv qarorini oʻzgarishsiz qoldirishni lozim topadi.

Ish hujjatlaridan koʻrinishicha, Qashqadaryo viloyat xoʻjalik sudining 2009-yil 4-avgustdagi 18-0903/11566-sonli hal qiluv qarori bilan “LYUKS-LTD” xususiy firmasi bankrot deb topilgan va tugatishga doir ish yuritish boshlangan. Tugatish boshqaruvchisi etib T.Eshmurodov tayinlangan.

Tugatishga doir ish yuritish jarayonida “LYUKS-LTD” xususiy firmasi tomonidan buyurtmachi — viloyat “Injiniring kompaniyasi” tomonidan tayyorlangan loyiha-smeta hujjatlari asosida Kasbi tuman 2-sonli Denov kasb-hunar kollejida 1275921376 soʻmlik qurilish-taʼmirlash ishlari bajarilganligi, ushbu bajarilgan ishlar uchun javobgar tomonidan 1198116406 soʻm toʻlov amalga oshirilganligi, qolgan 77804970 soʻmlik bajarilgan ishlar haqi hamda qurilish materiallari boʻyicha 19008199 soʻmlik farq mavjudligi, Qarshi shahar 1-sonli transport kasb-hunar kollejida 803893205 soʻmlik qurilish-taʼmirlash ishlari bajarilganligi, ushbu bajarilgan ishlar uchun javobgar tomonidan 741676748 soʻm toʻlov amalga oshirilganligi, qolgan 62216457 soʻm bajarilgan ishlar haqi hamda qurilish materiallari oʻrtasida 112774395 soʻm farq mavjudligi aniqlangan. Shunga koʻra, tugatish boshqaruvchisi javobgar — viloyat “Injiniring kompaniyasi”dan bajarilgan ishlar uchun jami 271803939 soʻm undirishni soʻragan.

Biroq, mazkur nizo boʻyicha Qashqadaryo viloyat xoʻjalik sudining 2006-yil 17-martdagi 18-0502/6597-sonli xoʻjalik ishi boʻyicha hal qiluv qarori mavjud boʻlib, unda “LYUKS-LTD” xususiy firmasining daʼvosi rad etilgan. Hal qiluv qarori kassatsiya instansiyasi sudining 2007-yil 5-fevraldagi 18-0502/6597-sonli qarori bilan oʻzgarishsiz qoldirilgan.

Oʻzbekiston Respublikasi Xoʻjalik protsessual kodeksi 60-moddasining ikkinchi qismiga koʻra, xoʻjalik sudining ilgari koʻrgan ish boʻyicha qonuniy kuchga kirgan hal qiluv qarori bilan aniqlangan holatlar, xuddi shu shaxslar ishtirokchisi boʻlgan boshqa ishni sud koʻrayotganda yangidan isbot qilinmaydi. Ushbu Kodeks 86-moddasining 2-bandiga koʻra, umumiy sud, xoʻjalik sudining ayni bir shaxslar oʻrtasidagi ayni bir predmet toʻgʻrisidagi va ayni bir asoslar boʻyicha nizo yuzasidan qonuniy kuchga kirgan hal qiluv qarori boʻlsa, ish boʻyicha ish yuritish tugatilishi belgilangan.

Birinchi instansiya sudi tomonidan nizo boʻyicha ish yuritish tugatilib, asosli xulosaga kelingan. Apellatsiya instansiyasi sudining qarori bilan ajrim oʻzgarishsiz qoldirilgan.

Biroq, sudlar tomonidan davlat boji undirish masalasi ochiq qoldirilgan.

“Bankrotlik toʻgʻrisida”gi Oʻzbekiston Respublikasi Qonunining 19-moddasiga koʻra, sud boshqaruvchisi oldindan davlat boji toʻlamay turib, daʼvo arizalari va boshqa arizalar bilan xoʻjalik sudiga murojaat etish huquqiga ega.

Oʻzbekiston Respublikasi Oliy xoʻjalik sudi Plenumining 2008-yil 18-apreldagi “Xoʻjalik sudlari tomonidan davlat boji toʻgʻrisidagi qonun hujjatlarini qoʻllashning ayrim masalalari haqida”gi 180-sonli qarorining 14-bandida ishni koʻrish ish yuritishni tugatish toʻgʻrisidagi ajrim bilan yakunlanganda davlat boji qaytarilmasligi, toʻlanmagan davlat boji esa daʼvogardan undirilishi toʻgʻrisida tushuntirish berilgan.

Bunday holatda sudlov hayʼati ishni birinchi instansiya sudida koʻrish bilan bogʻliq 2718039 soʻm davlat boji, ishni apellatsiya instansiyasi sudida koʻrish bilan bogʻliq 1359019 soʻm davlat boji hamda ishni kassatsiya instansiyasi sudida koʻrish bilan bogʻliq 1359019 soʻm davlat bojini daʼvogardan undirishni lozim deb hisoblaydi.

2010-yil 2-avgust,

18-01003/5599-son