Haydovchilik guvohnomalarini oʻzaro tan olish va almashtirish toʻgʻrisida

28.05.2015

Oʻzbekiston Respublikasi Hukumati bilan Koreya Respublikasi Hukumati oʻrtasida

Bitim

Oʻzbekiston Respublikasi Hukumati va Koreya Respublikasi Hukumati, keyingi oʻrinlarda “Tomonlar” deb ataluvchilar,

ikki davlat hududida yoʻl harakatini yengillashtirishdan manfaatdor boʻlgan holda,

Oʻzbekiston Respublikasida va Koreya Respublikasida berilgan haydovchilik guvohnomalarini oʻzaro tan olish va almashtirishni taʼminlash istagida,

kuyidagilar toʻgʻrisida kelishib oldilar:

1-modda

1. Tomonlardan birining vakolatli organi quyidagi talablarga mos keladigan boshqa Tomon davlati fuqarolariga oʻz davlati hududida transport vositalarini boshqarish huquqini beradi:

(a) Koreya Respublikasi fuqarolari uchun:

(i) Koreya Respublikasi vakolatli organlari tomonidan berilgan amaldagi Koreya haydovchilik guvohnomasiga ega boʻlsa; va

(ii) Oʻzbekiston Respublikasi hududida yashash uchun ruxsat etilgan boʻlsa;

(b) Oʻzbekiston Respublikasi fuqarolari uchun:

(i) Oʻzbekiston Respublikasi vakolatli organi tomonidan berilgan amaldagi Oʻzbekiston haydovchilik guvohnomasiga ega boʻlsa; va

(ii) Koreya Respublikasi hududida “xorijiy fuqaroni roʻyxatga olish kartasi”ga ega boʻlsa.

2. Koreya haydovchilik guvohnomasi, basharti Koreya Respublikasi vakolatli organi tomonidan qoʻyilgan apostil hamda Oʻzbekiston Respublikasidagi notarial idora tomonidan tasdiqlangan oʻzbek tilidagi tarjimasi boʻlgan taqdirda, uning egasidan transport vositasini boshqarish qobiliyati boʻyicha nazariy va amaliy imtihonlarni topshirish talab etilmasdan, Oʻzbekiston Respublikasi hududida Oʻzbekiston haydovchilik guvohnomasi bilan teng ravishda amal qiladi deb tan olinadi.

3. Oʻzbekiston haydovchilik guvohnomasi, uning egasidan transport vositasini boshqarish qobiliyati boʻyicha nazariy va amaliy imtihonlarni topshirish talab etilmasdan, Koreya Respublikasi vakolatli organi tomonidan tan olinadi va Koreya haydovchilik guvohnomasiga almashtirib beriladi.

4. Haydovchilik kursi ishtirokchisi yoki oʻrganuvchi-haydovchi hisoblangan Koreya Respublikasi fuqarolariga berilgan vaqtinchalik haydovchilik guvohnomalari ushbu Bitimga muvofiq oʻzaro tan olinmaydi.

5. Tomonlarning vakolatli organlari tarafidan beriladigan haydovchilik guvohnomalari toifalarining ekvivalentligi ushbu Bitim ilovasida koʻrsatilgan jadvalga muvofiq aniqlanadi.

6. Mazkur modda qoidalari ushbu Bitimda nazarda tutilgan haydovchilarning yoshi, sogʻligʻi va ruhiy holati bilan bogʻliq boʻlgan transport vositasini boshqarish boʻyicha har bir Tomon davlati milliy qonunchiligidagi cheklovlarga daxl qilmaydi.

2-modda

1. Koreya Respublikasining vakolatli organi oʻz haydovchilik guvohnomasini almashtirib berishni soʻrab murojaat qilgan shaxsdan quyidagilarni talab qilishi mumkin:

(a) Oʻzbekiston Respublikasi vakolatli organi tomonidan berilgan haydovchilik guvohnomasining asl nusxasi hamda uning koreys yoki ingliz tilidagi tasdiqlangan tarjimasini topshirish;

(b) tegishli haydovchilik guvohnomasiga mos turdagi transport vositalarini boshqarish uchun murojaat qiluvchining sogʻligʻi va ruhiy holatini tasdiqlash;

(c) Koreya Respublikasi milliy qonunchiligida belgilangan boshqa har qanday hujjatlarni taqdim qilish va toʻlovlarni amalga oshirish.

2. Koreya Respublikasining vakolatli organi, basharti murojaat qiluvchining sogʻligʻi yoki ruhiy holati tegishli haydovchilik guvohnomasi uchun talab qilinadigan darajaga mos kelmasa, haydovchilik guvohnomasini almashtirishni rad etishi mumkin.

3-modda

Ushbu Bitimni amalga oshirishda har bir Tomon haydovchilarni roʻyxatga olishga doir oʻz davlati milliy qonunchiligini qoʻllaydi.

4-modda

1. 1-moddada nazarda tutilgan haydovchilik guvohnomalarining amalda ekanligi yoki haqiqiyligiga shubha boʻlgan taqdirda, bir Tomon vakolatli organi boshqa Tomon vakolatli organidan ushbu haydovchilik guvohnomasining amaldaligi yoki haqiqiyligini tasdiqlashini soʻrashi mumkin.

2. Soʻrov qabul qilinganidan soʻng, qabul qiluvchi Tomonning vakolatli organi haydovchilik guvohnomasining amaldaligi yoki haqiqiyligiga doir har qanday xato va kamchiliklar toʻgʻrisida soʻrayotgan Tomonning vakolatli organini xabardor etadi.

3. Har bir Tomon boshqa Tomon davlati fuqarosining haydovchilik guvohnomasi haqiqiy emasligi haqida xabardor qilinsa, u mazkur haydovchilik guvohnomasini almashtirish yoki tan olishni rad etishi mumkin.

5-modda

Oʻzbekiston Respublikasi vakolatli organining soʻroviga asosan, Koreya Respublikasi vakolatli organi tomonidan almashtirish maqsadida olib qoʻyilgan haydovchilik guvohnomalarining asl nusxalari diplomatik kanallar orqali Oʻzbekiston Respublikasi vakolatli organiga yuborilishi mumkin.

6-modda

1. Tomonlar ushbu Bitim kuchga kirishidan avval diplomatik kanallar orqali bir-birlariga quyidagilarni taqdim etadilar:

(a) oʻz vakolatli organlarining toʻliq nomi, manzili, telefon va faks raqamlari, elektron pochta manzili; va

(b) ushbu Bitim ilovasida nazarda tutilgan amaldagi haydovchilik guvohnomalari namunalari.

2. Tomonlar oʻz haydovchilik guvohnomalaridagi har qanday oʻzgarishlar yoki ushbu Bitim ijrosiga daxl qiladigan milliy qonunchilikdagi oʻzgarish va qoʻshimchalar, shuningdek oʻz vakolatli organlarining aloqa uchun maʼlumotlaridagi har qanday oʻzgarishlar toʻgʻrisida bir-birlarini diplomatik kanallar orqali zudlik bilan xabardor qiladilar.

7-modda

Ushbu Bitim doirasida Tomonlarning vakolatli organlari oʻrtasidagi aloqa va diplomatik kanallar orqali yozishmalar Tomonlarning davlat tilida amalga oshirilib, ingliz yoki rus tilidagi tarjimasi ilova qilinadi.

8-modda

1. Ushbu Bitim Tomonlar ishtirokchi hisoblangan boshqa xalqaro shartnomalardan kelib chiqadigan huquq va majburiyatlariga daxl qilmaydi.

2. Ushbu Bitim har bir Tomonning amaldagi milliy qonunchiligiga muvofiq amalga oshiriladi.

3. Ushbu Bitimni talqin qilish yoki amalga oshirishda yuzaga keladigan har qanday kelishmovchiliklar Tomonlar oʻrtasida maslahatlashuvlar oʻtkazish yoʻli bilan diplomatik kanallar orqali hal etiladi.

9-modda

1. Ushbu Bitim uning kuchga kirishi uchun zarur boʻlgan davlat ichki protseduralarining bajarilgani toʻgʻrisida Tomonlarning oxirgi yozma xabarnomasi olingandan soʻng oʻttizinchi (30) kundan boshlab kuchga kiradi. Bitim nomuayyan muddatgacha oʻz kuchida qoladi.

2. Har bir Tomon diplomatik kanallar orqali boshqa Tomonga yozma xabarnoma yuborish bilan ushbu Bitim amal qilishini tugatishi mumkin. Mazkur holda Bitim boshqa Tomon xabarnomani qabul qilganidan soʻng oʻttizinchi (30) kundan boshlab amal qilishdan toʻxtaydi.

3. Ushbu Bitimga Tomonlarning kelishuviga asosan oʻzgartish va qoʻshimchalar kiritilishi mumkin. Bunday oʻzgartish va qoʻshimchalar Tomonlar oʻrtasida oʻzaro kelishilgan kundan eʼtiboran kuchga kiradi.

Yuqoridagilarni eʼtirof etgan holda, oʻz Hukumatlari tomonidan tegishli vakolatlarga ega boʻlgan quyida imzo chekuvchilar mazkur Bitimni imzoladilar.

Seul shahrida 2015-yil 28-mayda har biri oʻzbek, koreys va ingliz tillarida boʻlgan ikki asl nusxada imzolandi, bunda barcha matnlar teng autentikdir. Talqin qilishda kelishmovchiliklar yuzaga kelganda ingliz tilidagi matn ustuvor hisoblanadi.

(imzolar)

ILOVA

EKVIVALENTLIK JADVALI

1. Koreya haydovchilik guvohnomalariga almashtirilishi mumkin boʻlgan Oʻzbekiston haydovchilik guvohnomalari Oʻzbekiston haydovchilik guvohnomalari Tegishli Koreya haydovchilik guvohnomasi “VSE” toifadagi haydovchilik guvohnomasi Ikkinchi oddiy toifadagi haydovchilik guvohnomasi (Second Class Ordinary Driverʼs License) “BCDE” toifadagi haydovchilik guvohnomasi “BCD” toifadagi haydovchilik guvohnomasi “V” toifadagi haydovchilik guvohnomasi 2. Oʻzbekiston haydovchilik guvohnomalari bilan teng amalda boʻlishini tan olish mumkin boʻlgan Koreya haydovchilik guvohnomalari Koreya haydovchilik guvohnomalari Tegishli Oʻzbekiston haydovchilik guvohnomasi Birinchi maxsus toifadagi haydovchilik guvohnomasi (First Class Special Driver's License) “V” toifadagi haydovchilik guvohnomasi Birinchi katta toifadagi haydovchilik guvohnomasi (First Class Large Driver's License) Birinchi oddiy toifadagi haydovchilik guvohnomasi (First Class Ordinary Driver's License) Ikkinchi oddiy toifadagi haydovchilik guvohnomasi (Second Class Ordinary Driver's 1 License)