Texnik talablarga javob bermaydigan nazorat-kassa mashinalaridan foydalanganlik yoki fiskal xotirasining xizmat koʻrsatish dasturi buzilgan nazorat-kassa mashinalaridan foydalanganlik, shuningdek plastik kartochkalar asosida toʻlovlarni qabul qilishni rad etganlik eng kam ish haqining yuz baravari miqdorida jarima solishga sabab boʻladi (23-1103/4437(31)-son)

28.06.2011

Oʻzbekiston Respublikasi Oliy xoʻjalik sudi sudlov hayʼatining

Qarori

[Koʻchirma]

Kegeyli tuman davlat soliq inspeksiyasi xoʻjalik sudiga murojaat qilib, “ALPAMIS” xususiy savdo korxonasiga 4521500 soʻm moliyaviy jarima qoʻllashni soʻragan.

Birinchi instansiya sudining hal qiluv qarori bilan daʼvo qanoatlantirilgan.

Apellatsiya instansiyasi sudining qarori bilan hal qiluv qarori oʻzgarishsiz qoldirilgan.

Kassatsiya shikoyatida sud qarorlarini bekor qilib, daʼvoni rad etish soʻralgan.

Sudlov hayʼati shikoyat vajlarini muhokama qilib, ishdagi hujjatlarni oʻrganib chiqib, quyidagilarga koʻra sud qarorlarini oʻzgarishsiz qoldirishni lozim topadi.

Ish hujjatlaridan koʻrinishicha, Nazorat qiluvchi organlar faoliyatini muvofiqlashtiruvchi Respublika Kengashi Kegeyli tuman hududiy komissiyasining 2010-yil 16-sentabrdagi 13-son ruxsatnomasi, Kegeyli tuman davlat soliq inspeksiyasining 2010-yil 20-sentabrdagi 90-xs-son buyrugʻiga asosan “ALPAMIS” xususiy savdo korxonasiga qarashli savdo doʻkonida qisqa muddatli tekshirish oʻtkazilgan.

Tekshirishda “ALPAMIS” xususiy savdo korxonasiga qarashli savdo doʻkoni sotuvchisi xaridor bilan naqd pulsiz (plastik kartochka orqali) hisob-kitob qilishdan bosh tortganligi aniqlangan.

Tekshirish natijalari yuzasidan hisoblangan moliyaviy sanksiyani ixtiyoriy toʻlash haqida Kegeyli tuman davlat soliq inspeksiyasining 2010-yil 5-oktabrdagi qarori korxona tomonidan bajarilmagach, daʼvogar javobgarga Soliq kodeksi 119-moddasining uchinchi qismiga asosan moliyaviy jarima qoʻllashni soʻragan.

Birinchi instansiya sudi daʼvoni qanoatlantirish haqida asosli xulosaga kelgan.

Oʻzbekiston Respublikasi Soliq kodeksi 119-moddasining uchinchi qismiga binoan texnik talablarga javob bermaydigan nazorat-kassa mashinalaridan foydalanganlik yoki fiskal xotirasining xizmat koʻrsatish dasturi buzilgan nazorat-kassa mashinalaridan foydalanganlik, shuningdek plastik kartochkalar asosida toʻlovlarni qabul qilishni rad etganlik eng kam ish haqining yuz baravari miqdorida jarima solishga sabab boʻladi.

“ALPAMIS” xususiy savdo korxonasiga qarashli savdo doʻkoni sotuvchisi xaridor bilan naqd pulsiz (plastik kartochka orqali) hisob-kitob qilishdan bosh tortganligi, yaʼni plastik kartochkalar asosida toʻlovlarni qabul qilishni rad etganligi ishdagi dalillar bilan isbotlangan.

Apellatsiya instansiyasi sudi ushbu holatlarga huquqiy baho berib, asosli ravishda hal qiluv qarorini oʻzgarishsiz qoldirgan.

Qayd etilganlarga koʻra, sudlov hayʼati sud qarorlarini oʻzgarishsiz qoldirishni lozim topadi.

2011-yil 28-iyun,

23-1103/4437(31)-son