Nizo xoʻjalik sudida koʻrish uchun tegishli boʻlmasa, sudya daʼvo arizasini qabul qilishni rad etadi (10-0805/269-o-son)

10.12.2008

Oʻzbekiston Respublikasi Oliy xoʻjalik sudi sudlov hayʼatining

Qarori

[Koʻchirma]

Daʼvogar — “UzRossel Trade” masʼuliyati cheklangan jamiyati qoʻshma korxonasi javobgar — “O`zbekqishloqsavdo” masʼuliyati cheklangan jamiyatiga nisbatan xoʻjalik sudiga murojaat qilib, 2008-yil 20-avgustda berilgan ijro varaqasini haqiqiy emas deb topishni soʻragan.

Birinchi instansiya sudining 2008-yil 29-sentabrdagi ajrimi bilan daʼvo arizasini qabul qilish rad etilgan.

Ish apellatsiya tartibida koʻrilmagan.

Kassatsiya shikoyatida sud ajrimini bekor qilib, daʼvo arizani mazmunan koʻrish uchun yuborish soʻralgan.

Sudlov hayʼati kassatsiya shikoyatida keltirilgan vajlarni muhokama qilib, ish hujjatlarini oʻrganib chiqib, quyidagilarga asosan sud ajrimini oʻzgarishsiz qoldirishni lozim topadi.

Ishdagi mavjud hujjatlarga koʻra, “UzRossel Trade” masʼuliyati cheklangan jamiyati xoʻjalik sudiga murojaat qilib, 2008-yil 20-avgustda berilgan ijro varaqasini haqiqiy emas deb topishni soʻragan.

Oʻzbekiston Respublikasi Xoʻjalik protsessual kodeksining 24-moddasida xoʻjalik sudi tomonidan hal etiladigan nizolar roʻyxati belgilangan. Ushbu moddada ijro varaqani haqiqiy emas deb topish haqida nizo xoʻjalik sudida koʻrish uchun tegishli ekanligi koʻrsatilmagan.

Oʻzbekiston Respublikasi Xoʻjalik protsessual kodeksining 117-moddasida daʼvo arizasini qabul qilishni rad etish asoslari koʻrsatilgan. Ushbu moddaning 1-bandiga koʻra, nizo xoʻjalik sudida koʻrish uchun tegishli boʻlmasa, sudya daʼvo arizasini qabul qilishni rad etadi.

Birinchi instansiya sudi taqdim etilgan daʼvo arizasi va unga ilova qilingan hujjatlar bilan tanishib chiqib, daʼvo arizasini qabul qilishni rad etish haqida asosli va toʻgʻri xulosaga kelgan.

Yuqoridagilarni inobatga olib, sudlov hayʼati sud ajrimini oʻzgarishsiz, kassatsiya shikoyatini esa qanoatlantirmasdan qoldirishni lozim topadi.

2008-yil 10-dekabr,

10-0805/269-o-son