Daʼvogarning nizoni sudgacha hal qilish tartibiga rioya etmaganligi daʼvoni koʻrmasdan qoldirishga asos boʻladi (14-0809/6998(21)-son)

16.12.2008

Oʻzbekiston Respublikasi Oliy xoʻjalik sudi sudlov hayʼatining

Qarori

[Koʻchirma]

Samarqand shahar hokimligi xoʻjalik sudiga murojaat qilib, “Vodrem-25” ochiq turdagi aksiyadorlik jamiyatini tugatishni soʻragan.

Birinchi instansiya sudining hal qiluv qarori bilan daʼvo rad etilgan.

Apellatsiya instansiyasi sudining qarori bilan hal qiluv qarori oʻzgarishsiz qoldirilgan.

Kassatsiya shikoyatida sud qarorlarini bekor qilib, daʼvoni qanoatlantirish soʻralgan.

Sudlov hayʼati shikoyat vajlarini muhokama qilib, ish hujjatlarini oʻrganib chiqib, quyidagilarga koʻra sud qarorlarini bekor qilib, daʼvoni koʻrmasdan qoldirishni lozim topadi.

Ishdagi hujjatlarga koʻra, “Vodrem-25” ochiq turdagi aksiyadorlik jamiyati Samarqand shahar Temiryoʻl tuman hokimligi tomonidan 1995-yil 11-iyulda davlat roʻyxatidan oʻtkazilgan. Uning nizom jamgʻarmasi 430000 soʻm miqdorida belgilangan.

Samarqand shahar hokimligi “Vodrem-25” ochiq turdagi aksiyadorlik jamiyatining Nizom jamgʻarmasi toʻliq shakllantirilmaganligini vaj qilib koʻrsatib, uni tugatish haqida daʼvo arizasi bergan.

Roʻyxatdan oʻtkazuvchi organ faoliyat koʻrsatmayotgan va ustav jamgʻarmasini shakllantirmagan korxonalarni tugatish tartibiga rioya etmasdan daʼvo arizasi berganligiga birinchi instansiya sudi eʼtibor bermasdan, moddiy va protsessual huquq normalarini notoʻgʻri qoʻllab, daʼvoni rad etgan. Apellatsiya instansiyasi sudi esa ushbu holatga huquqiy baho bermasdan, hal qiluv qarorini oʻzgarishsiz qoldirgan.

Oʻzbekiston Respublikasi Vazirlar Mahkamasining 1999-yil 3-iyuldagi 327-sonli qarori bilan tasdiqlangan “Moliya-xoʻjalik faoliyatini amalga oshirmayotgan va qonunchilikda belgilangan muddatlarda oʻzlarining ustav jamgʻarmasini shakllantirmagan korxonalarni tugatish tartibi toʻgʻrisida”gi nizomning 3.1-bandiga muvofiq roʻyxatdan oʻtkazuvchi organ moliya-xoʻjalik faoliyatini amalga oshirmayotgan va (yoki) qonunchilikda belgilangan muddatda oʻz ustav jamgʻarmasini shakllantirmagan korxonalar faoliyatini bundan keyin davom ettirishning maqsadga muvofiq emasligi toʻgʻrisida soliq organining taqdimnomasini yoki maxsus komissiyaning xulosasini olgan kundan boshlab bir hafta muddatda muassislarga (qatnashchilarga) yoki taʼsis hujjatlari bilan vakil qilingan organlarga, asoslarini koʻrsatgan holda yozma ravishda, korxonani ixtiyoriy tugatishni taklif etadi.

Korxona ikki hafta muddatda (aksiyadorlik jamiyati — bir oy muddatda) ixtiyoriy ravishda oʻzini tugatishga kirishmagan yoxud muassislar (qatnashchilar) yoki taʼsis hujjatlari bilan vakil qilingan organ korxonani ixtiyoriy ravishda tugatishni rad etgan taqdirda roʻyxatdan oʻtkazuvchi organ korxonani tugatish toʻgʻrisida xoʻjalik sudiga bir hafta muddatda belgilangan tartibda daʼvo arizasi yuboradi.

Ammo ushbu holda roʻyxatdan oʻtkazuvchi organ jamiyat muassislari (ishtirokchilari)ga korxonani ixtiyoriy tugatish haqida yozma taklif yubormagan.

Bunday holda sud Oʻzbekiston Respublikasi Xoʻjalik protsessual kodeksi 88-moddasining 5-bandiga asosan daʼvoni koʻrmasdan qoldirishi lozim edi.

Qayd etilganlarga koʻra sudlov hayʼati sud qarorlarini bekor qilib, daʼvoni koʻrmasdan qoldirishni lozim deb hisoblaydi.

2008-yil 16-dekabr,

14-0809/6998(21)-son