Davlat boji belgilangan tartibda va miqdorda toʻlanganligini tasdiqlovchi hujjatlar apellatsiya shikoyatiga ilova qilinmagan boʻlsa, qonunda davlat bojini toʻlash muddatini kechiktirish yoki boʻlib-boʻlib toʻlash imkoniyati nazarda tutilgan hollarda esa bu haqda iltimosnoma berilmagan yoxud iltimosnoma rad etilgan boʻlsa, apellatsiya shikoyati qaytariladi (14-0907/16041-son)
19.04.2010
Oʻzbekiston Respublikasi Oliy xoʻjalik sudi sudlov hayʼatining
Qarori
[Koʻchirma]
“AGERES STAR” MChJ xoʻjalik sudiga daʼvo arizasi bilan murojaat qilib, javobgar — “2-son MKK” MChJdan 292880981 soʻm asosiy qarz va 212000000 soʻm penya undirishni soʻragan.
Birinchi instansiya sudining 2009-yil 24-dekabrdagi hal qiluv qarori bilan daʼvo qisman qanoatlantirilib, “AGERES STAR” MChJ foydasiga “2-son MKK” MChJdan 292880981 soʻm asosiy qarz va 21200000 soʻm penya undirilgan. Daʼvoning qolgan qismi rad etilgan.
Shuningdek, birinchi instansiya sudining 2009-yil 24-dekabrdagi qaroriga asosan “2-son MKK” MChJ direktori maʼmuriy javobgarlikka tortilgan.
Apellatsiya instansiyasi sudining 2010-yil 25-yanvardagi ajrimi bilan apellatsiya shikoyati qaytarilgan.
Kassatsiya shikoyatida apellatsiya instansiyasi sudining ajrimini bekor qilib, ishni apellatsiya instansiyasi sudida koʻrish uchun yuborish soʻralgan.
Sudlov hayʼati kassatsiya shikoyatida keltirilgan vajlarni ish hujjatlari bilan birgalikda muhokama qilib, quyidagilarga koʻra sud ajrimini oʻzgarishsiz qoldirishni lozim topadi.
Ish hujjatlaridan koʻrinishicha, “SIFATLI YOL QURILISH” MChJ bilan “2-son MKK” MChJ oʻrtasida 2007-yil 16-iyulda 12-sonli, 2007-yil 17-iyulda 11-sonli va 2007-yil 10-sentabrda 14-sonli pudrat shartnomalari tuzilgan. Ularga koʻra, “2-son MKK” MChJ (“Pudratchi”) “SIFATLI YOL QURILISH” MChJ (“Buyurtmachi”ga) taʼmirlash-tiklash ishlarini bajarib berishni, “SIFATLI YOL QURILISH” MChJ esa bajarilgan ishlarni qibul qilish va uning qiymatini toʻlash majburiyatini olgan.
2009-yil 8-mayda “SIFATLI YOL QURILISH” MChJning nomi “AGERES STAR” MChJ deb oʻzgartirilgan.
Birinchi instansiya sudining 2009-yil 24-dekabrdagi hal qiluv qarori bilan daʼvo qisman qanoatlantirilib, “AGERES STAR” MChJ foydasiga “2-son MKK” MChJdan 292880981 soʻm asosiy qarz va 21200000 soʻm penya undirilgan. Daʼvoning qolgan qismi rad etilgan.
Ushbu hal qiluv qarori ustidan “2-son MKK” MChJ apellatsiya shikoyati bilan murojaat etib, apellatsiya shikoyati berishda toʻlanishi shart boʻlgan davlat bojini Oʻzbekiston Respublikasi Soliq kodeksi 330-moddasining 1-bandiga asosan kechiktirish haqida iltimos qilgan.
Sudning 2010-yil 25-yanvardagi ajrimi bilan apellatsiya shikoyati Oʻzbekiston Respublikasi Soliq kodeksi 330-moddasining 1-bandi 2010-yildan oʻz kuchini yoʻqotganligi sababli qaytarilgan.
Oʻzbekiston Respublikasi Xoʻjalik protsessual kodeksi 162-moddasi birinchi qismining 3-bandiga asosan davlat boji belgilangan tartibda va miqdorda toʻlanganligini tasdiqlovchi hujjatlar apellatsiya shikoyatiga ilova qilinmagan, qonunda davlat bojini toʻlash muddatini kechiktirish yoki boʻlib-boʻlib toʻlash imkoniyati nazarda tutilgan hollarda esa bu haqda iltimosnoma berilmagan yoxud iltimosnoma rad etilgan boʻlsa, apellatsiya shikoyati sudya tomonidan qaytariladi.
Yuqoridagilarni inobatga olib, sudlov hayʼati ajrimni oʻzgarishsiz qoldirib, ishni kassatsiya instansiyasi sudida koʻrish uchun toʻlangan 5000 soʻm pochta xarajatlarini javobgar zimmasida qoldirishni lozim topadi.
2010-yil 19-aprel,
14-0907/16041-son