Majburiy sertifikatlashtirilishi lozim boʻlgan, ammo sertifikatlanmagan mahsulotni realizatsiya qilganlik uchun tayyorlovchiga (tadbirkorga) realizatsiya qilingan mahsulot qiymati miqdorida jarima solinadi (11-0829/24226-son)

07.04.2009

Oʻzbekiston Respublikasi Oliy xoʻjalik sudi sudlov hayʼatining

Qarori

[Koʻchirma]

Toshkent viloyat standartlashtirish va metrologiya boshqarmasi xoʻjalik sudiga murojaat qilib, “4-son koʻchma mexanizatsiyalashgan kolonna” shoʻba korxonasiga 78209396 soʻm moliyaviy jarima qoʻllashni soʻragan.

Birinchi instansiya sudining hal qiluv qarori bilan daʼvo rad etilgan.

Apellatsiya instansiyasi sudining qarori bilan hal qiluv qarori oʻzgarishsiz qoldirilgan.

Kassatsiya shikoyatida sud qarorlarini bekor qilib, daʼvoni qanoatlantirish soʻralgan.

Sudlov hayʼati shikoyat vajlarini muhokama qilib, ishdagi hujjatlarni oʻrganib chiqib, quyidagilarga koʻra sud qarorlarini oʻzgarishsiz qoldirishni lozim topadi.

Ishdagi hujjatlarga koʻra, Nazorat qiluvchi organlar faoliyatini muvofiqlashtiruvchi Respublika kengashining 2008-yil 3-yanvardagi 2/1-G-son reja-jadvali, Toshkent viloyati standartlashtirish va metrologiya boshqarmasining 2008-yil 2-oktabrdagi 108-son, 2008-yil 24-oktabrdagi 113-son buyruqlari va tekshirish dasturiga asosan “4-son koʻchma mexanizatsiyalashgan kolonna” shuʼba korxonasida Toshkent viloyati standartlashtirish va metrologiya boshqarmasi tomonidan tekshirish oʻtkazilgan. Tekshirish tartibi va qoidalari tekshiruvchilar tomonidan buzilmagan.

Tekshirishda korxona majburiy sertifikatlashtirilishi lozim boʻlgan 78209396 soʻmlik qurilish mollarini sertifikatlanganligini tasdiqlovchi hujjatlarsiz sotib olib, qurilishda ishlatganligi aniqlangan.

Toshkent viloyati standartlashtirish va metrologiya boshqarmasining hisoblangan moliyaviy jarimani ixtiyoriy toʻlash haqida 2008-yil 3-noyabrdagi 30-son talabnomasi javobgar tomonidan bajarilmagach, daʼvogar “4-son koʻchma mexanizatsiyalashgan kolonna” shoʻba korxonasiga moliyaviy sanksiya qoʻllashni xoʻjalik sudidan soʻragan.

Birinchi instansiya sudi daʼvoni toʻgʻri rad etgan.

“Mahsulotlar va xizmatlarni sertifikatlashtirish toʻgʻrisida”gi Oʻzbekiston Respublikasi Qonuni 23-moddasining ikkinchi qismida majburiy sertifikatlashtirilishi lozim boʻlgan, ammo sertifikatlanmagan mahsulotni realizatsiya qilganlik uchun tayyorlovchiga (tadbirkorga) realizatsiya qilingan mahsulot qiymati miqdorida jarima solinishi nazarda tutilgan.

Ammo, “4-son koʻchma mexanizatsiyalashgan kolonna” shoʻba korxonasi 78209396 soʻmlik qurilish mollarini ishlab chiqarmagan va realizatsiya qilmagan, balki sotib olib, oʻzi qurilishda ishlatgan.

Bundan tashqari, Oʻzbekiston Respublikasi Vazirlar Mahkamasining 2004-yil 6-iyuldagi 318-son qarori bilan tasdiqlangan “Mahsulotlarni sertifikatlashtirish tartibi toʻgʻrisida”gi Nizom talablariga koʻra ishlab chiqariladigan va chetdan keltiriladigan mahsulotlar sertifikatlanadi. “4-son koʻchma mexanizatsiyalashgan kolonna” shoʻba korxonasi qurilish mollarini ishlab chiqarmagan va chet eldan olib kelmagan.

Apellatsiya instansiyasi sudi ushbu holatlarga huquqiy baho berib, asosli ravishda hal qiluv qarorini oʻzgarishsiz qoldirgan.

Qayd etilganlarga koʻra sud qarorlari oʻzgarishsiz qoldirilishi lozim.

2009-yil 7-aprel,

11-0829/24226-son