Konsert-tomosha faoliyatini amalga oshirish tartibini yanada takomillashtirish chora-tadbirlari toʻgʻrisida (354-son)

09.12.2015

Oʻzbekiston Respublikasi Vazirlar Mahkamasining

qarori

Mustaqillik yillarida respublikada zamonaviy milliy estrada sanʼatini yanada rivojlantirish, estrada ijrochilarining professional mahoratini oshirish hamda iqtidorli yosh xonandalarni kashf etish uchun barcha zarur shart-sharoitlar va imkoniyatlar yaratildi. Estrada ijrochilarini har tomonlama qoʻllab-quvvatlash va ragʻbatlantirish, badiiy jihatdan yuksak musiqa asarlarini keng targʻib qilish taʼminlanmoqda.

Shu bilan birga, tegishli vazirliklar va idoralar tomonidan konsert-tomosha faoliyatini muvofiqlashtirish va nazorat qilish, madaniy-ommaviy tadbirlarni oʻtkazish, badiiy jihatdan yuksak musiqa asarlarini yaratish sohasidagi ishlar susaygan.

Oʻzbekiston Respublikasi Madaniyat va sport ishlari vazirligi, “Oʻzbeknavo” estrada birlashmasi hamda Milliy estrada sanʼatini rivojlantirish va muvofiqlashtirish Kengashining Oʻzbekiston Respublikasi Vazirlar Mahkamasining “Estrada qoʻshiqchilik sanʼatini yanada rivojlantirish toʻgʻrisida” 2001-yil 26-iyundagi 272-son qarorida belgilangan yosh va iqtidorli ijrochilarni aniqlash va qoʻllab-quvvatlash, yoshlarni vatanparvarlik va milliy mustaqillik gʻoyalari ruhida tarbiyalashga hissa qoʻshadigan musiqa asarlari yaratishni ragʻbatlantirish, sogʻlom ijodiy muhitni shakllantirish borasidagi vazifalarni amalga oshirish boʻyicha faoliyati qoniqarsizligicha qolmoqda.

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari tomonidan madaniy-tomosha tadbirlarini tashkil etishda Oʻzbekiston Respublikasi Vazirlar Mahkamasining “Ommaviy tadbirlarni tashkil etish va oʻtkazish tartibini yanada takomillashtirish chora-tadbirlari toʻgʻrisida” 2014-yil 29-iyuldagi 205-son qarori talablariga toʻliq rioya etilmayapti.

Oʻzbekiston milliy teleradiokompaniyasining televideniye va radio dasturlarining yuqori badiiy darajasini taʼminlashga doir ishlari yetarli emas, azaliy maʼnaviy-madaniy qadriyatlarga va milliy urf-odatlarga muvofiq boʻlmagan, kamol topayotgan avlodni maʼnaviy-axloqiy tarbiyalashga salbiy taʼsir koʻrsatadigan qoʻshiqlar va videokliplarning efirga chiqishiga yoʻl qoʻyilmoqda.

Ushbu holatlar madaniy-tomosha tadbirlarini oʻtkazish tartibining qoʻpol tarzda buzilishiga, estrada ijrochilari tomonidan odob-axloq meʼyorlariga rioya qilinmasligiga, ular tomonidan badiiy jihatdan sayoz musiqiy asarlarning ijro etilishiga olib kelmoqda.

“Faoliyatning ayrim turlarini litsenziyalash toʻgʻrisida” hamda “Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi qonunlariga muvofiq, milliy musiqa sanʼatini yanada rivojlantirish, ushbu sohani rivojlantirish uchun shart-sharoitlar yaratish, badiiy jihatdan yuksak asarlarni targʻib qilish, litsenziya talablari va shartlarini kuchaytirish orqali madaniy-tomosha tadbirlarini tashkil qilish va oʻtkazishni tizimli ravishda tartibga solish, litsenziya talabgorlariga qoʻyiladigan mezonlarni va malaka talablarini takomillashtirish, shuningdek litsenziatlarning aholiga madaniy xizmat koʻrsatish boʻyicha huquqlari va majburiyatlarini aniqlashtirish maqsadida Vazirlar Mahkamasi qaror qiladi:

1.Oʻzbekiston Respublikasi Madaniyat va sport ishlari vazirligi (Ahmedov), “Oʻzbeknavo” estrada birlashmasi (Majidov), Milliy estrada sanʼatini rivojlantirish va muvofiqlashtirish Kengashi (Mirzaaliyev), Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining, Oʻzbekiston milliy teleradiokompaniyasi (Xadjayev)ning konsert-tomosha faoliyati sohasini muvofiqlashtirish va nazorat qilishga doir ishlari qoniqarsiz deb hisoblansin.

3. Oʻzbekiston Respublikasi Madaniyat vazirligi:

konsert-tomosha va madaniy-ommaviy tadbirlarni chuqur va noformal gʻoyaviy mazmun bilan toʻldirish, ijodiy uyushmalar, davlat va nodavlat tashkilotlari bilan mustahkam hamkorlik oʻrnatish chora-tadbirlarini koʻrsin;

konsert-tomosha hamda madaniy-ommaviy tadbirlarning oʻtkazilishini muvofiqlashtirsin, ular yuzasidan samarali monitoringni amalga oshirsin;

tadbirlarning dastur va ssenariylarini koʻrib chiqish boʻyicha tartibot reglamentlariga, tadbir tashkilotchilarining qonunchilikka muvofiq talablarga soʻzsiz rioya etishini taʼminlasin.

4. Oʻzbekiston Respublikasi Madaniyat vazirligi huzuridagi “Oʻzbekkonsert” davlat muassasasi:

litsenziya va ruxsatnoma talablari va shartlariga qatʼiy rioya etilishini taʼminlasin;

litsenziatlar va konsert-tomosha tadbirlarining tashkilotchilari tomonidan qonunchilik talablarining bajarilishi yuzasidan tizimli nazorat oʻrnatsin.

5. Milliy estrada sanʼatini rivojlantirish va muvofiqlashtirish Kengashi:

tegishli tashkilotlarning yosh va iqtidorli ijrochilarni aniqlash va qoʻllab-quvvatlash, qoʻshiqlar va videokliplarning badiiy saviyasini oshirish, badiiy yuksak musiqa asarlari yaratishni ragʻbatlantirish ishlarini muvofiqlashtirsin;

konsert-tomosha faoliyatini litsenziyalashda mezonlarga va litsenziya talabgorlariga qoʻyiladigan malaka talablariga qatʼiy rioya etilishini taʼminlasin;

bir oy muddatda Oʻzbekiston milliy teleradiokompaniyasi va Elektron ommaviy-axborot vositalari milliy assotsiatsiyasi bilan hamkorlik qilish dasturini ishlab chiqsin va tasdiqlasin.

6. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari ommaviy tadbirlarning oʻtkazilishini nazorat qilish boʻyicha komissiyalar ishlarini bir oy muddatda tanqidiy qayta koʻrib chiqsinlar va komissiya aʼzolarining shaxsiy masʼuliyatini oshirish choralarini koʻrsinlar, shuningdek ommaviy tadbirlarni oʻtkazishga qoʻyiladigan talablarga ogʻishmay rioya etilishini taʼminlasinlar.

61. Davlat organlari va tashkilotlari tizimidagi konsert, madaniyat saroylari va boshqa muassasalarda toʻliq jonli ijro asosida oʻtkazilgan konsert dasturlari uchun ijara toʻlovidan 50 foiz chegirma beriladi.

7. Oʻzbekiston Respublikasi Ichki ishlar vazirligi, Favqulodda vaziyatlar vazirligi, Madaniyat vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari:

xalq sayillarini, konsert-tomosha va madaniy-ommaviy tadbirlarni oʻtkazishda belgilangan talablarga soʻzsiz rioya etilishi yuzasidan nazoratning kuchaytirilishini;

ommaviy tadbirlarni oʻtkazish obyektlarini muntazam ravishda xatlovdan oʻtkazish va texnik jihatdan tekshirish, shu jumladan ularning muhandislik-texnik kommunikatsiyalari, yongʻinga qarshi, evakuatsiya inshootlari, yer osti yoʻllari va transport vositalarining toʻxtab turish joylari, dastlabki tibbiy yordam koʻrsatish punktlari, texnik uskunalar, favqulodda vaziyatlarni bartaraf etish uchun zarur boʻlgan maxsus vositalarning hisoblangan zaxirasi va turlari holatini tekshirish boʻyicha amaliy chora-tadbirlarni;

ommaviy tadbirlarning oʻziga xos xususiyatlaridan, shuningdek ommaviy tadbirlarni oʻtkazish obyektlari joylashgan joylar va obyektlarning shart-shartlaridan kelib chiqqan holda favqulodda vaziyatlar boʻyicha hududiy boshqarmalarning zarur maxsus vositalar va texnika bilan taʼminlangan malakali mutaxassislari ishga jalb etilishini taʼminlasinlar.

8. Oʻzbekiston Respublikasi Davlat soliq qoʻmitasi, Oʻzbekiston Respublikasi Madaniyat vazirligi huzuridagi “Oʻzbekkonsert” davlat muassasasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari konsert-tomosha faoliyati bilan shugʻullanishning belgilangan tartibiga yuridik va jismoniy shaxslar tomonidan rioya etilishi yuzasidan qatʼiy va muntazam nazoratni amalga oshirsinlar, aybdor shaxslarning qonunchilikka muvofiq javobgarlikka tortilishini taʼminlasinlar.

9. Oʻzbekiston milliy teleradiokompaniyasi:

Elektron ommaviy-axborot vositalari milliy assotsiatsiyasi bilan birgalikda televideniye va radio dasturlarining badiiy jihatdan yuksak darajasini taʼminlashda televideniye va radiokanallarning badiiy kengashlari ishlarini tanqidiy koʻrib chiqsin, madaniy qadriyatlarga va milliy urf-odatlarga muvofiq boʻlmagan, oʻsib kelayotgan yosh avlodni maʼnaviy-axloqiy tarbiyalashga salbiy taʼsir koʻrsatadigan qoʻshiqlar va videokliplarning efirga chiqishiga yoʻl qoʻymaslik chora-tadbirlarini koʻrsin;

Oʻzbekiston Respublikasi Madaniyat vazirligi, Oʻzbekiston Respublikasi Madaniyat vazirligi huzuridagi “Oʻzbekkonsert” davlat muassasasi, Oʻzbekiston Yozuvchilar uyushmasi va Bastakorlar uyushmasi bilan birgalikda milliy musiqani qoʻllab-quvvatlash va ommalashtirish hamda badiiy jihatdan yuksak asarlarni yaratish borasida tizimli ishlar amalga oshirilishini taʼminlasin.

11. Oʻzbekiston Respublikasi Hukumatining 4-ilovaga muvofiq baʼzi qarorlariga oʻzgartirish va qoʻshimchalar kiritilsin.

12. Oʻzbekiston Respublikasi Hukumatining 5-ilovaga muvofiq ayrim qarorlari oʻz kuchini yoʻqotgan deb hisoblansin.

13. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.Yu. Xodiyev zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 9-dekabr,

354-son

Vazirlar Mahkamasining 2015-yil 9-dekabrdagi 354-son qaroriga 5-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblangan qarorlari

roʻyxati

1. Vazirlar Mahkamasining “Konsert-tomosha faoliyati sohasida soliq solishni va audio-, videokassetalarni tarqatishni takomillashtirish chora-tadbirlari toʻgʻrisida” 2001-yil 29-iyundagi 285-son qarori (Oʻzbekiston Respublikasi QT, 2001-y., 6-son, 36-modda).

2. Vazirlar Mahkamasining “Konsert-tomosha faoliyatini litsenziyalash toʻgʻrisidagi nizomni tasdiqlash haqida” 2003-yil 11-noyabrdagi 498-son qarori (Oʻzbekiston Respublikasi QT, 2003-y., 11-son, 114-modda).

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” 2006-yil 10-martdagi 41-son qaroriga 1-ilovaning 4-bandi (Oʻzbekiston Respublikasi QT, 2006-y., 3-son, 18-modda).

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Tadbirkorlik faoliyatini yuritish uchun ruxsatnoma turlarini qisqartirish va ularni berish tartib-qoidalarini soddalashtirish toʻgʻrisida” 2005-yil 21-sentabrdagi PQ-186-son qarori)” 2006-yil 22-maydagi 92-son qaroriga ilovaning 31-bandi (Oʻzbekiston Respublikasi QT, 2006-y., 5-son, 34-modda).

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (“Tadbirkorlik subyektlarini huquqiy himoya qilish tizimi takomillashtirilganligi hamda ularning javobgarligi erkinlashtirilganligi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida” Oʻzbekiston Respublikasining 2006-yil 10-oktabrdagi OʻRQ-59-son Qonuni)” 2006-yil 10-noyabrdagi 235-son qaroriga 1-ilovaning 52-bandi (Oʻzbekiston Respublikasi QT, 2006-y., 11-son, 86-modda).

7. Vazirlar Mahkamasining “Oʻzbekiston Respublikasining “Intellektual mulk toʻgʻrisidagi qonun hujjatlari takomillashtirilishi munosabati bilan Oʻzbekiston Respublikasining ayrim qonunlariga oʻzgartish va qoʻshimchalar kiritish haqida” 2011-yil 26-dekabrdagi OʻRQ-312-son Qonunini amalga oshirish chora-tadbirlari toʻgʻrisida” 2012-yil 15-martdagi 72-son qaroriga 3-ilovaning 3 va 7-bandlari (Oʻzbekiston Respublikasi QT, 2012-y., 3-son, 18-modda).

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Statistik, soliq va moliyaviy hisobotlarni, litsenziyalanadigan faoliyat turlarini va ruxsat berish tartib-taomillarini tubdan qisqartirish chora-tadbirlari toʻgʻrisida” 2012-yil 16-iyuldagi PF-4453-son Farmoni)” 2012-yil 1-noyabrdagi 313-son qaroriga 1-ilovaning 47-bandi (Oʻzbekiston Respublikasi QT, 2012-y., 11-son, 79-modda).

9. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Tadbirkorlik faoliyatini amalga oshirish va davlat xizmatlarini koʻrsatish bilan bogʻliq tartibotlarni yanada takomillashtirish chora-tadbirlari toʻgʻrisida” 2014-yil 15-apreldagi PQ-2164-son qarori)” 2014-yil 17-iyuldagi 196-son qaroriga 1-ilovaning 6 va 18-bandlari (Oʻzbekiston Respublikasi QT, 2014-y., 7-son, 73-modda).