Davlat soliq xizmati organining inkasso topshiriqnomasini haqiqiy emas deb topish yoki jarima toʻlash majburiyatidan ozod etish toʻgʻrisidagi nizolar xoʻjalik sudi sudloviga taalluqli emas (11-1028/1887-son)

23.03.2010

Oʻzbekiston Respublikasi Oliy xoʻjalik sudi sudlov hayʼatining

Qarori

[Koʻchirma]

“Angren shahar dehqon bozori” MChJ xoʻjalik sudiga murojaat qilib, Angren shahar davlat soliq inspeksiyasining 2009-yil 6-noyabrdagi 120002143/1576-son inkasso topshiriqnomasini haqiqiy emas deb topishni va jamiyatni jarima toʻlash majburiyatidan ozod etishni soʻragan.

Birinchi instansiya sudining ajrimi bilan ish yuritish tugatilgan.

Ish apellatsiya instansiyasi sudida koʻrilmagan.

Kassatsiya shikoyatida sud ajrimini bekor qilib, 3588700 soʻm jarima qoʻllash soʻralgan.

Sudlov hayʼati shikoyat vajlarini muhokama qilib, ishdagi hujjatlarni oʻrganib chiqib, quyidagilarga koʻra sud ajrimini oʻzgarishsiz qoldirishni lozim topadi.

Ish hujjatlaridan koʻrinishicha, “Angren shahar dehqon bozori” MChJ xoʻjalik sudiga murojaat qilib, Angren shahar davlat soliq inspeksiyasining 2009-yil 6-noyabrdagi 120002143/1576-son inkasso topshiriqnomasini haqiqiy emas deb topishni va jamiyatni jarima toʻlash majburiyatidan ozod etishni soʻragan.

Oʻzbekiston Respublikasi Xoʻjalik protsessual kodeksi 24-moddasi birinchi qismining 10-bandida undirish soʻzsiz (akseptsiz) tartibda amalga oshiriladigan ijro hujjatini yoki boshqa hujjatni ijro etilishi mumkin emas deb topish toʻgʻrisidagi nizolar xoʻjalik sudi sudloviga taalluqli ekanligi belgilangan. Ammo davlat soliq xizmati organining inkasso topshiriqnomasini haqiqiy emas deb topish yoki jarima toʻlash majburiyatidan ozod etish toʻgʻrisidagi nizolar xoʻjalik sudi sudloviga taalluqli ekanligi belgilanmagan.

Oʻzbekiston Respublikasi Xoʻjalik protsessual kodeksi 86-moddasining 1-bandiga koʻra, nizo xoʻjalik sudida koʻrish uchun tegishli boʻlmasa, ish yuritish tugatiladi. Bu haqda Oʻzbekiston Respublikasi Oliy xoʻjalik sudi Plenumining “Birinchi instansiya sudida ishlarni koʻrishda Oʻzbekiston Respublikasi Xoʻjalik protsessual kodeksining qoʻllanilishi toʻgʻrisida” 2007-yil 15-iyundagi 162-son qarorining 19-bandida tushuntirish berilgan.

Qayd etilganlarga koʻra, sudlov hayʼati sud ajrimini oʻzgarishsiz qoldirishni lozim topadi.

Ishni kassatsiya instansiyasi sudida koʻrish bilan bogʻliq 5000 soʻm pochta xarajatlari javobgar zimmasiga yuklanadi.

2010-yil 23-mart,

11-1028/1887-son