Qishloq vrachlik punktlarining patronaj tibbiyot hamshiralarini moddiy ragʻbatlantirishni kuchaytirishga doir qoʻshimcha chora-tadbirlar toʻgʻrisida (350-son)

01.12.2015

Oʻzbekiston Respublikasi Vazirlar Mahkamasining

qarori

Qishloq joylarda dastlabki tibbiy-sanitariya yordami sifatini yanada yaxshilash, qishloq vrachlik punktlari patronaj tibbiyot hamshiralari mehnatini ragʻbatlantirishni ularning kasalliklar profilaktikasi, aholi oʻrtasida sogʻlom turmush tarzini va sanitariya-gigiyena madaniyatini targʻib qilish chora-tadbirlarini roʻyobga chiqarishdagi faoliyatining ahamiyati va yetakchi rolini hisobga olgan holda oshirish maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vazirligi, Iqtisodiyot vazirligi va Moliya vazirligining qishloq vrachlik punktlari patronaj tibbiyot hamshiralari ish samaradorligini reyting baholash natijalariga bogʻliq ravishda ular mehnatini moddiy ragʻbatlantirish va taqdirlash tizimini 2016-yil 1-yanvardan boshlab joriy etish toʻgʻrisidagi taklifi qabul qilinsin, unda quyidagilar nazarda tutilsin:

oʻziga biriktirilgan hududda oilalarning patronaj bilan toʻliq qamrab olinishini taʼminlaydigan va oʻz faoliyatida ijobiy yakuniy natijalarga, shu jumladan kasalliklarni kamaytirishga, bolalar va onalar oʻlimiga barham berishga erishgan patronaj tibbiyot hamshiralariga tarif stavkasining 5 foizidan 20 foizigacha miqdorda har oylik shaxsiy ustama belgilash;

eng yuqori darajada namuna koʻrsatgan patronaj tibbiyot hamshiralarini va patronaj tibbiyot hamshiralari faoliyatini tashkil etish uchun masʼul boʻlgan qishloq vrachlik punktlarining vrach-tibbiyot xodimlarini ularning faoliyatini har chorakda baholash asosida, lekin tegishli xodimni yiliga ikki oylik maoshdan koʻp boʻlmagan miqdorda mukofotlash.

2. Qishloq vrachlik punkti patronaj tibbiyot hamshirasi ishlarining samaradorligini reyting baholashni oʻtkazish tartibi toʻgʻrisidagi nizom 1-ilovaga muvofiq tasdiqlansin.

3. Vazirlar Mahkamasining “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida” 2005-yil 21-dekabrdagi 276-son qaroriga (Oʻzbekiston Respublikasi QT, 2005-y., 12-son, 64-modda) 2-ilovaga muvofiq oʻzgartirish va qoʻshimchalar kiritilsin.

4. Oʻzbekiston Respublikasi Moliya vazirligi Oʻzbekiston Respublikasining 2016-yil va keyingi yillar uchun Davlat budjeti parametrlarida ushbu qarorda nazarda tutilgan tadbirlarni amalga oshirishga zarur mablagʻlarni nazarda tutsin.

5. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 1-dekabr,

350-son

Vazirlar Mahkamasining 2015-yil 1-dekabrdagi 350-son qaroriga 1-ILOVA

Qishloq vrachlik punkti patronaj tibbiyot hamshirasi ishlarining samaradorligini reyting baholashni oʻtkazish tartibi toʻgʻrisida

NIZOM

I. Umumiy qoidalar

1. Ushbu Nizom Oʻzbekiston Respublikasi Vazirlar Mahkamasining “Qishloq vrachlik punktlarini yanada maqbullashtirish va faoliyati samaradorligini oshirish chora-tadbirlari toʻgʻrisida” 2014-yil 5-martdagi 50-son qaroriga muvofiq qishloq vrachlik punkti patronaj tibbiyot hamshirasi (keyingi oʻrinlarda QVP patronaj tibbiyot hamshirasi deb ataladi) ishlarining samaradorligini reyting baholashni oʻtkazish tartibini belgilaydi.

2. QVP patronaj tibbiyot hamshirasi ishlari samaradorligini reyting baholashni oʻtkazish:

faoliyat sifatini va uning yakuniy natijalarini oshirish;

asosiy funksional vazifalarning toʻliq bajarilishini taʼminlash — ayollar va bolalarni xonadoniga borib patronaj tartibida koʻrish, vrachning koʻrsatmalarini bajarish, aholining sanitariya-epidemiologik osoyishtaligini taʼminlash, sanitariya-gigiyenik tarbiyalash tadbirlarini va sogʻlom turmush tarzini targʻib qilish boʻyicha kompleks chora-tadbirlarni tashkil etish va amalga oshirish;

profilaktik emlashlar, flyuorografik tekshirish bilan qamrab olish, kasallikni kamaytirish, chaqaloqlar va onalar oʻlimini bartaraf etish maqsadida amalga oshiriladi.

3. QVP patronaj tibbiyot hamshirasi ishlari samaradorligini reyting baholash ish hajmi koʻrsatkichlariga, yuqori sifatga va hisobot davri mobaynidagi natijadorlikka asoslanadi.

II. QVP patronaj tibbiyot hamshirasi ishlari samaradorligini reyting baholash koʻrsatkichlari

4. QVP patronaj tibbiyot hamshirasining kundalik ishlari maxsus jurnalda qayd etiladi, uni toʻldirish shakli va tartibi Oʻzbekiston Respublikasi Sogʻliqni saqlash vazirligi tomonidan tasdiqlanadi.

5. QVP patronaj tibbiyot hamshirasi ishlari samaradorligini reyting baholash ushbu Nizomga 1-ilovaga muvofiq sxema boʻyicha, uning faoliyatining asosiy koʻrsatkichlari asosida har chorakda bir marta oʻtkaziladi.

6. QVP patronaj tibbiyot hamshirasi ishlari samaradorligini reyting baholash uch bosqichda oʻtkaziladi:

birinchi bosqichda — QVP patronaj tibbiyot hamshirasining asosiy funksional vazifalari toʻliq bajarilishi koʻrsatkichlari baholanadi;

ikkinchi bosqichda — QVP patronaj tibbiyot hamshirasi faoliyati yakuniy natijalarining salbiy koʻrsatkichlari baholanadi;

uchinchi bosqichda — reyting baholashning toʻplangan yakuniy ballaridan kelib chiqib ragʻbatlantirish/jazolash choralari belgilanadi.

7. QVP patronaj tibbiyot hamshirasi ishlari samaradorligini reyting baholash tegishli tuman tibbiyot birlashmasi, shu jumladan tegishli tuman tibbiyot birlashmasi huzuridagi maxsus monitoring guruhi (keyingi oʻrinlarda maxsus monitoring guruhi deb ataladi) tomonidan oʻtkaziladi.

8. Maxsus monitoring guruhi tarkibi ushbu Nizomga 2-ilovaga muvofiq tuman tibbiyot birlashmasining boshligʻi tomonidan tasdiqlanadi.

Maxsus monitoring guruhi uch oyda bir marta har bir qishloq vrachlik punktining faoliyatini oʻrganadi.

9. QVP patronaj tibbiyot hamshirasi ishlari samaradorligini reyting baholash quyidagi koʻrsatkichlar boʻyicha amalga oshiriladi:

a) biriktirilgan aholi oʻrtasida kasallikka chalinishning oldini olish boʻyicha asosiy funksional vazifalar bajarilishining toʻliqligi:

tibbiy-sanitariya yordami koʻrsatish uchun uy xoʻjaliklari patronaji;

yolgʻiz keksalar, nogironlar va parvarish qilishga muhtoj shaxslar patronaji;

yosh oilalar patronaji;

keksa yoshdagi aholini chaqiriq boʻyicha profilaktik koʻzdan kechirish;

b) fertil yoshdagi ayollar, homiladorlar, shuningdek koʻzi yoriganlar oʻrtasida kasalliklarning oldini olish boʻyicha asosiy funksional vazifalar bajarilishining toʻliqligi:

homilador ayollarni xonadoniga borib koʻrish;

fertil yoshdagi ayollarni chaqiriq boʻyicha profilaktik koʻzdan kechirish;

koʻzi yoriganlarni tuqqanidan keyin 42 kun mobaynida xonadoniga borib koʻrish;

v) bolalar oʻrtasida kasallikka chalinishning oldini olish boʻyicha asosiy fuknksional vazifalar bajarilishining toʻliqligi:

1 yoshgacha bolalarni xonadoniga borib koʻrish;

nogiron bolalarni xonadoniga borib koʻrish;

bolalarni chaqiriq boʻyicha profilaktik koʻzdan kechirish;

g) bolalarni profilaktik vaksinatsiyalash va revaksinatsiyalash boʻyicha asosiy funksional vazifalar bajarilishining toʻliqligi;

bolalarni profilaktik vaksinatsiyalash va revaksinatsiyalash bilan qamrab olish;

vaksinatsiyadan keyingi taʼsir yuzasidan monitoring olib borish boʻyicha nazorat tartibida borib koʻrish;

d) maxsus monitoring guruhining xulosasi boʻyicha asosiy funksional vazifalar bajarilishining salbiy yakuniy natijalari:

QVP patronaj tibbiyot hamshirasining aybi bilan homilador ayollarni 12 haftadan kech muddatlarda roʻyxatga olish;

onalar oʻlimi mavjudligi;

1 yoshgacha chaqaloqlar oʻlimi mavjudligi;

QVP patronaj tibbiyot hamshirasi faoliyati yuzasidan aholi oʻrtasida asosli shikoyatlar mavjudligi.

III. QVP patronaj tibbiyot hamshirasi ishlari samaradorligini reyting baholash tartibi

10. QVP patronaj tibbiyot hamshirasi qishloq vrachlik punktining oʻz vrachi rahbarligida har oyda ushbu Nizomga 3-ilovaga muvofiq bajarilgan ishlar toʻgʻrisidagi hisobot shaklini toʻldiradi.

Qishloq vrachlik punktining vrachi mavjud boʻlmaganda ushbu shakl qishloq vrachlik punktining mudiri rahbarligida QVP patronaj tibbiyot hamshirasi tomonidan toʻldiriladi.

11. Hisobot davri (chorak) tamom boʻlgandan keyin QVP patronaj tibbiyot hamshirasining bajargan ishlari toʻgʻrisidagi hisobotning toʻldirilgan shakli hisobot davridan keyingi oyning 5-kunidan kechikmay qishloq vrachlik punkti mudiriga topshiriladi.

12. QVP patronaj tibbiyot hamshirasi ishlarining natijalari bajarilgan ishlar toʻgʻrisidagi hisobotning toʻldirilgan shakli asosida hisobot davridan keyingi oyning 15-kunigacha har chorak yakunlari boʻyicha qishloq vrachlik punktining mudiri va katta tibbiyot hamshirasi tomonidan baholanadi.

13. Maxsus monitoring guruhi tomonidan hisobot davridan keyingi oyning 15-kunidan soʻng har chorak yakunlari boʻyicha birlamchi hujjatlarni (QVP patronaj tibbiyot hamshirasining jurnalini) tahlil qilish asosida har bir qishloq vrachlik punkti boʻyicha 10 kundan koʻp boʻlmagan muddatda QVP patronaj tibbiyot hamshirasining ishlari natijalarining salbiy koʻrsatkichlari oʻrganiladi.

14. Hisobot davrida QVP patronaj tibbiyot hamshirasi ishlarining salbiy koʻrsatkichlari maxsus monitoring guruhi tomonidan oʻrganilishi natijalari ushbu Nizomga 4-ilovaga muvofiq shaklda ikki nusxada maʼlumotnoma shaklida rasmiylashtiriladi.

Maʼlumotnomaning bir nusxasi qishloq vrachlik punktida saqlanadi, ikkinchi nusxasi saqlash uchun tuman tibbiyot birlashmasiga beriladi.

15. Maxsus monitoring guruhi qishloq vrachlik punktining mudiri bilan birgalikda tekshirish maʼlumotlari asosida ushbu Nizomga 3-ilovaga muvofiq qishloq vrachlik punkti patronaj tibbiyot hamshirasining bajarilgan ishlar toʻgʻrisidagi hisoboti shakliga hisoblab chiqilgan ballarni kiritadi.

QVPning har bir patronaj tibbiyot hamshirasi ishlari samaradorligini reyting baholash yakunlangandan keyin tegishli yakuniy ballar belgilanadi.

16. Eng koʻp toʻplanishi mumkin boʻlgan ballarning 85 foizini va undan yuqori yakuniy ballarni toʻplagan QVP patronaj tibbiyot hamshiralari lavozim tarif stavkasining 5 foizidan 20 foizigacha miqdorda shaxsiy ustama belgilash shaklida navbatdagi reyting baholashlar yakunlarigacha moddiy ragʻbatlantiriladi.

17. Shaxsiy ustamalar miqdorlari toʻplangan yakuniy ballar sonidan kelib chiqib quyidagi tartibda belgilanadi:

reyting ballari eng koʻp miqdorining 85 foizidan 87 foizigacha — 5 foiz;

reyting ballari eng koʻp miqdorining 87 foizidan 91 foizigacha — 10 foiz;

reyting ballari eng koʻp miqdorining 91 foizidan 96 foizigacha — 15 foiz;

reyting ballari eng koʻp miqdorining 96 foizidan 100 foizigacha — 20 foiz.

18. Qishloq vrachlik punkti xodimlarini qoʻshimcha ravishda ragʻbatlantirish maqsadida reyting baholash yakunlari boʻyicha har chorakda eng yuqori namuna koʻrsatgan QVP patronaj tibbiyot hamshiralari va ushbu patronaj tibbiyot hamshiralari faoliyatini tashkil etish uchun masʼul boʻlgan qishloq vrachlik punkti vrachlari mukofotlanadilar, biroq bir yilda 2 lavozim maoshidan ortiq emas.

19. Eng koʻp toʻplash mumkin boʻlgan ballarning 55 foizidan 85 foizigacha miqdorda yakuniy ballar toʻplagan QVP patronaj tibbiyot hamshiralari qoʻshimcha ravishda moddiy ragʻbatlantirishsiz belgilangan tartibda oʻz lavozim maoshini oladilar.

20. Eng koʻp toʻplash mumkin boʻlgan yakuniy ballarning 55 foizidan kam ball toʻplagan QVP patronaj tibbiyot hamshiralariga nisbatan Oʻzbekiston Respublikasining Mehnat kodeksiga muvofiq intizomiy jazolar qoʻllanadi.

IV. QVP patronaj tibbiyot hamshirasi ishlari samaradorligini reyting baholash oʻtkazilishini nazorat qilish tartibi

21. QVPning har bir patronaj tibbiyot hamshirasi bajarilgan ishlar toʻgʻrisidagi hisobotning belgilangan shakliga kiritiladigan maʼlumotning ishonchliligi uchun oʻzi javob beradi.

22. QVP patronaj tibbiyot hamshirasining bajarilgan ishlari hajmi toʻgʻrisidagi maʼlumotlarning nomuvofiqligi, shuningdek QVP patronaj tibbiyot hamshirasi ishlari natijalarining salbiy koʻrsatkichlari birlamchi hujjatlarni va hisobot shakllarini tanlab oʻrganish asosida maxsus monitoring guruhi tomonidan aniqlanadi.

23. Maxsus monitoring guruhi faoliyatini nazorat qilish tekshirishlar rejasiga muvofiq Oʻzbekiston Respublikasi Sogʻliqni saqlash vazirligi Nazorat inspeksiyasining mintaqaviy boʻlinmalari tomonidan amalga oshiriladi.

V. Yakunlovchi qoida

24. QVP patronaj tibbiyot hamshirasi ishlari samaradorligini reyting baholashning xolisonaligi, toʻgʻriligi va uni oʻtkazish tartibiga rioya qilinishi uchun tegishli ravishda qishloq vrachlik punktlarining rahbarlari, maxsus monitoring guruhi aʼzolari, shuningdek sogʻliqni saqlashning yuqori boshqaruv organlari rahbarlari javob beradilar.

Qishloq vrachlik punkti patronaj tibbiyot hamshirasi ishlarining samaradorligini reyting baholashni oʻtkazish tartibi toʻgʻrisidagi nizomga 1-ILOVA

Qishloq vrachlik punktlarining patronaj tibbiyot hamshiralari ishlari samaradorligini reyting baholashni oʻtkazish

SXEMASI

Qishloq vrachlik punkti patronaj tibbiyot hamshirasi ishlarining samaradorligini reyting baholashni oʻtkazish tartibi toʻgʻrisidagi nizomga 2-ILOVA

Izoh: maxsus monitoring guruhi tarkibiga tuman tibbiyot birlashmasi boshligʻining ixtiyoriga koʻra boshqa mutaxassislar ham qoʻshimcha ravishda kiritilishi mumkin.

Qishloq vrachlik punkti patronaj tibbiyot hamshirasi ishlarining samaradorligini reyting baholashni oʻtkazish tartibi toʻgʻrisidagi nizomga 3-ILOVA

Qishloq vrachlik punktining patronaj tibbiyot hamshirasi ishlari samaradorligini reyting baholashni oʻtkazish tartibi toʻgʻrisidagi nizomga 4-ILOVA

Vazirlar Mahkamasining 2015-yil 1-dekabrdagi 350-son qaroriga 2-ILOVA

Vazirlar Mahkamasining “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida” 2005-yil 21-dekabrdagi 276-son qaroriga kiritilayotgan qoʻshimchalar

1. 4-bandning toʻrtinchi xatboshisidagi “3-ilovaga muvofiq” soʻzlaridan keyin “, qishloq vrachlik punktlari uchun esa — 31-ilovaga muvofiq” soʻzlari qoʻshilsin.

2. Quyidagi mazmundagi 31-ilova qoʻshilsin:

“Vazirlar Mahkamasining 2005-yil 21-dekabrdagi 276-son qaroriga 31-ILOVA

Tibbiyot tashkilotlarining moddiy ragʻbatlantirish va rivojlantirish jamgʻarmasi mablagʻlarini shakllantirish va sarflash yoʻnalishlari (qishloq vrachlik punktlari uchun)

Tibbiyot tashkilotlarining moddiy ragʻbatlantirish va rivojlantirish jamgʻarmasini shakllantirish manbalari (qishloq vrachlik punktlari uchun): Moddiy ragʻbatlantirish va rivojlantirish jamgʻarmasi mablagʻlarini sarflash yoʻnalishlari: moddiy ragʻbatlantirishga moddiy-texnika bazasini rivojlantirishga, muassasani modernizatsiyalash va taʼmirlashga, kreditorlik qarzlarni toʻlashga QVP uchun budjet mablagʻlari umumiy hajmining 5 foizigacha homiylik va donorlik tashkilotlaridan, pulli davolash va xizmatlardan, intizomiy jazoni qoʻllashdan tushadigan, jarimalar mablagʻlari hisobot choragining oxirgi ish kuni tugashida paydo boʻlgan budjet mablagʻlaridan tejamlar (kapital qoʻyilmalarni moliyalashtirish uchun nazarda tutilgan mablagʻlardan tashqari) vaqtinchalik foydalanilmayotgan xonalarni va boshqa davlat mulkini oʻzga tashkilotlarga ijaraga berishdan olingan mablagʻlar koʻpi bilan 75% kamida 25%

Izoh: tejalgan mablagʻlar mavjud boʻlgan taqdirda ushbu mablagʻlar vaqtinchalik mehnatga layoqatsiz xodimlarga toʻlanmagan nafaqalarni moliyalashtirishga yoʻnaltirilishi mumkin”.