Oʻzbekiston Respublikasi Vazirlar Mahkamasi huzuridagi Yangi quriladigan va rekonstruksiya qilinadigan ishlab chiqarish quvvatlari loyihalarining texnik-iqtisodiy asoslanishini, texnika va texnologiyalarni ekspertizadan oʻtkazib baholash agentligi faoliyatini tashkil etish chora-tadbirlari toʻgʻrisida (332-son)

19.11.2015

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Yangi quriladigan va rekonstruksiya qilinadigan ishlab chiqarish quvvatlari loyihalarining texnik-iqtisodiy asoslanishini, texnika va texnologiyalarni ekspertizadan oʻtkazib baholash agentligini tashkil etish toʻgʻrisida” 2015-yil 30-sentabrdagi PQ-2413-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzuridagi Yangi quriladigan va rekonstruksiya qilinadigan ishlab chiqarish quvvatlari loyihalarining texnik-iqtisodiy asoslanishini, texnika va texnologiyalarni ekspertizadan oʻtkazib baholash agentligi toʻgʻrisidagi nizom ilovaga muvofiq tasdiqlansin.

2. Vazirliklar, idoralar va xoʻjalik birlashmalari:

investitsiya loyihalarining dastlabki va yakuniy texnik-iqtisodiy asoslanishi va hisob-kitoblari boʻyicha beriladigan xulosalarning nusxalarini Agentlikka yuborsinlar;

Agentlikning soʻrovi boʻyicha investitsiya loyihalarining dastlabki va yakuniy texnik-iqtisodiy asoslanishi va hisob-kitoblarini ekspertizadan oʻtkazish uchun zarur axborotni taqdim etsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 19-noyabr,

332-son

Vazirlar Mahkamasining 2015-yil 19-noyabrdagi 332-son qaroriga ILOVA

NIZOM

I. Umumiy qoidalar

1. Ushbu Nizom Oʻzbekiston Respublikasi Vazirlar Mahkamasi huzuridagi Yangi quriladigan va rekonstruksiya qilinadigan ishlab chiqarish quvvatlari loyihalarining texnik-iqtisodiy asoslanishini, texnika va texnologiyalarni ekspertizadan oʻtkazib baholash agentligining (keyingi oʻrinlarda Agentlik deb ataladi) maqomi, asosiy vazifalari, funksiyalari, huquqlari va javobgarligini, faoliyatining tashkiliy asoslarini belgilaydi.

2. Agentlik qonun hujjatlariga muvofiq Oʻzbekiston Respublikasi Prezidenti yoki Vazirlar Mahkamasi tomonidan tasdiqlanadigan quyidagi investitsiya loyihalarining dastlabki va yakuniy texnik-iqtisodiy asoslanishini va hisob-kitoblarini (DTIA/TIA, DTIH/TIH) ekspertizadan oʻtkazadi, shu jumladan:

markazlashtirilgan investitsiyalar (Oʻzbekiston Respublikasi Davlat budjetining, davlat maqsadli fondlari va budjet tashkilotlarining budjetdan tashqari fondlarining mablagʻlari, ayrim tarmoqlar va tashkilotlarning Hukumatning qarorlari bilan tashkil etiladigan maxsus fondlari mablagʻlari, Oʻzbekiston Respublikasi nomidan yoki uning kafolati ostida jalb etiladigan xorijiy kreditlar, Oʻzbekiston Respublikasi Tiklanish va taraqqiyot jamgʻarmasi mablagʻlari) hisobiga amalga oshiriladigan;

Oʻzbekiston Respublikasi Prezidentining soliqlar va boshqa majburiy toʻlovlar boʻyicha imtiyozlar berilishini nazarda tutuvchi alohida qarorlari asosida amalga oshiriladigan;

mahsulot taqsimotiga oid bitimlarga muvofiq amalga oshiriladigan;

ustav fondida davlat ulushi 50 foizdan ortiq boʻlgan tashkilotlar tomonidan markazlashtirilmagan investitsiyalar hisobiga amalga oshiriladigan qiymati 10 mln AQSh dollaridan ortiq boʻlgan;

strategik foydali qazilmalarni qazib olish va qayta ishlashni nazarda tutadigan moliyalashtirish manbalaridan qatʼi nazar, qiymati 10 mln AQSh dollaridan ortiq boʻlgan investitsiya loyihalarini.

Agentlik tomonidan investitsiya loyihalarining DTIA/TIA, DTIH/TIHlarini ekspertizadan oʻtkazish ushbu Nizomga ilovaga muvofiq sxema boʻyicha oshiriladi.

3. Agentlik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga va ushbu Nizomga amal qiladi.

4. Agentlik davlat muassasasi shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan muhrga ega boʻladi va oʻz faoliyatida Oʻzbekiston Respublikasi Vazirlar Mahkamasiga hisobot beradi.

5. Agentlik faoliyatiga mutasaddilik qilish Oʻzbekiston Respublikasi Bosh vazirining birinchi oʻrinbosari — Makroiqtisodiy rivojlantirish, tarkibiy oʻzgartirishlar, xorijiy investitsiyalarni jalb etish va hududlarni kompleks rivojlantirish masalalari kompleksi rahbariga yuklanadi.

II. Agentlikning asosiy vazifalari va funksiyalari

6. Quyidagilar Agentlikning asosiy vazifalari hisoblanadi:

yangi ishlab chiqarishlarni qurish, ishlab turgan sanoat korxonalarini rekonstruksiya qilish va modernizatsiyalash boʻyicha zamonaviy yuqori texnologik asbob-uskunalar va ilgʻor texnologiyalarni joriy etishga doir ularda eng maqbul yechimlar qoʻllanilishini taʼminlash yuzasidan investitsiya loyihalarining dastlabki va yakuniy texnik-iqtisodiy asoslanishini va hisob-kitoblarini tizimli, puxta ekspertizadan oʻtkazish;

respublikaga istiqbolsiz, maʼnaviy va jismoniy eskirgan asbob-uskunalar va texnologiyalar olib kelinishining oldini olgan holda unumdorligi va ishlab chiqariladigan mahsulotning sifati, energiya va resurslarni tejashi boʻyicha zamonaviy talablarga, shuningdek ekologik standartlarga javob beradigan ilgʻor texnologiyalar va asbob-uskunalarning jahon bozorini chuqur tahlil qilish;

asbob-uskuna narxining cheklangan parametrlarini, shuningdek taklif etilayotgan texnologiyaga muvofiq “foydalanishga tayyor” investitsiya loyihalari qiymatini aniqlash, talab etiladigan texnik va texnologik parametrlarni hisobga olgan holda asbob-uskunalar, texnika va texnologiyalar narxlarining maqbulligini puxta ekspertizadan oʻtkazish va tahlil qilish;

chet elda ishlab chiqariladigan zamonaviy asbob-uskunalar va texnologiyalar, ularning texnik va ishlab chiqarish-iqtisodiy tavsiflari, samaradorligi darajasi va amaliyotda sinab koʻrilganligi darajasi, shuningdek faoliyat ixtisosligi boʻyicha yuqori texnologik asbob-uskunalarning asosiy xorijiy ishlab chiqaruvchilari va yetkazib beruvchilari, texnologiyalarning ishlab chiquvchilari va litsenziarlari toʻgʻrisidagi maʼlumotlarning axborot-tahlil bazasini shakllantirish va doimiy ravishda yangilash;

sanoat korxonalarini qurish, rekonstruksiya qilish va modernizatsiyalash boʻyicha xorijiy investorlar va kompaniyalardan tushadigan takliflar boʻyicha axborotni toʻplash va umumlashtirish hamda mahalliy xomashyoni qayta ishlash yoʻli bilan jahon bozorida va ichki bozorda talab yuqori boʻlgan raqobatga bardoshli tayyor mahsulotlar va yarim tayyor sanoat mahsulotlari ishlab chiqarishga yoʻnaltirilgan yangi investitsiya loyihalarini amalga oshirish boʻyicha takliflarni ishlab chiqishda qatnashish;

davlat vakolatli organlarining investitsiya loyihalarining hujjatlarini oʻz vaqtida va sifatli ekspertizadan oʻtkazishga doir faoliyatini muvofiqlashtirish.

7. Agentlik yuklangan vazifalarga muvofiq quyidagi funksiyalarni amalga oshiradi:

Oʻzbekiston Respublikasi Davlat arxitektura va qurilish qoʻmitasi hamda Oʻzbekiston Respublikasi Iqtisodiyot vazirligi bilan birgalikda investitsiya loyihalarining dastlabki va yakuniy texnik-iqtisodiy asoslanishini va hisob-kitoblarini ishlab chiqishga topshiriqlarni kelishadi;

qonun hujjatlariga muvofiq Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasi tomonidan tasdiqlanadigan investitsiya loyihalarining dastlabki texnik-iqtisodiy asoslanishini va hisob-kitoblarini tizimli, puxta ekspertizadan oʻtkazadi, “Davarxitektqurilish” qoʻmitasining xulosasi taqdim etilgandan keyin 14 kalendar kundan ortiq boʻlmagan muddatda ular boʻyicha xulosalar beradi;

qonun hujjatlariga muvofiq Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasi tomonidan tasdiqlanadigan investitsiya loyihalarining texnik-iqtisodiy asoslanishi va hisob-kitoblari boʻyicha vakolatli organlarning xulosalari olingan sanadan boshlab 14 kalendar kundan ortiq boʻlmagan muddatda xulosalar beradi;

zaruriyat boʻlganda koʻrib chiqiladigan investitsiya loyihalarining dastlabki va yakuniy texnik-iqtisodiy asoslanishini va hisob-kitoblarini ekspertizadan oʻtkazish uchun mahalliy va xorijiy konsalting tashkilotlari bilan belgilangan tartibda shartnomalar tuzadi, keyinchalik tegishli sarf-xarajatlarni amalga oshiriladigan ekspertiza qiymatiga kiritadi;

ilgʻor texnologiyalar va asbob-uskunalar jahon bozorining tizimli monitoringini olib borish, talab etiladigan axborotni toʻplash uchun zarur boʻlgan aloqalarni yoʻlga qoʻyish, shakllantiriladigan maʼlumotlarning axborot-tahlil bazasini yangilash va kengaytirish maqsadida ixtisoslashtirilgan xalqaro koʻrgazmalar va yarmarkalarda ishtirok etadi;

asbob-uskunalar qiymatini taklif etilayotgan texnologiyaga muvofiq asbob-uskunalarning yiriklashtirilgan pozitsiyalarini cheklangan narxlar parametrlari boʻyicha baholaydi, cheklangan narxlar parametrlari boʻlmaganda esa — shunga oʻxshash loyihalarning qiymatini tahlil qilish asosida, shu jumladan quvvat birligiga, mahsulot birligiga sarflangan xarajatlarni taqqoslash yoʻli bilan yoki loyihaning boshqa shunga oʻxshash parametrlari boʻyicha baholaydi;

taklif etilayotgan texnologiyaning texnik va texnologik parametrlariga muvofiq “foydalanishga tayyor” investitsiya loyihalari qiymatini baholaydi;

chet elda ishlab chiqarilayotgan zamonaviy asbob-uskunalar va texnologiyalar, ularning texnik va ishlab chiqarish-iqtisodiy tavsiflari, samaradorligi darajasi va amalda sinab koʻrilganligi darajasi, shuningdek faoliyat ixtisosligi boʻyicha yuqori texnologik asbob-uskunalarning asosiy xorijiy ishlab chiqaruvchilari va yetkazib beruvchilari, texnologiyalarning ishlab chiquvchilari va litsenziarlari toʻgʻrisidagi maʼlumotlarning axborot-tahlil bazasini shakllantiradi va doimiy ravishda yangilanishini taʼminlaydi;

sanoat korxonalarini qurish, rekonstruksiya qilish va modernizatsiyalash boʻyicha xorijiy investorlar va kompaniyalardan tushayotgan takliflar boʻyicha axborotni toʻplaydi va umumlashtiradi, mahalliy xomashyoni qayta ishlash yoʻli bilan jahon bozorida va ichki bozorda talab yuqori boʻlgan raqobatga bardoshli tayyor mahsulotlar va yarim tayyor sanoat mahsulotlari ishlab chiqarishga yoʻnaltirilgan yangi investitsiya loyihalarini amalga oshirish boʻyicha takliflar ishlab chiqishda qatnashadi;

asbob-uskunalar, texnika va texnologiyalarning ixtisoslashtirilgan bozorlarida taklif etiladigan texnik, ishlab chiqarish-iqtisodiy va narx tavsiflarini kuzatib borish imkonini beruvchi asosiy xorijiy kataloglar va nashrlarga obuna boʻladi;

investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibiga muvofiq vakolatli ekspertiza organlari tomonidan ularning vakolatlari doirasida investitsiya loyihalarining dastlabki va yakuniy texnik-iqtisodiy asoslanishi va hisob-kitoblari samarali, sifatli va oʻz vaqtida ekspertizadan oʻtkazilishi ishlarini muvofiqlashtiradi;

vakolatli ekspertiza organlari va Tabiatni muhofaza qilish davlat qoʻmitasining beriladigan xulosalari nusxalarini oladi;

investitsiya loyihalarining dastlabki texnik-iqtisodiy asoslanishini va hisob-kitoblarini hamda texnik-iqtisodiy asoslanishini va hisob-kitoblarini tasdiqlash boʻyicha Oʻzbekiston Respublikasi Prezidenti hujjatlari, Oʻzbekiston Respublikasi Vazirlar Mahkamasi qarorlari loyihalarini koʻrib chiqadi va belgilangan tartibda kelishadi;

amalga oshiriladigan faoliyat doirasidagi qonun hujjatlarini takomillashtirish yuzasidan Oʻzbekiston Respublikasi Vazirlar Mahkamasiga takliflar kiritadi;

qonun hujjatlariga muvofiq boshqa funksiyalarni amalga oshiradi.

III. Agentlikning huquqlari va javobgarligi

8. Agentlik:

vazirliklar, idoralar va boshqa tashkilotlardan Agentlikka yuklangan vazifalarni bajarish uchun zarur boʻlgan hujjatlarni, tahliliy maʼlumotlarni va boshqa maʼlumotlarni belgilangan tartibda soʻrash;

amalga oshiriladigan faoliyat doirasida, shu jumladan investitsiya loyihalarining dastlabki va yakuniy texnik-iqtisodiy asoslanishini va hisob-kitoblarini ekspertizadan oʻtkazish uchun loyihalash tashkilotlari, vazirliklar, idoralar va boshqa tashkilotlardan, shuningdek chet eldan yuqori malakali mutaxassislarni ekspertlar sifatida belgilangan tartibda jalb etish;

oʻzi tomonidan beriladigan xulosalar boʻyicha tavsiyalarni “Oʻzogʻirneftgazkimyoloyiha” institutining ilmiy-texnik kengashiga va vakolatli ekspertiza organlariga yuborish;

investitsiya loyihalarining dastlabki va yakuniy texnik-iqtisodiy asoslanishi va hisob-kitoblari sifatli ishlab chiqilishi va ekspertizadan oʻtkazilishini, shuningdek oʻz vaqtida yuritilishini taʼminlash masalalari boʻyicha vakolatli ekspertiza organlari va boshqa tashkilotlar ishtirokida yigʻilishlar oʻtkazish;

konsalting tashkilotlarining hisobotlari asosida asbob-uskunalar, texnika va texnologiyalarning sifati, soni va narxlari darajasi yuzasidan belgilangan tartibda xulosalar berish;

Agentlikka yuklangan vazifalarni bajarish bilan bogʻliq konsalting xizmatlari va boshqa xizmatlarni pulli asosda koʻrsatish;

belgilangan tartibda noshirlik faoliyatini amalga oshirish, axborot materiallari, davriy nashrlar va boshqa bosma mahsulotlarni chop etish va tarqatish huquqiga ega.

Agentlik qonun hujjatlariga muvofiq boshqa huquqlarga ham ega boʻlishi mumkin.

9. Agentlik oʻziga yuklangan vazifalar va funksiyalar samarali bajarilishi uchun javob beradi.

IV Agentlik faoliyatini tashkil etish

10. Agentlikka Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan va maqomiga koʻra vazirning birinchi oʻrinbosariga tenglashtiriladigan direktor boshchilik qiladi.

Agentlik direktorining oʻrinbosari Oʻzbekiston Respublikasi Prezidenti devoni Tashkiliy-kadrlar xizmati bilan kelishgan holda Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod etiladi hamda maqomiga koʻra vazir oʻrinbosariga tenglashtiriladi.

11. Agentlikning faoliyati Oʻzbekiston Respublikasi Davlat budjeti mablagʻlari, oʻz mablagʻlari va qonun hujjatlarida taqiqlanmagan boshqa mablagʻlar hisobiga moliyalashtiriladi.

12. Agentlik direktori:

Agentlik faoliyatiga umumiy rahbarlik qiladi hamda Agentlikka yuklangan vazifalar va funksiyalar bajarilishi uchun shaxsan javob beradi;

xodimlarning belgilangan soni va mehnatga haq toʻlash fondi doirasida tuzilmaga Oʻzbekiston Respublikasi Vazirlar Mahkamasi bilan kelishgan holda oʻzgartirishlar kiritadi;

Agentlikning shtat jadvali va xarajatlari smetasini tasdiqlaydi;

Agentlikning tarkibiy boʻlinmalari toʻgʻrisidagi nizomlarni tasdiqlaydi;

Agentlik xodimlarining lavozim vazifalarini tasdiqlaydi;

yuqori malaka, professionalizm va ish sifati uchun Agentlik xodimlariga lavozim maoshining 50 foizigacha miqdorda har oylik ustamalar, lavozim maoshining 100 foizigacha miqdorda har choraklik ustamalar, mehnatga haq toʻlash fondi doirasida toʻlanadigan kompleks ekspert baholashning yuqori sifati uchun lavozim maoshining 100 foizigacha miqdorda (ustamalarni hisobga olmagan holda) bir martalik mukofot pulini belgilaydi, shuningdek yuklangan vazifalarning bajarilishi natijadorligini hisobga olgan holda ularni qayta koʻrib chiqadi;

Agentlik xodimlarini belgilangan tartibda lavozimga tayinlaydi va lavozimdan ozod qiladi;

oʻz vakolatlari doirasida Agentlik xodimlari tomonidan bajarilishi majburiy boʻlgan buyruqlar, farmoyishlar chiqaradi va koʻrsatmalar beradi.

Direktor qonun hujjatlariga muvofiq boshqa vakolatlarni ham amalga oshiradi.

13. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.

Oʻzbekiston Respublikasi Vazirlar Mahkamasi huzuridagi Yangi quriladigan va rekonstruksiya qilinadigan ishlab chiqarish quvvatlari loyihalarining texnik-iqtisodiy asoslanishini, texnika va texnologiyalarni ekspertizadan oʻtkazib baholash agentligida loyihalarning dastlabki va yakuniy texnik-iqtisodiy asoslanishini va hisob-kitoblarini (DTIA/TIA, DTIH/TIH) ekspertizadan oʻtkazish boʻyicha oʻzaro hamkorlik qilish

SXEMASI