Oliy taʼlim tashkilotlari magistratura mutaxassisliklari talabalari tomonidan stajirovkani oʻtash tartibi toʻgʻrisidagi nizomni tasdiqlash toʻgʻrisida (2734-son)
26.11.2015
Oʻzbekiston Respublikasi Oliy va oʻrta maxsus taʼlim vazirining
buyrugʻi
[Oʻzbekiston Respublikasi Adliya vazirligi tomonidan 2015-yil 26-noyabrda 2734-son bilan davlat roʻyxatidan oʻtkazilgan]
Oʻzbekiston Respublikasining “Taʼlim toʻgʻrisida”gi Qonuni, Oʻzbekiston Respublikasi Vazirlar Mahkamasining 2001-yil 16-avgustdagi 343-son “Oliy taʼlimning davlat taʼlim standartlarini tasdiqlash toʻgʻrisida”gi va 2015-yil 2-martdagi 36-son “Magistratura toʻgʻrisidagi nizomni tasdiqlash haqida”gi qarorlariga muvofiq buyuraman:
1. Oliy taʼlim tashkilotlari magistratura mutaxassisliklari talabalari tomonidan stajirovkani oʻtash tartibi toʻgʻrisidagi nizom ilovaga muvofiq tasdiqlansin.
2. Mazkur buyruq rasmiy eʼlon qilingan kundan eʼtiboran kuchga kiradi.
Vazir A. VAXABOV
Toshkent sh.,
2015-yil 30-oktabr,
9-2015-son
Oʻzbekiston Respublikasi oliy va oʻrta maxsus taʼlim vazirining 2015-yil 30-oktabrdagi 9-2015-son buyrugʻiga ILOVA
Oliy taʼlim tashkilotlari magistratura mutaxassisliklari talabalari tomonidan stajirovkani oʻtash tartibi toʻgʻrisidagi
NIZOM
Mazkur Nizom oliy taʼlim tashkilotlari (bundan buyon matnda OTM deb yuritiladi) magistratura mutaxassisliklari talabalari (bundan buyon matnda magistratura talabasi deb yuritiladi) tomonidan stajirovka oʻtash tartibini belgilaydi.
1-bob. Umumiy qoidalar
1. Mazkur Nizomda quyidagi asosiy tushunchalardan foydalaniladi:
OTMdan stajirovka rahbari — stajirovkaga yoʻllangan magistratura talabasining magistrlik dissertatsiyasi va ilmiy-tadqiqot ishlariga bevosita rahbarlik qilayotgan ilmiy rahbar (ilmiy maslahatchi), magistratura talabasining stajirovkasiga rahbarlik qilish oʻquv yuklamasiga kiritilgan OTM professor-oʻqituvchisi;
stajirovka (ishlab chiqarishda, ilmiy-tadqiqot muassasasida, xorijda tajriba orttirish) — magistratura mutaxassisligi boʻyicha maqsadli kasbiy taʼlim oʻquv reja va dasturlarini oʻzlashtirish, magistratura talabalarida ilmiy-tadqiqot kompetensiyalarini shakllantirish maqsadida taʼlimning fan va ishlab chiqarish bilan integratsiyasini rivojlantirish yoʻli orqali magistrlarni eng yangi ilmiy-texnik rivojlanishdagi yutuqlar hamda iqtisod, fan, texnika, madaniyat va sogʻliqni saqlash tarmoqlaridagi zamonaviy texnika va texnologiyalar bazasida ilmiy tadqiqot olib borishi;
stajirovka oʻtash dasturi — stajirovka davomida iqtisod, fan, texnika, madaniyat, sogʻliqni saqlash, qishloq va suv xoʻjaligi tarmoqlaridagi zamonaviy texnika va texnologiyalar bazasida eng yangi ilmiy-texnik rivojlanishdagi yutuqlarni oʻrganish hamda magistratura talabasining magistrlik dissertatsiyasini (yoki uning bir qismini) tayyorlash uchun materiallar yigʻish, magistrlik dissertatsiyasi mavzusi yuzasidan ilmiy-tadqiqot ishlarini bajarish, magistrlik dissertatsiyasi (yoki uning bir qismi) uchun zarur boʻlgan tajriba-sinovlarni oʻtkazish, ularni mutaxassislar muhokamasidan oʻtkazish, tajriba-sinov natijalaridan ilmiy xulosalar chiqarish boʻyicha tadbirlarni qamrab olgan stajirovka rahbari tomonidan ishlab chiqilgan va fakultet dekani yoki OTMning zimmasiga stajirovka masalalari bilan shugʻullanish majburiyati yuklatilgan tarkibiy boʻlinmasi boshligʻi tomonidan tasdiqlanadigan dastur (xorijda stajirovka oʻtash dasturi OTM rektori (direktori) tomonidan tasdiqlanadi);
qabul qiluvchi tashkilot — stajirovka oʻtkazilishi rejalashtirilgan hamda oʻtkaziladigan yuridik shaxs;
qabul qiluvchi tashkilotdan stajirovka rahbari — zimmasiga magistratura talabalari tomonidan stajirovka oʻtash dasturida belgilangan topshiriqlar bajarilishini nazorat qilish, ularni amaliy koʻnikmalarga oʻrgatish, magistrlik dissertatsiyasining tajriba-sinovlarini oʻtkazish va uning amaliy qismi materiallarini tayyorlashga koʻmaklashish masʼuliyati yuklangan qabul qiluvchi tashkilot xodimi.
2. Mazkur Nizom talablari:
Oʻzbekiston Respublikasi Prezidenti huzuridagi Davlat siyosati va boshqaruvi akademiyasi, Oʻzbekiston Respublikasi Bank-moliya akademiyasi va Biznes va tadbirkorlik oliy maktabiga;
Oʻzbekiston Respublikasi hududida oʻz faoliyatini yuritayotgan, oʻrnatilgan tartibda faoliyati xususiyatlari inobatga olinib, magistrlar tayyorlashni amalga oshirayotgan xalqaro va xorijiy OTMlariga, shuningdek yuridik taʼlim tashkilotlariga nisbatan tatbiq etilmaydi.
3. Stajirovka magistratura talabasining ilmiy-tadqiqot ishlari taqozo etganda individual ilmiy izlanish va tajriba-sinovlarni oʻtkazish maqsadida tashkil etiladi va magistratura talabalari OTM kengashi tavsiyasiga muvofiq stajirovka oʻtashga yuboriladi.
4. Stajirovka:
ilmiy-tadqiqot olib borish, nazariy va amaliy bilimlarni chuqurlashtirishi;
iqtisod, fan, madaniyat va sogʻliqni saqlash hamda boshqa tarmoqlardagi zamonaviy texnika va texnologiyalar bilan tanishtirishi;
amaliy kasbiy va ilmiy-tadqiqot kompetensiyalarni shakllantirishi;
mutaxassislik boʻyicha bilim va koʻnikmalarni takomillashtirish va magistrlik dissertatsiyasi (yoki biror qismi) boʻyicha tajriba-sinov, ilmiy-tadqiqot ishlarini bajarilishi;
kasbga samarali moslashuvni taʼminlashi lozim.
5. Magistratura talabalari stajirovkani stajirovka oʻtash dasturi asosida ishlab chiqarishda, ilmiy-tadqiqot muassasasida yoki xorijda oʻtashi mumkin.
2-bob. Stajirovkani tashkil etish
6. Stajirovkani tashkil etish magistratura talabalari tomonidan kasbiy faoliyatni egallashda uzluksizlik va izchillikni taʼminlashga yoʻnaltirilishi lozim.
7. OTM kengashi magistratura talabasining ilmiy rahbari tavsiyasiga koʻra magistratura talabasini stajirovka oʻtashga yuborish masalasini koʻrib chiqadi va tegishli qaror qabul qiladi.
8. Magistratura talabasi kadrlar isteʼmolchilari tomonidan tanlov asosida stajirovka oʻtashga jalb qilinishi mumkin.
9. Stajirovka oʻtashga yuborilayotgan magistratura talabalari roʻyxati OTMdan stajirovka rahbari koʻrsatilgan holda OTM rektorining (direktorining) buyrugʻi bilan tasdiqlanadi.
10. Stajirovka oʻtash uchun yuborishda magistratura talabasining qabul qiluvchi tashkilot tomonidan turar joy bilan taʼminlash imkoniyati hisobga olinadi.
11. Stajirovka OTM joylashgan hududdan (shahardan, viloyatdan) tashqarida yoki xorijda oʻtkazilishi nazarda tutilganda, stajirovkaga borish va undan qaytish boʻyicha bir martalik yoʻl haqi xarajatlari qonunchilik hujjatlarida belgilangan tartibda OTMning budjetdan tashqari mablagʻlari hisobidan qoplanadi, mazkur xarajatlar qabul qiluvchi tashkilot tomonidan qoplanishi koʻrsatilgan hollar bundan mustasno.
12. OTM rektori (direktori) stajirovka oʻtash jarayonida magistratura talabasi xavfsizligini taʼminlash boʻyicha zarur chora-tadbirlar koʻrilishini taʼminlaydi.
13. Stajirovka boʻyicha ishlarni muvofiqlashtirish OTMning magistratura boʻlimi tomonidan tegishli kafedra mudiri va fakultet dekani yoki OTMning zimmasiga stajirovka masalalari bilan shugʻullanish majburiyati yuklatilgan tarkibiy boʻlinmasi bilan hamkorlikda amalga oshiriladi.
14. Stajirovka OTM bilan qabul qiluvchi tashkilot oʻrtasida stajirovkani tashkil etish va oʻtkazish boʻyicha tuzilgan shartnomalar (kelishuvlar) asosida amalga oshiriladi, stajirovkani xorijda oʻtash hollari bundan mustasno.
15. Stajirovkani tashkil etish va oʻtkazish boʻyicha tuzilgan shartnomada shartnoma predmeti, taraflarning huquq va majburiyatlari, magistratura talabasini turar joy bilan taʼminlash, shartnomaning amal qilish muddati, shartnomani bekor qilish asoslari, taraflarning javobgarligi va stajirovka oʻtashni tashkil etish bilan bogʻliq boshqa muhim shartlar nazarda tutiladi.
16. Stajirovka oʻtash davrida stajirovka oʻtayotgan magistratura talabasiga qabul qiluvchi tashkilotdagi tegishli mehnatni muhofaza qilish qoidalari va ichki mehnat tartibi qoidalari, shuningdek qabul qiluvchi tashkilotda amalda boʻlgan boshqa hujjatlar tatbiq qilinadi.
3-bob. Stajirovkaga rahbarlik qilish
17. OTMdan stajirovka rahbari stajirovka davomida magistratura talabasi tomonidan stajirovka dasturining oʻz vaqtida bajarilishini nazorat qiladi va zarur hollarda, unga amaliy koʻmaklashib boradi.
Stajirovka nazorati elektron ravishda yoki boshqa telekommunikatsiya vositalari (telefon, faks va boshqa vositalar) orqali amalga oshirilishi mumkin.
18. OTMdan stajirovka rahbari:
magistratura talabalarini stajirovka oʻtash joylariga taqsimlashda ishtirok etadi;
magistratura talabasiga berish uchun OTMning tegishli boʻlinmasidan stajirovka kundaligini qabul qilib oladi;
stajirovka oʻtash dasturini ishlab chiqadi;
magistratura talabasining stajirovkasiga umumiy rahbarlik qiladi;
stajirovka oʻtash uchun ketayotgan magistratura talabasiga zarur yoʻl-yoʻriqlar beradi;
magistratura talabasining stajirovka oʻtash joyiga yetib borishi va qaytishini nazorat qiladi;
qabul qiluvchi tashkilotdan stajirovka rahbari bilan stajirovka oʻtash holati boʻyicha muntazam ravishda aloqada faoliyat olib boradi;
magistratura talabasiga stajirovka oʻtash dasturini bajarish boʻyicha uslubiy yordam koʻrsatadi;
zarur hollarda, stajirovka oʻtash joylariga borish orqali stajirovka oʻtash tartibiga magistratura talabasi tomonidan rioya qilinishini, stajirovka oʻtash dasturi bajarilishini nazorat qiladi;
stajirovka oʻtashni takomillashtirish yuzasidan oʻz taklif va mulohazalarini OTM kengashida koʻrib chiqish uchun taqdim etadi.
19. Qabul qiluvchi tashkilot rahbari:
stajirovkani tashkil etish boʻyicha buyruq (qaror) qabul qiladi;
malakali va tajribali mutaxassislar orasidan stajirovka rahbarini tayinlaydi;
magistratura talabasiga stajirovka oʻtash dasturiga muvofiq stajirovka oʻtash uchun zarur sharoitlar yaratilishini taʼminlaydi.
20. Qabul qiluvchi tashkilotdan stajirovka rahbari:
tashkilotda magistratura talabasining stajirovkasiga umumiy rahbarlik qiladi;
magistratura talabasiga zarur yoʻl-yoʻriqlar va tushuntirishlar beradi;
magistratura talabasini qabul qiluvchi tashkilot obyektlarining tuzilishi, faoliyat yoʻnalishlari va boshqa oʻziga xos xususiyatlari bilan tanishtiradi;
magistratura talabasining stajirovka oʻtash dasturiga taalluqli zarur materiallardan foydalanishini taʼminlaydi;
magistratura talabasiga stajirovka oʻtash dasturida nazarda tutilgan masalalar boʻyicha zarur maslahatlar beradi;
magistratura talabasi tomonidan amalga oshirilayotgan ishlar va stajirovka kundaligining yuritilishi ustidan doimiy nazoratni amalga oshiradi;
OTMdan stajirovka rahbari bilan stajirovka oʻtash holati boʻyicha muntazam ravishda aloqada faoliyat olib boradi;
stajirovka kundaligining tegishli qismlarini imzolaydi, imzo qabul qiluvchi tashkilot muhri (muhr mavjud boʻlgan taqdirda) bilan tasdiqlanadi;
OTMdagi stajirovka rahbari yoki OTM rahbariyatini magistratura talabasining stajirovka oʻtash uchun kelmayotganligi yoki u tomonidan stajirovka oʻtash dasturi bajarilmayotganligi yoxud mehnat intizomi buzilayotganligi haqida xabardor qiladi;
21. Qabul qiluvchi tashkilotdan stajirovka rahbari magistratura talabasidan stajirovka oʻtash dasturi bilan bogʻliq boʻlmagan vazifa va topshiriqlarni bajarishni talab etishga haqli emas.
4-bob. Magistratura talabasining stajirovka boʻyicha huquq va majburiyatlari
22. Magistratura talabasi:
stajirovkani oʻtash shartlari va tartibi bilan oldindan tanishish;
stajirovka boʻyicha oʻz fikr-mulohazalarini bildirish;
stajirovka yuzasidan zarur axborotlar olish huquqiga ega.
23. Magistratura talabasi zimmasiga:
stajirovkani belgilangan muddatlarda oʻtash;
stajirovka oʻtash dasturida koʻrsatilgan topshiriqlarni (ishlarni) belgilangan tartibda, toʻliq va sifatli bajarish;
stajirovka kundaligini har kuni va tartibli yuritish, jumladan stajirovka davomida bajarilgan ishlarni stajirovka kundaligiga qayd etib borish;
qabul qiluvchi tashkilotda (davlatda) belgilangan tartib qoidalarga rioya qilish majburiyati yuklatiladi.
24. Magistratura talabasi stajirovka boʻyicha qonunchilik hujjatlarida yoki oliy taʼlim tashkiloti ustavida belgilangan boshqa huquqlarga ega boʻlishi va uning zimmasiga boshqa majburiyatlar ham yuklatilishi mumkin.
5-bob. Stajirovka oʻtash bosqichlari
25. Stajirovka oʻtash quyidagi bosqichlarga boʻlinadi:
tayyorlov bosqichi (stajirovka oʻtashning birinchi kuni);
asosiy bosqich;
yakuniy bosqich (stajirovka boʻyicha hisobot himoyasi).
26. Stajirovka oʻtashning tayyorlov bosqichida — qabul qiluvchi tashkilotdan stajirovka rahbari tomonidan stajirovka oʻtash uchun kelgan magistratura talabasi tegishli mehnatni muhofaza qilish qoidalari, ichki mehnat tartibi qoidalari, tashkilotda stajirovka oʻtashning talab va shartlari, tashkilotning tashkiliy tuzilmasi, vazifa va funksiyalari, faoliyat yoʻnalishlari bilan tanishtiriladi hamda stajyorga stajirovka oʻtash dasturiga muvofiq tegishli koʻrsatmalar beriladi. Mazkur bosqichda magistratura talabasi tomonidan qabul qiluvchi tashkilotdan stajirovka rahbari bilan kelishgan holda stajirovka oʻtash dasturini bajarish boʻyicha reja-jadval (kalendar reja) tuziladi.
27. Stajirovka oʻtashning asosiy bosqichida — magistratura talabasi tomonidan stajirovka oʻtash dasturini bajarish boʻyicha reja-jadvalda (kalendar rejada) nazarda tutilgan ishlar bajariladi.
28. Stajirovka oʻtashning yakuniy bosqichida — magistratura talabasi tomonidan stajirovka oʻtash davrida (jarayonida) amalga oshirilgan ishlar va ularning natijalari koʻrib chiqiladi, tahlil qilinadi hamda baholanadi.
6-bob. Stajirovkani rasmiylashtirish
29. Magistratura talabasi birinchi semestrni (birinchi kursni) muvaffaqiyatli tugatgandan soʻng, stajirovka oʻtashga yuboriladi. Stajirovka rejalashtirilayotganda uning yakuniy davlat attestatsiyasi boshlanishiga ikki oy qolgunga qadar yakunlanishi hisobga olinishi lozim.
30. Magistratura talabasining u taʼlim olayotgan OTM bilan oldindan tuzilgan tegishli kelishuv (shartnoma) mavjud boʻlgan tashkilotlarda stajirovka oʻtashi nazarda tutilganda, unga OTM rektorining (direktorining) OTM kengashi tavsiyasiga muvofiq chiqargan buyrugʻi bilan ushbu tashkilotda stajirovka oʻtash uchun yoʻllanma beriladi.
31. Magistratura talabasi yozgi taʼtil davrida stajirovka oʻtash uchun yuborilishi mumkin.
32. Stajirovka oʻtash jarayonida magistratura talabasi tomonidan stajirovka kundaligi yuritiladi.
Stajirovka kundaligi OTMdan stajirovka rahbari tomonidan stajirovka boshlanishidan oldin bepul beriladi.
33. Stajirovka oʻtash davrida amalga oshirilgan ishlar stajirovka dasturiga muvofiq stajirovka kundaligiga yozib boriladi va qabul qiluvchi tashkilotdan stajirovka rahbari tomonidan imzolab boriladi.
34. Stajirovka oʻtashning normal kunlik davomiyligi olti soatni tashkil etadi.
35. Stajirovkaning oxirgi kuni qabul qiluvchi tashkilotdan stajirovka rahbari stajirovka kundaligida stajirovka oʻtash natijalarini xulosa tarzida bayon etadi va imzolaydi.
Qabul qiluvchi tashkilot rahbariyati tomonidan stajirovka oʻtagan magistratura talabasiga uning iltimosiga koʻra yozma yoki elektron ravishda tavsifnoma berilishi mumkin.
36. Stajirovka oʻtash uchun yuborilgan magistratura talabalari oʻquv jadvalini individual grafik asosida bajaradi.
37. Stajirovka oʻtash muddati ilmiy rahbarning asoslangan tavsiyasiga muvofiq OTM rektori (direktori) buyrugʻi bilan bir oygacha uzaytirilishi mumkin. Bunday hollarda zarur hujjatlarga tegishli oʻzgartirishlar kiritiladi.
Stajirovkaning uzluksiz davomiyligi uch oydan oshmasligi kerak.
Stajirovka nazariy taʼlimning oʻzaro aloqasini taʼminlash shartini bajargan holda nazariy bilimlar bilan navbatlanish yoʻli orqali amalga oshirilishi mumkin.
38. Magistratura talabasi xorijda stajirovka oʻtash uchun OTMning xalqaro aloqalar bilan shugʻullanuvchi boʻlimiga qabul qiluvchi tashkilotdan olingan rasmiy taklifnomani, xorijda stajirovka oʻtash uchun qabul qiluvchi tashkilot bilan tuzilgan shartnomani (yozma ravishdagi kelishuvni) ilova qilgan holda murojaat etadi.
39. OTMning xalqaro aloqalar bilan shugʻullanuvchi boʻlimi magistratura talabasining xorijda stajirovka oʻtashi masalasini oʻrganib chiqadi va koʻrib chiqish uchun OTM kengashiga murojaat qiladi.
40. OTMning xalqaro aloqalar bilan shugʻullanuvchi boʻlimi stajirokani tashkil etish boʻyicha quyidagi ishlarni amalga oshiradi:
xorijda stajirovka oʻtaydigan magistratura talabalari roʻyxatini tayyorlaydi;
xorijda stajirovka oʻtaydigan magistratura talabasiga xorijga chiqish-kelish tartibini tushuntiradi;
xorijda stajirovka oʻtaydigan magistratura talabasiga xorijda oʻzini tutish boʻyicha tegishli koʻrsatmalar beradi;
zarur hujjatlarni, jumladan vizani rasmiylashtirishda magistratura talabasiga amaliy yordam koʻrsatadi.
41. Stajirovkani xorijda oʻtash uchun magistratura talabasi:
qabul qiluvchi tashkilot joylashgan davlat tilini yoki shartnomada koʻrsatilgan chet tilini bilishi;
stajirovka boshlanishidan kamida uch oy oldin chetga chiqish boʻyicha tegishli hujjatlarini tayyorlashi, jumladan zarur hollarda viza rasmiylashtirishi;
stajirovka boshlanishidan kamida bir oy oldin stajirovka oʻtash dasturini bajarish boʻyicha reja-jadvalni (kalendar rejani) qabul qiluvchi tashkilot bilan kelishishi lozim.
42. Xorijda stajirovka oʻtash uchun qabul qiluvchi tashkilot bilan tuziladigan shartnomada magistratura talabasining tashkilot joylashgan davlatdagi turar joyi, yashashi va yoʻl xarajatlari miqdori, manbalari hamda ular kim tomonidan qoplanishi va boshqa muhim shartlar koʻrsatilishi zarur.
43. Magistratura talabasi homiy tashkilot mablagʻlari hisobidan xorijda stajirovka oʻtashi mumkin. Bunda stajirovka homiy tashkilot bilan OTM oʻrtasidagi shartnomaga (kelishuvga) muvofiq amalga oshiriladi.
7-bob. Stajirovka boʻyicha hisobot himoyasi
44. Magistratura talabasi stajirovka oʻtab boʻlgandan soʻng, stajirovka boʻyicha yozma yoki elektron ravishda hisobot tayyorlaydi.
45. Stajirovka yakunlari boʻyicha hisobotda quyidagi maʼlumotlar aks ettirilishi lozim:
stajirovka muddati, stajirovka oʻtalgan tashkilotning nomi, joylashgan yeri;
OTMdagi stajirovka rahbari va qabul qiluvchi tashkilotdan stajirovka rahbari haqida qisqacha maʼlumotlar,;
stajirovka dasturida koʻrsatilgan tadbirlarning bajarilganlik holati, bajarilmagan tadbirlar boʻyicha magistratura talabasining asosli tushuntirishlari va tasdiqlovchi hujjatlar haqidagi maʼlumotlar;
stajirovka xorijda oʻtalgan boʻlsa, OTM xalqaro aloqalar bilan shugʻullanuvchi boʻlimining xorijda oʻtalgan stajirovka boʻyicha xulosalarini aks ettiruvchi maʼlumotlar;
stajirovka boʻyicha hisobotning ilmiy konfrensiyalarda maʼruza qilinganligi va mazkur maʼruzaning muhokama natijalariga koʻra ijobiy baholanganligini, ilmiy nashrlarda chop etilganligini koʻrsatuvchi maʼlumotlar, agar mavjud boʻlsa;
magistrlik dissertatsiyasi (dissertatsiyaning rejalashtirilgan qismi) boʻyicha amalga oshirilgan tajriba sinovlari yoki tadqiqot ishlari natijalari haqidagi maʼlumotlar;
sohani takomillashtirish va rivojlantirishga qaratilgan asosli amaliy takliflar;
stajirovka oʻtash boʻyicha boshqa muhim masalalar.
46. Stajirovka boʻyicha hisobot himoyasi stajirovka yakunlangandan soʻng, bir oy ichida OTMda tashkil etiladi.
47. Stajirovka natijalari boʻyicha magistratura talabasi tomonidan stajirovka yakunlangan kundan eʼtiboran 3 kun ichida OTM buxgalteriyasiga stajirovka davomida qilingan maqsadli xarajatlarni tasdiqlovchi hujjatlar (borish-kelish yoʻl xarajatlari chiptalari, turar joy (mehmonxona) toʻlovlari kvitansiyalari va boshqa hujjatlar) ilova qilingan holda xarajatlar haqida hisobot taqdim etiladi.
48. Magistratura talabasi OTMda stajirovka boʻyicha hisobot himoyasi oʻtkazilgunga qadar stajirovka boʻyicha hisobotni dastlab mutaxassislik kafedrasi yigʻilishida himoya qiladi. Himoya yakunlari boʻyicha mutaxassislik kafedrasi tomonidan yozma yoki elektron ravishda xulosa beriladi.
49. Magistratura talabasi stajirovka boʻyicha hisobot himoyasi oʻtkazilishidan kamida 5 kun oldin OTMdagi stajirovka rahbariga stajirovka yakuni boʻyicha quyidagi hujjatlarni taqdim etadi:
stajirovka boʻyicha hisobot;
stajirovka kundaligi;
stajirovka oʻtash vaqtida toʻplangan materiallar yigʻmajildi (ularning roʻyxati stajirovka kundaligida aks ettirilgan boʻlishi lozim). Toʻplangan materiallar yigʻmajildi stajirovka boʻyicha baho qoʻyilgandan soʻng, kelgusida oʻquv va amaliy faoliyatda foydalanish uchun magistratura talabasiga qaytarib beriladi.
50. OTMdan stajirovka rahbari stajirovka yakuni boʻyicha taqdim etilgan hujjatlarni oʻrganib, stajirovka kundaligida stajirovka oʻtash natijalarini xulosa tarzida bayon etadi va imzolaydi.
51. Stajirovka boʻyicha hisobot himoyasi OTM rektori (direktori) buyrugʻi bilan OTMning malakali va tajribali pedagog xodimlaridan iborat tarkibda tuzilgan komissiya tomonidan OTMda oʻtkaziladi.
52. Stajirovka boʻyicha hisobot himoyasida qabul qiluvchi tashkilot vakili ishtirok etishi mumkin. OTMning xalqaro aloqalar bilan shugʻullanuvchi boʻlimi xodimi (magistratura talabasi xorijda stajirovka oʻtagan boʻlsa), OTMdan stajirovka rahbari stajirovka boʻyicha hisobot himoyasida ishtirok etishi shart, ular uzrli sabablarga koʻra ishtirok etmagan hollar bundan mustasno.
53. Stajirovka boʻyicha hisobot himoyasi komissiya aʼzosining stajirovka boʻyicha rahbarlar xulosalarini oʻqib eshittirishidan boshlanadi.
Stajirovka rahbarlari xulosalari oʻqib eshittirilgandan soʻng, magistratura talabasining stajirovka boʻyicha xulosasi, stajirovka davomida toʻplagan materiallari, shuningdek stajirovkaga oid taklif va mulohazalari tinglanib, komissiya tomonidan muhokama qilinadi.
54. Stajirovka boʻyicha hisobot himoyasi quyidagi mezonlariga asosan baholanadi:
magistratura talabasining nazariy va amaliy bilimlari darajasi;
magistratura talabasi tomonidan stajirovka davomida toʻplangan materiallarning tuzilishi darajasi va sifati hamda stajirovka oʻtash davomida oʻrganilgan masalalarning yoritib berilishi;
bildirilgan takliflarning asosliligi va amaliy ahamiyati.
55. Stajirovka boʻyicha hisobot himoyasi natijalari 100 (yuz) ballik tizimda baholanadi va shu kunning oʻzida magistratura talabasiga eʼlon qilinadi.
56. Magistratura talabasi stajirovka boʻyicha hisobotni ilmiy konfrensiyalarda maʼruza qilsa va mazkur maʼruza muhokama natijalariga koʻra ijobiy baholansa, shuningdek ilmiy maqola sifatida ilmiy nashrlarda chop ettirsa, u hisobotni rasmiy himoya qilgan hisoblanadi.
57. Stajirovka boʻyicha hisobot ilmiy konfrensiyalarda maʼruza qilinganligi va mazkur maʼruza muhokama natijalariga koʻra ijobiy baholanganligini, ilmiy nashrlarda nashr etilganligini tasdiqlovchi hujjat(lar) komissiyaga taqdim etiladi. Bunda hisobotni himoya qilish talab etilmaydi hamda u maʼruza va maqolaning sifatiga qarab komissiya tomonidan baholanadi.
58. Stajirovka boʻyicha qoʻyilgan ball fanlar boʻyicha qoʻyiladigan ballarga tenglashtiriladi va umumiy oʻzlashtirish yakunlarini chiqarishda inobatga olinadi.
Stajirovka yakunlari boʻyicha 60 va undan kam ball toʻplagan hollarda magistratura talabasining bilimi “qoniqarsiz” deb baholanadi hamda magistratura talabasi stajirovka boʻyicha hisobotni bir oy ichida mazkur Nizomda belgilangan tartibda qayta himoya qilish huquqiga ega. Bunda OTM rektorining (direktorining) tegishli buyrugʻi chiqarilishi lozim.
581. Magistratura talabasining apellatsiya shikoyatlarini koʻrib chiqish uchun OTM rahbarining qarori bilan ushbu tashkilot tizimining kamida besh nafar mutaxassislaridan iborat tarkibda Apellatsiya komissiyasi tashkil etiladi.
Bunda, Apellyatsiya komissiyasi tarkibiga boshqa davlat organlari va tashkilotlaridan ham mutaxassislar kelishuv asosida jalb etilishi mumkin.
Stajirovka boʻyicha hisobot himoyasi komissiya aʼzosining Apellatsiya komissiyasi tarkibiga kiritilishiga yoʻl qoʻyilmaydi.
582. Stajirovka boʻyicha hisobot himoyasi komissiyasi qaroridan norozi boʻlgan magistratura talabasi natijalar eʼlon qilingan kundan boshlab bir oy ichida Apellyatsiya komissiyasiga yozma yoki elektron shaklda apellyatsiya shikoyati berishlari mumkin.
Bunda, Apellyatsiya komissiyasi apellyatsiya shikoyati bilan murojaat qilgan magistratura talabasini shikoyat koʻrib chiqilishidan ikki kun oldin uni koʻrib chiqish vaqti va joyi haqida ogohlantiradi.
583. Apellyatsiya komissiyasi apellyatsiya shikoyatini, u kelib tushgan kundan boshlab besh kun muddat ichida koʻrib chiqadi. Bunda, apellyatsiya shikoyati bilan murojaat qilgan magistratura talabasi mazkur shikoyatni koʻrib chiqishda ishtirok etish huquqiga ega.
584. Apellyatsiya komissiyasi unda aʼzolarning kamida uchdan ikki qismi ishtirok etganda vakolatli hisoblanadi. Apellyatsiya komissiyasining qarori oddiy koʻpchilik ovoz bilan qabul qilinadi va majlisda ishtirok etgan barcha aʼzolar tomonidan tasdiqlanadigan bayonnoma bilan rasmiylashtiriladi.
Berilgan ovozlar soni teng boʻlib qolgan taqdirda, Apellyatsiya komissiyasi raisining ovozi hal qiluvchi hisoblanadi.
585. Apellyatsiya komissiyasi tomonidan apellyatsiya shikoyatini koʻrib chiqish davomida magistratura talabasiga uni qayta baholashga qaratilgan savollar berilishiga yoʻl qoʻyilmaydi.
586. Shikoyatni koʻrib chiqish natijalari boʻyicha Apellyatsiya komissiyasi tomonidan quyidagi qarorlardan biri qabul qilinadi:
magistratura talabasi natijalarini oʻzgarishsiz qoldirish;
magistratura talabasi natijalariga oʻzgartirish kiritish va uni stajirovkadan oʻtgan deb topish.
587. Apellyatsiya komissiyasi apellyatsiya shikoyati bilan murojaat qilgan magistratura talabasiga oʻz qarorini u qabul qilingan kunning oʻzida maʼlum qilishi kerak.
588. Apellyatsiya komissiyasi qarori ustidan magistratura talabasi yuqori turuvchi organga yoki sudga shikoyat qilishi mumkin.
59. Magistratura talabasi stajirovkani uzrli sabablarsiz oʻtamaganda, stajirovka oʻtash bilan bogʻliq barcha xarajatlar qonunchilik hujjatlarida belgilangan tartibda undiriladi.
Magistratura talabasining ogʻir kasalligi, favqulodda holatlar (yaqin qarindoshining vafot etganligi yoki uning oilasiga jiddiy moddiy (maʼnaviy) zarar yetkazgan voqea va shu kabi boshqa holatlar) yuz berganligi sababli, stajirovka oʻtashga bora olmaganligi yoki stajirovka dasturini toʻliq yakunlay olmaganligi uzrli holatlar deb topiladi. Bunda magistratura talabasi ushbu holatlar yuz berganligini tasdiqlovchi hujjatlarni taqdim etishi lozim.
8-bob. Stajirovkani moliyalashtirish
60. Stajirovka oʻtash davrida magistratura talabalarining stipendiya olish huquqi saqlanib qoladi.
61. Quyidagilar stajirovka oʻtashni moliyalashtirish manbalari hisoblanadi:
ushbu maqsadlar uchun ajratilgan OTMning budjetdan tashqari mablagʻlari;
qabul qiluvchi tashkilotning mablagʻlari (budjet tashkilotlarida ularning ushbu maqsadlar uchun ajratilgan budjetdan tashqari mablagʻlari);
xorijiy davlatlardagi qabul qiluvchi tashkilotning mablagʻlari;
homiylarning begʻaraz yordami tufayli tushgan (ushbu maqsadlar uchun ajratilgan) mablagʻlari;
qonunchilik hujjatlarida belgilangan boshqa manbalar.
9-bob. Yakuniy qoidalar
62. Mazkur Nizomda belgilangan masalalar boʻyicha nizolar qonunchilik hujjatlari asosida hal etiladi.
63. Mazkur Nizom Oʻzbekiston Respublikasi Moliya vazirligi, Iqtisodiyot vazirligi, Sogʻliqni saqlash vazirligi, Tashqi ishlar vazirligi, Xalq taʼlimi vazirligi, Qishloq va suv xoʻjaligi vazirligi, Madaniyat va sport ishlari vazirligi, Axborot texnologiyalari va kommunikatsiyalarini rivojlantirish vazirligi, Fanlar akademiyasi, Davlat soliq qoʻmitasi, Oʻzbekiston Badiiy akademiyasi, “Oʻzbekiston temir yoʻllari” AJ va Navoiy kon-metallurgiya kombinati Davlat korxonasi bilan kelishilgan.
Moliya vaziri R. AZIMOV
2015-yil 30-oktabr
Iqtisodiyot vaziri G. SAIDOVA
2015-yil 30-oktabr
Sogʻliqni saqlash vaziri A. ALIMOV
2015-yil 30-oktabr
Tashqi ishlar vaziri A. KOMILOV
2015-yil 30-oktabr
Xalq taʼlimi vaziri U. INOYATOV
2015-yil 30-oktabr
Qishloq va suv xoʻjaligi vaziri Sh. TESHAYEV
2015-yil 30-oktabr
Madaniyat va sport ishlari vaziri B. AXMEDOV
2015-yil 30-oktabr
Axborot texnologiyalari va kommunikatsiyalarini rivojlantirish vaziri X. MIRZAXIDOV
2015-yil 30-oktabr
Fanlar akademiyasi prezidenti Sh. SALIXOV
2015-yil 30-oktabr
Davlat soliq qoʻmitasi raisi B. PARPIYEV
2015-yil 30-oktabr
Oʻzbekiston Badiiy akademiyasi raisi A. NURITDINOV
2015-yil 30-oktabr
“Oʻzbekiston temir yoʻllari” AJ raisi A. RAMATOV
2015-yil 30-oktabr
Navoiy kon-metallurgiya kombinati Davlat korxonasi bosh direktori Q. SANAQULOV
2015-yil 30-oktabr