Oʻzbekiston Respublikasi Davlat budjetining 2005-yil toʻqqiz oyidagi ijrosi yakunlari toʻgʻrisida (181-I-son)

15.12.2005

Oʻzbekiston Respublikasi Oliy Majlisi Qonunchilik palatasining

Qarori

Oʻzbekiston Respublikasi Vazirlar Mahkamasi tomonidan taqdim etilgan Oʻzbekiston Respublikasi Davlat budjetining 2005-yil toʻqqiz oyidagi ijrosi yakunlari toʻgʻrisidagi hisobotni koʻrib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Davlat budjetining 2005-yil toʻqqiz oyidagi ijrosi yakunlari toʻgʻrisidagi hisobot tasdiqlansin.

2005-yilning toʻqqiz oyida Davlat budjetining daromadlari uning xarajatlaridan 53,0 mlrd soʻm miqdorida ortiq boʻlishiga erishilganligi yoki Davlat budjeti yalpi ichki mahsulotga nisbatan 0,5 foiz miqdorida profitsit bilan ijro etilganligi maʼlumot uchun qabul qilinsin.

2. Oʻzbekiston Respublikasi Vazirlar Mahkamasi Davlat budjeti xarajatlari samaradorligi yanada oshirilishi va maqbullashtirilishini, qatʼiy pul-kredit siyosati oʻtkazilishini, soliq tushumlari mexanizmi takomillashtirilishini, milliy valyuta kursining mustahkamlanishini, shuningdek budjetning birinchi navbatdagi xarajatlarini, aholining ijtimoiy himoyaga muhtoj qatlamlarini muhofaza qilish tadbirlarini hamda budjet xarajatlarining ijtimoiy yoʻnaltirilganligini kuchaytirishga oid boshqa tadbirlarni toʻliq va oʻz vaqtida moliyalashtirish yuzasidan aniq chora-tadbirlar koʻrilishini taʼminlasin, bunda Maktab taʼlimini rivojlantirish davlat umummilliy dasturini amalga oshirishni davom ettirishga alohida eʼtibor qaratsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining eʼtibori tegishli mintaqalar boʻyicha budjet toʻlovlari toʻliq tushishini taʼminlash, mintaqalarning soliq bazasi va moliyaviy salohiyatini kengaytirish yuzasidan amaliy choralar koʻrish hamda shu asosda mahalliy budjetlarning xarajatlari toʻliq moliyalashtirilishini taʼminlash zarurligiga qaratilsin.

4. Ushbu qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri E. XALILOV

Toshkent sh.,

2005-yil 15-dekabr,

181-I-son