Aholining ijtimoiy himoyaga muhtoj qatlamlarini aniq yoʻnaltirilgan tarzda qoʻllab-quvvatlashning 2002-2003-yillarga moʻljallangan dasturi toʻgʻrisida (306-II-son)

06.12.2001

Oʻzbekiston Respublikasi Oliy Majlisining

Qarori

Oʻzbekiston Respublikasi Vazirlar Mahkamasi tomonidan taqdim etilgan Aholining ijtimoiy himoyaga muhtoj qatlamlarini aniq yoʻnaltirilgan tarzda qoʻllab-quvvatlashning 2002-2003-yillarga moʻljallangan dasturini koʻrib chiqib, Oʻzbekiston Respublikasi Oliy Majlisi qaror qiladi:

1. Aholining ijtimoiy himoyaga muhtoj qatlamlarini aniq yoʻnaltirilgan tarzda qoʻllab-quvvatlanishning 2002-2003-yillarga moʻljallangan dasturi maʼqullansin.

2. Oʻzbekiston Respublikasi Vazirlar Mahkamasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

aholining ijtimoiy himoya qilinishini taʼminlashga yoʻllanayotgan budjet mablagʻlaridan ular aholining ijtimoiy himoyaga muhtoj qatlamlariga yoʻnaltirilganligini kuchaytirishni nazarda tutgan holda foydalanish samaradorligini oshirish;

aholini ijtimoiy himoya qilishga yoʻllanayotgan mablagʻlarning taqsimlanishi uchun masʼul boʻlgan fuqarolar oʻzini oʻzi boshqarish organlarining moliyaviy negizini mustahkamlash;

davlat ijtimoiy madadini oluvchilar qatorini bir yoʻla ana shunday yordamga muhtojlikni belgilashning qoʻshimcha mezonlarini joriy etgan holda kengaytirish;

kam taʼminlangan oilalarning mehnatga qobiliyatli aʼzolari iqtisodiy faolligini oshirish uchun qulay shart-sharoit yaratish hamda oilaviy tadbirkorlikni rivojlantirishga yoʻllanayotgan kredit resurslarining hajmlarini koʻpaytirish hisobiga aholining anchagina qismini kam taʼminlanganlar toifasidan chiqarish;

yoshlarni taʼlim jarayoniga faol jalb qilish, yangi tipdagi oʻquv yurtlarining (akademik litseylar, kasb-hunar kollejlarining) nufuzini oshirish, kam taʼminlangan oilalarga mansub oʻquvchilarning darsliklar va oʻquv adabiyotlaridan erkin foydalana olishini taʼminlash;

qishloq joylarda taʼlim jarayonining sifat darajasini oshirish;

pensiya taʼminoti tizimini yanada takomillashtirish va kuchaytirish;

davlat mablagʻlaridan belgilangan maqsadda foydalanish ustidan jiddiy nazoratni taʼminlash yuzasidan zarur chora-tadbirlarni koʻrsinlar.

Oʻzbekiston Respublikasi Oliy Majlisining Raisi E. XALILOV

Toshkent sh.,

2001-yil 6-dekabr,

306-II-son