Elektr energiyasi va tabiiy gaz isteʼmolini hisobga olish tizimini takomillashtirish toʻgʻrisida (309-son)

02.11.2015

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “2015 — 2019-yillarda iqtisodiyot tarmoqlari va ijtimoiy sohada energiya sigʻimini qisqartirish, energiya tejaydigan texnologiyalarni joriy etish chora-tadbirlari Dasturi toʻgʻrisida” 2015-yil 5-maydagi PQ-2343-son qaroriga muvofiq, elektr energiyasi va tabiiy gaz isteʼmolini hisobga olishning avtomatlashtirilgan tizimini takomillashtirish maqsadida Vazirlar Mahkamasi qaror qiladi:

1. “Oʻzbekenergo” aksiyadorlik jamiyati va “Oʻztransgaz” aksiyadorlik jamiyati tomonidan elektr energiyasi va tabiiy gaz isteʼmolini hisobga olishning avtomatlashtirilgan tizimini joriy etish loyihalari bosqichma-bosqich amalga oshirilayotganligi maʼlumot uchun qabul qilinsin.

2. 2018-yil 1-yanvardan boshlab elektr energiyasi va tabiiy gaz isteʼmolini hisobga olish va nazorat qilishning avtomatlashtirilgan tizimi bilan mos boʻlgan zamonaviy elektron hisobga olish priborlari bilan jihozlanmagan xoʻjalik yurituvchi subyektlarga — yuridik shaxslarga elektr energiyasi va tabiiy gaz yetkazib berish taqiqlansin.

3. Belgilansinki, xoʻjalik yurituvchi subyektlarni — yuridik shaxslarni tabiiy gaz isteʼmolini hisobga olish va nazorat qilishning avtomatlashtirilgan tizimiga mos boʻlgan zamonaviy elektron hisobga olish priborlari bilan jihozlash ularning oʻz mablagʻlari hisobiga amalga oshiriladi.

4. “Oʻzbekenergo” aksiyadorlik jamiyati va “Oʻztransgaz” aksiyadorlik jamiyati:

“Oʻzstandart” agentligi bilan birgalikda elektr energiyasi va tabiiy gaz isteʼmolchilarida oʻrnatiladigan elektr energiyasi va tabiiy gaz isteʼmolini hisobga olishning avtomatlashtirilgan tizimi bilan mos boʻlgan zamonaviy elektron hisobga olish priborlariga qoʻyiladigan yagona texnik talablar 2017-yil 1-yanvargacha boʻlgan muddatda belgilangan tartibda ishlab chiqilishi va tasdiqlanishini;

Oʻzbekiston matbuot va axborot agentligi hamda Oʻzbekiston milliy teleradiokompaniyasi bilan birgalikda ushbu qarorning maqsadlari va mohiyati ommaviy axborot vositalarida, shu jumladan elektron ommaviy axborot vositalarida keng yoritilishini taʼminlasinlar.

5. Vazirlar Mahkamasining “Elektr energiyasi isteʼmolini hisobga olish va nazorat qilish tizimini takomillashtirishga doir qoʻshimcha chora-tadbirlar toʻgʻrisida” 2009-yil 5-iyundagi 150-son qarori 8-bandining oltinchi xatboshidagi “2019” raqamlari “2018” raqamlari bilan almashtirilsin.

6. Vazirliklar va idoralar bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 2-noyabr,

309-son