Qonun loyihalarini va boshqa normativ-huquqiy hujjatlar loyihalarini koʻrib chiqishni tashkil etish boʻyicha muvofiqlashtiruvchi guruh faoliyatni taʼminlashga doir chora-tadbirlar toʻgʻrisida (652-II-son)

13.05.2013

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasining 2003-yil 29-avgustda qabul qilingan “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi 522-II-sonli Qonunining 81, 13 va 19-moddalariga muvofiq Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Qonun loyihalarini va boshqa normativ-huquqiy hujjatlar loyihalarini Qonunchilik palatasida koʻrib chiqishni tashkil etish boʻyicha Muvofiqlashtiruvchi guruh (bundan buyon matnda Muvofiqlashtiruvchi guruh deb yuritiladi) uch kishidan iborat tarkibda tuzilsin (1-ilova).

Belgilab qoʻyilsinki, Muvofiqlashtiruvchi guruh oʻz faoliyatida Oʻzbekiston Respublikasi Oliy Majlisi Qonunchilik palatasining Kengashiga hisobdordir.

2. Oʻzbekiston Respublikasi Oliy Majlisi Qonunchilik palatasi Devonining shtat roʻyxatiga oʻzgartishlar kiritilsin va unga qoʻshimcha uchta shtat birligi (Muvofiqlashtiruvchi guruh rahbari va ikki nafar katta referent) ajratilsin.

3. Qonun loyihalarini va boshqa normativ-huquqiy hujjatlar loyihalarini koʻrib chiqishni tashkil etish boʻyicha muvofiqlashtiruvchi guruh toʻgʻrisidagi nizom tasdiqlansin (2-ilova).

Oʻzbekiston Respublikasi Oliy Majlisi Qonunchilik palatasining Spikeri D. TOShMUHAMEDOVA

Toshkent sh.,

2013-yil 13-may,

652-II-son

Oʻzbekiston Respublikasi Oliy Majlisi Qonunchilik palatasi Kengashining 2013-yil 13-maydagi 652-II-sonli qaroriga 1-ILOVA

Qonun loyihalarini va boshqa normativ-huquqiy hujjatlar loyihalarini koʻrib chiqishni tashkil etish boʻyicha muvofiqlashtiruvchi guruh

TARKIBI

Oʻzbekiston Respublikasi Oliy Majlisi Qonunchilik palatasi Kengashining 2013-yil 13-maydagi 652-II-sonli qaroriga 2-ILOVA

Qonun loyihalarini va boshqa normativ-huquqiy hujjatlar loyihalarini koʻrib chiqishni tashkil etish boʻyicha muvofiqlashtiruvchi guruh toʻgʻrisidagi

NIZOM

I. Umumiy qoidalar

1. Oʻzbekiston Respublikasining 2003-yil 29-avgustda qabul qilingan “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi 522-II-sonli Qonunining 81, 13 va 19-moddalariga muvofiq Oʻzbekiston Respublikasi Oliy Majlisi Qonunchilik palatasining Kengashi (bundan buyon matnda Qonunchilik palatasi Kengashi deb yuritiladi) huzurida Qonun loyihalarini va boshqa normativ-huquqiy hujjatlar loyihalarini koʻrib chiqishni tashkil etish boʻyicha muvofiqlashtiruvchi guruh (bundan buyon matnda Muvofiqlashtiruvchi guruh deb yuritiladi) Oʻzbekiston Respublikasi Oliy Majlisi Qonunchilik palatasi Devoni xodimlari orasidan uch kishidan iborat tarkibda tuzilishi nazarda tutilgan.

2. Muvofiqlashtiruvchi guruh oʻz faoliyatida “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi Qonuniga, Oʻzbekiston Respublikasi Oliy Majlisi Qonunchilik palatasining Reglamentiga va Oʻzbekiston Respublikasi Oliy Majlisi Qonunchilik palatasi hamda uning Kengashi qarorlariga, shuningdek ushbu Nizomga amal qiladi.

3. Muvofiqlashtiruvchi guruh Qonunchilik palatasi Kengashining ishchi organi boʻlib, oʻz faoliyatida unga hisobdordir.

4. Muvofiqlashtiruvchi guruh oʻz faoliyatini Oʻzbekiston Respublikasi Oliy Majlisi Qonunchilik palatasidagi (bundan buyon matnda Qonunchilik palatasi deb yuritiladi) siyosiy partiyalar fraksiyalari (deputatlar guruhlari), qoʻmitalar, komissiyalar va Qonunchilik palatasi Devoni bilan hamkorlikda amalga oshiradi.

II. Muvofiqlashtiruvchi guruhning asosiy vazifasi va funksiyalari

5. Muvofiqlashtiruvchi guruhning asosiy vazifasi Qonunchilik palatasiga kiritiladigan qonun loyihalari va boshqa normativ-huquqiy hujjatlar loyihalarining koʻrib chiqilishini tashkil etishdan iborat.

6. Muvofiqlashtiruvchi guruhning asosiy funksiyalari quyidagilardan iborat:

kelib tushgan qonun loyihalarini va boshqa normativ-huquqiy hujjatlar loyihalarini roʻyxatdan oʻtkazish;

kelib tushgan qonun loyihalari va boshqa normativ-huquqiy hujjatlar loyihalari toʻgʻrisida axborot tayyorlash va Qonunchilik palatasi Kengashi majlisiga taqdim etish;

kelib tushgan qonun loyihasini siyosiy partiyalar fraksiyalariga (deputatlar guruhlariga), masʼul qoʻmitaga va Qonunchilik palatasi Devonining tegishli boʻlimiga topshirish;

Qonunchilik palatasi va uning Kengashi majlislariga kiritilayotgan qonun loyihalari va boshqa normativ-huquqiy hujjatlar loyihalarini ularni tayyorlash, koʻrib chiqish, shuningdek Qonunchilik palatasida qabul qilishning barcha bosqichlarida kuzatib borish;

qonun loyihalari ustida olib borilayotgan ishlarning holati, Qonunchilik palatasi koʻrib chiqishida turgan qonun loyihalarining oʻtish jarayoni haqida, Qonunchilik palatasining Reglamentiga rioya etilmaganligi borasida aniqlangan faktlar haqida Qonunchilik palatasining Kengashi aʼzolarini muntazam xabardor qilib borish;

Qonunchilik palatasidagi siyosiy partiyalar fraksiyalari (deputatlar guruhlari), qoʻmitalar, deputatlar va manfaatdor ekspert guruhlaridan qonun loyihalari va boshqa normativ-huquqiy hujjatlar loyihalari yuzasidan olingan axborot asosida fikrlar va takliflarning hisobini yuritish;

Qonunchilik palatasi va uning Kengashi majlislari koʻrib chiqishi uchun kiritiladigan qonun loyihalari va boshqa normativ-huquqiy hujjatlar loyihalarini roʻyxatga olish hamda ularning tayyorlanishini, koʻrib chiqilishini tashkil etishga doir ishlarga zamonaviy axborot-kommunikatsiya texnologiyalarini joriy etish;

Qonunchilik palatasi va uning Kengashi majlislari koʻrib chiqishi uchun kiritiladigan, ish yuritishda turgan qonun loyihalari va boshqa normativ-huquqiy hujjatlar loyihalariga doir materiallar boʻyicha tizimli asosda elektron maʼlumotlar bazasini yuritish;

Qonunchilik palatasi majlislari koʻrib chiqishi uchun kiritiladigan qonun loyihalari va boshqa normativ-huquqiy hujjatlar loyihalarini siyosiy partiyalar fraksiyalarida (deputatlar guruhlarida), qoʻmitalarda koʻrib chiqish jarayonida bildirilgan, shu jumladan ularning majlislari bayonnomalari koʻchirma nusxalarida koʻrsatilgan fikrlar va takliflar toʻgʻrisidagi axborot asosida axborot-tahliliy materiallarni umumlashtirish va tayyorlash;

Qonunchilik palatasi majlislari koʻrib chiqishi uchun kiritiladigan qonun loyihalari va boshqa normativ-huquqiy hujjatlar loyihalarini tayyorlash va koʻrib chiqish tartibini takomillashtirishga doir takliflarni Qonunchilik palatasi Kengashi koʻrib chiqishi uchun kiritish.

7. Muvofiqlashtiruvchi guruh Qonunchilik palatasi majlislari koʻrib chiqishi uchun kiritiladigan qonun loyihalari va boshqa normativ-huquqiy hujjatlar loyihalarini tayyorlash va koʻrib chiqish bilan bogʻliq masalalarni Qonunchilik palatasidagi siyosiy partiyalar fraksiyalarining (deputatlar guruhlarining), qoʻmitalar va komissiyalarning majlislarida muhokama qilish chogʻida ishtirok etishga haqlidir.

III. Yakunlovchi qoidalar

8. Muvofiqlashtiruvchi guruh faoliyatini moddiy-texnik jihatdan taʼminlash Qonunchilik palatasi Devoni tomonidan amalga oshiriladi.

9. Ushbu Nizomga oʻzgartish va qoʻshimchalar kiritish Qonunchilik palatasi Kengashining qarori bilan amalga oshiriladi.