Fuqarolarning hayoti va sogʻligʻiga qarshi qaratilgan jinoyatlarning oldini olish yuzasidan qoʻshimcha chora-tadbirlar toʻgʻrisida (113-son)

15.03.1999

Oʻzbekiston Respublikasi Vazirlar Mahkamasining

qarori

Oʻzbekiston Respublikasi huquqni muhofaza qilish organlari tomonidan fuqarolarning xavfsizligini taʼminlash, ularning konstitutsiyaviy huquq va erkinliklarini jinoyatkorona tajovuzlar va salbiy koʻrinishlardan himoya qilish yuzasidan aniq maqsadli chora-tadbirlar koʻrilmoqda. Koʻrilgan chora-tadbirlar natijasida ogʻir jinoyatlar pasayishi sezilmoqda va ularning ochilishi darajasi oshmoqda.

Shu bilan birga sodir etilgan jinoyatlarni oʻrganib chiqish fuqarolarning hayoti va sogʻligʻiga qarshi qaratilgan jinoyatlarning oldini olish va ularni ochishda nuqsonlar mavjudligini koʻrsatmoqda.

Oʻzbekiston Respublikasida jinoyatchilikni yanada pasaytirish hamda jinoyat sodir etishga va boshqa huquq buzishlarga moyil boʻlgan shaxslar bilan olib boriladigan profilaktika ishlarini takomillashtirish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Ichki ishlar vazirligi boʻlinmalari va respublika “Mahalla” xayriya jamgʻarmasi bilan birgalikda bir oy muddatda:

shaharlar va tumanlar hokimliklari huzurida — jazoni oʻtash joylaridan ozod qilingan shaxslarga ijtimoiy-maishiy jihatdan va ishga joylashishda yordam koʻrsatish boʻyicha maxsus komissiyalar tashkil etsinlar, komissiyalarga rahbarlik qilishni hokim oʻrinbosarlaridan biriga yuklasinlar;

joylarda — jamoat tartibini saqlashni taʼminlashda ichki ishlar organlariga koʻmaklashish uchun “Mahalla posboni” jamoat tuzilmalari tashkil etsinlar;

fuqarolarning oʻzini oʻzi boshqarish har bir organida — ilgari sudlangan, surunkali alkogolizmga chalingan va maishiy turmushda huquqni buzishlar sodir etishga moyil boʻlgan shaxslarga tarbiyaviy taʼsir koʻrsatish uchun oqsoqollar, faxriylar, ayollar va yoshlardan, madaniyat va din vakillaridan iborat yarashtirish komissiyalari tuzsinlar.

2. Oʻzbekiston Respublikasi Ichki ishlar vazirligi (Almatov) shtatdagi xodimlarning mavjud sonini qayta taqsimlash hisobiga 1999-yil 1-maygacha:

Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari va Toshkent shahar ichki ishlar Bosh boshqarmasining profilaktika xizmati tarkibida jazoni oʻtash joylaridan ozod qilingan shaxslar bilan ishlash boʻlinmalarini belgilangan tartibda tashkil etsin;

takroriy jinoyatchilikning oldini olishni yaxshilash, tarbiyaviy ishlar samaradorligini oshirish va ogʻir jinoyatlar sodir etgan shaxslar xatti-harakatini tibbiy-psixologik oʻrganish uchun Sogʻliqni saqlash vazirligi bilan birgalikda har bir jazoni ijro etish muassasasi shtatiga psixolog lavozimini kiritsin.

3. Oʻzbekiston Respublikasi Ichki ishlar vazirligi (Almatov), Adliya vazirligi (Mirsafoyev), Mehnat vazirligi (Akbarov), respublika “Mahalla” xayriya jamgʻarmasi (Jalilov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki hafta muddatda:

hokimliklar huzuridagi jazoni oʻtash joylaridan ozod qilingan shaxslarga ijtimoiy-maishiy jihatdan va ishga joylashishda yordam koʻrsatish boʻyicha maxsus komissiyalar toʻgʻrisidagi;

“Mahalla posboni” jamoat tuzilmalari toʻgʻrisidagi;

fuqarolarning oʻzini oʻzi boshqarish organlari huzuridagi yarashtirish komissiyalari toʻgʻrisidagi nizomlarni ishlab chiqsin va tasdiqlash uchun Vazirlar Mahkamasiga kiritsin.

4. Oʻzbekiston Respublikasi Prokuraturasiga (Xudoyqulov), vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, xoʻjalik yurituvchi subyektlar rahbarlari tomonidan ozodlikdan mahrum etish joylaridan ozod etilgan shaxslarga maishiy jihatdan va ishga joylashishda yordam koʻrsatishga hamda ularning hayotga moslashuviga qaratilgan qonun hujjatlari bajarilishi ustidan prokuror nazoratini kuchaytirish tavsiya etilsin.

5. Ichki ishlar vazirligi (Almatov), Adliya vazirligi (Mirsafoyev) bilan birgalikda, Oʻzbekiston Respublikasi Prokuraturasi (Xudoyqulov) bilan kelishgan holda “Ozodlikdan mahrum etish joylaridan boʻshatilgan shaxslar ustidan ichki ishlar idoralarining maʼmuriy nazorati toʻgʻrisida”gi Oʻzbekiston Respublikasi Qonuniga alohida ogʻir jinoyatlar sodir etgan shaxslar jazoni oʻtagandan keyin ular ustidan majburiy nazorat belgilashga oid oʻzgartirish va qoʻshimchalar kiritish haqidagi takliflarni bir oy muddatda tayyorlasin va Oʻzbekiston Respublikasi Vazirlar Mahkamasiga kiritsin.

6. Ichki ishlar vazirligi (Almatov), Adliya vazirligi (Mirsafoyev), Moliya vazirligi (Azimov), Mehnat vazirligi (Akbarov), Ijtimoiy taʼminot vazirligi (Obidov) bilan birgalikda, Oʻzbekiston Respublikasi Prokuraturasi (Xudoyqulov) va Oliy sudi (Mingboyev) bilan kelishgan holda 2000 — 2005-yillar davrida huquq buzishlarning oldini olish va jinoyatchilikka qarshi kurash chora-tadbirlari davlat dasturini 1999-yil 1-oktabrgacha ishlab chiqsin va tasdiqlash uchun Vazirlar Mahkamasiga kiritsin.

7. Oʻzbekiston Respublikasi Sogʻliqni saqlash vazirligi (Nazirov) manfaatdor vazirliklar va idoralar bilan birgalikda surunkali alkogolizm va giyohvandlikka chalinganlarni davolash uchun ixtisoslashtirilgan tibbiy muassasalar tarmogʻini kengaytirish toʻgʻrisida Vazirlar Mahkamasining qarori loyihasini 1999-yil 1-iyungacha belgilangan tartibda kiritsin.

8. “Oʻzteleradio” kompaniyasi (Koʻchimov) va Oʻzbekiston Milliy axborot agentligi (Boliyev):

matbuot, radio va televideniye orqali jinoyatchilikka qarshi kurash va huquq buzishlarning oldini olish toʻgʻrisida axborot-tushuntirish ishlarini muntazam olib borsinlar;

“Sud zalidan reportaj” doimiy ruknini tashkil etsinlar.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 15-mart,

113-son