Davlat mulki obyektlaridan samarali va oqilona foydalanish boʻyicha qoʻshimcha chora-tadbirlar toʻgʻrisida (289-son)

09.10.2015

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Aksiyadorlik jamiyatlarida zamonaviy korporativ boshqaruv uslublarini joriy etish chora-tadbirlari toʻgʻrisida” 2015-yil 24-apreldagi PF-4720-son Farmoniga muvofiq, shuningdek, davlat mulki obyektlaridan samarali va oqilona foydalanishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Davlat raqobat qoʻmitasi tomonidan manfaatdor vazirlik va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda davlat mulki obyektlari inventarizatsiyasi oʻtkazilganligi hamda ulardan kelgusida yanada oqilona foydalanish boʻyicha takliflar tayyorlanganligi maʼlumot uchun qabul qilinsin.

2. Quyidagi roʻyxatlar:

davlat organlariga operativ boshqaruv uchun, shuningdek, tashkilotlarga kelgusida yanada samarali foydalanish uchun tekin foydalanishga berilayotgan davlat mulki obyektlari, 1-ilovaga muvofiq;

keyinchalik tarmoq va hududiy investitsiya dasturlariga kiritgan holda samarali foydalanish boʻyicha chora-tadbirlar rejasini ishlab chiqish zarur boʻlgan qurilishi tugallanmagan va rekonstruksiya qilinishi lozim boʻlgan davlat mulki obyektlari, 2-ilovaga muvofiq;

xoʻjalik boshqaruvi organlarining ustav kapitaliga oʻtkaziladigan davlat aktivlari, 3-ilovaga muvofiq tasdiqlansin;

3. Vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tashkilotlar – davlat mulki obyektlarining balans egalari bir oy muddatda ushbu qarorning 1-ilovasida koʻrsatilgan davlat mulki obyektlarini, zaruriy qayta tiklash ishlarini olib borish va ulardan kelgusida yanada samarali foydalanishni taʼminlash masʼuliyatini yuklagan holda, tegishli davlat organlariga va boshqa tashkilotlarga oʻtkazishni taʼminlasin.

4. Qoraqalpogʻiston Respublikasi Vazirlar Kengashi, viloyatlar hokimliklari Moliya vazirligi, Iqtisodiyot vazirligi, davlat boshqaruvi organlari, tashkilotlar – davlat mulki obyektlarining balans egalari bilan birgalikda ikki oy muddatda ushbu qarorning 2-ilovasida koʻrsatilgan qurilishi tugallanmagan va rekonstruksiya qilinishi lozim boʻlgan davlat mulki obyektlaridan, ularni keyinchalik tarmoq va hududiy investitsiya dasturlariga kiritgan holda, kelgusida yanada samarali foydalanish boʻyicha chora-tadbirlar rejasini ishlab chiqsin.

5. Oʻzbekiston Respublikasi Davlat raqobat qoʻmitasi tegishli davlat va xoʻjalik boshqaruvi organlari, mahalliy ijro etuvchi hokimiyat organlari bilan birgalikda ushbu qarorning 3-ilovasida koʻrsatilgan xoʻjalik boshqaruv organlarining ustav kapitaliga davlat aktivlarini oʻtkazishni belgilangan tartibda taʼminlasin.

6. Mazkur qarorning 4-ilovasiga kiritilgan tashkilotlarning taʼsischilari Oʻzbekiston Respublikasi Davlat raqobat qoʻmitasi bilan kelishilgan holda ikki oy muddatda oʻzlarining tashkiliy-huquqiy shakllari va taʼsis hujjatlarini qonun hujjatlari talablariga muvofiqlashtirsinlar.

7. Oʻzbekiston Respublikasi Hukumatining ayrim qarorlariga 5-ilovaga muvofiq oʻzgartirishlar kiritilsin.

8. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 9-oktabr,

289-son

Vazirlar Mahkamasining 2015-yil 9-oktabrdagi 289-son qaroriga 1-ILOVA

Davlat organlariga operativ boshqaruv uchun, shuningdek tashkilotlarga kelgusida samarali foydalanish uchun tekin foydalanishga berilayotgan davlat mulki obyektlarining

ROʻYXATI

*Oʻtkaziladigan aksiyalar boʻyicha Oʻzbekiston Respublikasi Moliya vazirligi bilan kelishilgan holda hisoblangan dividendlarni Oʻzbekiston Respublikasi Davlat budjeti daromadiga yuborish sharti bilan.

Vazirlar Mahkamasining 2015-yil 9-oktabrdagi 289-son qaroriga 2-ILOVA

Keyinchalik tarmoq va hududiy investitsiya dasturlariga kiritgan holda samarali foydalanish boʻyicha chora-tadbirlar rejasini ishlab chiqish zarur boʻlgan qurilishi tugallanmagan va rekonstruksiya qilinishi lozim boʻlgan davlat mulki obyektlari

ROʻYXATI

Vazirlar Mahkamasining 2015-yil 9-oktabrdagi 289-son qaroriga 3-ILOVA

Xoʻjalik boshqaruvi organlarining ustav kapitaliga oʻtkaziladigan davlat aktivlarining

ROʻYXATI

Izohlar:

Xoʻjalik boshqaruvi organlarining ustav kapitaliga oʻtkaziladigan ulushlarni baholash boʻyicha hisobotlarning ishonchliligini tekshirish va baholash bilan bogʻliq xarajatlar xoʻjalik boshqaruvi organlari tomonidan qoplanadi.

Xoʻjalik jamiyatining tashkiliy-huquqiy shakli yoki xoʻjalik boshqaruvi organlarining ustav kapitaliga oʻtkazilishi lozim boʻlgan davlat ulushining miqdori oʻzgargan taqdirda ushbu roʻyxatga oʻzgartirish kiritish talab etilmaydi, bu ushbu oʻzgartirishlar hisobga olingan holda ijro etilishi lozim, shuningdek, “Oʻzpaxtasanoat” uyushmasi, “Oʻzagromashservis” uyushmasi, “Oʻzdonmahsulot” AJ va “Oʻzbekenergo” AJ xoʻjalik jamiyatlarining ustav kapitalida davlat ulushi yuzaga kelganda, ushbu ulushlar hukumatning alohida qarori qabul qilinmasdan, belgilangan tartibda tegishli xoʻjalik jamiyatlarining ustav kapitaliga oʻtkaziladi.

1 Vazirlar Mahkamasining qarori bilan aksiyadorlik jamiyatlarini boshqarishda davlat ishtirokining alohida huquqi — “oltin aksiya” joriy etilishi mumkin.

2 Davlat ulushi xoʻjalik birlashmalarining ustav fondlariga oʻtkazilgan xoʻjalik jamiyatlari tomonidan dividendlar hisoblanishi Moliya vazirligi bilan kelishilgan holda amalga oshiriladi.

*** Davlat aktivlarini oʻtkazish aksiyalarni nominal qiymati boʻyicha qoʻshib olish va konvertatsiya qilish yoʻli bilan amalga oshiriladi.

Vazirlar Mahkamasining 2015-yil 9-oktabrdagi 289-son qaroriga 4-ILOVA

Tashkiliy-huquqiy shakllari va taʼsis hujjatlari qonun talablariga muvofiqlashtirilishi lozim boʻlgan tashkilotlar

ROʻYXATI

Izohlar:

* Mehnat va aholini ijtimoiy muhofaza qilish vazirligi huzuridagi “Tashqi mehnat migratsiyasi agentligi” DUK tarkibiga filiallar shaklida birlashtirib qayta tashkil etilishi kerak.

** “Bandlik, mehnatni muhofaza qilish va aholini ijtimoiy muhofaza qilish Respublika ilmiy markazi” davlat muassasasi tarkibiga qoʻshish yoʻli bilan qayta tashkil etilishi kerak.

*** MCHJga oʻzgartirish yoʻli bilan “Bandlik, mehnatni muhofaza qilish va aholini ijtimoiy muhofaza qilish Respublika ilmiy markazi” davlat muassasasini Mehnat va aholini ijtimoiy muhofaza qilish vazirligi tizimiga axborot, aloqa va kompyuter dasturlarini, mahalliy, kompyuter va internet tarmoqlarini ishlab chiqish, joriy etish va ularga xizmat koʻrsatish boʻyicha xizmat koʻrsatuvchi ixtisoslashtirilgan tashkilot sifatida taʼsischi etgan tayinlagan holda qayta tashkil etilishi kerak.

Vazirlar Mahkamasining 2015-yil 9-oktabrdagi 289-son qaroriga 5-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining 2012-yil 31-maydagi 154-son “Davlat mulki obyektlaridan kelgusida samarali foydalanish va ularni tasarruf etish boʻyicha qoʻshimcha chora-tadbirlar toʻgʻrisida” qarorida:

a) 2-ilovadagi 58, 65, 137, 138, 143, 148 — 153, 155, 157, 160, 162, 165, 167, 173-174, 429, 434, 445, 449-450, 454-455, 463-464 va 472-pozitsiyalari chiqarib tashlansin;

b) 3-ilovadagi 7 — 9-pozitsiyalar chiqarib tashlansin;

v) 4-ilovadagi 5-6, 42 — 44 va 46-pozitsiyalar chiqarib tashlansin.

2. Vazirlar Mahkamasining 2012-yil 28-avgustdagi 254-son “Davlat daromadiga oʻtkazilgan mol-mulkni samarali tasarruf etish chora-tadbirlari toʻgʻrisida”gi qarori 1-ilovasining 2 — 5-pozitsiyalarida “Mehnat va aholini ijtimoiy muhofaza qilish vazirligi (qariyalar uyini tashkil etish yoki Tashqi mehnat migratsiyasi agentligiga topshirish uchun)” soʻzlari “Toshkent shahar hokimligi” soʻzlari bilan almashtirilsin.

3. Vazirlar Mahkamasining 2013-yil 25-iyuldagi 209-son “Toshkent shahri aholisining uy-joy-kommunal sharoitlarini yanada yaxshilash chora-tadbirlari toʻgʻrisida”gi qarori 2-ilovasining 6 va 13-pozitsiyalari chiqarib tashlansin.