Oʻzbekiston Respublikasi qonunlari, Oʻzbekiston Respublikasi Oliy Majlisi Senati, Senat Kengashi qarorlari va Oʻzbekiston Respublikasi Oliy Majlisi Senati qoʻmitalari (komissiyalari) qarorlarining davlat hokimiyati va boshqaruvi organlari tomonidan ijro etilishi ustidan nazoratni amalga oshirish tartibi toʻgʻrisidagi nizomni tasdiqlash haqida (151-II-son)

30.12.2010

Oʻzbekicton Respublikasi Oliy Majlisi Senati Kengashining

qarori

Oʻzbekiston Respublikasi Oliy Majlisi Senatining 2010-yil 7-maydagi 42-II-sonli qarori bilan tasdiqlangan Oʻzbekiston Respublikasi Prezidenti I.A. Karimovning 2010-yil 26-yanvardagi Oʻzbekiston Respublikasi Oliy Majlisi Senatining birinchi majlisidagi, 2010-yil 27-yanvardagi Oʻzbekiston Respublikasi Oliy Majlisi Qonunchilik palatasi va Senatining qoʻshma majlisidagi “Mamlakatimizni modernizatsiya qilish va kuchli fuqarolik jamiyati barpo etish — ustuvor maqsadimizdir” nomli maʼruzalarining asosiy qoida va xulosalarini roʻyobga chiqarish yuzasidan Oʻzbekiston Respublikasi Oliy Majlisi Senatining Harakat dasturi 2.2-bandining 2.2.1-kichik bandini ijro etish uchun Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi qonunlari, Oʻzbekiston Respublikasi Oliy Majlisi Senati, Senat Kengashi qarorlari va Oʻzbekiston Respublikasi Oliy Majlisi Senati qoʻmitalari (komissiyalari) qarorlarining davlat hokimiyati va boshqaruvi organlari tomonidan ijro etilishi ustidan nazoratni amalga oshirish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Oliy Majlisi Senati Kengashining 2006-yil 29-iyundagi “Oʻzbekiston Respublikasi Prezidenti I.A. Karimovning 2005-yilda mamlakatni ijtimoiy-iqtisodiy rivojlantirish yakunlari va 2006-yilda iqtisodiy islohotlarni chuqurlashtirishning eng muhim ustuvor yoʻnalishlariga bagʻishlangan Vazirlar Mahkamasining 2006-yil 10-fevralda boʻlib oʻtgan yigʻilishidagi hamda Oʻzbekiston Respublikasi Oliy Majlisi Senatining 2006-yil 24-fevralda oʻtkazilgan beshinchi yalpi majlisidagi “Mamlakatimiz taraqqiyotining qonuniy asoslarini mustahkamlash — faoliyatimiz mezoni boʻlishi darkor” maʼruzalarining asosiy qoidalarini amalga oshirishga qaratilgan chora-tadbirlarni bajarishga oid Oʻzbekiston Respublikasi Oliy Majlisi Senati Harakat dasturining 8.4, 9.1, 9.2, va 9.3-bandlarini amalga oshirish toʻgʻrisida”gi 199-I-sonli Qarorining 2-bandi oʻz kuchini yoʻqotgan deb topilsin.

Oʻzbekiston Respublikasi Oliy Majlisi Senatining Raisi I. SOBIROV

Toshkent sh.,

2010-yil 30-dekabr,

151-II-son

Oʻzbekiston Respublikasi Oliy Majlisi Senati Kengashining 2010-yil 30-dekabrdagi 151-II-sonli qarori bilan TASDIQLANGAN

Oʻzbekiston Respublikasi qonunlari, Oʻzbekiston Respublikasi Oliy Majlisi Senati, Senat Kengashi qarorlari va Oʻzbekiston Respublikasi Oliy Majlisi Senati qoʻmitalari (komissiyalari) qarorlarining davlat hokimiyati va boshqaruvi organlari tomonidan ijro etilishi ustidan nazoratni amalga oshirish tartibi toʻgʻrisida

NIZOM

I. Umumiy qoidalar

1. Oʻzbekiston Respublikasi qonunlari, Oʻzbekiston Respublikasi Oliy Majlisi Senati, Senat Kengashi qarorlari va Oʻzbekiston Respublikasi Oliy Majlisi Senati qoʻmitalari (komissiyalari) qarorlarining davlat hokimiyati va boshqaruvi organlari tomonidan ijro etilishi ustidan nazoratni amalga oshirish tartibi toʻgʻrisidagi nizom “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonuniga hamda “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasi Qonuniga muvofiq ishlab chiqilgan.

2. Ushbu Nizom Oʻzbekiston Respublikasi Oliy Majlisi Senati (bundan buyon matnda Senat deb yuritiladi) qoʻmitalari (komissiyalari) tomonidan Senat qoʻmitalarining (komissiyalarining) nazorat faoliyati boʻyicha ish rejasini tayyorlash, Oʻzbekiston Respublikasi qonunlarining ijro etilish amaliyotini oʻrganish, oʻrganish natijalarini Senat qoʻmitalari tomonidan koʻrib chiqish, davlat hokimiyati va boshqaruvi organlari tomonidan Senat, Senat Kengashi qarorlari, Senat qoʻmitalari (komissiyalari) qarorlarining oʻz vaqtida koʻrib chiqilishi va ijro etilishi ustidan nazoratni amalga oshirish tartibini belgilaydi.

3. Oʻzbekiston Respublikasi qonunlari (bundan buyon matnda qonun deb yuritiladi), Senat, Senat Kengashi qarorlarining va Senat qoʻmitalari (komissiyalari) qarorlarining ijro etilishi ustidan nazorat tegishincha Senat qoʻmitalari (komissiyalari) tomonidan amalga oshiriladi.

4. Qonun davlat hokimiyati va boshqaruvi organlari tomonidan ijro etilishi ustidan nazoratni amalga oshirishda Senat qoʻmitalarining asosiy vazifalari quyidagilardan iborat:

a) yagona huquqni qoʻllash amaliyotini taʼminlash maqsadida normalari amaliyotda qoʻllanilmayotgan qonunni, shuningdek qonun hujjatlaridagi nuqsonlarni aniqlash;

b) qonun ustuvorligini taʼminlash uchun qabul qilingan qonun osti hujjatlarining qonun normalariga muvofiqligini aniqlash;

v) qonunning ijro etilishiga toʻsqinlik qilayotgan sabablar va sharoitlarni aniqlash;

g) qonunning ijro etilishida yoʻl qoʻyilayotgan xato va kamchiliklarni bartaraf etish yuzasidan takliflar ishlab chiqish;

d) eng dolzarb mintaqaviy muammolarni aniqlash va ularni hal qilish boʻyicha tavsiyalar ishlab chiqish;

e) Senat qoʻmitalari (komissiyalari) tomonidan oʻtkazilgan konferensiyalar, davra suhbatlari va seminarlar, shuningdek fuqarolarning murojaatlarini koʻrib chiqish natijalari boʻyicha olingan axborotni amalda qoʻllash;

j) senatorlar va xalq deputatlari mahalliy Kengashlari deputatlarining nazariy bilimlari hamda amaliy koʻnikmalari darajasini oshirish;

z) jamiyatda huquqiy madaniyatni va huquqiy ongni oshirish.

5. Senat, Senat Kengashi qarorlari hamda Senat qoʻmitalari (komissiyalari) qarorlarining davlat hokimiyati va boshqaruvi organlari tomonidan ijro etilishi ustidan nazoratni amalga oshirishda Senat qoʻmitalarining (komissiyalarining) asosiy vazifalari quyidagilardan iborat:

a) qonun soʻzsiz ijro etilishini, uning moddiy-protsessual normalari amalga oshirilishini taʼminlash, shuningdek qonunning ijro etilishiga toʻsqinlik qilayotgan sabablar va sharoitlarni bartaraf etish;

b) davlat dasturlari, Senatning, Senat Kengashining qarorlari, shuningdek Senat qoʻmitalari (komissiyalari) tomonidan ularning nazorat faoliyati natijalari boʻyicha mamlakatni va mintaqalarni rivojlantirishning ustuvor yoʻnalishlarini hisobga olgan holda qabul qilingan qarorlar amalga oshirilishini taʼminlash;

v) joylardagi ishlarning holatini oʻrganish natijalari boʻyicha mintaqalarning dolzarb muammolarini hal qilish uchun aniq, har tomonlama puxta takliflar ishlab chiqish.

II. Senat qoʻmitalarining (komissiyalarining) nazorat faoliyati boʻyicha ish rejalarini tayyorlash

6. Senat qoʻmitalari (komissiyalari) nazorat faoliyati boʻyicha ishni oʻz rejalariga, shuningdek Senat, Senat Kengashi va Senat Raisi topshiriqlari hamda tavsiyalariga muvofiq tashkil etadi.

7. Senat qoʻmitalarining (komissiyalarining) nazorat faoliyati boʻyicha ish rejalarini ishlab chiqish borasidagi faoliyatini muvofiqlashtirish Senat Raisi yoki uning topshirigʻiga muvofiq Senat Raisining oʻrinbosari tomonidan amalga oshiriladi.

8. Senat qoʻmitalarining (komissiyalarining) nazorat faoliyati boʻyicha ish rejalari Senat Kengashi tomonidan kelgusi yilning 1-yanvarigacha tasdiqlanadi. Senat qoʻmitalarining (komissiyalarining) nazorat faoliyati boʻyicha ish rejalarini koʻrib chiqish natijalari yuzasidan Senat Kengashi qaror qabul qiladi.

9. Senat qoʻmitalarining (komissiyalarining) nazorat faoliyati boʻyicha ish rejalari mamlakat va mintaqalarni rivojlantirishning ustuvor yoʻnalishlarini, davlat dasturlari, Senatning harakat dasturlari, Senat qoʻmitalari (komissiyalari) tomonidan oʻtkazilgan konferensiyalar, davra suhbatlari va seminarlarning natijalari amalga oshirilishi zarurligini hisobga olgan holda, shuningdek Senat Kengashi va Senat Raisining topshiriqlari asosida tayyorlanadi.

III. Qonunning ijro etilishini nazorat qilish

1-bob. Qonunning davlat hokimiyati va boshqaruvi organlari tomonidan ijro etilishi amaliyotini oʻrganish

10. Qonunning davlat hokimiyati va boshqaruvi organlari tomonidan ijro etilishi amaliyotini oʻrganish boʻyicha tadbirlar oʻtkazishga tayyorgarlik koʻrish tartibi Senat qoʻmitasining raisi tomonidan belgilanadi.

11. Qonunning ijro etilishi amaliyotini oʻrganishga tayyorgarlik Senat qoʻmitasi tomonidan qonunning ijro etilishi amaliyotini oʻrganishni oʻtkazish rejasini ishlab chiqishdan boshlanadi.

12. Senat qoʻmitasi qonunning ijro etilishi amaliyotini oʻrganishni oʻtkazish rejasini tayyorlash jarayonida:

a) ijro etilishi amaliyotini oʻrganish nazarda tutilayotgan qonun normalarining tahlilini oʻtkazadi;

b) qonunning amal qilish doirasini hamda qonun bilan tartibga solinadigan munosabatlarni aniqlaydi;

v) davlat organlari va boshqa tashkilotlardan, mansabdor shaxslardan hujjatlar, ekspertlik va boshqa xulosalarni, statistik va boshqa maʼlumotlarni talab qilib oladi;

g) tegishli qonun osti va idoraviy normativ hujjatlarning dastlabki tahlilini oʻtkazadi;

d) qonunning ijro etilishi amaliyotini oʻrganish uchun zarur boʻlgan boshqa harakatlarni amalga oshiradi.

13. Qonunning ijro etilishi amaliyotini oʻrganishni oʻtkazish rejasida:

a) savolnoma tuzish va uni yuborish muddatlari;

b) ishchi guruh tarkibi;

v) joylarga chiqishning taxminiy sanasi;

g) qonunning ijro etilishi amaliyotini oʻrganish oʻtkaziladigan davlat hokimiyati va boshqaruvi organlari;

d) qonunning ijro etilishi amaliyotini oʻrganish tartibi;

e) qonunning ijro etilishi amaliyotini oʻrganish tamomlanadigan taxminiy sana;

j) Senat qoʻmitasi qarorining loyihasini tayyorlash muddatlari;

z) Senat qoʻmitasi majlisini oʻtkazish tartibi va joyi belgilanadi.

14. Savolnoma tuzishdan asosiy maqsad:

a) qonunning ijro etilishi amaliyotini oʻrganishda Senat qoʻmitasi faoliyatining yoʻnalishlarini;

b) qonun bilan tartibga solinadigan munosabatlarni;

v) qonunning ijro etilishi bilan bogʻliq boʻlgan amaldagi holatning qonun normalariga muvofiqligini;

g) qonun amal qiladigan shaxslar doirasini;

d) qonun normalarini amalga oshirishda davlat hokimiyati va boshqaruvi organlarining vakolatlarini;

e) qonun normalarini amalga oshirish mexanizmi qay darajada ishlab chiqilganligini, shu jumladan qonunni ijro etish uchun qabul qilingan qonun osti hujjatlarining mavjudligini, amaldagi qonun osti hujjatlarining qonun normalariga muvofiqligini, qonun osti hujjatlarida qonun normalarining qanchalik toʻla amalga oshirilganligini va hokazolarni aniqlashdan iborat.

15. Savolnomani tuzish ijro etilishi amaliyotini oʻrganish rejalashtirilgan tegishli qonun normalarini tahlil qilish natijalari asosida amalga oshiriladi.

16. Senat qoʻmitasi tomonidan tuzilgan savolnoma oldindan tegishli davlat hokimiyati va boshqaruvi organlariga yuboriladi. Savolnoma qonunning ijro etilishi amaliyotini oʻrganish rejalashtirilgan mintaqada ishlayotgan senatorlarga va xalq deputatlari mahalliy Kengashlari doimiy komissiyalari vakillariga ham yuborilishi mumkin.

17. Qonunning davlat hokimiyati va boshqaruvi organlari tomonidan ijro etilishi amaliyotini bevosita oʻrganish uchun Senat qoʻmitasi tomonidan ishchi guruh tuziladi.

18. Ishchi guruh tarkibiga Senatning tegishli qoʻmitasi aʼzolari — senatorlar, davlat va xoʻjalik boshqaruvi organlari, ilmiy muassasalar, ommaviy axborot vositalarining va boshqa fuqarolik jamiyati institutlarining vakillari, olimlar, mutaxassislar va ekspertlar kiritiladi.

19. Eng dolzarb mintaqaviy muammolarni aniqlash va mintaqalarni rivojlantirish masalalarini hal qilish uchun qonunning ijro etilishi amaliyotini oʻrganishda ishchi guruh tarkibiga joylarda ishlayotgan senatorlar, shuningdek tegishli mintaqa xalq deputatlari mahalliy Kengashlari doimiy komissiyalarining vakillari kiritilishi mumkin.

20. Senat qoʻmitasining raisi yoki Senatning tegishli qoʻmitasi aʼzosi — senator ishchi guruh rahbari boʻladi.

21. Davlat hokimiyati va boshqaruvi organlarining mansabdor shaxslari ishchi guruh joʻnab ketadigan sana haqida oldindan xabardor qilinadi.

22. Ishchi guruh rahbari ishchi guruhning har bir aʼzosi uchun ish uchastkasini belgilab beradi.

23. Ishchi guruh aʼzolari ishchi guruh rahbari bilan kelishgan holda qonunning ijro etilishi amaliyoti oʻrganiladigan davlat hokimiyati va boshqaruvi organi (bundan buyon matnda tashkilot deb yuritiladi) mansabdor shaxslaridan zarur materiallar va hujjatlarni, shuningdek boshqa maʼlumotlarni talab qilib olishlari mumkin. Ishchi guruhning har bir aʼzosi oʻzi amalga oshirgan ishlar haqida axborot tayyorlaydi, bu axborot keyinchalik umumiy maʼlumotnomaga kiritiladi.

24. Ishchi guruh oʻrganilishi kerak boʻlgan masalalar soniga qarab kichik guruhlarga boʻlinishi mumkin. Ishchi guruh rahbari ishchi guruh aʼzolari orasidan kichik guruh rahbarini tayinlaydi. Har bir kichik guruh oʻz ishining natijalari haqida alohida maʼlumotnoma tayyorlaydi. Kichik guruhlar tayyorlagan maʼlumotnomalar asosida umumiy maʼlumotnoma tuziladi.

25. Ishchi guruh oʻtkazgan oʻrganish natijalari toʻgʻrisidagi umumiy maʼlumotnomada quyidagi axborot koʻrsatiladi:

a) qonunni ijro etish uchun tashkilot tomonidan qabul qilingan (ishlab chiqilgan) qonun osti va idoraviy normativ hujjatlar toʻgʻrisida (agar bunday hujjatlar qabul qilinmagan boʻlsa, sababi koʻrsatiladi);

b) tashkilot tomonidan qabul qilingan (ishlab chiqilgan) qonun osti va idoraviy normativ hujjatlarning qonun normalariga muvofiqligi hamda ularda qonun normalari qanchalik toʻla amalga oshirilganligi haqida;

v) qonunchilikda qonunni ijro etishga toʻsqinlik qilayotgan ziddiyatlar va nuqsonlar mavjudligi toʻgʻrisida, shu jumladan ularni bartaraf etish uchun koʻrilgan chora-tadbirlar haqida;

g) fuqarolarning murojaatlari bilan ishlashni tahlil qilish natijalari haqida;

d) aniqlangan kamchiliklar haqida;

e) boshqa axborot.

26. Ishchi guruh tomonidan tayyorlangan umumiy maʼlumotnoma ishchi guruh rahbari, ishchi guruh aʼzolari va tashkilotning tegishli davlat hokimiyati va boshqaruvi organlari rahbarlari tomonidan imzolanadi.

2-bob. Qonunning ijro etilishi amaliyotini oʻrganish natijalarini koʻrib chiqish

27. Qonunning ijro etilishi amaliyotini oʻrganish natijalarini koʻrib chiqish Senat qoʻmitasining majlisida amalga oshiriladi. Senat qoʻmitasi majlisi davomida ishchi guruh aʼzolari tomonidan tayyorlangan axborot muhokama qilinadi. Zarurat boʻlganda, qonunning ijro etilishi amaliyotini oʻrganish natijalarini koʻrib chiqish Senat qoʻmitasi va xalq deputatlari mahalliy Kengashining qoʻshma majlisi — “Birlashgan sessiya”da amalga oshirilishi mumkin.

28. Senat qoʻmitasining majlisi, agar unda qoʻmita tarkibining kamida yarmi hozir boʻlsa, vakolatli hisoblanadi.

29. Qonunning ijro etilishi amaliyotini oʻrganish natijalari koʻrib chiqilayotganda Senat qoʻmitasining majlislari ochiq oʻtkaziladi. Zarurat boʻlganda, Senat qoʻmitasi yopiq majlis oʻtkazish toʻgʻrisida qaror qabul qilishi mumkin.

30. Qonunning ijro etilishi amaliyotini oʻrganish natijalari koʻrib chiqilayotganda Senat qoʻmitasining majlisiga manfaatdor davlat va xoʻjalik boshqaruvi organlari, ilmiy muassasalar, ommaviy axborot vositalari va boshqa fuqarolik jamiyati institutlarining vakillari, olimlar, mutaxassislar va ekspertlar taklif etiladi.

31. Qonunning ijro etilishi amaliyotini oʻrganish natijalari koʻrib chiqilayotganda Senat qoʻmitasining majlisida ishchi guruh aʼzolari va qonunning ijro etilishi amaliyoti oʻrganilgan tashkilot rahbari hozir boʻlishi shart.

32. Senat qoʻmitasi koʻrib chiqilayotgan masalalar yuzasidan qarorni uning aʼzolari umumiy sonining koʻpchilik ovozi bilan qabul qiladi. Senat qoʻmitasi qarori ushbu qoʻmitaning raisi tomonidan imzolanadi.

33. Qonunning ijro etilishi amaliyotini oʻrganish natijalari boʻyicha qabul qilingan Senat qoʻmitasining qarori tegishli davlat hokimiyati va boshqaruvi organlariga u qabul qilingan kundan eʼtiboran oʻn kun ichida yuboriladi. Senat qoʻmitasining qarori ommaviy axborot vositalarida eʼlon qilinishi mumkin.

34. Senat qoʻmitasining qarori asoslantiruvchi va qaror qiluvchi qismlardan iborat boʻladi.

35. Senat qoʻmitasi qarorining asoslantiruvchi qismida qonunning ijro etilishi amaliyotini oʻrganish jarayonida aniqlangan ijobiy va salbiy jihatlar koʻrsatilgan boʻlishi kerak.

36. Senat qoʻmitasi qarorining qaror qiluvchi qismi quyidagilarni oʻz ichiga olgan boʻlishi kerak:

a) qonunning ijro etilishi yuzasidan qabul qilingan qonun osti va idoraviy normativ hujjatlarni baholash;

b) tegishli davlat hokimiyati va boshqaruvi organlarining faoliyatini baholash;

v) davlat hokimiyati va boshqaruvi organlari faoliyatini takomillashtirishga doir tavsiyalar;

g) qonun hujjatlariga oʻzgartishlar kiritish yuzasidan takliflar tayyorlash haqidagi tavsiyalar;

d) Senat qoʻmitasining qarori koʻrib chiqish uchun yuboriladigan davlat hokimiyati va boshqaruvi organlarining roʻyxati.

37. Senat qoʻmitasining qarorida davlat hokimiyati va boshqaruvi organlari tomonidan qarorni koʻrib chiqish natijalari yoki koʻrilgan choralar toʻgʻrisida Senat qoʻmitasiga axborot taqdim etish muddatlari koʻrsatilishi mumkin.

38. Agar Senat qoʻmitasining qarorida davlat hokimiyati va boshqaruvi organlari tomonidan qarorni koʻrib chiqish natijalari toʻgʻrisida axborot taqdim etish muddatlari koʻrsatilgan boʻlmasa, u holda davlat hokimiyati va boshqaruvi organlarining mansabdor shaxslari uzogʻi bilan bir oylik muddatdan kechiktirmasdan Senat qoʻmitasiga uning qarorini koʻrib chiqish natijalari yoki koʻrilgan choralar haqida axborot berishlari shart.

IV. Senat, Senat Kengashi qarorlari va Senat qoʻmitalari (komissiyalari) qarorlarining ijro etilishini nazorat qilish

1-bob. Senat, Senat Kengashi qarorlarining ijro etilishini nazorat qilish

39. Senatning, Senat Kengashining davlat hokimiyati va boshqaruvi organlari faoliyatiga taalluqli qarori koʻrib chiqilishi va ijro etilishi shart.

40. Senat, Senat Kengashi qarorining ijro etilishini nazorat qilish, qoida tariqasida, Senat qoʻmitalaridan (komissiyalaridan) biriga (bundan buyon matnda Senatning masʼul qoʻmitasi deb yuritiladi) yuklatiladi. Senatning masʼul qoʻmitasi raisi Senat, Senat Kengashi qarorining ijro etilishi ustidan nazoratni amalga oshirish uchun shaxsan javobgardir.

41. Senatning masʼul qoʻmitasi Senat, Senat Kengashi qarori ijro etilishining borishi haqida Senat Raisiga yilning har choragida axborot taqdim etadi, agar boshqacha qoida belgalanmagan boʻlsa.

42. Senat, Senat Kengashi qarorining ijro etilishini nazorat qilishni tashkil qilish maqsadida Senatning masʼul qoʻmitasi Senat, Senat Kengashi qarorining ijro etilishi bilan bogʻliq boʻlgan, ijro amaliyotini oʻrganish boʻyicha savolnoma tayyorlash uchun zarur materiallar va maʼlumotlarni talab qilib olishi mumkin.

43. Olinayotgan axborotni tahlil qilish natijalariga qarab, Senatning masʼul qoʻmitasi tomonidan Senat, Senat Kengashi qarorining ijro etilishi ustidan nazoratni amalga oshirish shakli belgilanadi va ijro amaliyotini oʻrganish boʻyicha savolnoma tayyorlanadi.

44. Savolnoma tuzishdan maqsad Senat, Senat Kengashi qarori ijro etilishining borishi toʻgʻrisida davlat hokimiyati va boshqaruvi organlaridan toʻliq axborot olishdan iborat.

45. Savolnoma tegishli davlat hokimiyati va boshqaruvi organlariga xat bilan yuboriladi, unda ijro etish toʻgʻrisida axborot taqdim etish muddatlari aniq koʻrsatilgan boʻlishi kerak.

46. Senatning masʼul qoʻmitasi tomonidan davlat hokimiyati va boshqaruvi organlaridan Senat, Senat Kengashi qarorining ijro etilishi natijalari boʻyicha kelayotgan axborotni umumlashtirish va tahlil qilish ishlari olib boriladi.

47. Zarurat boʻlganda, Senatning masʼul qoʻmitasi davlat hokimiyati va boshqaruvi organlaridan qoʻshimcha hujjatlar, xulosalar, statistik va boshqa maʼlumotlarni soʻrab olishi mumkin.

48. Davlat hokimiyati va boshqaruvi organlaridan kelayotgan axborotni umumlashtirish va tahlil qilish yakunlari boʻyicha Senatning masʼul qoʻmitasi tomonidan tahliliy maʼlumotnoma tayyorlanadi.

49. Senat, Senat Kengashi qarori ijro etilishining borishi toʻgʻrisidagi axborot Senat Kengashida koʻrib chiqish uchun kiritiladi. Senat Kengashining majlisida Senat masʼul qoʻmitasi raisining axboroti eshitiladi, u Senat, Senat Kengashi qarori ijro etilishining borishi toʻgʻrisida axborot beradi.

50. Senat, Senat Kengashi qarorining ijro etilishi toʻgʻrisidagi axborot Senatning navbatdagi yalpi majlisida ham eshitilishi mumkin.

51. Senatning yalpi majlisida yoki Senat Kengashining majlisida Senat, Senat Kengashi qarorining ijro etilishi uchun masʼul boʻlgan tegishli davlat hokimiyati va boshqaruvi organlari rahbarlarining axboroti eshitilishi mumkin.

52. Davlat hokimiyati va boshqaruvi organlari faoliyatiga doir Senat, Senat Kengashi qarorining ijro etilishi toʻgʻrisida axborot taqdim etilmagan yoki axborot toʻliq taqdim etilmagan yoxud davlat hokimiyati va boshqaruvi organlari tomonidan Senat, Senat Kengashi qarori ijro etilmagan taqdirda Senatning masʼul qoʻmitasi Senat Kengashida koʻrib chiqish uchun parlament soʻrovini yuborish toʻgʻrisida yoki parlament eshituvlarini oʻtkazish tashabbusi haqida takliflar kiritishi mumkin.

53. Parlament soʻrovini yuborish Oʻzbekiston Respublikasi Oliy Majlisi Senati Kengashining 2006-yil 29-iyundagi 199-I-sonli qarori bilan tasdiqlangan Oʻzbekiston Respublikasi Oliy Majlisi Senati, Senat aʼzosi tomonidan parlament soʻrovini yuborish tartibiga muvofiq amalga oshiriladi.

54. Parlament eshituvlari Oʻzbekiston Respublikasi Oliy Majlisi Senati Kengashining 2010-yil 8-iyuldagi 73-II-sonli qarori bilan tasdiqlangan Oʻzbekiston Respublikasi Oliy Majlisi Senati tomonidan parlament eshituvlarini tayyorlash, tashkil etish va oʻtkazish tartibi toʻgʻrisidagi nizomga muvofiq oʻtkaziladi.

Parlament eshituvlari oʻtkazilganida materiallar tayyorlash maqsadida parlament eshituvlarini tashkil etish uchun masʼul Senat qoʻmitasi yoki komissiyasi (qoʻmitalari yoki komissiyalari) tomonidan Senat, Senat Kengashi qarorining ijro etilishini oʻrganish joylarga chiqib amalga oshirilishi mumkin.

55. Senat, Senat Kengashi qarorining ijro etilishini joylarga chiqib oʻrganish ushbu nizomning 11 — 26-bandlari qoidalariga muvofiq amalga oshiriladi.

56. Oʻrganish yakunlari boʻyicha Senatning masʼul qoʻmitasi tomonidan Senat, Senat Kengashi qarori ijro etilishining borishi haqida axborot tayyorlanadi.

2-bob. Senat qoʻmitasi (komissiyasi) qarorlarining ijro etilishini nazorat qilish

57. Davlat hokimiyati va boshqaruvi organlariga yuboriladigan Senat qoʻmitalarining (komissiyalarining) qarorlari ular tomonidan koʻrib chiqilib, natijalari yoki koʻrilgan choralar haqida, agar qarorda boshqacha qoida belgilangan boʻlmasa, uzogʻi bilan bir oydan kechiktirmay xabar qilinishi shart.

58. Senat qoʻmitasi (komissiyasi) qarorlarining ijro etilishi ustidan nazoratni amalga oshirish, qoida tariqasida, Senat qoʻmitasining (komissiyasining) raisi zimmasiga yuklatiladi.

59. Senat qoʻmitasining (komissiyasining) oʻz faoliyati toʻgʻrisidagi hisoboti Senat Kengashining majlisida eshitilganida Senat qoʻmitalari (komissiyalari) tomonidan ular qabul qilgan qarorlarning ijro etilishi natijalari toʻgʻrisida axborot taqdim etiladi.

60. Davlat hokimiyati va boshqaruvi organlarining Senat qoʻmitasi (komissiyasi) qarorining ijro etilishi yoki koʻrilgan choralar haqidagi axboroti Senat qoʻmitasining (komissiyasining) majlisida muhokama qilinadi. Senat qoʻmitasi (komissiyasining) majlislari ochiq oʻtkaziladi. Zarurat boʻlganda, Senat qoʻmitasi (komissiyasi) yopiq majlis oʻtkazish toʻgʻrisida qaror qabul qilishi mumkin.

61. Senat qoʻmitasining (komissiyasining) majlisida Senat qoʻmitasi (komissiyasi) qarorining ijro etilishi natijalari muhokama qilinganida tegishli davlat hokimiyati va boshqaruvi organlari rahbarlarining axboroti eshitiladi. Majlisga manfaatdor davlat va xoʻjalik boshqaruvi organlari, ilmiy muassasalar, ommaviy axborot vositalari va boshqa fuqarolik jamiyati institutlarining vakillari, olimlar, mutaxassislar va ekspertlar taklif etilishi mumkin.

62. Zarur boʻlganda davlat hokimiyati va boshqaruvi organlarining axboroti Senat qoʻmitasi (komissiyasi) va xalq deputatlari mahalliy Kengashining qoʻshma majlisida — “Birlashgan sessiya”da koʻrib chiqilishi va muhokama qilinishi mumkin.

63. Senat qoʻmitasi (komissiyasi) qarorining ijro etilishi toʻgʻrisida axborot taqdim etilmagan yoki toʻliq axborot taqdim etilmagan yoxud davlat hokimiyati va boshqaruvi organlari tomonidan tegishli choralar koʻrilmagan taqdirda Senat qoʻmitasi (komissiyasi) Senat Kengashida koʻrib chiqish uchun parlament soʻrovini yuborish yoki parlament eshituvlarini oʻtkazish tashabbusi haqida takliflar kiritishi mumkin.

64. Parlament eshituvlari oʻtkazilganida materiallar tayyorlash maqsadida parlament eshituvlarini tashkil etish uchun masʼul Senat qoʻmitasi yoki komissiyasi (qoʻmitalari yoki komissiyalari) tomonidan Senat qoʻmitasi (komissiyasi) qarorining ijro etilishini oʻrganish joylarga chiqib amalga oshirilishi mumkin.

65. Senat qoʻmitasi (komissiyasi) qarorining ijro etilishini joylarga chiqib oʻrganish ushbu nizomning 11 — 26-bandlari qoidalariga muvofiq amalga oshiriladi.

66. Oʻrganish yakunlari boʻyicha Senat qoʻmitasi (komissiyasi) qarori ijro etilishining borishi toʻgʻrisida axborot tayyorlanadi.

67. Senat qoʻmitasi (komissiyasi) oʻzi qabul qilgan qarorlarda koʻrsatilgan tavsiyalar amalga oshirilishini taʼminlash uchun qarorlarni qabul qilish amaliyotini umumlashtirish boʻyicha ishni olib boradi.

V. Yakunlovchi qoidalar

68. Qonun, Senat, Senat Kengashi qarorlari va Senat qoʻmitalari (komissiyalari) qarorlarining davlat hokimiyati va boshqaruvi organlari tomonidan ijro etilishi ustidan Senat qoʻmitalarining (komissiyalarining) nazoratni amalga oshirish bilan bogʻliq faoliyatini tashkiliy, axborot, moddiy-texnik jihatdan taʼminlash Senat Devoni tomonidan amalga oshiriladi.

69. Qonun, Senat, Senat Kengashi qarorlari va Senat qoʻmitalari (komissiyalari) qarorlarining davlat hokimiyati va boshqaruvi organlari tomonidan ijro etilishi ustidan Senat qoʻmitalarining (komissiyalarining) nazoratni amalga oshirish bilan bogʻliq faoliyatini taʼminlash deganda Senat qoʻmitalarining (komissiyalarining) davlat hokimiyati va boshqaruvi organlari, shu jumladan xalq deputatlari mahalliy Kengashlari bilan oʻzaro hamkorligini tashkil etish, Senat qoʻmitalarining (komissiyalarining) nazorat faoliyati boʻyicha materiallarni umumlashtirish va tahlil qilishga, Senat qoʻmitalarining (komissiyalarining) majlislarini yoki ishchi guruhlar majlislarini oʻtkazishga koʻmaklashish, shuningdek Senatning, Senat Kengashining qarori yoki Senat qoʻmitasi (komissiyasi) qarorining loyihalarini tayyorlash tushuniladi.

70. Senat Devoni boʻlimlarining faoliyatini amalga oshirish tartibi Oʻzbekiston Respublikasi Oliy Majlisi Senati Raisining 2010-yil 22-iyuldagi 85-sonli Farmoyishi bilan tasdiqlangan Oʻzbekiston Respublikasi Oliy Majlisi Senati Devonining boʻlimlari toʻgʻrisidagi nizomlar bilan belgilanadi.