Tadbirkorlik faoliyatini amalga oshirish uchun tanlov asosida yer uchastkalari berish tartibotlarini va qurilish uchun ruxsatnomalar olish tartibini yanada takomillashtirish chora-tadbirlari toʻgʻrisida (285-son)

07.10.2015

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2015-yil 15-maydagi PF-4725-son Farmoni bilan tasdiqlangan Xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish chora-tadbirlari dasturini amalga oshirish, qurilishning barcha bosqichlarida — shaharsozlik hujjatlarini tayyorlashdan boshlab obyektlarni foydalanishga topshirishgacha boʻlgan bosqichlarda tadbirkorlik faoliyati sohasidagi ruxsat berish tartibotlari doirasida yagona qoidalar va talablarni belgilash maqsadida Vazirlar Mahkamasi qaror qiladi:

1. Quyidagilar tadbirkorlik subyektlari tomonidan amalga oshiriladigan qurilish sohasida roʻyxatdan oʻtkazish va ruxsat berish tartibotlarining barcha turlarini yanada takomillashtirish va maqbullashtirish chora-tadbirlarini amalga oshirishning asosiy yoʻnalishlari hisoblansin:

tadbirkorlik faoliyatini amalga oshirish uchun yer uchastkalarini faqat tanlov asosida berish hisobiga tadbirkorlik subyektlariga teng raqobat sharoitlari yaratish;

Oʻzbekiston Respublikasi Davlat arxitektura va qurilish qoʻmitasining davlat arxitektura-qurilish nazorati hududiy inspeksiyalari tomonidan xabar berish tartibini joriy etish yoʻli bilan qurilish-montaj ishlarini bajarishga ruxsatnomalar berish mexanizmini takomillashtirish.

2. Belgilab qoʻyilsinki:

2016-yil 1-yanvardan boshlab yuridik va jismoniy shaxslarga tadbirkorlik faoliyatini amalga oshirish uchun aholi punktlarida doimiy foydalanishga maydoni 1 gektargacha va 1 gektar boʻlgan yer uchastkalari faqat tanlov asosida beriladi;

tadbirkorlik faoliyatini amalga oshirish uchun tanlov asosida beriladigan yer uchastkalarining roʻyxatini oʻz vaqtida shakllantirish ishlari Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari tomonidan taʼminlanadi.

3. Quyidagilar tasdiqlansin va 2016-yil 1-yanvardan boshlab amalga kiritilsin:

Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida yer uchastkalari berish tartibi toʻgʻrisidagi nizom 1-ilovaga muvofiq;

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibi toʻgʻrisidagi nizom 2-ilovaga muvofiq.

4. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari:

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan birgalikda amalga oshirilayotgan yerlar monitoringini puxta tahlil qilish natijalariga koʻra foydalanilmayotgan yerlarning aniqlanishini taʼminlasinlar, keyinchalik ularni tadbirkorlik faoliyatini amalga oshirish uchun tanlov asosida beriladigan yer uchastkalari roʻyxatiga kiritsinlar;

bir oy muddatda — belgilangan tartibda tadbirkorlik subyektlarining tanlov takliflarini koʻrib chiqish boʻyicha doimiy ishlovchi tanlov komissiyalari tashkil etsinlar va ularning faoliyatiga koʻmaklashishga doir chora-tadbirlar kompleksini amalga oshirsinlar, oydinlik va oshkoralik tamoyillariga rioya etilishini taʼminlasinlar.

5. Oʻzbekiston Respublikasi Davlat arxitektura va qurilish qoʻmitasi:

Yer resurslari, geodeziya, kartografiya va davlat kadastri davlat qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda yangidan tashkil etilayotgan tanlov komissiyalari aʼzolari, mahalliy ijro etuvchi hokimiyat organlari, tadbirkorlik subyektlariga “yagona darcha” tamoyili boʻyicha davlat xizmatlari koʻrsatuvchi yagona markazlar mutaxassislari uchun tadbirkorlik faoliyatini amalga oshirish uchun tanlov asosida yer uchastkalari berish, shuningdek qurilish-montaj ishlarini bajarishga ruxsatnoma berish va qurilish obyektlarini foydalanishga qabul qilish tartibotlarini takomillashtirish chora-tadbirlarining amalda toʻgʻri qoʻllanilishi va natijadorligi yuzasidan seminar-treninglar tashkil etilishi va oʻtkazilishini taʼminlasin;

manfaatdor vazirliklar va idoralar bilan birgalikda shaharsozlik faoliyati va boshqa noqishloq xoʻjaligi ehtiyojlari uchun yer uchastkalari berishning, shuningdek obyektni qayta ixtisoslashtirish va rekonstruksiya qilishga ruxsatnomalar berishning, bino va inshootning tashqi koʻrinishini oʻzgartirishni (fasadni taʼmirlashni) kelishishning, turar joyni noturar joy toifasiga oʻtkazish toʻgʻrisida qaror qabul qilishning umumiy belgilangan tartibini yanada soddalashtirish yuzasidan uch oy muddatda Vazirlar Mahkamasiga takliflar kiritsin.

6. Savdo-sanoat palatasi Oʻzbekiston matbuot va axborot agentligi hamda Oʻzbekiston milliy teleradiokompaniyasi bilan birgalikda ommaviy axborot vositalari ishtirokida tadbirkorlik faoliyati subyektlarining qurilishning barcha bosqichlarida — shaharsozlik hujjatlarini tayyorlashdan boshlab obyektlarni foydalanishga topshirishgacha boʻlgan bosqichlarda ruxsat beruvchi tartibotlarni takomillashtirish yuzasidan koʻrilayotgan chora-tadbirlar toʻgʻrisida xabardorligini oshirishga yoʻnaltirilgan, shu jumladan tegishli maʼlumotlarni aholining keng qatlamlari va tadbirkorlik subyektlarining foydalanishi qulay boʻlgan axborot manbalarida joylashtirish yuzasidan chora-tadbirlar kompleksini ishlab chiqsin va amalga oshirsin.

7. Vazirlar Mahkamasining 2013-yil 25-fevraldagi 54-son qarori (Oʻzbekiston Respublikasi QT, 2013-y., 2-son, 13-modda) bilan tasdiqlangan Shaharsozlik faoliyatini amalga oshirish uchun aholi punktlarida yer uchastkalari berish, qurilish obyektlarini loyihalashtirish va roʻyxatdan oʻtkazish, shuningdek obyektlarni foydalanishga qabul qilish tartibi toʻgʻrisidagi nizom 1-bandiga quyidagi mazmundagi xatboshi qoʻshilsin:

“tadbirkorlik faoliyatini amalga oshirish uchun maydoni 1 gektargacha va 1 gektar boʻlgan yer uchastkalarini tanlov asosida berishga”.

8. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 7-oktabr,

285-son

Vazirlar Mahkamasining 2015-yil 7-oktabrdagi 285-son qaroriga 1-ILOVA

Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida yer uchastkalari berish tartibi toʻgʻrisida

NIZOM

I. Umumiy qoidalar

1. Ushbu Nizom tadbirkorlik faoliyatini amalga oshirish uchun yuridik va jismoniy shaxslarga maydoni 1 gektargacha va 1 gektar boʻlgan yer uchastkalarini doimiy foydalanishga berish tartibini belgilaydi.

2. Tadbirkorlik faoliyatini amalga oshirish uchun yuridik va jismoniy shaxslarga aholi punktlaridagi maydoni 1 gektargacha va 1 gektar boʻlgan yer uchastkalarini doimiy foydalanishga berish faqat tanlov asosida (keyingi oʻrinlarda yer uchastkalarini tanlov asosida berish deb ataladi) amalga oshiriladi.

3. Ushbu Nizom talablari:

kichik sanoat zonalari hududida joylashgan;

erkin iqtisodiy zonalar hududida joylashgan;

Oʻzbekiston milliy avtomagistrali boʻyida infratuzilma va servis obyektlari qurish uchun;

Oʻzbekiston Respublikasi Prezidenti va Vazirlar Mahkamasining qarorlarida nazarda tutilgan obyektlarning aniq turlarini qurish uchun;

jamoat va davlat ehtiyojlari uchun, olib qoʻyiladigan yer uchastkalari oʻrniga yuridik va jismoniy shaxslarga;

namunaviy loyihalar asosida yakka tartibdagi uy-joylar qurilayotgan massivlarda;

besh yil davomida faoliyat turini oʻzgartirmaslik va yer uchastkasidan doimiy foydalanish huquqini boshqa shaxsga oʻtkazmaslik sharti bilan tadbirkorlik subyektlariga ilgari berilgan yer uchastkalariga qoʻshimcha ravishda (ilgari berilgan yer uchastkasi oʻlchamidan koʻp boʻlmagan miqdorda) faqat ishlab chiqarishni va aholiga koʻrsatilayotgan savdo, maishiy, tibbiy va boshqa xizmatlarni kengaytirish hamda turlarini koʻpaytirish (yer uchastkasining qoʻshimcha ravishda berilishi asoslangan tadbirkorlik subyektining biznes rejasi tuman (shahar) hokimlari tomonidan tasdiqlangan boʻlishi kerak), tadbirkorlik subyektlarining mulki boʻlgan binolarga qoʻshimcha kirish-chiqish maydonchalari, yertoʻlaga tushish va yuqori qavatlarga chiqish zinalarini tashkil etish, bino va inshootlarning qismlariga yuk tashish va oʻt oʻchirish avtomobillarini oʻtishiga yoʻl tashkil etish uchun yer uchastkalarini qoʻshib berishga;

noqishloq xoʻjaligi ehtiyojlari uchun, shuningdek ikki va undan koʻp tumanlar (shaharlar) yoki viloyatlar hududida joylashadigan obyektlarni qurish uchun aholi punktlari tashqarisidagi yer uchastkalarini berishga tatbiq etilmaydi.

4. Yer uchastkalarini tanlov asosida berish ushbu Nizomning 1-ilovasiga muvofiq sxema boʻyicha amalga oshiriladi.

5. Ushbu Nizomda quyidagi tushunchalardan foydalaniladi:

tanlov predmetining minimal qiymati — tanlov perdmetini tanlovga qoʻyish uchun uning belgilangan qiymati;

talabgor — taklif etilgan shartlarda tanlovda qatnashish niyatini bildirgan yuridik va jismoniy shaxs.

6. Tadbirkorlik subyektlarining tanlov takliflarini koʻrib chiqish ushbu Nizomning 2-ilovasiga muvofiq namunaviy tarkib asosida Qoraqalpogʻiston Respublikasi Vazirlar Kengashi, viloyatlar va Toshkent shahri hokimlari qarori bilan tuziladigan tadbirkorlik subyektlarining tanlov takliflarini koʻrib chiqish boʻyicha doimiy faoliyat koʻrsatadigan tanlov komissiyalari tomonidan amalga oshiriladi.

7. Vakolatli organlar tomonidan yer uchastkasi berish boʻyicha materiallarni tayyorlash va kelishish, yer uchastkasining topografik xaritasidan yer uchastkasi chegaralarini naturaga koʻchirish dalolatnomasidan tashqari, Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalari tomonidan Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan tuziladigan shartnoma asosida, qonun hujjatlarida belgilangan tartibda avans toʻlash sharti bilan amalga oshiriladi.

Avans toʻlovlari tanlov gʻoliblaridan tushadigan mablagʻlarni jamlash uchun ochiladigan Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining maxsus hisob raqamlaridan toʻlanadi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus hisob raqamlarida mablagʻ boʻlmagan holatlarda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablagʻlari yoki Qoraqalpogʻiston Respublikasi respublika budjetining, viloyatlar viloyat budjetlarining va Toshkent shahri shahar budjetining zaxira jamgʻarmalari hisobidan toʻlab beriladi.

Qoraqalpogʻiston Respublikasi Arxitektura va qurilish davlat qoʻmitasi, viloyatlar arxitektura va qurilish bosh boshqarmalari yer uchastkasi berish boʻyicha materiallarni tayyorlash va kelishish funksiyalarini shartnoma asosida tuman (shahar) arxitektura va qurilish boʻlimlariga yuklashi mumkin.

Toshkent shahrida yer uchastkasi berish boʻyicha materiallarni tayyorlash va kelishish Toshkent shahri arxitektura va qurilish bosh boshqarmasi tomonidan amalga oshiriladi.

8. Yer uchastkasi berish boʻyicha materiallarni tayyorlash va kelishish ishlarining qiymati Oʻzbekiston Respublikasi Vazirlar Mahkamasi tomonidan belgilangan tartibda aniqlanadi.

9. Tanlov predmetining minimal qiymati respublika shaharlari, posyolkalari va qishloq joylaridagi yer uchastkalaridan foydalanish uchun ularning joylashish zonasiga muvofiq yuridik shaxslar uchun belgilangan yer soligʻining yillik stavkasi miqdorida belgilanadi.

10. Yer uchastkalarini tanlov asosida berish natijasida tushgan mablagʻlar Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining maxsus hisob raqamlarida jamlanadi hamda Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalarining va “OʻzGAShKLITI” DUK loyiha-qidiruv tashkilotining yer uchastkasi berish boʻyicha materiallarni tayyorlash va kelishishga xarajatlarini, avans toʻlovlarini chegirgan holda qoplashga yoʻnaltiriladi.

Tushgan mablagʻlarning qolgan qismi Qoraqalpogʻiston Respublikasi budjeti daromadiga hamda viloyatlar va Toshkent shahrining tegishli mahalliy budjetlari daromadiga oʻtkaziladi.

II. Tadbirkorlik faoliyatini amalga oshirish uchun tanlov asosida beriladigan yer uchastkalari roʻyxatini shakllantirish va yer uchastkalarini tanlovga qoʻyish uchun zarur materiallarni tayyorlash tartibi

11. Tanlov asosida beriladigan yer uchastkalari roʻyxati (keyingi oʻrinlarda yer uchastkalari roʻyxati deb ataladi) shakllantirish Qoraqalpogʻiston Respublikasi Vazirlar Kengashi, viloyatlar hokimliklari tomonidan, yer uchastkalarining roʻyxati shaklida, ulardan foydalanishning maqsadi, ularning maydoni va joylashgan joyi koʻrsatilgan holda har chorakning birinchi oʻn kunligigacha (10-yanvargacha, 10-aprelgacha, 10-iyulgacha va 10-oktabrgacha) taqdim etiladigan tumanlar (shaharlar) hokimliklarining takliflari asosida amalga oshiriladi.

12. Yer uchastkalarining roʻyxatini tuzish tadbirkorlik faoliyatini tashkil etish uchun yer uchastkalari berish toʻgʻrisida tushgan arizalarni taqdim qilish natijalari boʻyicha tumanlar (shaharlar) hokimliklari tomonidan, shuningdek:

tasdiqlangan shaharsozlik hujjatlariga muvofiq — tumanlar (shaharlar) arxitektura va qurilish boʻlimlarining;

tegishli tuman (shahar) yerlaridan foydalanishning holati monitoringi natijalari boʻyicha tumanlar (shaharlar) yer resurslari va davlat kadastri boʻlimlarining;

tumanlarni (shaharlarni) kompleks rivojlantirish dasturiga kiritilgan loyihalarning tahlili natijalari boʻyicha — tumanlar (shaharlar) iqtisodiyot boʻlimlarining;

tadbirkorlik subyektlari oʻrtasida oʻtkaziladigan soʻrovlar natijalari boʻyicha — Savdo-sanoat palatasining tuman (shahar) boʻlinmalarining takliflari asosida amalga oshiriladi.

Ushbu bandda koʻrsatilgan tashkilotlarning takliflari tumanlar (shaharlar) hokimliklariga har yili chorakning birinchi oyini birinchi sanasigacha (1-yanvargacha, 1-aprelgacha, 1-iyulgacha va 1-oktabrgacha) boʻlgan muddatda taqdim etiladi.

13. Toshkent shahrida yer uchastkalari roʻyxatini shakllantirish Toshkent shahri hokimligi tomonidan, ushbu Nizomning 11-bandida nazarda tutilgan muddatlarda, tadbirkorlik faoliyatini tashkil etish uchun yer uchastkalari berish toʻgʻrisida tushgan arizalarning tahlili natijalari boʻyicha, shuningdek:

tasdiqlangan shaharsozlik hujjatlariga muvofiq — viloyatlar va Toshkent shahri arxitektura va qurilish bosh boshqarmasining;

yerlardan foydalanishning holati monitoringi natijalari boʻyicha — Toshkent shahri yer resurslari va davlat kadastri boshqarmasining;

hududlarni kompleks rivojlantirish dasturiga kiritilgan loyihalarning tahlili natijalari boʻyicha — Toshkent shahri iqtisodiyot bosh boshqarmasining;

tadbirkorlik subyektlari oʻrtasida oʻtkaziladigan soʻrovlar natijasi boʻyicha — Savdo-sanoat palatasi hududiy boshqarmasining takliflari asosida amalga oshiriladi.

Ushbu bandda koʻrsatilgan tashkilotlarning takliflari Toshkent shahri hokimligiga har yili chorakning birinchi oyini birinchi sanasigacha (1-yanvargacha, 1-aprelgacha, 1-iyulgacha va 1-oktabrgacha) boʻlgan muddatda taqdim etiladi.

14. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari har yili chorakning birinchi oʻn kunligigacha (10-yanvargacha, 10-aprelgacha, 10-iyulgacha va 10-oktabrgacha) boʻlgan muddatda ushbu Nizomning 12 va 13-bandlarida koʻrsatilgan tashkilotlarning takliflarini umumlashtiradilar va ularni yer uchastkalari berish boʻyicha materiallarni tayyorlash va kelishish uchun tegishli ravishda Qoraqalpogʻiston Respublikasi Arxitektura va qurilish davlat qoʻmitasiga, viloyatlar va Toshkent shahri arxitektura va qurilish bosh boshqarmalariga yuboradilar.

141. Qoraqalpogʻiston Respublikasi Arxitektura va qurilish qoʻmitasiga, viloyatlar va Toshkent shahar arxitektura va qurilish bosh boshqarmalari oʻzlarining huzuridagi hududiy arxitektura-shaharsozlik kengashlarida yer uchastkalari berish boʻyicha materiallarni tayyorlashdan oldin asosiy va qoʻshimcha roʻyxatlardagi har bir yer uchastkasini shaharsozlik norma va qoidalarga muvofiqligini baholaydilar.

Shaharsozlik norma va qoidalarga nomuvofiq boʻlgan yer uchastkalari oldin asosiy va qoʻshimcha roʻyxatlardan chiqarib tashlanadi.

15. Yer uchastkalari berish boʻyicha materiallar quyidagi tarkibda tayyorlanadi:

yer uchastkasi, shu jumladan undan joriy foydalanish va rejalashtirilayotgan maqsadda foydalanish toʻgʻrisidagi qisqacha axborot;

tutash yer uchastkalaridan foydalanish turlari (zarurat boʻlganda) qishloq xoʻjaligi xaritasida) koʻrsatilgan holdagi vaziyat sxemasi;

yer uchastkasining yer osti muhandislik kommunikatsiyalari aks ettirilgan holda M-500 masshtabli topografik xaritadagi joylashish rejasi;

yer uchastkasining uni kamida ikki tomondan oʻrab turgan obyektlar koʻrsatilgan holdagi fotosurati (15 x 20 sm);

tuman (shahar) hokimligi huzuridagi yer uchastkalarini berish (realizatsiya qilish) masalalarini koʻrib chiqish boʻyicha komissiyasining (keyingi oʻrinlarda tuman (shahar) komissiyasi deb ataladi) yer uchastkasini tanlash dalolatnomasi;

yer uchastkasi chegaralarini naturaga chiqarish dalolatnomasi.

16. Yer uchastkalarining topografik xaritasini ishlab chiqish uchun “OʻzGAShKLITI” DUKning loyiha-qidiruv tashkiloti vakolatxonasi shartnoma asosida jalb etiladi, uning tomonidan ayni bir vaqtda tuman (shahar) arxitektura va qurilish boʻlimi (boshqarmasi) hamda Qoraqalpogʻiston Respublikasi, viloyatlar va Toshkent shahri yer tuzish va koʻchmas mulk kadastri davlat korxonasining tegishli tuman (shahar)dagi filiali vakillari ishtirokida yer uchastkasi chegaralarini naturaga chiqarish amalga oshiriladi.

Yer uchastkasining topografik xaritasini tayyorlash va yer uchastkasi chegaralarini naturaga chiqarish uchun quyidagi miqdorda toʻlov undiriladi:

0,3 gektargacha maydon suratga olinganda — eng kam oylik ish haqining ikki baravari miqdorida;

0,3 gektardan 0,5 gektar maydon suratga olinganda — eng kam oylik ish haqining uch baravari miqdorida;

0,5 gektardan 0,7 gektargacha maydon suratga olinganda — eng kam oylik ish haqining toʻrt baravari miqdorida;

0,7 gektardan 1,0 gektar maydon suratga olinganda — eng kam oylik ish haqining besh baravari miqdorida.

Yer uchastkasining topografik xaritasini tayyorlash va yer uchastkasi chegaralarini naturaga chiqarish boʻyicha ishlar “OʻzGAShKLITI” DUKning loyiha-qidiruv tashkiloti bilan Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari oʻrtasida tuzilgan shartnoma asosida amalga oshiriladi.

Yer uchastkasi chegaralarini naturaga koʻchirish “OʻzGAShKLITI” DUKning loyiha-qidiruv tashkiloti, tuman (shahar) arxitektura va qurilish boʻlimi (boshqarmasi) hamda Qoraqalpogʻiston Respublikasi, viloyatlar va Toshkent shahri yer tuzish va koʻchmas mulk kadastri davlat korxonasining tegishli tuman (shahar)dagi filiali vakillari tomonidan imzolanadigan dalolatnoma bilan rasmiylashtiriladi.

17. Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalari har yili chorakning birinchi oyini uchinchi oʻn kunligigacha (30-yanvargacha, 30-aprelgacha, 30-iyulgacha va 30-oktabrgacha) boʻlgan muddatda yer uchastkalari berish boʻyicha materiallarni tayyorlaydi va ularni vakolatli tashkilotlar bilan kelishadi.

18. Yer uchastkasi berish boʻyicha materiallar tayyorlash davomida:

uning umumiy maydoni aniqlanadi;

shaharsozlik va yer tuzish hujjatlari, yer va shaharsozlik kadastrlari maʼlumotlari oʻrganiladi;

yer uchastkalarini binolar va inshootlarni asossiz koʻchirish, suv xoʻjaligi obyektlari va muhandislik infratuzilmasidan foydalanishda noqulaylik paydo boʻlishi istisno etiladigan holda joylashtirish imkoniyati qidiriladi;

kengligi joylashtiriladigan ishlab chiqarish klassi bilan aniqlanadigan atmosfera havosini ifloslantirish manbalari hisoblanadigan obyektlar atrofini sanitariya jihatidan qoʻriqlash zonasini taʼminlash imkoniyati hisobga olinadi.

19. Yer uchastkasi berish boʻyicha materiallar:

tuman (shahar) hokimi bilan;

tuman (shahar) yer resurslari va davlat kadastri boʻlimi — yer resurslari va davlat kadastri boshqarmasi bilan;

Qoraqalpogʻiston Respublikasi Ekologiya va atrof muhitni muhofaza qilish qoʻmitasi, viloyatlar va Toshkent shahar ekologiya va atrof muhitni muhofaza qilish boshqarmalari bilan;

tuman (shahar) davlat sanitariya-epidemiologiya nazorati markazi bilan, Toshkent shahrida — shahar davlat sanitariya-epidemiologiya nazorati markazi bilan;

tumanlar (shaharlar) ichki ishlar boshqarmalari (boʻlimlari)ning yongʻin xavfsizligi boʻlimi bilan, Toshkent shahrida — Toshkent shahri ichki ishlar bosh boshqarmasining yongʻin xavfsizligi boshqarmasi bilan;

madaniy meros yodgorliklari qoʻriqlanadigan zonada obyekt qurish uchun yer uchastkasi tanlashda — Oʻzbekiston Respublikasi Madaniyat vazirligining madaniy meros obyektlarini qoʻriqlash va ulardan foydalanish bosh ilmiy-ishlab chiqarish boshqarmasi mintaqalararo (mintaqa) davlat inspeksiyasi bilan;

qoʻriqlanadigan tabiiy hududlar, magistral quvurlar, temir yoʻllar va avtomobil yoʻllari, elektr quvvati uzatish va aloqa liniyalari, shuningdek aerodromlar hamda chiqindilarni va boshqa zaharli moddalarni koʻmish joylari yaqinidagi qoʻriqlanadigan, suvni muhofaza qilish va sanitariya himoya zonalarida yer uchastkalari tanlashda — tegishli rejimli hududlar va inshootlardan foydalanadigan va ularni ishlatadigan tashkilotlar bilan;

avtomobillarning toʻxtab turish joylari va yoʻl harakati xavfsizligiga taʼsir koʻrsatuvchi boshqa obyektlar uchun yer uchastkasi ajratiladigan holatlarda — davlat yoʻl harakati xavfsizligi xizmatining hududiy organi bilan kelishiladi.

Yer uchastkasi berish boʻyicha materiallarni vakolatli tuman (shahar) organlari va boshqa shaxslar bilan kelishish 10 ish kuni mobaynida amalga oshiriladi.

Qoraqalpogʻiston Respublikasi Arxitektura va qurilish davlat qoʻmitasiga, viloyatlar va Toshkent shahri arxitektura va qurilish bosh boshqarmalariga murojaat olingan kundan boshlab belgilangan muddat mobaynida vakolatli tashkilotlar tomonidan xulosalar taqdim etilmagan taqdirda yer uchastkasini joylashtirish rejasi kelishilgan hisoblanadi, murakkablik (xavflilik)ning II va III toifalaridagi obyektlar bundan mustasno.

Yer uchastkalari berish boʻyicha materiallarni kelishishda vakolatli tashkilotlar tomonidan qoʻshimcha hujjatlar taqdim etishga doir talablarni belgilash taqiqlanadi.

20. Yer uchastkalari berish boʻyicha materiallarni kelishishda vakolatli tashkilotlar tomonidan ayni bir vaqtda quyidagi xulosalar beriladi:

tuman (shahar) yer resurslari va davlat kadastri boʻlimining, Toshkent shahrida — yer resurslari va davlat kadastri boshqarmasining xulosasi;

Vazirlar Mahkamasining “Oʻzbekiston Respublikasida davlat ekologik ekspertizasi toʻgʻrisidagi nizomni tasdiqlash haqida” 2001-yil 31-dekabrdagi 491-son qaroriga muvofiq Davlat ekologik ekspertizasidan oʻtkazilishi kerak boʻlgan obyektlar uchun — yer uchastkasi ajratish toʻgʻrisida qaror qabul qilingandan keyin tanlov gʻolibi tomonidan atrof muhitga taʼsir toʻgʻrisidagi ariza loyihasini taqdim etish sharti bilan yer uchastkasi berish mumkinligi haqida Qoraqalpogʻiston Respublikasi Ekologiya va atrof muhitni muhofaza qilish qoʻmitasining, ekologiya va atrof muhitni muhofaza qilish boshqarmalarining xulosasi;

tuman (shahar) davlat sanitariya-epidemiologiya nazorati markazining, Toshkent shahrida — shahar davlat sanitariya-epidemiologiya nazorati markazining xulosasi;

tumanlar (shaharlar) ichki ishlar boshqarmalari (boʻlimlari)ning yongʻin xavfsizligi boʻlimining, Toshkent shahrida — Toshkent shahri ichki ishlar bosh boshqarmasi yongʻin xavfsizligi boshqarmasining xulosasi.

Xulosalarda uning shaharsozlik, sanitariya, tabiatni muhofaza qilish, yongʻinga qarshi hamda boshqa norma va qoidalarga rioya etish boʻyicha majburiyatlarida hisobga olinadigan tanlov gʻolibiga qoʻyiladigan talablar bayon qilinadi.

21. Yer uchastkalari berish boʻyicha materiallarni kelishishda vakolatli tashkilotlar tomonidan ayni bir vaqtda tuman (shahar) komissiyasining yer uchastkasi ajratish dalolatnomasi imzolanadi.

Yer uchastkalari ajratish dalolatnomasi faqat tuman (shahar) komissiyasining tanlanayotgan yer uchastkasi manfaatlariga daxldor boʻlgan tashkilotlarning vakillari hisoblanadigan aʼzolari tomonidan imzolanadi.

22. Toshkent, Samarqand shaharlarining loyihadagi chegaralarida, Toshkent viloyati shaharlarida, tumanlarining maʼmuriy markazlarida va shahar posyolkalarida joylashgan yer uchastkalarini berish boʻyicha materiallar 10 ish kuni mobaynida “ToshkentboshrejaLITI” DUKning bosh loyiha-qidiruv tashkiloti bilan, Qoraqalpogʻiston Respublikasi va viloyatlar shaharlarida, tumanlarining maʼmuriy markazlarida va shahar posyolkalarida — “OʻzshaharsozlikLITI” DUKning bosh loyiha-qidiruv tashkiloti bilan, qishloq aholi punktlarida — “Qishloqqurilishloyiha” MChJning bosh loyiha-qidiruv tashkiloti bilan kelishiladi.

Bosh loyiha-qidiruv tashkilotlari berilayotgan yer uchastkasida qurish rejalashtirilayotgan obyektning quvvatini va boshqa parametrlarini aniqlash uchun yer uchastkasini tanlashda shaharsozlik, sanitariya, tabiatni muhofaza qilish, yongʻinga qarshi kurashish boʻyicha hamda boshqa norma va qoidalarning buzilishlari aniqlangan holatlarda Qoraqalpogʻiston Respublikasi Arxitektura va qurilish davlat qoʻmitasidan, viloyatlar va Toshkent shahri arxitektura va qurilish bosh boshqarmalaridan, taqdim etishning zarurligini asoslagan va qonunchilikning aniq normalarini koʻrsatgan holda, qoʻshimcha materiallar talab qilishga haqlidir. Bunda yer uchastkasi berish boʻyicha materiallarni kelishish muddati 5 kunga uzaytiriladi.

Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalari tomonidan zarur qoʻshimcha materiallar 5 kun mobaynida taqdim etilmagan holatlarda bosh-loyiha-qidiruv tashkiloti yer uchastkasi berish boʻyicha materiallarni puxtalashtirish uchun qaytarishga haqlidir.

23. Toshkent shahrida hamda Toshkent viloyatining Qibray, Zangiota, Toshkent, Boʻstonliq va Parkent tumanlarida yer uchastkalari berish boʻyicha materiallar Toshkent shahri va Toshkent viloyati hokimlari tomonidan Vazirlar Mahkamasining “Toshkent shahrida yer uchastkalari berish tartibini yanada takomillashtirish va ulardan maqsadli foydalanish chora-tadbirlari toʻgʻrisida” 2008-yil 22-avgustdagi 189-son hamda “Toshkent viloyatida yuridik va jismoniy shaxslarga yer uchastkalari berish tartibini yanada takomillashtirish va ulardan maqsadli foydalanish chora-tadbirlari toʻgʻrisida” 2009-yil 20-yanvardagi 16-son qarorlariga muvofiq tashkil etilgan komissiyalarga qonunchilikda belgilangan tartibda kelishish uchun kiritiladi.

24. Shaharlar va posyolkalarda (tuman markazlarida) qurilishi tugallangan maʼmuriy markazlar, uy-joy mikrotumanlari hududida ilgari ishlab chiqilgan va tasdiqlangan loyihalar boʻyicha obyektlar qurish uchun yer uchastkalari berishda yer uchastkasini tanlash materiallari, shuningdek Oʻzbekiston Respublikasi Prezidentining “Ijtimoiy va fuqarolar uchun obyektlarni loyihalashtirish va qurishda zarur tartib oʻrnatish chora-tadbirlari toʻgʻrisida” 2011-yil 27-dekabrdagi PQ-1666-son qarori bilan tuzilgan Qurish va rekonstruksiya qilish Oʻzbekiston Respublikasi Hukumati darajasida tasdiqlanadigan obyektlarning manzilli roʻyxatlarini tasdiqlash boʻyicha Hukumat komissiyasi bilan ham kelishiladi.

25. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari har yili chorakning ikkinchi oyini ikkinchi oʻn kunligigacha (20-fevralgacha, 20-maygacha, 20-avgustgacha va 20-noyabrgacha) boʻlgan muddatda, yer uchastkalari berish boʻyicha kelishilgan materiallar asosida yer uchastkalari roʻyxatini tasdiqlaydilar hamda uni “Koʻchmas mulk savdo xizmati” MChJning hududiy filiallariga, shuningdek Qoraqalpogʻiston Respublikasi Arxitektura va qurilish davlat qoʻmitasiga, viloyatlar va Toshkent shahri arxitektura va qurilish bosh boshqarmalariga yer uchastkalarini tanlovga qoʻyishga taalluqli tanlov hujjatlarini tayyorlash uchun yuboradilar.

III. Tanlovni tashkil etish va oʻtkazish, shuningdek tanlov natijalarini rasmiylashtirish va hisob-kitob qilish

26. Tanlovni tashkil etish va oʻtkazish quyidagi bosqichlardan iborat boʻladi:

tanlov hujjatlarini tayyorlash;

tanlovni ommaviy axborot vositalarida eʼlon qilish;

talabgorlardan tanlov takliflarini va zarur hujjatlarni qabul qilish;

tushgan tanlov takliflarini baholash, tanlovning gʻolibini aniqlash va natijalarini rasmiylashtirish;

tanlov gʻolibi toʻgʻrisida bildirish.

27. Tanlovni oʻtkazish uchun Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari “Koʻchmas mulk savdo xizmati” MJChning hududiy filiallari bilan yer uchastkalari berish uchun tanlovni tashkil etish va oʻtkazish xizmatlari koʻrsatish yuzasidan shartnoma tuzadilar.

28. “Koʻchmas mulk savdo xizmati” MJChning hududiy filiallari:

Qoraqalpogʻiston Respublikasi Davlat arxitektura va qurilish qoʻmitasi, viloyatlar va Toshkent shahri arxitektura va qurilish bosh boshqarmalari bilan birgalikda tanlov hujjatlarini tayyorlaydi;

yer uchastkalarining tasdiqlangan roʻyxati olingan kundan boshlab besh kun mobaynida tanlovni eʼlon qilish sanasini va tanlov shartlarini belgilaydi;

tanlovda qatnashish uchun buyurtmanomalar berish muddatini belgilaydi;

tanlov takliflari solingan konvertlarni ochish belgilangan sanadan kamida oʻttiz kun oldin asosan Oʻzbekiston Respublikasining barcha hududida tarqatiladigan, ikki ming nusxadan ortiq tirajda nashr etiladigan kamida ikkita davriy nashrlarda hamda “Koʻchmas mulk savdo xizmati” MJChning, “Davarxitektqurilish” qoʻmitasining, Oʻzbekiston Respublikasi Savdo-sanoat palatasining, Qoraqalpogʻiston Respublikasi Vazirlar Kengashining, viloyatlar va Toshkent shahri hokimliklarining rasmiy veb-saytlarida, shuningdek Internet tarmogʻidagi Oʻzbekiston Respublikasining interaktiv davlat xizmatlari yagona portalida yer uchastkalarining roʻyxatini koʻrsatgan holda tanlov oʻtkazilishi toʻgʻrisida rasmiy bildirish eʼlon qilinishini taʼminlaydi;

talabgorlarga ularning soʻrovlari boʻyicha tanlov hujjatlarini taqdim etadi;

talabgorlarning tanlovda qatnashish uchun berilgan buyurtmanomalarini roʻyxatdan oʻtkazadi hamda ular mazmunining maxfiyligini va saqlanishini taʼminlaydi;

talabgorlarning yer uchastkasi bilan tanishishi uchun shart-sharoitlar yaratadi;

talabgorlarni taqdim etiladigan hujjatlarning namunalari bilan taʼminlaydi hamda ularni rasmiylashtirishda koʻmaklashadi;

tanlov yakunlari toʻgʻrisidagi axborotni matbuotda eʼlon qiladi.

“Koʻchmas mulk savdo xizmati” MJChning hududiy filiallari tanlov qatnashchilari taklif etgan takliflarning saqlanishi va oshkor etilmasligi, shuningdek talabgorlar uchun teng sharoitlar taʼminlanishi uchun javob beradi.

29. Tanlov toʻgʻrisidagi bildirishnomada quyidagi maʼlumotlar boʻlishi kerak:

“Koʻchmas mulk savdo xizmati” MJCh hududiy filiallarining pochta manzili, ularning aloqa telefoni, telefaksi va elektron pochta manzili;

tanlovga qoʻyilgan yer uchastkalarining nomi, soni, tavsifi, foydalanish maqsadi va joylashgan joyi;

tanlov predmetining minimal qiymati;

majburiyatlarni bajarish shakllari va shartlari koʻrsatilgan holda majburiyatlarning boshlangʻich hajmi;

yer uchastkasiga boʻlgan cheklangan (majburiyatlar olingan) huquqlar belgilangan tartibda roʻyxatdan oʻtkazilganligi toʻgʻrisidagi maʼlumot;

talabgorlarning takliflari qayd etilgan konvertlarni ochish sanasi, vaqti va joyi;

tanlov gʻolibini aniqlash sanasi, vaqti, joyi va shartlari;

zakalat miqdori, uni qoʻyish muddati va tartibi, uni toʻlash uchun bank rekvizitlari;

buyurtmanomalarni qabul qilishning oxirgi muddati (kun va soat koʻrsatilgan holda);

tanlov hujjatlarini va qoʻshimcha maʼlumotlarni olish mumkin boʻlgan manzil;

tanlov hujjatlari uchun toʻlov miqdori va uni toʻlash uchun bank rekvizitlari.

30. Tanlov hujjatlari paketida quyidagi hujjatlar boʻlishi kerak:

talabgorlar uchun yoʻriqnoma;

tanlovning texnik qismi;

tanlovning tijorat qismi.

Shuningdek tanlov hujjatlariga tanlov komissiyasi tomonidan tasdiqlanadigan tanlov gʻolibini tanlab olish mezonlari ilova qilinadi.

31. Talabgorlar uchun yoʻriqnomada quyidagilar boʻlishi kerak:

tanlov oʻtkazish qoidalari boʻyicha tushuntirish olish mumkin boʻlgan “Koʻchmas mulk savdo xizmati” MJCh hududiy filiallarining pochta manzili, ularning aloqa telefoni, telefaksi va elektron pochta manzili;

tanlovda qatnashish uchun zarur boʻlgan hujjatlarni rasmiylashtirish tartibi;

tanlov takliflarini rasmiylashtirish boʻyicha talablar;

tanlov taklifini taqdim etish tartibotiga oid talablar;

tanlov takliflari qayd etilgan konvertlarni ochish tartibi;

tanlov takliflarini baholash tartibi.

32. Tanlov hujjatlarining texnik qismida quyidagilar boʻlishi kerak:

yer uchastkasini berish shartlari va maqsadlari;

obyekt qurilishini tugallash muddati;

tanlov majburiyatlarining bajarilishi toʻgʻrisidagi shartnoma loyihasi;

yer uchastkasining joylashish rejasi bilan yer uchastkasini berishga oid materiallar;

Qoraqalpogʻiston Respublikasi Davlat arxitektura va qurilish qoʻmitasi, viloyatlar va Toshkent shahri arxitektura va qurilish bosh boshqarmalari tomonidan tayyorlangan shaharsozlik topshirigʻi (qurilishi uchun yer uchastkasi tanlovga qoʻyilayotgan bino yoki inshootning tashqi koʻrinishiga oid umumiy talablarni belgilovchi, shuningdek talabgorning tanlov majburiyatlarida va bino yoki inshootning ishlab chiqiladigan loyiha-smeta hujjatlarida hisobga olinadigan qurilishning, avtomobillar toʻxtab turish joyining, hududga kirish va hududdan chiqish yoʻllarining, kichik arxitekturaviy shakllarning, ushbu yer uchastkasini koʻkalamzorlashtirish va obodonlashtirishning taxminiy maydonlarini aniqlashtiruvchi hujjatlar);

tanlov gʻolibining atrof muhitni muhofaza qilish, ekologik xavfsizlik talablariga, shuningdek sanitariya normalari va qoidalariga rioya qilish boʻyicha majburiyatlari;

tanlov gʻolibining nogironlarning ijtimoiy infratuzilma obyektlariga (turar joylarga, jamoat, ishlab chiqarish binolari va inshootlariga, dam olish joylariga, madaniy-tomosha muassasalari va boshqa obyektlarga) toʻsiqsiz kirishlari uchun shart-sharoitlar yaratish boʻyicha majburiyatlari;

tanlov gʻolibining madaniy meros obyektlarini va muhofaza qilinadigan tabiiy hududlarni saqlashga qoʻyiladigan talablarga rioya etish boʻyicha majburiyatlari.

33. Tanlov hujjatlarining tijorat qismida quyidagilar boʻlishi kerak:

tanlov predmetining qiymati boʻyicha taklif;

tashkil etiladigan ish oʻrinlarining eng kam soni boʻyicha taklif;

nazarda tutilayotgan investitsiyalar hajmi boʻyicha taklif.

34. Talabgorlar eʼlon berilgandan keyin tanlov hujjatlarini oladilar (shaxsini tasdiqlaydigan hujjat taqdim etilgach, talabgorga tilxat ostida beriladi). Tanlov hujjatlari har bir talabgorga eng kam oylik ish haqining 50 foizi miqdoridagi toʻlov asosida beriladi.

“Koʻchmas mulk savdo xizmati” MChJning hududiy filiallari tomonidan axborot-maslahat xizmatlari uchun talabgorlardan qoʻshimcha toʻlov talab qilishga yoʻl qoʻyilmaydi.

35. Tanlovda qatnashish uchun talabgor yoki uning vakili chopar orqali yoxud pochta orqali buyurtma xat bilan “Koʻchmas mulk savdo xizmati” MJChning hududiy filiallariga tanlov oʻtkazish toʻgʻrisidagi bildirishnomada belgilangan muddatlarda tanlovda qatnashish uchun quyidagi hujjatlar ilova qilingan buyurtmanomani ikki nusxada taqdim etadi:

tanlov hujjatlari talablariga muvofiq tuzilgan tanlov takliflari;

obyektning fasadlarini va bosh rejasini oʻz ichiga oluvchi loyiha eskizi;

ishlab chiqarish moʻljallanayotgan mahsulot turi, hajmi va assortimenti yoki koʻrsatiladigan xizmatlar turi boʻyicha takliflar;

loyihaning talabgorning oʻz mablagʻlari, shuningdek kredit resurslari hisobiga moliyalashtirish bilan taʼminlanganligi toʻgʻrisidagi maʼlumotlar.

Tanlovda qatnashish uchun buyurtmanomaga ilova qilingan barcha hujjatlar talabgorlar tomonidan yelimlangan (imzo bilan tasdiqlangan) konvertlarda, tanlov predmeti minimal qiymatining 10 foizi miqdoridagi zakalat tanlov toʻgʻrisida bildirishnomada koʻrsatilgan bankning hisob raqamiga oʻtkazilganligini tasdiqlovchi toʻlov hujjati nusxasi bilan birga taqdim etiladi.

Taqdim etilgan hujjatlarning barcha varaqlari talabgorning imzosi bilan tasdiqlangan boʻlishi kerak.

Tanlov takliflarining amal qilish muddati tanlov hujjatlarida belgilanadi.

36. Tanlovda qatnashishga buyurtmanomalar qabul qilish bildirishnoma eʼlon qilingan sanadan boshlanadi va konvertlarni ochishning bildirishnomada koʻrsatilgan sanasidan bir kun oldin soat 18.00 da tugaydi.

“Koʻchmas mulk savdo xizmati” MJCh hududiy filialining vakolatli xodimi buyurtmanomaning ikkinchi nusxasiga hujjatlarning roʻyxati bilan birga berilgan hujjatlar qabul qilinganligi toʻgʻrisida belgi qoʻyadi, ular qabul qilingan sana va vaqtni koʻrsatadi. Buyurtmanomaning ikkinchi nusxasi talabgorga yoki uning vakiliga topshiriladi yoxud pochta orqali yuboriladi.

“Koʻchmas mulk savdo xizmati” MChJning hududiy filiallari xodimlari tomonidan ushbu Nizomning 35-bandida nazarda tutilgan hujjatlarni muhrlanmagan konvertlarda qabul qilish, muhrlangan konvertlarni ochish va talabgorning imzolari mavjudligini tekshirish bahonasida ulardagi hujjatlar bilan tanishishga yoʻl qoʻyilmaydi.

“Koʻchmas mulk savdo xizmati” MJChning hududiy filiallari quyidagi hollarda talabgorlarning buyurtmanomalarini qabul qilmaydi:

buyurtmanoma bildirishnomada koʻrsatilgan muddat tamom boʻlgandan keyin taqdim etilganda;

talabgor ushbu Nizomning 34-bandi talablariga muvofiq tanlov hujjatlarini olmaganda.

Buyurtmanomalarni qabul qilish rad etilishining boshqa asoslariga yoʻl qoʻyilmaydi.

“Koʻchmas mulk savdo xizmati” MJChning hududiy filiallari tomonidan qabul qilinmagan hujjatlar qabul qilish rad etilganligi toʻgʻrisidagi belgi qoʻyilgan va sabablari koʻrsatilgan holda oʻsha kunning oʻzida bevosita talabgorga yoki uning vakiliga tilxat bilan yoxud koʻrsatib oʻtilgan hujjatlarni pochta orqali buyurtma xat bilan joʻnatgan holda qaytariladi. Bunda toʻlangan zakalat summasi talabgorga besh bank kuni mobaynida qaytariladi.

37. Olingan buyurtmanomalar tartib raqamlari qoʻyilgan sahifali, ip oʻtkazib tikilgan maxsus jurnalda roʻyxatdan oʻtkaziladi.

Talabgorlarning tanlov takliflari konvertlarni ochishning belgilangan muddatigacha ochilmaydi va seyfda saqlanadi.

38. Konvertlarni ochishning belgilangan sanasigacha talabgor “Koʻchmas mulk savdo xizmati” MJChning hududiy filiallarini yozma ravishda xabardor qilish yoʻli bilan oʻz buyurtmanomasini va tanlov takliflarini qaytarib olish huquqiga ega. “Koʻchmas mulk savdo xizmati” MJChning hududiy filiallari koʻrsatib oʻtilgan bildirishnomani tushgan kunida roʻyxatdan oʻtkazishi shart. Ushbu holatda talabgordan tushgan zakalat besh bank kuni mobaynida qaytarilishi kerak.

Tanlov qatnashchisi koʻrsatib oʻtilgan sanadan keyin oʻz taklifini qaytarib olgan taqdirda, uning toʻlagan zakalati qaytarilmaydi.

39. Tanlov komissiyasi quyidagi huquqlarga ega:

a) oʻz ish reglamentini mustaqil ishlab chiqish va tasdiqlash;

b) tanlov oʻtkazish toʻgʻrisidagi bildirishnomada koʻrsatilgan tanlov takliflarini taqdim etish muddatlarini yoki tanlov oʻtkazish sanasini tanlov hujjatlari berilgan barcha talabgorlarni (ular mavjud boʻlganda) yozma bildirishnoma yuborgan holda, shuningdek ushbu Nizom 28-bandining beshinchi xatboshida nazarda tutilgan axborot resurslarida tegishli bildirishnomani eʼlon qilgan holda tanlov oʻtkazish sanasini tanlov oʻtkazish toʻgʻrisidagi bildirishnomada belgilangan muddatdan bir oydan ortiq boʻlmagan muddatga uzaytirish toʻgʻrisida qaror qabul qilish;

v) soʻzlar, takliflar va ifodalarda ikki xil talqin qilinmaydigan umumiy qabul qilingan belgilar va nomlardan foydalangan holda tushunarli tilda tuzilishi kerak boʻlgan tanlov hujjatlarini tasdiqlash;

g) tanlovda qatnashish uchun talabgor tomonidan toʻlanadigan zakalatni toʻlash tartibini belgilash;

d) tanlov takliflarini koʻrib chiqish muddatini belgilash va konvertlar ochilgan sanadan boshlab 3 kalendar kundan ortiq boʻlmagan muddatda tanlov gʻolibini aniqlash;

e) takliflar tanlov hujjatlariga va tanlov oʻtkazish shartlariga muvofiq boʻlmagan taqdirda, tanlov qatnashchilarining takliflarini rad etish, bu haqda talabgorga xabar berish va rad etish sabablarini koʻrsatish;

j) quyidagi hollarda:

bildirishnomada koʻrsatilgan muddat tamom boʻlgunga qadar birorta ham buyurtmanoma tushmaganda;

barcha tushgan tanlov takliflari tanlov hujjatlari shartlariga muvofiq boʻlmaganda tanlovni boʻlib oʻtmagan deb eʼlon qilish.

Tanlov taklifi faqat bir nafar talabgordan tushganda tanlov komissiyasi tomonidan tanlov boʻlib oʻtmagan deb eʼlon qilinadi va uning qarori bilan belgilangan muddatlarda takroriy tanlov oʻtkaziladi. Takroriy tanlov oʻtkazishda tanlov taklifi yana faqat bir nafar talabgordan tushganda tanlov komissiyasi tomonidan tanlov oʻtmagan deb eʼlon qilinadi va tanlov komissiyasining tanlov natijalari toʻgʻrisidagi protokolida ushbu talabgorga yer uchastkasi berilishi qayd etiladi.

40. Tanlov komissiyasi quyidagilarga majbur:

oʻz faoliyatini hozir boʻlish tartibida tashkil etish;

konvertlarni ochishda va tanlov natijalarini eʼlon qilishda talabgorlar yoki ularning ishonchli vakillarining hamda tegishli tumanlar (shaharlar) hokimliklarining vakillarining ishtirok etishi uchun sharoit yaratish;

konvertlar ochilmaganligini va ulardagi muhrlarning buzilmaganligini tekshirish;

tanlov oʻtkazish jarayonini nazorat qilish;

talablarning birligini va tanlov natijalari boʻyicha qarorlar qabul qilishning xolisonaligini taʼminlash;

ushbu Nizom, boshqa qonun hujjatlari talablari buzilgan, til biriktirish va tanlov oʻtkazish tartib-qoidasini buzadigan boshqa oldindan koʻrilmagan holatlar aniqlangan taqdirda, tanlov oʻtkazishni toʻxtatish;

tanlov takliflarini ular mazmunining raqobatlashuvchi talabgorlarga oshkor qilinishiga yoʻl qoʻyilmaydigan tarzda koʻrib chiqish.

41. Tanlov takliflari qayd etilgan konvertlarning birinchi nusxalari tanlov komissiyasi tomonidan belgilangan kun va soatda ochiladi. Konvertlarning ikkinchi nusxalari “Koʻchmas mulk savdo xizmati” MJChning hududiy filialida saqlanadi va takliflarning mazmuni boʻyicha nizolar yuzaga kelgan taqdirda ochiladi.

Yagona qatnashchining tanlov takliflari qayd etilgan konvert ochilmaydi.

Talabgorlar tanlov takliflari qayd etilgan konvertlarni ochishda ishtirok etishlari mumkin.

Tanlov komissiyasi tomonidan tanlov takliflari qayd etilgan konvertlarni ochishda shartlar va tartib-qoidalarga rioya qilinishi, tanlov hujjatlarida koʻrsatilgan hujjatlarning mavjudligi tekshiriladi.

42. Tanlov takliflarini baholash va tanlov gʻolibini aniqlash quyidagi tartibda amalga oshiriladi:

talabgor takliflarini tanlov hujjatlarining texnik qismi boʻyicha, shu jumladan loyiha eskizini baholash;

talabgorning tashkil etiladigan ish oʻrinlarining eng kam soni boʻyicha taklifini baholash;

talabgorning nazarda tutilayotgan investitsiyalar hajmi boʻyicha taklifini baholash;

talabgorning ishlab chiqarish moʻljallanayotgan mahsulot turi, hajmi va assortimenti yoki koʻrsatiladigan xizmatlar turi boʻyicha taklifini baholash;

talabgorning tanlov predmeti qiymati boʻyicha taklifini baholash;

loyihaning talabgorning oʻz mablagʻlari, shuningdek kredit resurslari hisobiga moliyalashtirish bilan taʼminlanganligi.

Zaruriyat boʻlganda, tanlov takliflarini baholash uchun komissiya tomonidan qoʻshimcha ravishda quyidagi hujjatlar talab qilinishi mumkin:

oxirgi yil uchun auditorlik tashkilotining (yuridik shaxslar uchun) xulosasi (mavjud boʻlganda);

oxirgi ikki yil uchun talabgorning buxgalteriya balansi (yuridik shaxslar uchun);

loyihani amalga oshirish boʻyicha biznes-reja (mavjud boʻlganda).

43. Eng yaxshi tanlov taklifini taklif etgan talabgor tanlov gʻolibi deb eʼtirof etiladi.

44. Tanlov gʻolibini aniqlash konvertlar ochilgan kunda tanlov komissiyasining yopiq majlisida oʻtkaziladi.

Qaror tanlov komissiyasi aʼzolari umumiy sonining oddiy koʻpchilik ovozi bilan qabul qilinadi. Ovozlar teng boʻlib qolgan taqdirda tanlov komissiyasi raisi hal qiluvchi ovozga ega boʻladi.

Agar tanlov komissiyasi majlisida komissiya aʼzolarining kamida toʻrtdan uch qismi qatnashsa tanlov komissiyasining qarori qonuniy hisoblanadi.

45. Tanlov komissiyasi tanlov natijalarini tushgan buyurtmanomalar soniga qarab tanlov takliflari qayd etilgan konvertlar ochilgan sanadan boshlab 3 kalendar kundan ortiq boʻlmagan muddatda protokol shaklida rasmiylashtiradi.

Protokolda:

tanlov komissiyasining tarkibi;

tanlov talabgorlari va ularning takliflari toʻgʻrisidagi maʼlumotlar;

yer uchastkasi joylashgan joy va uning maydoni;

yer uchastkasidan foydalanishning maqsadi;

tanlov gʻolibi;

ovoz berish natijalari va tanlov komissiyasi aʼzolarining qarori;

yer uchastkasidan doimiy foydalanish huquqini olishning bahosi, toʻlov shakli, gʻolibni tanlashga asos boʻlgan shartlar koʻrsatiladi.

Protokol tanlov komissiyasining barcha aʼzolari, tanlov gʻolibi tomonidan imzolanadi va tanlov komissiyasi raisi tomonidan tasdiqlanadi.

46. Tanlov natijalari rasmiylashtirilgandan keyin “Koʻchmas mulk savdo xizmati” MJChning hududiy filiallari bir ish kuni mobaynida ushbu Nizom 28-bandining beshinchi xatboshida nazarda tutilgan axborot resurslarida tanlov natijalari toʻgʻrisidagi axborotni eʼlon qilishga buyurtmanoma rasmiylashtiradi.

47. “Koʻchmas mulk savdo xizmati” MJChning hududiy filiallari tanlov yakunlari boʻyicha qaror qabul qilingan kundan boshlab 2 ish kuni mobaynida tanlov gʻolibini va talabgorlarini tanlov natijalari toʻgʻrisida xabardor qiladi, ularga oʻtkazilgan tanlov natijalari toʻgʻrisidagi tasdiqlangan protokolni yuboradi.

48. Oʻtkazilgan tanlov natijalari toʻgʻrisidagi protokol rasmiylashtirilgandan keyin bir ish kuni mobaynida tegishli tuman (shahar) hokimiga taqdim etiladi, hokim 5 kun mobaynida:

yer uchastkasi berish toʻgʻrisida qaror qabul qiladi va tanlov gʻolibi bilan tanlov predmeti qiymatini va boshqa toʻlovlarni toʻlashga, shuningdek obyektni hujjatlarining texnik qismi talablariga muvofiq qurishga oid tanlov majburiyatlarini bajarish yuzasidan shartnoma tuzadi;

yer uchastkasi ajratish toʻgʻrisidagi qarorni Qoraqalpogʻiston Respublikasi, viloyatlar va Toshkent shahri yer tuzish va koʻchmas mulk kadastri davlat korxonasining tegishli tuman (shahar)dagi filialiga yuboradi.

Toshkent shahrida, shuningdek Toshkent viloyatining Qibray, Zangiota, Toshkent, Boʻstonliq va Parkent tumanlarida yer uchastkalari ajratish toʻgʻrisida qarorlar tegishli ravishda Toshkent shahri va Toshkent viloyati hokimlari tomonidan qabul qilinadi.

481. Qishloq joylarda va uzoq tumanlarda yer uchastkalarini tanlov asosida berishda yer uchastkasidan doimiy foydalanish huquqini olgan tanlov gʻoliblari tanlov predmeti qiymatini bir yilgacha boʻlib-boʻlib toʻlashi mumkin, tanlov zakalati va boshqa belgilangan avans toʻlovlari bundan mustasno.

49. Qoraqalpogʻiston Respublikasi, viloyatlar va Toshkent shahri yer tuzish va koʻchmas mulk kadastri davlat korxonasining tegishli tuman (shahar)dagi filiali yer uchastkasi ajratish toʻgʻrisidagi qaror olingandan keyin 2 kun mobaynida yer uchastkasi ajratishga doir materiallar asosida yer uchastkasiga boʻlgan huquqni davlat roʻyxatidan oʻtkazadi, shuningdek tanlov gʻolibiga yer uchastkasiga boʻlgan huquqning davlat roʻyxatidan oʻtkazilganligi toʻgʻrisidagi guvohnomani beradi.

Yer uchastkasiga boʻlgan huquqni davlat roʻyxatidan oʻtkazish uchun tanlov gʻoliblari tomonidan ariza berilishiga va qoʻshimcha hujjatlar taqdim etilishiga oid talablar belgilash taqiqlanadi.

50. Tanlov gʻolibi tanlov majburiyatlarini bajarish toʻgʻrisidagi shartnomani tuzishdan bosh tortgan yoki uni rad etgan taqdirda tanlov natijalari bekor qilinadi va tanlov komissiyasi qarori bilan belgilangan muddatlarda takroriy tanlov oʻtkaziladi.

Takroriy tanlov oʻtkazishda dastlabki tanlov shartlari qayta koʻrib chiqilmaydi.

51. Tanlov gʻolibi shartnoma tuzishdan bosh tortgan yoki uni rad etgan taqdirda u toʻlagan zakalat summasi qaytarilmaydi.

52. Yer uchastkasidan doimiy foydalanish huquqini olish bilan bogʻliq barcha toʻlovlar yer uchastkasi ajratish toʻgʻrisida qaror qabul qilingandan keyin amalga oshiriladi, zakalat bundan mustasno. Bunda tanlov gʻolibi tomonidan toʻlangan zakalat shartnomada belgilangan yer uchastkasiga boʻlgan huquq qiymatiga kiritiladi, qolgan talabgorlarga esa zakalat belgilangan tartibda besh bank kuni mobaynida qaytariladi.

Shaharsozlik topshirigʻini ishlab chiqish boʻyicha xarajatlar obyektning loyiha-smeta hujjatlarini ishlab chiqayotgan loyihalash tashkiloti tomonidan arxitektura-rejalashtirish topshirigʻini olishda Oʻzbekiston Respublikasi Vazirlar Mahkamasi belgilaydigan miqdorlarda qoplanadi.

IV. Yakunlovchi qoidalar

53. Tanlov gʻolibi tomonidan shartnoma majburiyatlarining bajarilishini nazorat qilish belgilangan tartibda:

tanlov gʻolibi va loyihalash tashkiloti tomonidan loyiha-smeta hujjatlarini ishlab chiqishda qabul qilingan majburiyatlarga rioya etilishi — Qoraqalpogʻiston Respublikasi Davlat arxitektura va qurilish qoʻmitasi, viloyatlar va Toshkent shahri arxitektura va qurilish bosh boshqarmalari, Oʻzbekiston Respublikasi “Davarxitektqurilish” qoʻmitasining davlat ekspertizasi hududiy boshqarmalari;

tanlov gʻolibi tomonidan obyektning qurilishi boʻyicha qabul qilingan majburiyatlarga rioya etilishi — Qoraqalpogʻiston Respublikasi, viloyatlar va Toshkent shahri arxitektura-qurilish nazorati hududiy inspeksiyalari, qabul komissiyalari;

tanlov gʻolibi tomonidan atrof muhitni muhofaza qilish, ekologik xavfsizlik boʻyicha qabul qilingan majburiyatlarga rioya etilishi — Qoraqalpogʻiston Respublikasi Ekologiya va atrof muhitni muhofaza qilish qoʻmitasi, viloyatlar va Toshkent shahar ekologiya va atrof muhitni muhofaza qilish boshqarmalari;

tanlov gʻolibi tomonidan tanlov hujjatlarining tijorat qismiga muvofiq qabul qilingan majburiyatlarga rioya etilishi — tumanlar (shaharlar) hokimliklari tomonidan amalga oshiriladi.

54. Tanlov gʻolibi tomonidan qabul qilingan majburiyatlarga rioya etilmagan taqdirda, uning yer uchastkasiga boʻlgan huquqi qonun hujjatlarida va tanlov majburiyatlarini bajarish uchun tuzilgan shartnomada belgilangan tartibda toʻxtatiladi.

55. Ushbu Nizom talablari buzilishida aybdor boʻlgan shaxslar belgilangan tartibda javob beradilar.

56. Tanlov asosida yer uchastkalari berishda paydo boʻladigan nizolar qonun hujjatlarida belgilangan tartibda koʻrib chiqiladi.

Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida yer uchastkalari berish tartibi toʻgʻrisidagi nizomga 1-ILOVA

Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida yer uchastkalari berish

SXEMASI

Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida yer uchastkalari berish tartibi toʻgʻrisidagi nizomga 2-ILOVA

Tadbirkorlik subyektlarining tanlov takliflarini koʻrib chiqish boʻyicha tanlov komissiyalarining

Namunaviy tarkibi

Izohlar:

1. Tadbirkorlik subyektlarining tanlov takliflarini koʻrib chiqish boʻyicha tanlov komissiyalarining shaxsiy tarkibi Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimlarining qarori bilan tasdiqlanadi.

2. Tanlov komissiyalarining aʼzolari boshqa ishga oʻtgan taqdirda komissiya tarkibiga ushbu lavozimlarga yangidan tayinlangan shaxslar yoxud zimmasiga tegishli funksiyalar yuklangan shaxslar kiritiladi.

Vazirlar Mahkamasining 2015-yil 7-oktabrdagi 285-son qaroriga 2-ILOVA

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibi toʻgʻrisida

Nizom

I. Umumiy qoidalar

1. Mazkur Nizom Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida yer uchastkalari berish tartibi toʻgʻrisidagi nizomga muvofiq berilgan yer uchastkasidagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibini belgilaydi.

2. Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida berilgan yer uchastkalaridagi (keyingi oʻrinlarda yer uchastkalari deb ataladi) obyektlar qurilishi loyihasini ishlab chiqish va kelishish, qurilish-montaj ishlarini amalga oshirishga ruxsatnoma berish, shuningdek obyektlarni foydalanishga qabul qilish ushbu Nizomga 1-ilovaga muvofiq sxema boʻyicha amalga oshiriladi.

II. Loyiha-smeta hujjatlarini kelishish tartibi

3. Yuridik va jismoniy shaxslar yer uchastkasi berish toʻgʻrisidagi qarorni olgandan keyin loyiha tashkilotiga loyihalashtirishga topshiriq beradi va loyiha-smeta hujjatlarini tayyorlash yuzasidan shartnoma tuzadi.

Loyiha tashkiloti tomonidan loyiha-smeta hujjatlarini ishlab chiqish yuridik (jismoniy) shaxs va loyiha tashkiloti oʻrtasida tuzilgan shartnomada nazarda tutilgan muddatlarda amalga oshiriladi.

Yuridik (jismoniy) shaxs va loyiha tashkiloti oʻrtasida tuzilgan shartnomaning majburiy shartlari loyiha tashkilotining quyidagilarni taʼminlash boʻyicha majburiyati hisoblanadi:

obyektning loyihadagi quvvatiga muvofiq texnik shartlarini olish;

geologik xulosa tayyorlash;

loyiha-smeta hujjatlarini Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalari huzuridagi Arxitektura-shaharsozlik kengashi (keyingi oʻrinlarda Arxitektura-shaharsozlik kengashi deb ataladi) bilan kelishish;

loyiha-smeta hujjatlari boʻyicha obyektning yongʻinga qarshi xavfsizligi va zilzilaga bardoshliligi boʻyicha davlat ekspertiza organlarining ijobiy xulosasini olish.

4. Loyiha-smeta hujjatlarini ishlab chiqish boʻyicha ishlar tugallangandan keyin loyiha tashkiloti uni yuridik va jismoniy shaxslarga tanlov hujjatlari tarkibida berilgan yer uchastkasidan doimiy foydalanish huquqini amalga oshirish boʻyicha loyiha-smeta hujjatlarining shaharsozlik topshirigʻiga muvofiqligini kelishish uchun Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalariga beradi.

Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalari tomonidan bevosita yuridik va jismoniy shaxslardan loyiha-smeta hujjatlarini qabul qilish, shuningdek ularni kelishish jarayoniga jalb etish taqiqlanadi.

5. Loyiha-smeta hujjatlarini Arxitektura-shaharsozlik kengashi bilan kelishish toʻlovlar undirmasdan, loyiha tashkilotining murojaati tushgan kundan boshlab yetti kun mobaynida amalga oshiriladi, ushbu Nizomning 6-bandida nazarda tutilgan holatlar bundan mustasno.

6. Amaldagi muhandislik tarmoqlarini oʻzgartirish talab qilinmaydigan kichik oʻlchamdagi (300 kub metrdan ortiq boʻlmagan) alohida qurilayotgan obyektlarning loyiha-smeta hujjatlarini kelishish Qoraqalpogʻiston Respublikasi Arxitektura va qurilish davlat qoʻmitasi, viloyatlar va Toshkent shahri arxitektura va qurilish bosh boshqarmalari rahbarlari tomonidan ikki kun muddatda, toʻlovlar undirmasdan amalga oshiriladi.

7. Arxitektura-shaharsozlik kengashi ushbu Nizomning 2-ilovasiga muvofiq namunaviy tarkib asosida Qoraqalpogʻiston Respublikasi Vazirlar Kengashining, viloyatlar va Toshkent shahri hokimlarining qarorlari bilan shakllantiriladi hamda oʻz faoliyatini doimiy asosda amalga oshiradi.

Kengash majlislari har haftada hozir boʻlish tartibida oʻtkaziladi.

Kengash aʼzosi Arxitektura-shaharsozlik kengashi majlisiga kelmagan taqdirda majlis uning ishtirokisiz oʻtkaziladi va obyektning loyiha-smeta hujjatlari majlisga kelmagan kengash aʼzosining tashkiloti bilan kelishilgan deb hisoblanadi, ushbu bandning oltinchi xatboshida nazarda tutilgan holatlar bundan mustasno.

Bunda majlisga kelmagan kengash aʼzosi vakolatiga kiradigan masalalar boʻyicha javobgarlik tegishli tashkilotga yuklanadi.

Loyiha-smeta hujjatlarini Arxitektura-shaharsozlik kengashi aʼzolari bilan soʻrov yoʻli bilan kelishish taqiqlanadi.

Tanlov komissiyasining qarori, agar uning majlisida uning aʼzolarining yarmidan koʻpi ishtirok etgan boʻlsa qonuniy huquqqa ega hisoblanadi.

8. Arxitektura-shaharsozlik kengashi bilan kelishilgan loyiha-smeta hujjatlari loyiha tashkiloti tomonidan barcha zarur hujjatlar paketi taqdim etilgan kundan boshlab yetti kun mobaynida davlat ekspertiza organlariga obyektning yongʻinga qarshi xavfsizligi va zilzilaga bardoshliligi boʻyicha ekspertizadan oʻtadi.

Loyiha-smeta hujjatlarini obyektning yongʻinga qarshi xavfsizligi va zilzilaga bardoshliligi boʻyicha davlat ekspertizasidan oʻtkazilganligi uchun Oʻzbekiston Respublikasi Vazirlar Mahkamasi tomonidan belgilangan miqdorda toʻlov undiriladi.

Loyiha-smeta hujjatlarining boshqa boʻlimlarini ekspertiza qilish qonun hujjatlarida belgilangan tartibda yuridik va jismoniy shaxslarning xohishiga koʻra amalga oshiriladi.

9. Amaldagi muhandislik tarmoqlarini oʻzgartirish talab qilinmaydigan kichik oʻlchamdagi (300 kub metrdan ortiq boʻlmagan) alohida qurilayotgan obyektlarning loyiha-smeta hujjatlarini davlat ekspertizasidan oʻtkazish talab qilinmaydi.

III. Qurilish-montaj ishlarini amalga oshirishga ruxsatnoma berish tartibi

10. Yuridik va jismoniy shaxslar kelishilgan loyiha-smeta hujjatlarini olgandan keyin qurilish-montaj ishlarini amalga oshirishga ruxsatnoma olish uchun belgilangan tartibda Davlat xizmatlari markaziga (keyingi oʻrinlarda “markaz” deb ataladi) qonun hujjatlarida belgilangan shakl boʻyicha davlat xizmatlari koʻrsatishga ariza beradi.

Arizaga ushbu Nizomning 3-ilovasiga muvofiq shakl boʻyicha qurilish obyekti toʻgʻrisidagi maʼlumotlar hamda yuridik va jismoniy shaxslar tomonidan namunaviy shartnoma asosida rasmiylashtirilgan (imzolangan) inspeksiya tomonidan nazorat funksiyalarini amalga oshirish yuzasidan shartnomani ilova qiladi.

Namunaviy shartnomaning shakli Oʻzbekiston Respublikasi Arxitektura va qurilish davlat qoʻmitasi tomonidan belgilangan tartibda tasdiqlanadi va Qoʻmitaning rasmiy veb-saytiga joylashtiriladi.

11. Markaz bir ish kuni mobaynida Oʻzbekiston Respublikasi Arxitektura va qurilish davlat qoʻmitasining davlat arxitektura-qurilish nazorati hududiy inspeksiyalariga (keyingi oʻrinlarda inspeksiyalar deb ataladi) ushbu Nizomning 10-bandida koʻrsatilgan hujjatlarni yuboradi.

12. Inspeksiya markazdan hujjatlar tushgan kundan boshlab bir ish kuni mobaynida qurilish-montaj ishlarini amalga oshirishga ruxsatnoma berish yoki berishni rad etish toʻgʻrisida qaror qabul qiladi.

13. Qurilish-montaj ishlarini amalga oshirishga ruxsatnoma berish toʻgʻrisidagi qaror qabul qilingan taqdirda inspeksiya:

markazga inspeksiya tomonidan rasmiylashtirilgan (imzolangan) nazorat funksiyalarini amalga oshirish yuzasidan shartnomaning bir nusxasini ilova qilgan holda qurilish-montaj ishlarini amalga oshirishga ruxsatnoma beradi;

Oʻzbekiston Respublikasi Arxitektura va qurilish davlat qoʻmitasi rasmiy veb-saytining maxsus boʻlimida qabul qilingan qaror toʻgʻrisidagi axborotni eʼlon qiladi.

14. Markaz qurilish-montaj ishlarini amalga oshirishga ruxsatnoma va inspeksiya tomonidan nazorat funksiyalarini amalga oshirish yuzasidan shartnomani olgandan keyin belgilangan tartibda ularning yuridik va jismoniy shaxslarga berilishini taʼminlaydi.

15. Qurilish-montaj ishlarini amalga oshirishga ruxsatnoma berish toʻgʻrisidagi qaror va inspeksiya tomonidan nazorat funksiyalarini amalga oshirishga shartnomaning eʼlon qilinishi yuridik va jismoniy shaxslar tomonidan qurilish-montaj ishlarini amalga oshirishni boshlash uchun asos hisoblanadi.

16. Inspeksiya:

yuridik va jismoniy shaxslar tomonidan maʼlumotlar shakllari toʻliq hajmda toʻldirilmaganda;

taqdim etilgan hujjatlarda ishonchsiz va notoʻgʻri maʼlumotlar mavjud boʻlganda qurilish-montaj ishlarini amalga oshirishga ruxsatnoma berishni rad etadi.

Boshqa asoslar, shu jumladan maqsadga muvofiq emasligi sabablari boʻyicha qurilish-montaj ishlarini amalga oshirishga ruxsatnoma berishni rad etishga yoʻl qoʻyilmaydi.

17. Inspeksiya tomonidan qurilish-montaj ishlarini amalga oshirishga ruxsatnoma berishni rad etish toʻgʻrisidagi qaror qabul qilingan taqdirda qaror yozma shaklda markazga yuboriladi hamda rad etish sabablari, qonunchilikning aniq normalari koʻrsatilgan holda Oʻzbekiston Respublikasi Arxitektura va qurilish davlat qoʻmitasi rasmiy veb-saytining maxsus boʻlimida eʼlon qilinadi.

Yuridik va jismoniy shaxslar tomonidan aniqlangan kamchiliklar bartaraf etilgandan keyin ular takroran murojaat qilganda qurilish-montaj ishlarini amalga oshirishga ruxsatnoma berish bir ish kuni mobaynida amalga oshiriladi.

Qurilish-montaj ishlarini amalga oshirishga ruxsatnoma berish toʻgʻrisidagi murojaatni takroran koʻrib chiqishda ruxsatnoma berishni rad etish toʻgʻrisidagi xabarnomada ilgari koʻrsatilmagan yangi asoslar boʻyicha ruxsatnoma berishni rad etishga yoʻl qoʻyilmaydi.

Qurilish-montaj ishlarini amalga oshirishga ruxsatnoma berishni rad etish yuzasidan qonun hujjatlarida belgilangan tartibda shikoyat qilinishi mumkin.

18. Qurilish-montaj ishlarini amalga oshirishga ruxsatnoma ushbu Nizomning 4-ilovasiga muvofiq shakl boʻyicha butun qurilish davrida amal qilish muddati cheklovsiz beriladi.

19. Amaldagi muhandislik tarmoqlarini oʻzgartirish talab qilinmaydigan kichik oʻlchamdagi (300 kub metrdan ortiq boʻlmagan) alohida qurilayotgan obyektlarga qurilish-montaj ishlarini amalga oshirishga ruxsatnoma talab etilmaydi.

20. Qurilish-montaj ishlarini amalga oshirishga ruxsatnoma berilgan obyektlarda inspeksiya tomonidan qurilish-montaj ishlarini amalga oshirishda qonun hujjatlarida belgilangan tartibda shaharsozlik normalari va qoidalariga rioya qilinishi yuzasidan tanlov nazorati belgilanadi.

Inspeksiya tomonidan nazorat funksiyalari amalga oshirilganligi uchun qonun hujjatlarida belgilangan tartibda toʻlov undiriladi.

21. Ruxsatnoma berishga asos boʻlgan shartlarda oʻzgartirishlar boʻlgan taqdirda (obyektda ish bajaruvchilarning, texnik va mualliflik nazoratini amalga oshiruvchi shaxslarning almashishi, litsenziyaning amal qilish muddatining tugashi, loyiha yechimlaridagi jiddiy oʻzgarishlar) yuridik va jismoniy shaxslar oʻn kun mobaynida inspeksiyaga tegishli oʻzgartirishlarni tasdiqlaydigan hujjatlarni taqdim etishi kerak.

22. Inspeksiyalar tomonidan hujjatlarni bevosita yuridik va jismoniy shaxslardan qurilish-montaj ishlarini amalga oshirishga ruxsatnoma olish uchun qabul qilish taqiqlanadi, ushbu Nizomning 21-bandida nazarda tutilgan holatlar bundan mustasno.

IV. Obyektlarni foydalanishga qabul qilish tartibi

23. Obyektni qurish qurilish pudrat shartnomasi tuzilgan qurilish pudrat tashkilotlari tomonidan yoxud yuridik va jismoniy shaxslarning oʻz kuchi bilan amalga oshiriladi.

24. Obyekt qurilishi qurilish pudrat tashkiloti tomonidan amalga oshirilayotgan taqdirda yuridik yoki jismoniy shaxslar va qurilish pudrat tashkilotlari oʻrtasidagi shartnomaning majburiy shartlari quyidagi qurilish pudrat tashkilotining majburiyati hisoblanadi:

shaharsozlik normalari va qoidalariga rioya qilish;

qurilishi tugallangan obyektni qabul komissiyasi tomonidan belgilangan tartibda qabul qilishni tashkil etishni taʼminlash.

Qabul qilishda aniqlangan kamchiliklar qurilish pudrat tashkilotlari tomonidan oʻz hisobidan amalga oshiriladi.

25. Qurilish pudrat tashkiloti, shuningdek yuridik va jismoniy shaxslar — oʻz kuchi bilan qurilishni amalga oshirgan taqdirda qurilish tugallangandan keyin yetti kun mobaynida “OʻzGAShKLITI” davlat unitar korxonasi tomonidan binolar va inshootlar, yer osti muhandislik kommunikatsiyalarining raqamli ijro tasviri amalga oshirilishini taʼminlaydi.

Ijro tasvirlari amalga oshirilganligi uchun eng kam ish haqining ikki baravari miqdorida toʻlov undiriladi.

Ijro tasviri (ilova qilinadigan yer uchastkasi chegaralari koordinatlari katalogi bilan) obyektni ishga tushirish uchun ijro qurilish hujjatlari tarkibiga kiradi.

26. Binolar va inshootlar, yer osti muhandislik kommunikatsiyalari raqamli ijro tasviri olingandan keyin qurilish pudrat tashkiloti, shuningdek yuridik va jismoniy shaxslar — oʻz kuchi bilan qurilishni amalga oshirgan taqdirda qurilishi tugallangan obyektni foydalanishga qabul qilish uchun tuman (shahar) hokimining nomiga ariza beradi.

Qurilishi tugallangan obyektni qabul qilish ushbu Nizomning 5-ilovasiga muvofiq namunaviy tarkibga asosan tuman (shahar) hokimining qarori bilan shakllantiriladigan qurilishi tugallangan obyektlarni foydalanishga qabul qilish boʻyicha doimiy faoliyat yuritadigan komissiya (keyingi oʻrinlarda qabul komissiyasi deb ataladi) tomonidan amalga oshiriladi.

27. Tuman (shahar) hokimi bir ish kuni mobaynida arizani qurilishi tugallangan obyektni foydalanishga qabul qilish boʻyicha ishlarni tashkil etish uchun qabul komissiyasi raisiga yuboradi.

28. Qabul komissiyasi raisi bir ish kuni mobaynida qabul komissiyasi aʼzolarini qurilishi tugallangan obyektni foydalanishga qabul qilish sanasi toʻgʻrisida xabardor qiladi.

29. Qurilishi tugallangan obyektni foydalanishga qabul qilish qabul komissiyasi raisi tomonidan uning aʼzolarini xabardor qilgan kundan boshlab 5 kun mobaynida amalga oshiriladi hamda qabul komissiyasi raisi va aʼzolari tomonidan qabul qilish amalga oshirilgan kunda imzolangan qabul qilish toʻgʻrisidagi dalolatnoma rasmiylashtiriladi.

Qabul komissiyasi aʼzosi kelmagan taqdirda qurilishi tugallangan obyektni foydalanishga qabul qilish uning ishtirokisiz amalga oshiriladi hamda komissiyaning dalolatnomasi qabul qilishda ishtirok etmagan qabul komissiyasi aʼzosining tashkiloti bilan kelishilgan deb hisoblanadi, ushbu bandning uchinchi xatboshida nazarda tutilgan holatlar bundan mustasno.

Qabul komissiyasining qarori, agar uning majlisida aʼzolarning yarmidan koʻpi ishtirok etgan boʻlsa, qonuniy huquqqa ega hisoblanadi.

Komissiyaning qurilishi tugallangan obyektni foydalanishga qabul qilish toʻgʻrisidagi dalolatnomasini soʻrov yoʻli bilan kelishish taqiqlanadi.

Qurilishi tugallangan obyektni foydalanishga qabul qilganlik uchun toʻlov undirilmaydi.

30. Agar obyektlarni foydalanishga qabul qilishda qabul komissiyasi aʼzolari tomonidan texnik shartlar, loyiha-smeta hujjatlari, shuningdek shaharsozlik normalari va qoidalaridan chetga chiqish aniqlangan taqdirda qabul qilish dalolatnomasini rasmiylashtirish ushbu Nizomda nazarda tutilgan tartibda aniqlangan chetga chiqishlar bartaraf etilgandan keyin amalga oshiriladi.

31. Qurilishi tugallangan obyektni foydalanishga qabul qilish ishlari tugallangandan keyin qabul komissiyasi raisi bir kun muddatda qabul qilish dalolatnomasini tuman (shahar) hokimi koʻrib chiqishi uchun uni tasdiqlash toʻgʻrisida qaror qabul qilish uchun kiritadi.

32. Tuman (shahar) hokimi ikki kun muddatda komissiyaning qurilishi tugallangan obyektni foydalanishga qabul qilish toʻgʻrisidagi dalolatnomasini tasdiqlash toʻgʻrisida qaror qabul qiladi.

Bunda komissiyaning qurilishi tugallangan obyektni foydalanishga qabul qilish toʻgʻrisidagi dalolatnomasini tasdiqlash toʻgʻrisida qarori qabul qilish haqidagi ariza tushgan kundan boshlab 10 kundan kechikmay qabul qilinadi.

33. Tuman (shahar) hokimining komissiyaning qurilishi tugallangan obyektni foydalanishga qabul qilish toʻgʻrisidagi dalolatnomasini tasdiqlash toʻgʻrisida qarori Qoraqalpogʻiston Respublikasi, viloyatlar va Toshkent shahri yer tuzish va koʻchmas mulk kadastri davlat korxonasining tegishli tuman (shahar)dagi filiali tomonidan obyektga boʻlgan huquqni davlat roʻyxatidan oʻtkazish uchun asos hisoblanadi.

V. Yakunlovchi qoidalar

34. Qurilish-montaj ishlarini qurilish-montaj ishlarini amalga oshirishga ruxsatnoma olmasdan amalga oshirish taqiqlanadi.

35. Ushbu Nizom talablari buzilishida aybdor boʻlgan shaxslar belgilangan tartibda javob beradilar.

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibi toʻgʻrisidagi nizomga 1-ILOVA

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish

SXEMASI

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibi toʻgʻrisidagi nizomga 2-ILOVA

Qoraqalpogʻiston Respublikasi Davlat arxitektura va qurilish qoʻmitasi, viloyatlar va Toshkent shahri arxitektura va qurilish bosh boshqarmalari huzuridagi Arxitektura-shaharsozlik kengashining

Namunaviy tarkibi

Lavozimiga koʻra — Qoraqalpogʻiston Respublikasi Davlat arxitektura va qurilish qoʻmitasining raisi, viloyat yoki Toshkent shahri shahar arxitektura va qurilish bosh boshqarmasining boshligʻi, Arxitektura-shaharsozlik kengashining raisi Lavozimiga koʻra — “Yergeodezkadastr” davlat qoʻmitasi hududiy boʻlinmasining rahbari Lavozimiga koʻra — “OʻzGAShKLITI” DUK loyiha-qidiruv tashkiloti vakilligining rahbari Lavozimiga koʻra — hududiy gaz taʼminoti tashkilotining rahbari Lavozimiga koʻra — hududiy elektr tarmoqlari korxonasining rahbari Lavozimiga koʻra — hududiy suv-oqova xoʻjaligi tashkilotining rahbari Lavozimiga koʻra — hududiy issiqlik taʼminoti korxonasining rahbari Lavozimiga koʻra — Savdo-sanoat palatasi hududiy boʻlinmasining rahbari Lavozimiga koʻra — Oʻzbekiston Arxitektorlar uyushmasi aʼzolari (mavjud boʻlganda) Lavozimiga koʻra — shahar va tuman aholi punktlarini rejalashtirish va qurish boʻlimi boshligʻi, tanlov komissiyasi kotibi

Izohlar:

1. Arxitektura-shaharsozlik kengashining shaxsiy tarkibi Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimlarining qarori bilan tasdiqlanadi.

2. Arxitektura-shaharsozlik kengashi tarkibiga lavozimiga koʻra tumanlar (shaharlar) arxitektura va qurilish boʻlimlari (boshqarmalari) boshliqlari kiradi.

3. Arxitektura-shaharsozlik kengashi aʼzolari boshqa ishga oʻtgan taqdirda kengash tarkibiga ushbu lavozimlarga yangidan tayinlangan shaxslar yoxud zimmasiga tegishli funksiyalar yuklangan shaxslar kiritiladi.

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibi toʻgʻrisidagi nizomga 3-ILOVA

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibi toʻgʻrisidagi nizomga 4-ILOVA

Izoh: qurilish pudrat tashkilotini jalb etmasdan amalga oshirilgan taqdirda yulduzcha (*) bilan belgilangan ustunlar toʻldirilmaydi.

Tanlov asosida berilgan yer uchastkalaridagi obyektlarning loyiha-smeta hujjatlarini kelishish, qurilish-montaj ishlarini bajarishga ruxsatnoma berish, shuningdek obyektlarni foydalanishga qabul qilish tartibi toʻgʻrisidagi nizomga 5-ILOVA

Qurilishi tugallangan obyektlarni foydalanishga qabul qilish komissiyasining

namunaviy tarkibi

Lavozimiga koʻra — tuman (shahar) hokimining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosari, qabul komissiyasining raisi Lavozimiga koʻra — tuman (shahar) arxitektura va qurilish boʻlimi (boshqarmasi) rahbari Lavozimiga koʻra — hududiy davlat sanitariya nazorati organining rahbari Lavozimiga koʻra — hududiy davlat yongʻin nazorati organining rahbari Lavozimiga koʻra — hududiy davlat tabiatni muhofaza qilish organining rahbari Lavozimiga koʻra — hududiy gaz taʼminoti tashkilotining rahbari Lavozimiga koʻra — hududiy elektr tarmoqlari korxonasining rahbari Lavozimiga koʻra — hududiy suv-oqova xoʻjaligi tashkilotining rahbari Lavozimiga koʻra — hududiy issiqlik taʼminoti korxonasining rahbari (zarur boʻlganda) Lavozimiga koʻra — loyihalash tashkilotining rahbari Lavozimiga koʻra — pudrat tashkilotining rahbari (mavjud boʻlganda) Lavozimiga koʻra — Savdo-sanoat palatasi hududiy boʻlinmasining rahbari Lavozimiga koʻra — hududiy davlat arxitektura-qurilish nazorati inspeksiyasining inspektori

Izohlar:

1. Qurilishi tugallangan obyektlarni foydalanishga qabul qilish komissiyasining shaxsiy tarkibi tuman (shahar) hokimining qarori bilan tasdiqlanadi.

2. Qabul komissiyasi aʼzolari boshqa ishga oʻtgan taqdirda komissiya tarkibiga ushbu lavozimlarga yangidan tayinlangan shaxslar yoxud zimmasiga tegishli funksiyalar yuklangan shaxslar kiritiladi.

Vazirlar Mahkamasining 2015-yil 7-oktabrdagi 285-son qaroriga 3-ILOVA

Oʻzbekiston Respublikasi Hukumatining oʻz kuchini yoʻqotgan qarorlari

roʻyxati

1. Vazirlar Mahkamasining “Tadbirkorlik faoliyatini amalga oshirish uchun yuridik va jismoniy shaxslarga tanlov asosida yer uchastkalari berishni takomillashtirishga doir qoʻshimcha chora-tadbirlar toʻgʻrisida” 2011-yil 25-maydagi 147-son qarori (Oʻzbekiston Respublikasi QT, 2011-y., 5-son, 41-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Kichik biznes va xususiy tadbirkorlikni yanada rivojlantirish uchun qulay ishbilarmonlik muhitini shakllantirishga doir qoʻshimcha chora-tadbirlar toʻgʻrisida” 2011-yil 24-avgustdagi PF-4354-son Farmoni, Oʻzbekiston Respublikasi Prezidentining “Byurokratik toʻsiqlarni bartaraf etish va tadbirkorlik faoliyati erkinligini yanada oshirish chora-tadbirlari toʻgʻrisida” 2011-yil 25-avgustdagi PQ-1604-son qarori)” 2011-yil 2-noyabrdagi 294-son qaroriga (Oʻzbekiston Respublikasi QT, 2011-y., 11-son, 85-modda) ilovaning 33-bandi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga qoʻshimchalar kiritish toʻgʻrisida (Oʻzbekiston Respublikasi Prezidentining “Angren” maxsus industrial zonasini barpo etish toʻgʻrisida” 2012-yil 13-apreldagi PF-4436-son Farmoni)” 2012-yil 29-maydagi 149-son qaroriga (Oʻzbekiston Respublikasi QT, 2012-y., 5-son, 37-modda) ilovaning 5-bandi.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (“Tadbirkorlik faoliyati erkinligining kafolatlari toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” Oʻzbekiston Respublikasining 2012-yil 2-maydagi OʻRQ-328-son Qonuni)” 2012-yil 12-sentabrdagi 266-son qaroriga (Oʻzbekiston Respublikasi QT, 2012-y., 9-son, 65-modda) ilovaning 3-bandi.

5. Vazirlar Mahkamasining “Oʻzbekiston Respublikasi Yagona qurilish reglamenti tizimini shakllantirish toʻgʻrisida” 2013-yil 20-avgustdagi 229-son qaroriga (Oʻzbekiston Respublikasi QT, 2013-y., 8-son, 59-modda) 3-ilovaning 10-bandi va 14-bandining oltinchi xatboshi.

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasini tashkil etish toʻgʻrisida” 2012-yil 13-noyabrdagi PF-4483-son Farmoni)” 2013-yil 9-sentabrdagi 244-son qaroriga (Oʻzbekiston Respublikasi QT, 2013-y., 9-son, 64-modda) 1-ilovaning 83-bandi.

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Vazirlar Mahkamasining “Oʻzbekiston Respublikasi Yagona qurilish reglamenti tizimini shakllantirish toʻgʻrisida” 2013-yil 20-avgustdagi 229-son qarori)” 2013-yil 24-oktabrdagi 288-son qaroriga (Oʻzbekiston Respublikasi QT, 2013-y., 10-son, 77-modda) ilovaning 2-bandi.

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Vazirlar Mahkamasining “Koʻchmas mulkka boʻlgan huquqlarni davlat roʻyxatidan oʻtkazish tartibini takomillashtirish toʻgʻrisida” 2014-yil 7-yanvardagi 1-son qarori)” 2014-yil 3-iyundagi 138-son qaroriga (Oʻzbekiston Respublikasi QT, 2014-y., 6-son, 56-modda) ilovaning 15-bandi.