Yoʻl harakati qoidalarining buzilishiga doir maʼmuriy ishlarni koʻrib chiqish tartibi toʻgʻrisidagi yoʻriqnomaga oʻzgartish va qoʻshimchalar kiritish haqida (2240-1-son)
07.10.2015
Oʻzbekiston Respublikasi Ichki ishlar vazirining
buyrugʻi
[Oʻzbekiston Respublikasi Adliya vazirligi tomonidan 2015-yil 7-oktabrda 2240-1-son bilan davlat roʻyxatidan oʻtkazilgan]
Oʻzbekiston Respublikasining 2015-yil 10-avgustdagi OʻRQ-389-son “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuniga muvofiq buyuraman:
1. Oʻzbekiston Respublikasi ichki ishlar vazirining 2011-yil 31-maydagi 68-son buyrugʻi (roʻyxat raqami 2240, 2011-yil 5-iyul) (Oʻzbekiston Respublikasi qonun hujjatlari toʻplami, 2011-y., 27-son, 286-modda) bilan tasdiqlangan Yoʻl harakati qoidalarining buzilishiga doir maʼmuriy ishlarni koʻrib chiqish tartibi toʻgʻrisidagi yoʻriqnomaga ilovaga muvofiq oʻzgartish va qoʻshimchalar kiritilsin.
2. Mazkur buyruq rasmiy eʼlon qilingan kundan eʼtiboran kuchga kiradi.
Vazir A. AXMEDBAYEV
Toshkent sh.,
2015-yil 3-sentabr,
155-son
Oʻzbekiston Respublikasi ichki ishlar vazirining 2015-yil 3-sentabrdagi 155-son buyrugʻiga ILOVA
Yoʻl harakati qoidalarining buzilishiga doir maʼmuriy ishlarni koʻrib chiqish tartibi toʻgʻrisidagi yoʻriqnomaga kiritilayotgan oʻzgartish va qoʻshimchalar
1. 5-band quyidagi tahrirda bayon etilsin:
“5. Qoidalarni buzgan haydovchilarga nisbatan Davlat yoʻl harakati xavfsizligi xizmati (keyingi oʻrinlarda DYHXX deb yuritiladi) xodimi huquqbuzarlik sodir etilgan joyning oʻzida mazkur Yoʻriqnomaning 1-ilovasiga muvofiq shaklda Yoʻl harakati qoidalari buzilganligi haqida bayonnoma (keyingi oʻrinlarda maʼmuriy bayonnoma deb yuritiladi) rasmiylashtiradi, bundan maxsus avtomatlashtirilgan foto va video qayd etish texnika vositalari orqali qayd etilgan maʼmuriy huquqbuzarlikni rasmiylashtirish mustasno.
Maʼmuriy huquqbuzarlik maxsus avtomatlashtirilgan foto va video qayd etish texnika vositalari orqali qayd etilgan taqdirda maʼmuriy bayonnoma belgilangan tezlikni oshirish va svetoforning taqiqlovchi ishorasiga boʻysunmaslik boʻyicha rasmiylashtirilmaydi.
Qoidalarni buzgan haydovchilardan joyida jarima olish qatʼiyan man etiladi.
Maʼmuriy huquqbuzarlik maxsus avtomatlashtirilgan foto va video qayd etish texnika vositalari orqali qayd etilgan taqdirda maʼmuriy javobgarlikka transport vositasining mulkdori, yuridik shaxsga tegishli transport vositalaridan foydalanib sodir etilgan maʼmuriy huquqbuzarlik qayd etilgan taqdirda yuridik shaxsning transport vositalaridan foydalanish uchun masʼul boʻlgan shaxsi tortiladi.”.
2. 6-band quyidagi tahrirda bayon etilsin:
“6. Qoidalarning buzilishi toʻgʻrisidagi ishlar yuzasidan Kodeksning 138-moddasi birinchi, ikkinchi va uchinchi qismlarida nazarda tutilgan hollarda (piyodalarning maʼmuriy huquqbuzarliklari) maʼmuriy bayonnoma tuzilmaydi.
Huquqbuzar piyodaga mazkur Yoʻriqnomaning 2-ilovasiga muvofiq shaklda jarima toʻlaganligi toʻgʻrisida kvitansiya beriladi.
Huquqbuzar piyoda oʻziga solinadigan jarimaga eʼtiroz bildirsa yoki joyida jarima toʻlashga imkoni boʻlmaganda maʼmuriy bayonnoma rasmiylashtiriladi va unga bu haqda yozib qoʻyiladi.”.
3. Quyidagi mazmundagi 61-band bilan toʻldirilsin:
“61. Maʼmuriy huquqbuzarlik maxsus avtomatlashtirilgan foto va video qayd etish texnika vositalari orqali qayd etilgan taqdirda maʼmuriy bayonnoma rasmiylashtirilmasdan huquqbuzarlik sodir etgan shaxsning ishtirokisiz mazkur Yoʻriqnomaning 11-ilovasiga muvofiq shakldagi jarima solish toʻgʻrisidagi qaror chiqariladi.
Jarima solish toʻgʻrisidagi qaror maxsus avtomatlashtirilgan foto va video qayd etish texnika vositalari qoʻllanilgan holda olingan materiallar ilova qilinib, yuridik kuchga ega boʻlgan elektron hujjat shaklida rasmiylashtiriladi hamda uni tuzgan vakolatli shaxsning elektron raqamli imzosi bilan tasdiqlanadi. Jarima solish toʻgʻrisidagi qarorning koʻchirma nusxasi maxsus avtomatlashtirilgan foto va video qayd etish texnika vositalari qoʻllanilgan holda olingan materiallar ilova qilinib, elektron hujjatni qogʻozdagi hujjatga aylantirish yoʻli bilan tayyorlanadi hamda mazkur qaror chiqarilgan kundan eʼtiboran uch kun ichida buyurtma pochta joʻnatmasi tarzida huquqbuzarga yuboriladi.
Unda quyidagilar koʻrsatilgan boʻlishi kerak:
qaror chiqarilgan sana va joy, uni chiqargan organning nomi, shaxsning lavozimi va familiyasi, maʼmuriy javobgarlikka tortilayotgan shaxs toʻgʻrisidagi maʼlumotlar, maʼmuriy huquqbuzarlik sodir etilgan vaqt, joy va holatlar, Kodeks Maxsus qismining mazkur huquqbuzarlik uchun javobgarlikni nazarda tutuvchi moddasi, moddasining qismi koʻrsatilgan holda, maxsus avtomatlashtirilgan foto va video qayd etish texnika vositalari bilan qayd etilgan transport vositasining huquqbuzarlik sodir etilgan paytdagi davlat raqam belgisi bilan tushirilgan tasviri, qabul qilingan qaror, tayinlangan jarimani toʻlash tartibi va muddatlari, maʼmuriy javobgarlikka tortilayotgan shaxsning huquq va majburiyatlari, shuningdek jarima solish toʻgʻrisidagi qaror xususida shikoyat berishning protsessual tartibi.”.
4. 8-bandning birinchi xatboshisi “maxsus uskunalar” degan soʻzlardan keyin “hamda maxsus avtomatlashtirilgan foto va video qayd etish texnika vositalari” degan soʻzlar bilan toʻldirilsin.
5. 17-bandning birinchi xatboshisi quyidagi tahrirda bayon etilsin:
“Kodeksning 290-moddasiga koʻra sodir etilgan huquqbuzarlik uchun Kodeksga muvofiq transport vositasini boshqarish huquqidan mahrum etish tarzida maʼmuriy jazo qoʻllanilishi mumkin boʻlsa, transport vositasini boshqarish huquqini beruvchi haydovchilik guvohnomasi olib qoʻyiladi va bu haqda maʼmuriy bayonnomaga, shuningdek talonga yozib qoʻyilib, talon huquqbuzarga qaytarib beriladi.”.
6. 22-banddagi “jarima kvitansiyalarining” degan soʻzlar “jarima kvitansiyalari hamda maxsus avtomatlashtirilgan foto va video qayd etish texnika vositalari orqali qayd etilgan yoʻl harakati qoidalarini buzilishi yuzasidan chiqarilgan jarima solish toʻgʻrisidagi qarorlarning” degan soʻzlar bilan almashtirilsin.
7. 33-banddagi “1283-moddasining birinchi va ikkinchi qismlarida,” degan soʻzlar “1283-moddasining birinchi, ikkinchi va uchinchi qismlarida,” degan soʻzlar bilan almashtirilsin.
8. Quyidagi mazmundagi 331-band bilan toʻldirilsin:
“331. Maxsus avtomatlashtirilgan foto va video qayd etish texnika vositalari orqali maʼmuriy huquqbuzarlik qayd etilgan taqdirda huquqbuzarlikning takroriyligi inobatga olinmasdan jarima solish toʻgʻrisidagi qaror chiqariladi.”.
9. 34-bandning birinchi xatboshisidagi “1283-moddasining birinchi va ikkinchi qismlarida,” degan soʻzlar “1283-moddasining birinchi, ikkinchi va uchinchi qismlarida,” degan soʻzlar bilan almashtirilsin.
10. 35-bandning birinchi xatboshisidagi “1283-moddasining birinchi qismida,” degan soʻzlar “1283-moddasining birinchi, ikkinchi va uchinchi qismlarida, 1284-moddasining birinchi qismida,” degan soʻzlar bilan almashtirilsin.
11. 36-bandda:
birinchi xatboshidagi “126, 131, 135, 1351-moddalarida,” degan soʻzlar “126-moddasida, 127-moddasining ikkinchi qismida, 1286-moddasida (agar transport vositasining haydovchisi boʻlmasa va toʻxtash yoki toʻxtab turish qoidalarining buzilishi yoʻl harakati ishtirokchilarining harakatlanishiga xalaqit bersa), 131, 135, 1351-moddalarida,” degan soʻzlar bilan almashtirilsin;
quyidagi mazmundagi toʻrtinchi-beshinchi xatboshilar bilan toʻldirilsin:
“Jarima solish toʻgʻrisida qaror chiqargan vakolatli organ rahbari maxsus avtomatlashtirilgan foto va video qayd etish texnika vositalari orqali qayd etilgan yoʻl harakati qoidalarining buzilishlari boʻyicha jarima solish toʻgʻrisidagi qaror chiqarilgan kundan eʼtiboran oltmish kun oʻtgach jarima solish toʻgʻrisidagi qarorning ijrosi yuzasidan ish yuritish tugaguniga qadar transport vositalarini ushlab turish toʻgʻrisida yozma koʻrsatma beradi va bu haqda DYHXX safdagi Yoʻl-patrul xizmati boʻlim-boʻlinmalari shaxsiy tarkibi eʼtiboriga yetkaziladi.
Transport vositasi ushlangan taqdirda faqat mazkur Yoʻriqnomaning 8-ilovasiga muvofiq shakldagi dalolatnoma tuziladi hamda jarima solish toʻgʻrisidagi qaror ijrosi yuzasidan ish yuritish tugaguniga qadar toʻxtash joyida ushlab turiladi. Dalolatnoma uch nusxada tuzilib, birinchi nusxasi transport vositasini toʻxtash joyida saqlash uchun masʼul boʻlgan shaxsda qoldiriladi, ikkinchi nusxasi DYHXX xodimida qoladi, uchinchi nusxasi huquqbuzarga beriladi.”;
toʻrtinchi-beshinchi xatboshilar tegishincha oltinchi-yettinchi xatboshilar deb hisoblansin;
yettinchi xatboshi “maʼmuriy bayonnomaga” degan soʻzlardan keyin “(jarima solish toʻgʻrisidagi qarorga)” degan soʻzlar bilan toʻldirilsin.
12. 39-band quyidagi mazmundagi ikkinchi xatboshi bilan toʻldirilsin:
“Bu holatlar quyidagi vositalar: maʼmuriy huquqbuzarlik toʻgʻrisidagi bayonnoma, maʼmuriy javobgarlikka tortilayotgan shaxsning tushuntirishlari, jabrlanuvchi, guvohlarning koʻrsatuvlari, ekspert xulosasi, ashyoviy dalillar, ashyo va hujjatlarni olib qoʻyish toʻgʻrisida tuzilgan bayonnoma, ovozli yozuvlar, videoyozuvlar, kinotasvir va fotosuratlardan iborat materiallar, shuningdek boshqa materiallar bilan belgilanadi.”;
ikkinchi-uchinchi xatboshilar tegishincha uchinchi-toʻrtinchi xatboshilar deb hisoblansin.
13. 45-band quyidagi mazmundagi xatboshi bilan toʻldirilsin:
“Maxsus avtomatlashtirilgan foto va video qayd etish texnika vositalari orqali tezkor va maxsus xizmat transport vositalari hamda ular kuzatib kelayotgan transport vositalari tomonidan Qoidalarning 7.1-bandiga muvofiq imtiyozdan foydalangan holda sodir etilgan maʼmuriy huquqbuzarliklar qayd etilgan hollarda haydovchilarning kechiktirib boʻlmaydigan xizmat vazifalarini bajarganliklarini tasdiqlovchi hujjatlar taqdim etilganda oxirgi zarurat holatida sodir etilgan deb topiladi va maʼmuriy ish tugatiladi.”.
14. 50-band “maxsus qurilma” degan soʻzlardan keyin “yoxud davlat raqam belgilarini koʻrish imkoniyatini cheklaydigan, ularni anglashga toʻsqinlik qiladigan ashyolar” degan soʻzlar bilan toʻldirilsin.
15. 51-bandning birinchi xatboshisidagi “ikki oydan” degan soʻzlar “bir yildan” degan soʻzlar bilan almashtirilsin.
16. 55-banddagi “1283-moddasining birinchi va ikkinchi qismlarida” degan soʻzlar “1283-moddaning birinchi, ikkinchi va uchinchi qismlarida” degan soʻzlar bilan almashtirilsin.
17. Quyidagi mazmundagi 631-band bilan toʻldirilsin:
“631. Agar maʼmuriy javobgarlikka tortish toʻgʻrisidagi qaror ustidan berilgan shikoyatni koʻrib chiqish jarayonida tegishli transport vositasiga huquqbuzarlik qayd etilgan paytda egalik qilgan shaxs aniqlansa yoxud mazkur transport vositasi boshqa shaxslarning gʻayrihuquqiy xatti-harakatlari natijasida transport vositasi mulkdorining egaligidan chiqib ketganligi aniqlansa, transport vositasining mulkdori oʻziga tegishli transport vositasidan foydalanib sodir etilgan, maxsus avtomatlashtirilgan foto va video qayd etish texnika vositalari orqali qayd etilgan maʼmuriy huquqbuzarlik uchun maʼmuriy javobgarlikdan ozod etiladi.
Maxsus avtomatlashtirilgan foto va video qayd etish texnika vositalari orqali qayd etilgan maʼmuriy huquqbuzarlik boʻyicha ish yangidan koʻrib chiqish uchun yuborilib, qaror bekor qilingan taqdirda, mazkur ish maʼmuriy huquqbuzarlikni sodir etgan shaxsga nisbatan u ilgari sodir etgan huquqbuzarliklarning takroriyligini inobatga olgan holda umumiy asoslarda koʻrib chiqiladi.”.
18. 70-bandda:
birinchi xatboshi “, bundan mazkur bandning ikkinchi xatboshisi mustasno.” degan soʻzlar bilan toʻldirilsin;
quyidagi mazmundagi ikkinchi xatboshi bilan toʻldirilsin:
“Maxsus avtomatlashtirilgan foto va video qayd etish texnika vositalari orqali qayd etilgan maʼmuriy huquqbuzarlik uchun solingan jarimani huquqbuzar jarima solish toʻgʻrisidagi qaror chiqarilgan kundan boshlab oltmish kundan kechiktirmay, bunday qaror xususida shikoyat berilgan yoki protest bildirilgan taqdirda esa, shikoyat yoki protest qanoatlantirilmaganligi toʻgʻrisida xabar berilgan kundan eʼtiboran oʻttiz kundan kechiktirmay toʻlashi lozim.”;
ikkinchi-uchinchi xatboshilar tegishincha uchinchi-toʻrtinchi xatboshilar deb hisoblansin.
19. 72-band quyidagi mazmundagi xatboshi bilan toʻldirilsin:
“Maʼmuriy huquqbuzarlik maxsus avtomatlashtirilgan foto va video qayd etish texnika vositalari orqali qayd etilganda bu haqda talonga belgi qoʻyilmaydi.”.
20. Mazkur oʻzgartish va qoʻshimchalarning 1-ilovasiga muvofiq tahrirdagi 11-ilova bilan toʻldirilsin.
21. 2-ilova mazkur oʻzgartish va qoʻshimchalarning 2-ilovasiga muvofiq tahrirda bayon etilsin.
22. 9-ilova “maʼmuriy bayonnoma” degan soʻzlardan keyin “(___-sonli dalolatnoma)” degan soʻzlar bilan toʻldirilsin.
Yoʻl harakati qoidalarining buzilishiga doir maʼmuriy ishlarni koʻrib chiqish tartibi toʻgʻrisidagi yoʻriqnomaga kiritilayotgan oʻzgartish va qoʻshimchalarga 1-ILOVA
Yoʻl harakati qoidalarining buzilishiga doir maʼmuriy ishlarni koʻrib chiqish tartibi toʻgʻrisidagi yoʻriqnomaga 11-ILOVA
Yoʻl harakati qoidalarining buzilishiga doir maʼmuriy ishlarni koʻrib chiqish tartibi toʻgʻrisidagi yoʻriqnomaga kiritilayotgan oʻzgartish va qoʻshimchalarga 2-ILOVA
Yoʻl harakati qoidalarining buzilishiga doir maʼmuriy ishlarni koʻrib chiqish tartibi toʻgʻrisidagi yoʻriqnomaga 2-ILOVA
(Oʻzbekiston Respublikasi qonun hujjatlari toʻplami, 2015-y., 40-son, 521-modda)