Eng kichik yosh toʻgʻrisida

26.06.1973

Konvensiya

Xalqaro Mehnat Tashkilotining Bosh konferensiyasi,

Xalqaro Mehnat Byurosining Maʼmuriy kengashi tomonidan Jenevada chaqirilib va 1973-yilning 6-iyunida oʻzining Ellik sakkizinchi Sessiyasiga toʻplanib,

ishga qabul qilish uchun eng kichik yosh toʻgʻrisidagi bir qancha takliflarni qabul qilishga qaror chiqarib va bu Sessiya kun tartibining toʻrtinchi bandi hisoblanib,

Sanoatda eng kichik yosh toʻgʻrisidagi 1919 yilgi Konvensiya, Dengizda ishlash uchun eng kichik yosh toʻgʻrisidagi 1920 yilgi Konvensiya, Qishloq hoʻjaligida eng kichik yosh toʻgʻrisidagi 1921 yilgi Konvensiya, Flotda koʻmir yuklovchi va oʻt yoquvchi uchun eng kichik yosh toʻgʻrisidagi 1921 yilgi Konvensiya, Nosanoat ishlarda eng kichik yosh toʻgʻrisidagi 1932-yilgi Konvensiya, Dengizda ishlash uchun eng kichik yosh toʻgʻrisidagi 1936-yilgi (qayta koʻrib chiqilgan) Konvensiya, Sanoatda eng kichik yosh toʻgʻrisidagi 1937 yilgi (qayta koʻrib chiqilgan) Konvensiya, Nosanoat ishlardagi eng kichik yosh toʻgʻrisidagi 1937 yilgi (qayta koʻrib chiqilgan) Konvensiya, Baliqchilar uchun eng kichik yosh toʻgʻrisidagi 1959-yilgi Konvensiya xamda Yer osti ishlariga ruxsat beriladigan eng kichik yosh toʻgʻrisidagi 1965-yilgi Konvensiya qoidalarini eʼtiborga olib,

bolalar mehnatini toʻliq bekor qilishga erishish maqsadida, cheklangan iqtisodiy sektorlarda qoʻllaniladigan mavjud shartnomalarni bosqichma-bosqich almashtiruvchi umumiy shartnoma ishlab chiqish vaqti kelganini eʼtiborga olib,

mazkur takliflarga xalqaro konvensiya shaklini berishga qaror qilib,

bir ming toʻqqiz yuz yetmish uchinchi yil iyun oyining yigirma oltinchi kunida quyidagi “Eng kichik yosh toʻgʻrisidagi 1973-yilgi Konvensiya” deb nomlanishi mumkin boʻlgan Konvensiyani qabul qildi:

1-modda

Tashkilotining xar bir aʼzosi, ushbu Konvensiya unga nisbatan kuchga kirgan boʻlsa, bolalar mehnatini batamom bekor qilishni taʼminlashga yoʻnaltirilgan va ishlashga yoki yollanishga ruxsat etilgan eng kichik yoshni oʻsmirlarning toʻla jismoniy va aqliy rivojlanish darajasiga mos keladigan yoshgacha bosqichma-bosqich oshirishga yoʻnaltirilgan milliy siyosatni amalga oshirish majburiyatini oʻz zimmasiga oladi.

2-modda

1. Ushbu Konvensiyani ratifikatsiya qiladigan Tashkilotning har bir aʼzosi, ratifikatsiya toʻgʻrisidagi hujjatga ilova qilinadigan deklaratsiyasida, oʻz hududi doirasida va hududida roʻyxatga olingan transport vositalarida ishga qabul qilinishga yoki yollanishga ruxsat etilgan eng kichik yoshni koʻrsatadi; mazkur Konvensiyaning 4 — 8-moddalari shartiga binoan, mazkur eng kichik yoshdan kichik boʻlgan shaxslarga har qanday ish turida ishlashiga yoki yollanishiga yoʻl qoʻyilmaydi.

2. Ushbu Konvensiyani ratifikatsiya qilgan Tashkilotning har bir aʼzosi, keyinchalik, keyingi deklaratsiyasi orqali, mamlakatda oʻrnatilgan eng kichik yoshni yangitdan, avval oʻrnatilgan eng kichik yoshidan kattaroq yosh belgilaganligi haqida Xalqaro Mehnat Byurosi Bosh direktorini xabardor qilishi mumkin.

3. Mazkur modda 1-bandi asosida belgilanadigan eng kichik yosh majburiy maktab taʼlimini tugallash uchun zarur boʻlgan yoshdan kam boʻlmasligi kerak va har qanday holda oʻn besh yoshdan kichik boʻlmasligi zarur.

4. Iqtisodiyoti va taʼlim imkoniyatlari yetarlicha rivojlanmagan Tashkilot aʼzosi, mazkur modda 3-bandi qoidalaridan qatʼiy nazar, ish beruvchilar va mehnatkashlarning tegishli tashkilotlari bilan, agar shunday tashkilotlar mavjud boʻlsa, maslahatlashilgandan soʻng dastavval eng kichik yosh deb oʻn toʻrt yoshni belgilashi mumkin.

5. Yuqoridagi band qoidalariga muvofiq eng kichik yosh deb oʻn toʻrt yoshni belgilagan Tashkilotning har bir aʼzosi Xalqaro Mehnat Tashkiloti Ustavining 22-moddasiga muvofiq oʻzining mazkur Konvensiya ijrosi toʻgʻrisidagi maʼruzasiga kuyidagi bayonotlarni kiritadi:

a) ushbu qaror qabul qilinishi sabablari oʻzgarmaganligi; yoki

b) u muayyan sanadan eʼtiboran oʻzining mazkur qoidalardan foydalanish huquqidan voz kechishini.

3-modda

1. Oʻz xususiyati yoki amalga oshiriladigan sharoitiga koʻra oʻsmir sogʻligi, xavfsizligi yoki maʼnaviyatiga ziyon yetkazishi mumkin boʻlgan har qanday ish turiga yoki yollanma ish turiga qabul qilish uchun eng kichik yosh oʻn sakkiz yoshdan kam boʻlmasligi kerak.

2. Ushbu modda 1-bandi qoʻllaniladigan ish turlari yoki yollanma ish turlari milliy qonun hujjatlari yoki vakolatli hokimiyat organi tomonidan ish beruvchilar va mehnatkashlarning tegishli tashkilotlari bilan, agar bunday tashkilotlar mavjud boʻlsa, maslahatlashilgandan soʻng belgilanadi.

3. Ushbu modda 1-bandi qoidalaridan qatʼiy nazar, milliy qonun hujjatlari yoki vakolatli hokimiyat organi ish beruvchilar va mehnatkashlarning tegishli tashkilotlari bilan, agar bunday tashkilotlar mavjud boʻlsa, maslahatlashilgandan soʻng oʻn olti yoshdan kichik boʻlmagan shaxslarga ishlashga yoki yollanib ishlashga, ularning sogʻligi, xavfsizligi va maʼnaviyati toʻla muhofaza etilishi va ular yetarlicha maxsus taʼlim hamda faoliyatning tegishli sohasi boʻyicha kasbiy tayyorgarlik olishlari sharti bilan ruxsat berishlari mumkin.

4-modda

1. Zaruratga koʻra vakolatli hokimiyat organi ish beruvchilar va mehnatkashlarning tegishli tashkilotlari bilan, agar bunday tashkilotlar mavjud boʻlsa, maslahatlashilgandan soʻng, mazkur Konvensiyaning qoʻllanilishi doirasidan ishlarning yoki yollanma ishlarning cheklangan toifalarini, yaʼni ularning qoʻllanilishida alohida va muhim muammolar vujudga keladigan toifalarini chiqarib tashlashlari mumkin.

2. Ushbu Konvensiyani ratifikatsiya qiladigan Tashkilotning har bir aʼzosi, Xalqaro Mehnat Tashkilot Ustavining 22-moddasiga binoan taqdim etiladigan, mazkur Konvensiyaning qoʻllanilishi toʻgʻrisidagi oʻzining birinchi maʼruzasida, mazkur modda 1-bandiga muvofiq chiqarib tashlanishi mumkin boʻlgan barcha toifalarni, chiqarib tashlash sabablarini koʻrsatgan holda qayd etadi hamda navbatdagi maʼruzalarda chiqarib tashlangan mazkur toifalarga nisbatan oʻz milliy qonunchiligi va amaliyotining ahvoli toʻgʻrisida va Konvensiya qoidalari ushbu toifalarga nisbatan qanday qoʻllanilayotganligi yoki qoʻllanilishi moʻljallanayotganligi toʻgʻrisida maʼlum qiladi.

3. Ushbu Konvensiya 3-moddasi bilan qamrab olinadigan ish turi yoki yollanma ish turi, mazkur modda bajarilishidan kelib chiqib, ushbu Konvensiya qoʻllanishi doirasidan chiqarib tashlanmasligi kerak.

5-modda

1. Iqtisodiyoti va maʼmuriy imkoniyatlari yetarlicha rivojlanmagan Tashkilotning aʼzosi, ish beruvchilar va mehnatkashlarning tegishli tashkilotlari bilan, agar shunday tashkilotlar mavjud boʻlsa, maslahatlashilgandan soʻng, dastavval mazkur Konvensiya qoʻllanilishi doirasini cheklab qoʻyishi mumkin.

2. Mazkur modda 1-bandi qoidalarini qoʻllayotgan Tashkilotning har bir aʼzosi ratifikatsiya toʻgʻrisidagi hujjatiga ilova qilinadigan deklaratsiyada, mazkur Konvensiya qoidalarini u qoʻllaydigan iqtisodiy faoliyat tarmoqlari yoki korxonalar turlarini koʻrsatishi lozim.

3. Konvensiya qoidalari hech boʻlmaganda kuyidagi sohalarda qoʻllanilishi lozim: shaxta va karyerlarda; ishlov berish sanoatida; qurilishda; elektr, gaz va suv taʼminotida; sanitariya xizmatlarida; transport, omborlar va aloqa xizmatida; ekinzorlar va tijorat maqsadlari uchun mahsulot ishlab chiqaradigan boshqa qishloq xoʻjalik korxonalaridagi ishlarda, shu jumladan, mahalliy isteʼmol uchun mahsulot ishlab chiqaradigan, doimiy ravishda yollanma mehnatkashlardan foydalanmaydigan oilaviy va kichik xoʻjaliklarda.

4. Mazkur Konvensiya qoʻllanilishi doirasini ushbu modda qoidalariga muvofiq cheklaydigan Tashkilotning har bir aʼzosi:

a) Xalqaro Mehnat Tashkiloti Ustavining 22-moddasiga muvofiq taqdim etiladigan maʼruzasida mazkur Konvensiya qoʻllanilishi doirasidan chiqarilgan faoliyat sohalarida oʻsmirlar va bolalarning ishlashi yoki yollanib ishlashining umumiy ahvoli toʻgʻrisidagi va mazkur Konvensiya qoidalari kengroq qoʻllanilishi yoʻlida amalga oshirilgan har qanday ijobiy oʻzgarishlar toʻgʻrisidagi maʼlumotlarni koʻrsatishi lozim;

b) xohlagan vaqtda, Xalqaro Mehnat Byurosi Bosh direktoriga yuboriladigan deklaratsiyasi orqali, Konvensiya qoʻllanilishi doirasini rasman kengaytirishi mumkin.

6-modda

Ushbu Konvensiya bolalar va oʻsmirlar tomonidan umumtaʼlim maktablari, kasb-hunar va texnika taʼlimi yoki boshqa oʻquv muassasalarida bajariladigan ishlarga yoki kamida oʻn toʻrt yoshda boʻlgan shaxslar tomonidan vakolatli hokimiyat organlari — ish beruvchilar va mehnatkashlarning tegishli tashkilotlari bilan, agar bunday tashkilotlar mavjud boʻlsa, maslahatlashilgandan soʻng — belgilab qoʻygan shartlarga muvofiq korxonalarda bajaradigan ishlarga nisbatan va quyidagilarning tarkibiy qismi hisoblanadigan ishlarga nisbatan qoʻllanilmaydi:

a) asosiy masʼuliyat maktab yoki kasbiy tayyorgarlik muassasasi zimmasida boʻlgan taʼlim yoki tayyorgarlik kursining;

b) asosan yoki butunlay korxonada amalga oshiriladigan, vakolatli hokimiyat organi tomonidan maʼqullangan kasbiy tayyorgarlik dasturining;

s) kasbiy yoki kasbiy tayyorgarlik turini tanlashni yengillashtirishga qaratilgan kasbga yoʻnaltirish dasturlarining.

7-modda

1. Milliy qonun hujjatlari oʻn uch yoshdan oʻn besh yoshgacha boʻlgan shaxslarga yengil ishlarda ishlashga yoki yollanib ishlashga ruxsat etishi mumkin, agar bu:

a) ularning sogʻligʻi va rivojlanishi uchun zararli boʻlmasa;

b) ularning maktabga qatnashiga, ularning vakolatli hokimiyat organlari tomonidan tasdiqlangan kasbga yoʻnaltirish yoki kasbiy tayyorgarlik dasturlarida ishtirok etishlariga, yoki ularning olgan oʻquvlaridan foydalanish layoqatiga zarar yetkazmaydigan boʻlsa.

2. Milliy qonun hujjatlari kamida oʻn besh yoshda boʻlgan, lekin majburiy maktab taʼlimini tugallamagan shaxslarga, mazkur modda 1-bandi “a” va “b” kichik bandlari talablariga rioya etish sharti bilan, ishlashga yoki yollanib ishlashga ruxsat etishi mumkin.

3. Vakolatli hokimiyat organi ishlashga yoki yollanib ishlashga mazkur modda 1 va 2-bandlariga muvofiq ruxsat etilgan faoliyat sohalarini aniqlaydi xamda bunday ishning yoki yollanma ishning bajarish mumkin boʻlgan ish vaqti davomiyligi va sharoitini belgilaydi.

4. Mazkur modda 1- va 2-bandlari qoidalaridan qatʼiy nazar, 2-modda 4-bandi qoidalarini qoʻllayotgan Tashkilot aʼzosi, u uchun zarur boʻlgan muddatda, mazkur modda 1-bandida koʻrsatilgan oʻn ikki va oʻn toʻrt yoshlarni — oʻn uch va oʻn besh yoshlar bilan, 2-bandida esa oʻn toʻrt yoshni — oʻn besh yosh bilan almashtirishi mumkin.

8-modda

1. Vakolatli hokimiyat organi, ish beruvchilar va mehnatkashlarning tegishli tashkilotlari bilan, agar bunday tashkilotlar mavjud boʻlsa, maslahatlashilgandan soʻng, ruxsatnomalar berish yoʻli orqali mazkur Konvensiya 2-moddasida koʻzda tutilgan ishga yoki yollanma ishga qabul qilishni man etish qoidasini ayrim hollarda, badiiy tadbirlarda ishtirok etish kabi maqsadlar uchun, istisno qilishi mumkin.

2. Shu tartibda beriladigan ruxsatnoma ishlash yoki yollanib ishlash mumkin boʻlgan sharoitni belgilaydi va ish vaqti davomiyligini cheklaydi.

9-modda

1. Vakolatli hokimiyat organi tomonidan mazkur Konvensiya qoidalarini hayotga samarali tatbiq etishni taʼminlash uchun zarur chora-tadbirlar koʻriladi, shu jumladan, tegishli jazolarni belgilash choralari koʻriladi.

2. Milliy qonun hujjatlari yoki vakolatli hokimiyat organi tomonidan Konvensiya ijrosini taʼminlovchi qoidalarning rioya etilishiga masʼul boʻlgan shaxslar belgilanadi.

3. Milliy qonun hujjatlari yoki vakolatli hokimiyat organi tomonidan ish beruvchi tasarrufida va xizmatida boʻladigan roʻyxatlar yoki boshqa hujjatlar tayinlanadi: bunday roʻyxatlar yoki hujjatlarda ish beruvchi tomonidan yollangan yoki u uchun ishlaydigan va oʻn sakkiz yoshdan kichik boʻlgan shaxslar ism-sharifi, yoshi yoki tugilgan sanasiga doir maʼlumotlar zarur darajada tasdiqlangan holda koʻrsatiladi.

10-modda

1. Mazkur Konvensiya, ushbu moddada koʻzda tutilgan shartlar asosida, Sanoatda eng kichik yosh toʻgʻrisidagi 1919 yilgi Konvensiya, Dengizda ishlash uchun eng kichik yosh toʻgʻrisidagi 1920 yilgi Konvensiya, Qishloq hoʻjaligidagi eng kichik yosh toʻgʻrisidagi 1921 yilgi Konvensiya, Flotda koʻmir yuklovchi va oʻt yoquvchi uchun eng kichik yosh toʻgʻrisidagi 1921 yilgi Konvensiya, Nosanoat ishlarda eng kichik yosh toʻgʻrisidagi 1932-yilgi Konvensiya, Dengizda ishlash uchun eng kichik yosh toʻgʻrisidagi 1936-yilgi (qayta koʻrib chiqilgan) Konvensiya, Sanoatda eng kichik yosh toʻgʻrisidagi 1937 yilgi (qayta koʻrib chiqilgan) Konvensiya, Nosanoat ishlardagi eng kichik yosh toʻgʻrisidagi 1937 yilgi (qayta koʻrib chiqilgan) Konvensiya, Baliqchilar uchun eng kichik yosh toʻgʻrisidagi 1959-yilgi Konvensiya hamda Yer osti ishlariga ruxsat beriladigan eng kichik yosh toʻgʻrisidagi 1965-yilgi Konvensiyani qayta koʻrib chiqadi.

2. Mazkur Konvensiyaning kuchga kirishi Dengizda ishlash uchun eng kichik yosh toʻgʻrisidagi 1936-yilgi (qayta koʻrib chiqilgan) Konvensiya, Sanoatda eng kichik yosh toʻgʻrisidagi 1937 yilgi (qayta koʻrib chiqilgan) Konvensiya, Nosanoat ishlardagi eng kichik yosh toʻgʻrisidagi 1937 yilgi (qayta koʻrib chiqilgan) Konvensiya, Baliqchilar uchun eng kichik yosh toʻgʻrisidagi 1959-yilgi Konvensiya yoki Yer osti ishlariga ruxsat beriladigan eng kichik yosh toʻgʻrisidagi 1965-yilgi Konvensiyaning keyinchalik ratifikatsiya uchun yopilishiga olib kelmaydi.

3. Agar, Sanoatda eng kichik yosh toʻgʻrisidagi 1919 yilgi Konvensiya, Dengizda ishlash uchun eng kichik yosh toʻgʻrisidagi 1920 yilgi Konvensiya, Qishloq hoʻjaligida eng kichik yosh toʻgʻrisidagi 1921 yilgi Konvensiya xamda Flotda koʻmir yuklovchi va oʻt yoquvchilar uchun eng kichik yosh toʻgʻrisidagi 1921 yilgi Konvensiyaning barcha ishtirokchilari ularni ratifikatsiya uchun yopishga rozi boʻlib, mazkur Konvensiyani ratifikatsiya qilsalar yoki bu haqda Xalqaro Mehnat Byurosi Bosh direktoriga deklaratsiya joʻnatsalar, ushbu Konvensiyalar bundan keyingi ratifikatsiya uchun yopiladi.

4. Agar mazkur Konvensiya majburiyatlari:

a) Sanoatda eng kichik yosh toʻgʻrisidagi 1937 yilgi (qayta koʻrib chiqilgan) Konvensiya ishtirokchisi boʻlgan Tashkilotning aʼzosi tomonidan qabul qilinsa va mazkur Konvensiyaning 2-moddasiga muvofiq eng kichik yosh oʻn besh yoshdan kam qilib belgilanmagan boʻlsa, u holda qonunning oʻz kuchi bilan, Sanoatda eng kichik yosh toʻgʻrisidagi 1937 yilgi (qayta koʻrib chiqilgan) Konvensiyaning darhol denonsatsiya qilinishiga olib keladi,

b) Nosanoat ishlarda eng kichik yosh toʻgʻrisidagi 1932-yilgi Konvensiya ishtirokchisi boʻlgan Tashkilotning aʼzosi tomonidan nosanoat ishlariga nisbatan qabul qilinsa, u holda qonunning oʻz kuchi bilan, Nosanoat ishlarda eng kichik yosh toʻgʻrisidagi 1932-yilgi Konvensiyaning darhol denonsatsiya qilinishiga olib keladi,

s) Nosanoat ishlarda eng kichik yosh toʻgʻrisidagi 1937 yilgi (qayta koʻrib chiqilgan) Konvensiya ishtirokchisi boʻlgan Tashkilotning aʼzosi tomonidan nosanoat ishlariga nisbatan qabul qilinsa va mazkur Konvensiyaning 2-moddasiga muvofiq eng kichik yosh oʻn besh yoshdan kam qilib belgilanmagan boʻlsa, u holda qonunning oʻz kuchi bilan, Nosanoat ishlarda eng kichik yosh toʻgʻrisidagi 1937 yilgi (qayta koʻrib chiqilgan) Konvensiyaning darhol denonsatsiya qilinishiga olib keladi,

d) Dengizda ishlash uchun eng kichik yosh toʻgʻrisidagi 1936-yilgi (qayta koʻrib chiqilgan) Konvensiya ishtirokchisi boʻlgan Tashkilotning aʼzosi tomonidan dengizdagi ishlarga nisbatan qabul qilinsa va mazkur Konvensiyaning 2-moddasiga muvofiq eng kichik yosh oʻn besh yoshdan kam qilib belgilanmagan boʻlsa, yoki Tashkilotning aʼzosi mazkur Konvensiyaning 3-moddasi dengizdagi ishlarga nisbatan qoʻllanilishini belgilagan boʻlsa, u holda qonunning oʻz kuchi bilan, Dengizda ishlash uchun eng kichik yosh toʻgʻrisidagi 1936-yilgi (qayta koʻrib chiqilgan) Konvensiyaning darhol denonsatsiya qilinishiga olib keladi,

e) Baliqchilar uchun eng kichik yosh toʻgʻrisidagi 1959-yilgi Konvensiya ishtirokchisi boʻlgan Tashkilotning aʼzosi tomonidan dengizda baliqchilik sohasidagi ishlarga nisbatan qabul qilinsa va mazkur Konvensiyaning 2-moddasiga muvofiq eng kichik yosh oʻn besh yoshdan kam qilib belgilanmagan boʻlsa yoki Tashkilotning aʼzosi mazkur Konvensiyaning 3-moddasi dengizda baliqchilik soqasidagi ishlarga nisbatan qoʻllanilishini belgilagan boʻlsa, u holda qonunning oʻz kuchi bilan, Baliqchilar uchun eng kichik yosh toʻgʻrisidagi 1959-yilgi Konvensiyaning darhol denonsatsiya qilinishiga olib keladi,

f) Yer osti ishlariga ruxsat beriladigan eng kichik yosh toʻgʻrisidagi 1965-yilgi Konvensiya ishtirokchisi boʻlgan Tashkilotning aʼzosi tomonidan qabul qilinsa va mazkur Konvensiya 2-moddasiga muvofiq eng kichik yoshni yuqorida koʻrsatilgan 1965-yilgi Konvensiyaga muvofiq belgilangan eng kichik yoshdan kam qilib belgilanmagan boʻlsa yoki Tashkilotning aʼzosi ushbu yosh mazkur Konvensiyaning 3-moddasiga koʻra shaxtalardagi yer osti ishlariga ruxsat berish uchun qoʻllanilishini belgilagan boʻlsa, u holda qonunning oʻz kuchi bilan, Yer osti ishlariga ruxsat beriladigan eng kichik yosh toʻgʻrisidagi 1965-yilgi Konvensiyaning darhol denonsatsiya qilinishiga olib keladi, faqat mazkur Konvensiya kuchga kirgan boʻlsa.

5. Mazkur Konvensiya majburiyatlarining qabul qilinishi:

a) ushbu Konvensiyaning 12-moddasiga muvofiq, Sanoatda eng kichik yosh toʻgʻrisidagi 1919 yilgi Konvensiyaning denonsatsiya qilinishiga olib keladi,

b) qishloq hoʻjaligiga nisbatan, ushbu Konvensiyaning 9-moddasiga muvofiq, Qishloq hoʻjaligida eng kichik yosh toʻgʻrisidagi 1921 yilgi Konvensiyaning denonsatsiya qilinishiga olib keladi,

s) dengizdagi ishlarga nisbatan, ushbu Konvensiyaning 10-moddasiga muvofiq, Dengizda ishlash uchun eng kichik yosh toʻgʻrisidagi 1920 yilgi Konvensiya va ushbu Konvensiyaning 12-moddasiga muvofiq, Flotda koʻmir yuklovchi va oʻt yoquvchilar uchun eng kichik yosh toʻgʻrisidagi 1921 yilgi Konvensiyaning denonsatsiya qilinishiga olib keladi, faqat mazkur Konvensiya kuchga kirgan boʻlsa.

11-modda

Ushbu Konvensiyani ratifikatsiya qilish toʻgʻrisidagi rasmiy hujjatlar roʻyxatga olinishi uchun Xalqaro Mehnat Byurosi Bosh direktoriga yuboriladi.

12-modda

1. Ushbu Konvensiya faqatgina ratifikatsiya qilish toʻgʻrisidagi hujjatlari Bosh direktor tomonidan roʻyxatga olingan Xalqaro Mehnat Tashkilotining aʼzolarinigina birlashtiradi.

2. Ushbu Konvensiya Tashkilot ikki aʼzosining ratifikatsiya qilish toʻgʻrisidagi hujjatlari Bosh direktor tomonidan roʻyxatga olingan sanadan keyin oʻn ikki oy oʻtgach kuchga kiradi.

3. Keyinchalik ushbu Konvensiya Tashkilotning har bir aʼzosi uchun uning ratifikatsiya qilish toʻgʻrisidagi hujjati roʻyxatga olingan sanadan keyin oʻn ikki oy oʻtgach kuchga kiradi.

13-modda

1. Ushbu Konvensiyani ratifikatsiya qilgan Tashkilotning aʼzosi Konvensiya dastlab kuchga kirgan sanadan oʻn yil oʻtganidan keyin Xalqaro Mehnat Byurosining Bosh direktoriga roʻyxatga olish uchun yuborilgan akt orqali Konvensiyani denonsatsiya qilishi mumkin. Bunday denonsatsiya denonsatsiya akti roʻyxatga olinganidan keyin bir yil oʻtgach kuchga kiradi.

2. Ushbu Konvensiyani ratifikatsiya qilgan Tashkilotning har bir aʼzosi, yuqoridagi bandda qayd etilgan oʻn yillik muddat oʻtganidan keyin, bir yil ichida mazkur moddada koʻzda tutilgan denonsatsiya huquqidan foydalanmagan boʻlsa, navbatdagi oʻn yillik muddatni kutishga majbur boʻladi va shunga muvofiq, u mazkur modda shartlariga binoan ushbu Konvensiyani har oʻn yillik muddat tugashi bilan denonsatsiya qilishi mumkin boʻladi.

14-modda

1. Xalqaro Mehnat Byurosi Bosh direktori Tashkilot aʼzolari tomonidan yuborilgan ratifikatsiya qilish toʻgʻrisidagi hujjatlari va denonsatsiya aktlarining barchasini roʻyxatga olganligi haqida Xalqaro Mehnat Tashkilotining barcha aʼzolariga xabar beradi.

2. Bosh direktor, unga yuborilgan ikkinchi ratifikatsiya qilish toʻgʻrisidagi hujjatni roʻyxatga olganligi haqida Tashkilot aʼzolariga xabar berganda, u Tashkilot aʼzolarining eʼtiborini Konvensiyaning kuchga kirish sanasiga qaratadi.

15-modda

Xalqaro Mehnat Byurosi Bosh direktori, Birlashgan Millatlar Tashkiloti Ustavining 102-moddasiga muvofiq, yuqoridagi moddalar qoidalariga binoan oʻzi roʻyxatga olgan ratifikatsiya qilish toʻgʻrisidagi hujjatlari va denonsatsiya aktlarining barchasiga oid toʻla maʼlumotlarni Birlashgan Millatlar Tashkilotining Bosh kotibiga roʻyxatga olish uchun yuboradi.

16-modda

Har gal, Xalqaro Mehnat Byurosi Maʼmuriy kengashi zarur deb topganda, Bosh konferensiyaga ushbu Konvensiyaning qoʻllanilishi toʻgʻrisidagi maʼruzani taqdim etadi va uni toʻla yoki qisman qayta koʻrib chiqish haqidagi masalani Konferensiya kun tartibiga kiritish kerakligini yoki kerak emasligini koʻrib chiqadi.

17-modda

1. Agar Konferensiya mazkur Konvensiyani toʻla yoki qisman qayta koʻrib chiqadigan yangi konvensiya qabul qilsa va yangi konvensiyada zid keluvchi qoidalar mavjud boʻlmasa, u xolda:

a) Tashkilotning biror aʼzosi tomonidan qayta koʻrib chiqilgan yangi konvensiyaning ratifikatsiya qilinishi, qonunning oʻz kuchi bilan, 13-modda qoidalaridan qatʼiy nazar, mazkur Konvensiyaning zudlik bilan denonsatsiya qilinishiga olib keladi, bunda qayta koʻrib chiqilgan yangi konvensiya kuchga kirgan boʻlishi kerak;

b) qayta koʻrib chiqilgan yangi konvensiya kuchga kirgan sanadan eʼtiboran, mazkur Konvensiyaning Tashkilot aʼzolari tomonidan ratifikatsiya qilinishi toʻxtatiladi.

2. Mazkur Konvensiya, har qanday holatda, uni ratifikatsiya qilgan, ammo qayta koʻrib chiqilgan yangi konvensiyani ratifikatsiya qilmagan Tashkilot aʼzolari uchun amaldagi shakli va mazmuni oʻz kuchida qolaveradi.

18-modda

Mazkur Konvensiyaning inglizcha va fransuzcha matnlari bir xil kuchga ega.

(imzolar)