Ikkiyoqlama soliq solinishiga yoʻl qoʻymaslik hamda daromad va mol-mulk soligʻini toʻlashdan bosh tortishning oldini olish toʻgʻrisida

11.07.2012

Oʻzbekiston Respublikasi Hukumati bilan Irlandiya Hukumati oʻrtasida

Konvensiya

Oʻzbekiston Respublikasi Hukumati va Irlandiya Hukumati,

Ikkiyoqlama soliq solinishiga yoʻl qoʻymaslik hamda daromad va mol-mulk soligʻini toʻlashdan bosh tortishning oldini olish toʻgʻrisida konvensiyani tuzishni istab,

quyidagilar toʻgʻrisida kelishib oldilar:

1-modda Konvensiya tatbiq etiladigan shaxslar

Mazkur Konvensiya Ahdlashuvchi Davlatlardan biri yoki har ikkisining rezidentlari boʻlgan shaxslarga nisbatan qoʻllaniladi.

2-modda Konvensiya tatbiq etiladigan soliqlar

1. Mazkur Konvensiya Ahdlashuvchi Davlat yoki uning maʼmuriy-hududiy boʻlinmalari yoki mahalliy hokimiyat organlari nomidan undiriladigan, undirish usulidan qatʼi nazar, daromad va mol-mulk soliqlariga tatbiq etiladi.

2. Daromad va mol-mulk soligʻiga umumiy daromad, umumiy mol-mulkdan yoki daromad yoki mol-mulkning bir qismidan undiriladigan barcha soliqlar, shu jumladan koʻchar yoki koʻchmas mulkni tasarrufdan chiqarishdan olingan daromaddan, korxonalar toʻlaydigan jami ish haqi yoki maosh summalaridan, shuningdek mol-mulk qiymatining ortishidan olinadigan soliqlar kiradi.

3. Mazkur Konvensiya tatbiq etiladigan amaldagi soliqlar, xususan, quyidagilardir:

a) Oʻzbekistonga nisbatan:

(i) yuridik shaxslarning daromadiga (foydasiga) solinadigan soliq;

(ii) jismoniy shaxslarning daromadiga solinadigan soliq; va

(iii) mol-mulk soligʻi;

(keyingi oʻrinlarda “Oʻzbekiston soligʻi” deb nomlanadi);

b) Irlandiyaga nisbatan:

(i) daromad soligʻi;

(ii) universal ijtimoiy toʻlov;

(iii) korporativ soliq; va

(iv) kapital qiymatining ortishidan olinadigan soliq (keyingi oʻrinlarda “Irlandiya soligʻi” deb nomlanadi).

4. Mazkur Konvensiya, shuningdek, ushbu Konvensiya imzolangan sanadan keyin amaldagi soliqlarga qoʻshimcha ravishda yoki ularning oʻrniga olinadigan har qanday bir xil yoki mohiyatan oʻxshash soliqlarga nisbatan qoʻllaniladi. Ahdlashuvchi Davlatlarning vakolatli organlari oʻzlarining tegishli soliqqa oid qonun hujjatlariga kiritilgan har qanday jiddiy oʻzgarishlar toʻgʻrisida bir-birini xabardor qiladilar.

3-modda Umumiy taʼriflar

1. Mazkur Konvensiya maqsadlari uchun, kontekstdan boshqacha maʼno kelib chiqmasa:

a) “Oʻzbekiston” atamasi Oʻzbekiston Respublikasini anglatadi va geografik maʼnoda qoʻllanilganda Oʻzbekiston Respublikasining hududini, shu jumladan doirasida Oʻzbekiston Respublikasi oʻzining suveren huquqlari va yurisdiksiyasini, shu jumladan xalqaro huquq va Oʻzbekiston Respublikasining qonunchiligiga muvofiq yer osti va tabiiy resurslardan foydalanish huquqini amalga oshirishi mumkin boʻlgan hududiy suvlari hamda havo hududini anglatadi;

b) “Irlandiya” atamasi Eksklyuziv iqtisodiy zona va Kontinental shelfga doir Irlandiya qonunchiligi boʻyicha doirasida Irlandiya oʻzining xalqaro huquqqa muvofiq tasdiqlangan suveren huquqlari va yurisdiksiyasini amalga oshira oladigan hudud boʻlgan yoki kelgusida shunday deb belgilanishi mumkin boʻlgan Irlandiya hududiy suvlaridan tashqaridagi har qanday hududni oʻz ichiga oladi;

c) “bir Ahdlashuvchi Davlat” va “boshqa Ahdlashuvchi Davlat” atamalari kontekstga bogʻliq holda Oʻzbekiston yoki Irlandiyani anglatadi;

d) “shaxs” atamasi jismoniy shaxs, kompaniya va boshqa har qanday shaxslar birlashmasini anglatadi;

e) “kompaniya” atamasi soliq solish maqsadlari uchun korporativ birlashma sifatida qabul qilinadigan har bir korporativ birlashma yoki har bir tashkilotni anglatadi;

f) “korxona” atamasi har qanday tadbirkorlik faoliyatini amalga oshirishga nisbatan qoʻllaniladi;

g) “bir Ahdlashuvchi davlat korxonasi” va “boshqa Ahdlashuvchi davlat korxonasi” atamalari tegishlicha bir Ahdlashuvchi davlat rezidentining boshqaruvi ostida faoliyat yurituvchi korxonani hamda boshqa Ahdlashuvchi davlat rezidentining boshqaruvi ostida faoliyat yurituvchi korxonani anglatadi;

h) “xalqaro tashish” atamasi Ahdlashuvchi davlat korxonasi tomonidan foydalanilayotgan dengiz, havo kemasi, temir yoʻl yoki avtomobil transporti vositasida har qanday tashishlarni anglatadi, dengiz, havo kemasi, temir yoʻl yoki avtomobil transporti faqat boshqa Ahdlashuvchi davlatda joylashgan punktlar orasida foydalaniladigan holatlar bundan mustasno;

i) “vakolatli organ” atamasi quyidagilarni anglatadi:

(i) Oʻzbekistonga nisbatan — Davlat soliq qoʻmitasi yoki uning vakolatli vakili;

(ii) Irlandiyaga nisbatan — Daromadlar xizmati yoki uning vakolatli vakili.

j) “fuqaro” atamasi quyidagilarni anglatadi:

(i) Ahdlashuvchi davlatning fuqaroligiga ega boʻlgan har bir jismoniy shaxsni;

(ii) Ahdlashuvchi davlatning amaldagi qonunchiligiga muvofiq oʻzining shunday maqomini olgan har qanday yuridik shaxs yoki uyushmani bildiradi;

k) “tadbirkorlik faoliyati” atamasi kasbiy xizmatlar va boshqa mustaqil xususiyatga ega boʻlgan faoliyatni amalga oshirishni oʻz ichiga oladi.

Ahdlashuvchi davlat tomonidan har qanday vaqtda Konvensiya qoʻllanganda unda taʼrifi berilmagan har bir atama, kontekstdan boshqacha maʼno kelib chiqmasa, ushbu Davlatning qonunchiligiga koʻra shu vaqtgacha mazkur Konvensiya tatbiq etiladigan soliqlarga nisbatan ega boʻlgan maʼnoga ega boʻladi; ushbu Davlatning qoʻllaniladigan qonunchiligiga muvofiq har bir maʼno shu Davlat qonunchiligining boshqa sohalarida ushbu atama uchun nazarda tutilgan maʼnodan ustun boʻladi.

4-modda Rezident

1. “Ahdlashuvchi davlatning rezidenti” atamasi mazkur Konvensiyaning maqsadlari uchun ushbu davlatning milliy qonunchiligiga koʻra unda oʻzining yashash joyi, doimiy turar joyi, boshqarish joyi yoki har qanday boshqa shunga oʻxshash mezon asosida soliq solinishi lozim boʻlgan, shuningdek mazkur Davlat va har qanday maʼmuriy-hududiy boʻlinma yoki mahalliy hokimiyat organlari qamrab oladigan har bir shaxsni anglatadi. Ammo, ushbu atama mazkur Ahdlashuvchi davlatda faqat shu Davlatdagi manbalardan olingan daromadga nisbatan yoki unda boʻlgan mol-mulkiga nisbatan soliq solinishi lozim boʻlgan har bir shaxsni oʻz ichiga olmaydi.

2. 1-bandning qoidalariga muvofiq, jismoniy shaxs har ikki Ahdlashuvchi davlatning rezidenti hisoblansa, uning maqomi quyidagicha belgilanadi:

a) mazkur shaxs faqat u yashay oladigan doimiy uy-joyga ega boʻlgan Davlatning rezidenti boʻlib hisoblanadi; agar u har ikki Davlatda oʻzining yashashi mumkin boʻlgan doimiy uy-joyga ega boʻlsa, u faqat eng yaqin shaxsiy va iqtisodiy aloqalarga (hayotiy manfaatlar markazi) ega boʻlgan Davlatning rezidenti boʻlib hisoblanadi;

b) agar shaxs hayotiy manfaatlar markaziga ega boʻlgan Davlatni aniqlab boʻlmasa yoki u Davlatlarning hech birida oʻzining yashashi mumkin boʻlgan doimiy uy-joyga ega boʻlmasa, ushbu shaxs faqat u odatda turadigan Davlatning rezidenti boʻlib hisoblanadi;

c) agar shaxs odatda har ikki Davlatda yashasa yoki u odatda ulardan hech birida yashamasa, mazkur shaxs faqat oʻzi fuqarosi boʻlgan Davlatning rezidenti boʻlib hisoblanadi;

d) agar shaxs har ikki Davlatning fuqarosi boʻlsa yoki ulardan hech birining fuqarosi hisoblanmasa, Ahdlashuvchi Davlatlarning vakolatli organlari mazkur masalani oʻzaro kelishuv boʻyicha hal qilishlari lozim.

3. Agar 1-bandning qoidalariga muvofiq jismoniy shaxs boʻlmagan shaxs har ikki Ahdlashuvchi Davlatning rezidenti hisoblansa, u faqat oʻzining amaldagi boshqaruv organi joylashgan davlatning rezidenti hisoblanadi.

5-modda Doimiy muassasa

1. Mazkur Konvensiyaning maqsadlari uchun “doimiy muassasa” atamasi korxona unda tadbirkorlik faoliyatini toʻliq yoki qisman amalga oshiradigan doimiy faoliyat joyini anglatadi.

2. “Doimiy muassasa” atamasi, xususan, quyidagilarni oʻz ichiga oladi:

a) boshqarish joyi;

b) boʻlinma;

c) ofis;

d) fabrika;

e) ustaxona, va

f) shaxta, neft yoki gaz qudugʻi, ochiq kon yoki har qanday boshqa tabiiy resurslarni qazib olish joyi.

3. Qurilish maydoni, qurilish, montaj yoki yigʻish obyekti faqat bunday maydon, obyekt yoki faoliyatning muddati 9 oydan ortiq davom etgandagina doimiy muassasa hisoblanadi.

4. Mazkur moddaning oldingi qoidalaridan qatʼi nazar, “doimiy muassasa” atamasi quyidagilarni oʻz ichiga olmaydi:

a) inshootlardan faqat mazkur korxonaga tegishli boʻlgan tovarlar yoki buyumlarni saqlash, namoyish qilish yoki yetkazib berish maqsadida foydalanish;

b) mazkur korxonaga tegishli boʻlgan tovarlar yoki buyumlar zaxirasini faqat saqlash, namoyish qilish yoki yetkazib berish maqsadida saqlash;

c) mazkur korxonaga tegishli boʻlgan tovarlar yoki buyumlar zaxirasini faqat boshqa korxona tomonidan qayta ishlash maqsadida saqlash;

d) doimiy faoliyat joyini faqat tovarlar yoki buyumlarni xarid qilish maqsadida yoki mazkur korxona uchun axborot yigʻish maqsadida saqlash;

e) doimiy faoliyat joyini faqat mazkur korxona manfaatlari uchun tayyorlov yoki yordamchi xususiyatga ega har qanday boshqa faoliyatni amalga oshirish maqsadidagina saqlash;

f) doimiy faoliyat joyini (a) — (e) kichik bandlarida aytib oʻtilgan faoliyat turlarini har qanday birga qoʻshish maqsadidagina saqlash, basharti bunday qoʻshishdan yuzaga keladigan ushbu doimiy faoliyat joyining umumiy faoliyati tayyorlov yoki yordamchi xususiyatga ega boʻlsa.

5. 1 va 2-bandlarining qoidalaridan qatʼi nazar, 6-bandni qoʻllash mumkin boʻlgan mustaqil maqomga ega agentdan boshqa shaxs korxona nomidan ish koʻrsa va Ahdlashuvchi davlatda korxona nomidan shartnomalarni tuzish vakolatiga ega boʻlsa hamda odatda uni amalga oshirsa, unda mazkur korxona shu Davlatda ushbu shaxs mazkur korxona uchun amalga oshirayotgan har qanday faoliyatga nisbatan doimiy muassasaga ega deb, hisoblanadi, faqat bunday shaxsning faoliyati 4-bandda qayd etilgan faoliyat turlari bilan cheklanmagan boʻlsa, ushbu faoliyat turlari doimiy faoliyat joyi orqali amalga oshirilayotgan boʻlsa, mazkur bandning qoidalariga koʻra ushbu doimiy faoliyat joyini doimiy muassasaga aylantirmaydi.

6. Korxona Ahdlashuvchi Davlatda tadbirkorlik faoliyatini broker, vositachi yoki mustaqil maqomga ega boʻlgan har qanday boshqa agent orqali amalga oshirayotganligi bois u mazkur Davlatda doimiy muassasaga ega deb hisoblanmaydi, basharti ushbu shaxslar oʻzlarining odatdagi faoliyati doirasida ish yuritayotgan boʻlsa.

7. Bir Ahdlashuvchi Davlat rezidenti boʻlgan kompaniyaning boshqa Ahdlashuvchi davlatning rezidenti boʻlgan kompaniyani nazorat qilishi yoki uning tomonidan nazorat qilinishi yoxud ushbu boshqa Davlatda tijorat faoliyatini (doimiy muassasa orqali yoki boshqacha tarzda) amalga oshirishi oʻz-oʻzidan ushbu kompaniyalardan birini boshqasining doimiy muassasasiga aylantirmaydi.

6-modda Koʻchmas mulkdan olinadigan daromadlar

1. Bitta Ahdlashuvchi Davlatning rezidenti tomonidan boshqa Ahdlashuvchi Davlatda joylashgan koʻchmas mulkdan olinadigan daromadga (shu jumladan qishloq yoki oʻrmon xoʻjaligidan olinadigan daromadga) mazkur boshqa Davlatda soliq solinishi mumkin.

2. “Koʻchmas mulk” atamasi koʻrib chiqilayotgan mol-mulk joylashgan Ahdlashuvchi Davlatning qonunchiligiga koʻra ega boʻlgan maʼnoga egadir. Mazkur atama har qanday holatda koʻchmas mulk bilan birga boʻlgan mol-mulk, chorva hamda qishloq xoʻjaligi va oʻrmonchilik uchun moʻljallangan inventarni, egalik huquqi yer usti mulkiga, uzufrukt koʻchmas mulkiga taalluqli umumiy qonunchilik qoidalari bilan belgilangan huquqlar hamda minerallar qatlamlari, konlar va boshqa tabiiy resurslarni qazib olish yoki qazib olish huquqi uchun kompensatsiya sifatida toʻlanadigan oʻzgaruvchan yoki qatʼiy belgilangan toʻlovlarga boʻlgan huquqni oʻz ichiga oladi. Dengiz, havo kemalari, temir yoʻl va avtomobil transporti vositalari koʻchmas mulk sifatida baholanmaydi.

3. 1-bandning qoidalari koʻchmas mulkdan bevosita foydalanish, ijaraga berish yoki har qanday boshqa shaklda foydalanishdan olinadigan daromadga nisbatan qoʻllaniladi.

7-modda Tadbirkorlik faoliyatidan olinadigan foyda

1. Bir Ahdlashuvchi Davlat korxonasining foydasiga, agar korxona boshqa Ahdlashuvchi Davlatda unda joylashgan doimiy muassasa orqali oʻzining tadbirkorlik faoliyatini amalga oshirmayotgan boʻlsa, faqat shu Davlatda soliq solinadi. Agar korxona oʻz faoliyatini yuqorida qayd etilganidek amalga oshirayotgan boʻlsa, boshqa Ahdlashuvchi Davlatda korxona foydasiga, faqat ushbu doimiy muassasaning faoliyatiga taalluqli qismiga, soliq solinishi mumkin.

2. 3-bandning qoidalariga muvofiq, agar bir Ahdlashuvchi Davlatning korxonasi boshqa Ahdlashuvchi Davlatda unda joylashgan doimiy muassasa orqali tadbirkorlik faoliyatini amalga oshirayotgan boʻlsa, unda har bir Ahdlashuvchi Davlatda ushbu doimiy muassasa hisobiga u xuddi shu yoki shunga oʻxshash sharoitda, xuddi shu yoki shunga oʻxshash faoliyatni amalga oshirayotgan alohida va mustaqil korxona boʻlib, doimiy muassasasi hisoblangan korxonadan mustaqil faoliyat yuritgan taqdirda olishi mumkin boʻlgan foyda yoziladi.

3. Doimiy muassasa foydasini aniqlashda mazkur doimiy muassasaning faoliyat maqsadlari uchun sarflangan xarajatlar, shu jumladan ham doimiy muassasa joylashgan Davlatda, ham uning tashqarisida sarflangan boshqaruv va umumiy maʼmuriy xarajatlarni chegirishga ruxsat etiladi.

4. Ahdlashuvchi Davlatda korxonaning jami foyda summasini uning turli boʻlinmalariga mutanosib ravishda taqsimlash asosida doimiy muassasaga tegishli boʻlgan foydani aniqlash oddiy amaliyot hisoblanishiga qaramay, 2-banddagi hech narsa mazkur Davlatga, amaliyotdan kelib chiqqan holda taqsimlash orqali soliq solinadigan foydani aniqlashni taqiqlamaydi; biroq, tanlangan taqsimlash usuli mazkur moddadagi prinsiplarga mos keladigan natijani berishi lozim.

5. Doimiy muassasa tomonidan yolgʻiz mazkur korxona uchun tovarlar yoki buyumlar faqat sotib olish asosida doimiy muassasaga biror foyda yozilmaydi.

6. Yuqoridagi bandlarning maqsadlari uchun doimiy muassasaga tegishli foyda, agar uni oʻzgartirish uchun asosli va yetarli sabab boʻlmasa, har yili bir xil usulda aniqlanadi.

7. Foyda mazkur Konvensiyaning boshqa moddalarida alohida aytib oʻtilgan daromad turlarini oʻz ichiga olganda, mazkur moddaning qoidalari ushbu moddalarning qoidalariga daxl qilmaydi.

8-modda Xalqaro transport

1. Bitta Ahdlashuvchi Davlat korxonasining xalqaro tashishlarda dengiz, havo kemalari, temir yoʻl yoki avtomobil transporti vositalaridan foydalanishdan olingan foydasiga faqat shu Davlatda soliq solinadi.

2. Mazkur moddaning maqsadlari uchun, xalqaro tashishlarda dengiz, havo kemalari, temir yoʻl yoki avtomobil transporti vositalaridan foydalanishdan olingan foyda xalqaro tashishlarda dengiz, havo kemalari, temir yoʻl yoki avtomobil transporti vositalarini ijaraga berishdan olingan foydani oʻz ichiga oladi, basharti bunday dengiz, havo kemalari, temir yoʻl yoki avtomobil transporti vositalaridan xalqaro tashishlarda foydalaniladigan boʻlsa yoki ijaradan olingan bunday foyda 1-bandda taʼriflangan foydaga nisbatan tasodifiy hisoblansa.

3. 1-bandning qoidalari konteynerlardan (shu jumladan treylerlar va konteynerlarni tashish bilan bogʻliq boshqa uskunalar)dan foydalanish, ularni saqlash yoki ijaraga berishdan olinadigan foydaga nisbatan ham qoʻllaniladi, basharti bunday foyda 1-band tatbiq etiladigan foydalarga nisbatan qoʻshimcha yoki tasodifiy hisoblansa.

4. 1, 2 va 3-bandlarning qoidalari shuningdek, transport vositalarini ishlatish boʻyicha pulda, birgalikdagi faoliyatda yoki xalqaro tashkilotda ishtirok etishdan olingan foydaga nisbatan ham qoʻllaniladi.

9-modda Birlashgan korxonalar

1. Agar:

a) Ahdlashuvchi Davlatning korxonasi boshqa Ahdlashuvchi Davlat korxonasining boshqaruvi, nazorati yoki kapitalida bevosita yoki bilvosita qatnashayotgan, yoki

b) aynan oʻsha shaxslar bir Ahdlashuvchi Davlat korxonasining hamda boshqa Ahdlashuvchi Davlat korxonasining boshqaruvi, nazorati yoki kapitalida bevosita yoki bilvosita qatnashayotgan boʻlsa, va har qanday holatda korxonalar oʻrtasida ularning tijoriy va moliyaviy munosabatlarida mustaqil korxonalar oʻrtasida yaratiladigan shartlardan farqlanadigan shartlar yaratiladi yoki belgilanadi, unda ulardan biriga yozilishi mumkin boʻlgan, biroq mazkur shartlar mavjudligi sababli, unga yozilmagan har qanday foyda ushbu korxonaning foydasiga kiritilishi va unga tegishli ravishda soliq solinishi mumkin.

2. Ahdlashuvchi Davlat ushbu Davlat korxonasining foydasiga boshqa Ahdlashuvchi Davlatning korxonasiga mazkur boshqa Ahdlashuvchi Davlatda soliq solinadigan foydani kiritgan va tegishlicha soliq solganda hamda shunday tarzda kiritilgan foyda, ikki korxona oʻrtasidagi munosabatlar xuddi ikki mustaqil korxona oʻrtasidagi kabi boʻlganda birinchi aytib oʻtilgan Davlatning korxonasiga yozilishi mumkin boʻlgan foyda boʻladi, bu holda ushbu boshqa Davlat unda mazkur foydaga hisoblangan soliqqa tegishli tuzatishlarni kiritadi. Bunday tuzatishni belgilashda mazkur Konvensiyaning boshqa qoidalariga tegishli eʼtibor qaratilishi lozim va Ahdlashuvchi Davlatlarning vakolatli organlari, zarur boʻlsa oʻzaro maslahatlashuvlarni boshlashi kerak.

10-modda Dividendlar

1. Bir Ahdlashuvchi Davlatning rezidenti boʻlgan kompaniya tomonidan boshqa Ahdlashuvchi Davlatning rezidentiga toʻlanadigan dividendlarga ushbu boshqa Davlatda soliq solinishi mumkin.

2. Biroq dividendlarni toʻlayotgan kompaniya rezidenti boʻlgan Ahdlashuvchi Davlatda ham bunday dividendlarga mazkur Ahdlashuvchi Davlatning qonunchiligiga muvofiq soliq solinishi mumkin, ammo dividend olishga amalda haqli boʻlgan oluvchi boshqa Ahdlashuvchi Davlatning rezidenti boʻlsa, shunday tarzda olinadigan soliq:

a) agar dividendlarni olishga amalda haqli boʻlgan shaxs dividend toʻlayotgan kompaniya kapitalining kamida 10 foiziga bevosita egalik qilsa, jami dividendlar summasining 5 foizidan;

b) qolgan barcha hollarda dividendlar jami summasining 10 foizidan oshmasligi lozim.

3. “Dividendlar” atamasidan mazkur moddada foydalanilganda aksiyalardan yoki aksiyalarni ishlatishdan yoki taʼsischilarning huquqlari, aksiyalaridan foydalanishdan yoki qarz majburiyatlari hisoblanmagan, foyda olishda ishtirok etish huquqini beradigan boshqa huquqlardan foydalanishdan olingan daromadni, shuningdek foydani taqsimlovchi kompaniya rezidenti boʻlgan Davlatning milliy qonunchiligiga muvofiq aksiyalardan olinadigan daromad kabi xuddi shunday soliqlar bilan tartibga solinishi lozim boʻlgan boshqa daromadni anglatadi.

4. Agar dividendlarning amaldagi egasi bir Ahdlashuvchi Davlatning rezidenti boʻlgan holda boshqa Ahdlashuvchi Davlatda faoliyatni amalga oshirayotgan boʻlsa va boshqa Ahdlashuvchi davlatda joylashgan doimiy muassasa orqali dividendlarni toʻlayotgan kompaniya shu davlatning rezidenti boʻlsa hamda dividendlar Nisbatan toʻlanayotgan xolding bunday doimiy muassasa bilan amalda bogʻlangan boʻlsa, 1-bandning qoidalari qoʻllanilmaydi. Bunday holatda 7-modda qoidalari qoʻllaniladi.

5. Agar bir Ahdlashuvchi Davlatning rezidenti boʻlgan kompaniya boshqa Ahdlashuvchi Davlatda foyda yoki daromad olayotgan boʻlsa, ushbu boshqa Ahdlashuvchi Davlat kompaniya tomonidan toʻlanayotgan dividendlarga soliq solmasligi mumkin, bunday dividendlar shu boshqa Ahdlashuvchi Davlatning rezidentiga toʻlanadigan yoki dividendlar nisbatan toʻlanadigan xolding doimiy muassasa bilan amalda bogʻlangan hollar bundan mustasno, shuningdek kompaniyaning taqsimlanmagan foydasiga, hatto toʻlanayotgan dividendlar yoki taqsimlanmagan foydaga mazkur boshqa Davlatda vujudga keladigan foyda yoki daromaddan toʻla yoki qisman tashkil topgan boʻlsa ham, soliq solinmasligi mumkin.

11-modda Foizlar

1. Bitta Ahdlashuvchi Davlatda yuzaga keladigan hamda boshqa Ahdlashuvchi Davlatda rezidentga toʻlanadigan foizlarga mazkur boshqa Ahdlashuvchi Davlatda soliq solinishi mumkin.

2. Biroq bunday foizlarga shuningdek, ular ushbu Ahdlashuvchi Davlatning milliy qonunchiligiga muvofiq yuzaga keladigan mazkur Davlatda soliq solinishi mumkin, ammo boshqa Ahdlashuvchi Davlatning rezidenti foizlarning amaldagi egasi boʻlsa, bu holda soliq foizlarning yalpi summasining 5 foizidan oshmasligi lozim.

3. “Foizlar” atamasi mazkur moddada foydalanilganda ipoteka taʼminotidan qatʼi nazar, har qanday turdagi qarz talabnomalaridan, xususan, hukumat qimmatli qogʻozlaridan olinadigan daromad hamda obligatsiyalar yoki qarz majburiyatlaridan olingan daromadni, shu jumladan ushbu qimmatli qogʻozlar, obligatsiyalar yoki qarz majburiyatlari boʻyicha mukofotlar va yutuqlarni, shuningdek daromad yuzaga keladigan davlatning qonunchiligiga koʻra pulni qarzga berishdan olinadigan daromad sifatida baholanadigan boshqa daromadni bildiradi, biroq 10-moddadagi dividendlar sifatida baholanadigan hech qanday daromadni oʻz ichiga olmaydi. Oʻz vaqtida toʻlanmaganligi uchun jarimalar mazkur moddaning maqsadlari uchun foizlar sifatida baholanmaydi.

4. Agar foizlarning amaldagi egasi bir Ahdlashuvchi Davlatning rezidenti boʻlgan holda boshqa Ahdlashuvchi Davlatda faoliyatni amalga oshirayotgan boʻlsa va boshqa Ahdlashuvchi davlatda joylashgan doimiy muassasa orqali foizlar vujudga kelayotgan boʻlsa hamda foizlar toʻlanadigan qarz talabi bunday doimiy muassasa bilan amalda bogʻlangan boʻlsa, 1-bandning qoidalari qoʻllanilmaydi. Bunday holatda 7-modda qoidalari qoʻllaniladi.

5. Davlatning oʻzi, maʼmuriy-hududiy boʻlinma, mahalliy hokimiyat organi yoki ushbu Davlatning rezidenti toʻlovchi boʻlganda foizlar Ahdlashuvchi Davlatda yuzaga kelgan hisoblanadi. Ammo, foizlarni toʻlovchi shaxs, Ahdlashuvchi Davlatning rezidenti boʻlgan yoki boʻlmagan holda qarzdorlik boʻyicha toʻlanayotgan foizlar vujudga kelgan Davlatda doimiy muassasaga ega boʻlganda va ushbu doimiy muassasa bunday foizlarni toʻlash boʻyicha xarajatlar qilganda, foizlar doimiy muassasa joylashgan Ahdlashuvchi Davlatda vujudga kelgan hisoblanadi.

6. Agar toʻlovchi bilan foizlarning amaldagi egasi oʻrtasidagi yoki ularning ikkalasi bilan boshqa biror shaxs oʻrtasidagi alohida munosabatlar tufayli qarz talabnomasiga tegishli boʻlgan va unga nisbatan toʻlanadigan foizlar summasi bunday munosabatlar boʻlmaganda toʻlovchi bilan amaldagi ega oʻrtasida kelishilishi mumkin boʻlgan summadan ortiq boʻlsa, mazkur modda qoidalari faqat oxirgi qayd etilgan summaga nisbatan qoʻllaniladi. Bunday holatda toʻlovning ortiqcha qismiga avvalgidek, har bir Ahdlashuvchi Davlatning qonunchiligiga muvofiq mazkur Konvensiyaning boshqa qoidalarini hisobga olgan holda soliq solinadi.

12-modda Royalti

1. Bir Ahdlashuvchi Davlatda yuzaga keladigan va boshqa Ahdlashuvchi Davlatning rezidentiga toʻlanadigan royaltiga ushbu boshqa Davlatda soliq solinishi mumkin.

2. Biroq, ushbu royaltilarga ular yuzaga keladigan Ahdlashuvchi Davlatda ham, mazkur Davlatning milliy qonunchiligiga muvofiq, soliq solinishi mumkin ammo, basharti, royaltining amaldagi egasi boshqa Ahdlashuvchi Davlatning rezidenti boʻlsa, shunday tarzda undiriladigan soliq yalpi royalti summasining 5 foizidan oshmasligi lozim.

3. “Royalti” atamasi mazkur moddada ishlatilganda adabiyot, sanʼat va ilmiy asarlarga, shu jumladan kinofilmlarga har qanday mualliflik huquqlaridan, har qanday patent, tovar belgisi, chizmalar yoki modellar, sxemalar, maxfiy formulalar yoki jarayonlardan foydalanganlik yoki foydalanish huquqini berish yoxud sanoat, tijorat yoki ilmiy tajribaga taalluqli maʼlumot uchun mukofot sifatida olinadigan har qanday turdagi toʻlovlarni bildiradi.

4. Agar royaltining amaldagi egasi bir Ahdlashuvchi Davlatning rezidenti boʻlgan holda royalti vujudga keladigan boshqa Ahdlashuvchi Davlatda unda joylashgan doimiy muassasa orqali tijorat faoliyatini amalga oshirayotgan boʻlsa va royalti nisbatan toʻlanayotgan huquq yoki mol-mulk bunday doimiy muassasa bilan haqiqatan ham bogʻlangan boʻlsa, 1-bandning qoidalari qoʻllanilmaydi. Bunday holatda sharoitga qarab 7-modda qoidalari qoʻllaniladi.

5. Agar Ahdlashuvchi Davlatning rezidenti toʻlovchi boʻlsa, royalti ushbu Davlatda vujudga keladi deb hisoblanadi. Biroq, royaltini toʻlayotgan shaxs, uning Ahdlashuvchi Davlat rezidenti boʻlgani yoki boʻlmaganligidan qatʼi nazar, Ahdlashuvchi Davlatda doimiy muassasaga ega boʻlsa va bunday doimiy muassasa toʻlov boʻyicha xarajatlarni koʻtarayotgan boʻlsa, u holda bunday royalti doimiy muassasa joylashgan Ahdlashuvchi Davlatda yuzaga keladi deb hisoblanadi.

6. Agar toʻlovchi bilan royaltining amaldagi egasi oʻrtasidagi yoki ularning ikkalasi bilan boshqa biror shaxs oʻrtasidagi alohida munosabatlar tufayli foydalanishga, foydalanish huquqiga yoki maʼlumotga tegishli boʻlgan va ular uchun toʻlanayotgan royalti summasi bunday munosabatlar boʻlmaganda toʻlovchi bilan ushbu daromadlarning amaldagi egasi oʻrtasida kelishilishi mumkin boʻlgan summadan ortiq boʻlsa, mazkur modda qoidalari faqat oxirgi qayd etilgan. summaga nisbatan qoʻllaniladi. Bunday holatda toʻlovning ortiqcha qismiga avvalgidek, har bir Ahdlashuvchi Davlatning qonunchiligiga muvofiq mazkur Konvensiyaning boshqa qoidalarini hisobga olgan holda soliq solinadi.

13-modda Mol-mulk qiymatining ortishidan olinadigan daromadlar

1. Bir Ahdlashuvchi Davlatning rezidenti tomonidan 6-moddada qayd etilgan va boshqa Ahdlashuvchi Davlatda joylashgan koʻchmas mulkni tasarrufdan chiqarishdan olinadigan daromadlarga mazkur boshqa Davlatda soliq solinishi mumkin.

2. Bir Ahdlashuvchi Davlatning korxonasi boshqa Ahdlashuvchi Davlatda ega boʻlgan doimiy muassasaning ishga aloqador mulkining bir qismini tashkil qiluvchi koʻchar mulkni tasarrufdan chiqarishdan olingan daromadlar, shu jumladan ushbu doimiy muassasani (alohida yoki korxona bilan birga) tasarrufdan chiqarishdan olinadigan daromadlarga mazkur boshqa Davlatda soliq solinishi mumkin.

3. Ahdlashuvchi Davlatning rezidenti tomonidan Ahdlashuvchi Davlatning korxonasi xalqaro tashishlarda foydalanadigan dengiz yoki havo kemalari, temir yoʻl yoki avtomobil transporti vositalarini tasarrufdan chiqarishdan olinadigan yoki bunday dengiz yoki havo kemalari, temir yoʻl yoki avtomobil transporti vositalaridan foydalanishga tegishli koʻchar mulkni tasarrufdan chiqarishdan olinadigan daromadlarga faqat shu Davlatda soliq solinadi.

4. Bir Ahdlashuvchi Davlatning rezidenti tomonidan:

a) boshqa Ahdlashuvchi Davlatda joylashgan koʻchmas mulkdan bevosita yoki bilvosita oʻz qiymatining 50 foizidan ortigʻi olingan aksiyalardan, belgilangan birjada kvotalanadigan aksiyalarni boshqa narsalarni, yoki

b) boshqa Ahdlashuvchi Davlatda joylashgan koʻchmas mulkdan bevosita yoki bilvosita oʻz qiymatining 50 foizidan ortigʻi olingan shirkat yoki trastdagi foizlarni tasarrufdan chiqarishdan olinadigan daromadga ushbu boshqa Ahdlashuvchi Davlatda soliq solinishi mumkin.

5. Yuqoridagi bandlarda sanab oʻtilmagan har qanday boshqa mol-mulkni tasarrufdan chiqarishdan olinadigan daromadlarga mol-mulkni tasarrufdan chiqarayotgan shaxs rezidenti boʻlgan Ahdlashuvchi Davlatdagina soliq solinadi.

6. 5-bandning qoidalari Ahdlashuvchi Davlatning oʻz qonunchiligiga muvofiq boshqa Ahdlashuvchi Davlatning rezidenti boʻlgan va har qanday vaqtda mol-mulkni begonalashtirishdan bevosita oldin 5 yil davomida birinchi aytib oʻtilgan Davlatning rezidenti boʻlgan jismoniy shaxs tomonidan har qanday mol-mulkni tasarrufdan chiqarishdan olinadigan daromad qiymatining ortishiga soliq solish huquqiga nisbatan qoʻllanilmaydi.

14-modda Bandlikdan olinadigan daromadlar

1. 15, 17 va 18-moddalar qoidalarini hisobga olgan holda, bir Ahdlashuvchi Davlatning rezidenti tomonidan yollanib ishlashga taalluqli olinadigan maoshlar, ish haqi va boshqa shunga oʻxshash mukofotlarga, agar boshqa Ahdlashuvchi Davlatda yollanib ishlanilayotgan boʻlmasa, faqat ushbu Davlatda soliq solinadi. Agar yollanib ishlash shu tariqa amalga oshirilayotgan boʻlsa, shu munosabat bilan olingan mukofotga ushbu boshqa Davlatda soliq solinishi mumkin.

2. 1-bandning qoidalaridan qatʼi nazar, bir Ahdlashuvchi Davlatning rezidenti tomonidan boshqa Ahdlashuvchi Davlatda yollanib ishlash uchun olinadigan mukofotga agar:

a) oluvchi koʻrib chiqilayotgan moliya yilida boshlanadigan yoki tugaydigan har qanday oʻn ikki oylik davr chegarasida jami boʻlib 183 kundan oshmaydigan davr yoki davrlar davomida boshqa Davlatda boʻlsa, va

b) mukofot boshqa Davlatning rezidenti boʻlmagan yollagan shaxs tomonidan yoki yollagan shaxs nomidan toʻlanayotgan boʻlsa, va

c) mukofotni toʻlash boʻyicha xarajatlarni yollovchi boshqa Davlatda ega boʻlgan doimiy muassasa yoki doimiy baza koʻtarmayotgan boʻlsada faqat birinchi aytib oʻtilgan Davlatda soliq solinadi.

3. Mazkur moddaning oldingi qoidalaridan qatʼi nazar, Ahdlashuvchi Davlatning korxonasi tomonidan xalqaro tashishlarda foydalanadigan dengiz, havo kemalari, temir yoʻl yoki avtomobil transporti vositalari bortida yollanib ishlaganlik uchun olinadigan mukofotlarga shu Davlatda soliq solinishi mumkin.

15-modda Direktorlarning gonorarlari

Direktorlarning gonorarlari va bir Ahdlashuvchi Davlatning rezidenti boshqa Ahdlashuvchi Davlatning rezidenti boʻlgan kompaniya Direktorlar kengashining aʼzosi sifatida oladigan boshqa shunga oʻxshash toʻlovlarga ushbu boshqa Davlatda soliq solinishi mumkin.

16-modda Sanʼat xodimlari va sportchilar

1. 7 va 14-moddalarning qoidalaridan qatʼi nazar, bir Ahdlashuvchi Davlatning rezidenti tomonidan boshqa Ahdlashuvchi Davlatda amalga oshirayotgan oʻz shaxsiy faoliyati tufayli teatr, kino, radio yoki televideniye artisti yoki musiqachi kabi sanʼat xodimi sifatida, yoxud sportchi sifatida olinadigan daromadga ushbu boshqa Davlatda soliq solinishi mumkin.

2. Sanʼat xodimi yoki sportchi tomonidan uning shunday sifatida amalga oshiriladigan shaxsiy faoliyatdan olinadigan daromad sanʼat xodimi yoki sportchining oʻziga emas, boshqa shaxsga yoziladigan taqdirda, 7 va 14-moddalarning qoidalaridan qatʼi nazar, ushbu daromadga sanʼat xodimi yoki sportchining faoliyati amalga oshirilayotgan Ahdlashuvchi Davlatda soliq solinishi mumkin.

17-modda Pensiyalar va annuitetlar

1. 18-modda 2-bandining qoidalarini hisobga olgan holda, Ahdlashuvchi Davlatning rezidentiga ilgari yollanib ishlaganlik uchun kompensatsiya sifatida toʻlanadigan pensiyalar va boshqa shunga oʻxshash mukofotlar hamda bunday rezidentga toʻlanadigan har qanday annuitetlarga faqat shu Davlatda soliq solinadi.

2. “Annuitetlar” atamasi pulli yoki qiymat shaklida aynan mos va toʻliq qoplanish evaziga toʻlovlarni amalga oshirish majburiyatlari boʻyicha hayot davomida yoxud maxsus yoki maʼlum davr mobaynida vaqti-vaqti bilan toʻlanadigan belgilangan summani anglatadi.

18-modda Hukumat xizmati

1. a) Ahdlashuvchi Davlat yoki mahalliy hokimiyat organi tomonidan jismoniy shaxsga ushbu Davlatga yoki boʻlinma yoki mahalliy hokimiyat organiga hukumat xususiyatiga ega boʻlgan majburiyatlarni bajarishda koʻrsatilgan xizmatlar yuzasidan toʻlanadigan pensiyalardan tashqari oylik ish haqi, maoshlar va boshqa shunga oʻxshash mukofotlarga faqat ushbu Davlatda soliq solinadi.

b) Biroq, bunday oylik ish haqi, maoshlar va boshqa shunga oʻxshash mukofotlarga faqat boshqa Ahdlashuvchi Davlatda soliq solinadi, basharti xizmat mazkur Davlatda amalga oshirilayotgan boʻlsa va jismoniy shaxs mazkur Davlatning rezidenti boʻlsa va u:

(i) mazkur Davlatning fuqarosi boʻlsa; yoki

(ii) faqat mazkur xizmatni amalga oshirish maqsadida ushbu Davlatning rezidentiga aylanmagan boʻlsa.

2. a) 1-bandning qoidalaridan qatʼi nazar, Ahdlashuvchi Davlat yoki mahalliy hokimiyat organlari tomonidan yoki ular tuzgan jamgʻarmalardan ushbu Davlatga yoki boʻlinmaga yoki mahalliy hokimiyat organiga hukumat xususiyatiga ega boʻlgan majburiyatlarni bajarish chogʻida koʻrsatilgan xizmatlar uchun toʻlanadigan pensiyalar va boshqa shunga oʻxshash mukofotlarga faqat mazkur Davlatda soliq solinadi.

b) Biroq, agar jismoniy shaxs boshqa Ahdlashuvchi Davlatning rezidenti va fuqarosi boʻlsa, bunday pensiya va boshqa shunga oʻxshash mukofotga faqat shu Davlatda soliq solinishi mumkin.

3. 14, 15, 16 va 17-moddalar qoidalari Ahdlashuvchi Davlat yoki siyosiy boʻlinma yoki mahalliy hokimiyat organi tomonidan amalga oshiriladigan tijorat faoliyati munosabati bilan koʻrsatilgan xizmatlar yuzasidan toʻlanadigan ish haqi, maoshlar, pensiyalar va boshqa shunga oʻxshash mukofotlarga nisbatan qoʻllaniladi.

19-modda Talabalar va stajorlar

Bir Ahdlashuvchi Davlatga bevosita kelishdan oldin boshqa Ahdlashuvchi Davlatning rezidentlari hisoblangan yoki hisoblanuvchi va birinchi aytib oʻtilgan Davlatda faqat oʻqish yoki taʼlim olish maqsadida boʻlgan talaba yoki stajor tomonidan olinadigan hamda yashash, oʻqish yoki taʼlim olish maqsadlari uchun moʻljallangan toʻlovlarga mazkur Davlatda soliq solinmaydi, basharti bunday toʻlovlar mazkur Davlat hududidan tashqaridagi manbalardan vujudga kelgan boʻlsa.

20-modda Professorlar va ilmiy xodimlar

1. Ahdlashuvchi Davlatga tashrif buyurishdan bevosita oldin boshqa Ahdlashuvchi Davlatning rezidenti hisoblangan yoki hisoblanuvchi va birinchi aytib oʻtilgan Ahdlashuvchi Davlatning vakolatli organi tomonidan eʼtirof etilgan har qanday universitet, kolledj, maktab yoki boshqa shunga oʻxshash taʼlim muassasasining taklifiga binoan ushbu birinchi aytib oʻtilgan Ahdlashuvchi Davlatga ikki yildan ortiq boʻlmagan muddat davomida ushbu taʼlim muassasasida faqat oʻqish va /yoki ilmiy tadqiqot olib borish maqsadida tashrif buyuradigan shaxs ushbu Ahdlashuvchi Davlatda bunday oʻqish yoki ilmiy tadqiqotdan olingan har qanday mukofotlarga soliq toʻlashdan ozod qilinadi.

2. Agar shaxs tomonidan ilmiy tadqiqot birinchi navbatda alohida shaxs yoki shaxslarning foydasi uchun olib borilsa, 1-band qoidalari ushbu tadqiqotdan olingan daromadga nisbatan tatbiq etilmaydi.

21-modda Boshqa daromadlar

1. Ahdlashuvchi Davlat rezidentining mazkur Konvensiyaning oldingi moddalarida aytib oʻtilmagan daromadlari turlariga, ular qayerda yuzaga kelganidan qatʼi nazar, faqat ushbu Davlatda soliq solinadi.

2. 1-band qoidalari 6-moddaning 2-bandida belgilangan koʻchmas mulkdan olingan daromadlardan boshqa daromadlarga nisbatan qoʻllanilmaydi, basharti bunday daromadlar oluvchisi bir Ahdlashuvchi Davlatning rezidenti boʻlgan holda, boshqa Ahdlashuvchi Davlatda u erda joylashgan doimiy muassasa orqali faoliyat yuritayotgan boʻlsa va daromad nisbatan toʻlanayotgan huquq yoki mol- mulk haqiqatan ham bunday doimiy muassasa bilan bogʻliq boʻlsa. Bu holda 7-modda qoidalari qoʻllaniladi.

22-modda Mol-mulk

1. Bir Ahdlashuvchi Davlat rezidentining boshqa Ahdlashuvchi Davlatda joylashgan koʻchmas mulkiga ushbu boshqa Davlatda soliq solinishi mumkin.

2. Bir Ahdlashuvchi Davlat korxonasining boshqa Ahdlashuvchi Davlatdagi doimiy muassasasining tadbirkorlik bilan bogʻliq mulkining bir qismini tashkil qiluvchi koʻchar mulkka ushbu boshqa Ahdlashuvchi Davlatda soliq solinishi mumkin.

3. Xalqaro tashishlarda foydalanadigan dengiz va havo kemalari, temir yoʻl yoki avtomobil transport vositalaridan hamda bunday dengiz va havo kemalari, temir yoʻl va avtomobil transporti vositalaridan foydalanishga taalluqli koʻchar mulkdan iborat mol-mulkka faqat ushbu Davlatda soliq solinadi.

4. Ahdlashuvchi Davlatning rezidenti mol-mulkining qolgan barcha tarkibiy qismlariga faqat ushbu davlatda soliq solinadi.

23-modda Ikkiyoqlama soliq solishni bartaraf etish

1. Oʻzbekiston qonunchiligi qoidalarini hisobga olgan holda:

Oʻzbekiston rezidenti mazkur Konvensiyaning qoidalariga muvofiq Irlandiyada soliq solinishi mumkin boʻlgan daromad olgan taqdirda, Oʻzbekiston bu rezidentdan olinadigan daromad soligʻidan Irlandiyada toʻlangan daromad soligʻiga teng summani chegirishga ruxsat etishi lozim.

Bunday chegirishlar, har qanday holatda, chegirishdan oldin hisoblab chiqilgan, olinadigan daromad soligʻining mazkur holdagi kabi, Irlandiyada soliq solinishi mumkin boʻlgan daromadga taalluqli qismidan oshmasligi lozim.

2. Irlandiya qonunchiligining Irlandiya hududidan tashqarida toʻlanadigan (tegishli ravishda, umumiy qoidaga nisbatan kuchga ega boʻlmagan) irland soligʻini hisobga olish sifatida kamaytirishlarga oid qoidalarini hisobga olgan holda:

a) Oʻzbekiston qonunlariga koʻra va mazkur Konvensiyaga muvofiq toʻlanadigan oʻzbek soligʻi, toʻgʻridan toʻgʻri yoki kamaytirish yoʻli bilan, foyda, daromad yoki qiymatning ortishidan, Oʻzbekiston chegarasidagi manbalardan olinishidan qatʼi nazar (dividendlar toʻlanadigan foydaga nisbatan toʻlanadigan dividendlar soligʻi bundan mustasno), oʻzbek soligʻidan hisoblangan daromadga havola qilgan holda, shunga oʻxshash foyda, daromad yoki qiymatning oʻsishiga havola qilish yoʻli bilan hisoblab chiqilgan har bir irland soligʻidan chegirilishi lozim.

b) Oʻzbekiston rezidenti hisoblangan kompaniya tomonidan Irlandiya rezidenti hisoblangan hamda dividendlar toʻlovchi kompaniyada nazorat paketining 5 yoki undan koʻproq foizini bevosita yoki bilvosita nazorat qiladigan kompaniyaga toʻlanadigan dividendlar bilan bogʻliq holatda, hisoblash ((a) kichik band qoidalariga koʻra hisobga olingan har bir oʻzbek soligʻiga qoʻshimcha ravishda) kompaniya tomonidan dividendlar toʻlanayotgan foydaga nisbatan toʻlanuvchi oʻzbek soligʻi eʼtiborga olinadi.

3. Bir Ahdlashuvchi Davlatning rezidenti mazkur Konvensiyaning qoidalariga muvofiq boshqa Ahdlashuvchi davlatda soliq solinishi mumkin boʻlgan mol-mulkka ega boʻlgan taqdirda, birinchi zikr etilgan Davlat bu rezidentning mulk soligʻidan ushbu boshqa Davlatda toʻlangan mulk soligʻiga teng summani chegirishga ruxsat etishi lozim.

Bunday chegirishlar, har qanday holatda, daromad yoki mol-mulk soligʻining ushbu boshqa Davlatda mazkur holatdagi kabi, vaziyatga qarab soliq solinishi mumkin boʻlgan mol-mulkka taalluqli chegirishgacha hisoblab chiqilgan qismidan oshmasligi lozim.

4. 1 va 2-bandlar maqsadlari uchun mazkur Konvensiyaga muvofiq boshqa Ahdlashuvchi Davlatda soliq solinishi mumkin boʻlgan bir Ahdlashuvchi Davlatning rezidentiga tegishli foyda, daromad va kapital qiymatining ortishi ushbu boshqa Ahdlashuvchi Davlatdagi manbalardan olingan deb hisoblanadi.

5. Mazkur Konvensiyaning biror qoidasiga muvofiq Ahdlashuvchi Davlatning rezidenti olgan daromad yoki u egalik qilgan mol-mulk ushbu Davlatda soliq solishdan chiqarilganda, ushbu Davlat shunga qaramasdan, bu rezidentning daromadi yoki mol-mulkining qolgan qismiga soliq summasini hisoblab chiqishda soliq solishdan chiqarilgan daromad yoki mol-mulk summasini hisobga olishi mumkin.

24-modda Muayyan offshor faoliyatiga nisbatan qoʻllaniladigan turli xil qoidalar

1. Ushbu modda qoidalari, mazkur Konvensiyaning har qanday boshqa qoidalaridan qatʼi nazar, Ahdlashuvchi Davlatda joylashgan offshorlarda dengiz tubini va yer ostini hamda ularning tabiiy resurslarini tadqiq qilish yoki qazib olish munosabati bilan amalga oshiriladigan (mazkur moddada “tegishli faoliyat” deb nomlanuvchi) faoliyatga nisbatan qoʻllaniladi.

2. Ahdlashuvchi Davlatning boshqa Ahdlashuvchi Davlatda “tegishli faoliyatni” amalga oshirayotgan korxonasi mazkur moddaning 3-bandiga muvofiq shu faoliyatga nisbatan ushbu boshqa Ahdlashuvchi Davlatda unda joylashgan doimiy muassasa orqali tadbirkorlik faoliyatini amalga oshiruvchi sifatida qaraladi.

3. Bir Ahdlashuvchi Davlatning korxonasi tomonidan boshqa Ahdlashuvchi Davlatda 12 oyning har qanday davri davomida 30 kun chegarasida jami 30 kundan oshmaydigan davr yoki davrlar davomida amalga oshiriladigan tegishli faoliyat u erda joylashgan doimiy muassasa orqali tadbirkorlik faoliyatini amalga oshirayotgan hisoblanmaydi. Mazkur bandning maqsadlari uchun:

a) agar bir Ahdlashuvchi Davlatning boshqa Ahdlashuvchi Davlatda tegishli faoliyatni amalga oshirayotgan korxonasi u erda mohiyatiga koʻra bir xil tegishli faoliyatni amalga oshirayotgan boshqa korxona bilan uyushgan boʻlsa, birinchi korxona keyingi korxonaning barcha shunday faoliyati boʻyicha amalga oshirayotgan hisoblanadi, shu vaqtda bunday faoliyat uning oʻz faoliyati sifatida qay darajada amalga oshirilishi bundan mustasno;

b) agar bir korxona boshqa korxonaning boshqaruv, nazorati yoki kapitalida bevosita yoki bilvosita ishtirok etayotgan boʻlsa yoki oʻsha shaxslarning oʻzi har ikki korxonaning boshqaruvi, nazorati yoki kapitalida bevosita yoki bilvosita ishtirok etayotgan boʻlsa, korxona boshqa korxona bilan uyushgan deb hisoblanadi.

4. Maoshlar, ish haqi va bir Ahdlashuvchi Davlatning rezidenti tomonidan boshqa Ahdlashuvchi Davlatda tegishli faoliyat bilan bogʻliq yollanib ishlashga nisbatan olinadigan boshqa shunga oʻxshash mukofotlarga ushbu boshqa Davlatning offshor zonasida ishni amalga oshirish bilan bogʻliq qismida ushbu boshqa Davlatda soliq solinishi mumkin.

Bir Ahdlashuvchi Davlatning rezidenti tomonidan:

a) tadqiqot olib borish yoki qazib olish huquqlarini; yoki

b) oʻz qiymati yoki oʻz qiymatining katta qismi bunday huquqlardan bevosita yoki bilvosita olinadigan aksiyalar (yoki tenglashtirilgan vositalar)ni;

tasarrufdan chiqarishdan olingan daromadlarga ushbu boshqa Davlatda soliq solinishi mumkin.

Mazkur bandda “tadqiq qilish yoki qazib olish huquqlari” boshqa Ahdlashuvchi Davlatda dengiz tubini va yer ostini yoki ularning tabiiy resurslarini tadqiq qilish yoki qazib olish natijasida olingan mol-mulk, shu jumladan foydadan foiz olinadigan aktivlar yoki bunday aktivlardan olingan foydaga egalik qilish huquqini bildiradi.

25-modda Kamsitilmaslik

1. Bir Ahdlashuvchi Davlatning fuqarolari boshqa Ahdlashuvchi Davlatda ushbu boshqa Davlatning fuqarolari xuddi shu sharoitda, xususan, rezidensiya jihatidan tortiladigan yoki tortilishi mumkin boʻlgan soliq solish va u bilan bogʻliq majburiyatlardan koʻra ogʻirroq boʻlgan har qanday soliq solish yoki u bilan bogʻliq majburiyatga tortilmaydi. Ushbu qoida, 1-moddaning qoidalaridan qatʼi nazar, bir yoki har ikki Ahdlashuvchi Davlatning rezidentlari boʻlmagan jismoniy shaxslarga nisbatan ham qoʻllaniladi.

2. Bir Ahdlashuvchi Davlatning korxonasi boshqa Ahdlashuvchi Davlatda ega boʻlgan doimiy muassasasiga ushbu boshqa Ahdlashuvchi davlatda soliq solish mazkur boshqa Ahdlashuvchi Davlatning xuddi shunday faoliyatni amalga oshirayotgan korxonalariga soliq solishdan koʻra noqulayroq boʻlmaydi. Ushbu qoida bir Ahdlashuvchi Davlatni u oʻzining rezidentlariga ularning fuqarolik holati yoki oilaviy sharoiti asosida soliq solish maqsadida taqdim qiladigan biror xususiy imtiyozlar, ozod qilishlar va chegirmalarni boshqa Ahdlashuvchi Davlatning rezidentlariga taqdim etishga majburlaydigan deb talqin qilinmasligi lozim.

3. 9-moddaning 1-bandi, 11-moddaning 6-bandi yoki 12-moddaning 6-bandi qoidalari qoʻllaniladigan hollardan tashqari, bir Ahdlashuvchi Davlatning korxonasi tomonidan boshqa Ahdlashuvchi Davlatning rezidentiga toʻlanadigan foizlar, royalti va boshqa badallar bunday korxonaning soliq solinadigan foydasini aniqlash maqsadida, xuddi ular birinchi aytib oʻtilgan Davlatning rezidentiga toʻlangandagi kabi shartlarga muvofiq chegiriladi.

4. Bir Ahdlashuvchi Davlatning kapitali boshqa Ahdlashuvchi Davlatning bir yoki undan koʻp rezidentlariga toʻliq yoki qisman tegishli boʻlgan yoki ular tomonidan bevosita yoki bilvosita nazorat qilinadigan korxonalari birinchi aytib oʻtilgan Ahdlashuvchi Davlatda mazkur davlatning shunga oʻxshash korxonalari tortiladigan yoki tortilishi mumkin boʻlgan soliq solish va u bilan bogʻliq majburiyatlardan boshqacha yoki ogʻirroq boʻlgan har qanday soliq solish yoki u bilan bogʻliq majburiyatga tortilmaydi.

5. Mazkur moddaning qoidalari mazkur Konvensiya predmeti boʻlgan soliqlarga nisbatan qoʻllaniladi.

26-modda Oʻzaro kelishish protsedurasi

1. Agar shaxs bir yoki har ikki Ahdlashuvchi Davlatning harakatlari unga mazkur Konvensiyaning qoidalariga mos boʻlmagan soliq solinishiga olib kelmoqda yoki olib keladi, deb hisoblasa, mazkur shaxs, ushbu Davlatlar ichki qonunchiligida nazarda tutilgan himoya vositalaridan qatʼi nazar, oʻzi rezidenti boʻlgan Ahdlashuvchi davlatning vakolatli organiga yoki, agar uning vaziyatiga 23-moddaning 1-bandi amalda joriy boʻlsa, oʻzi fuqarosi boʻlgan Ahdlashuvchi Davlatning vakolatli organiga arizasini taqdim qilishi mumkin. Ushbu ariza mazkur Konvensiyaning qoidalariga mos kelmaydigan soliq solishga olib keluvchi harakat toʻgʻrisida birinchi bildirish kunidan eʼtiboran uch yil davomida taqdim qilinishi lozim.

1. Vakolatli organ, agar u eʼtirozni asosli deb hisoblasa va uning oʻzi qoniqarli qarorga kela olmasa, mazkur Konvensiyaga mos kelmaydigan soliq solishning oldini olish maqsadida, boshqa Ahdlashuvchi davlatning vakolatli organi bilan oʻzaro kelishuv boʻyicha masalani hal qilishga harakat qiladi. Har bir erishilgan kelishuv Ahdlashuvchi Davlatlarning ichki qonunchiligidagi biror vaqtinchalik ichki cheklovlardan qatʼi nazar, amalga oshirilishi lozim.

2. Ahdlashuvchi Davlatlarning vakolatli organlari mazkur Konvensiyani talqin qilish yoki qoʻllanishida yuzaga keladigan har qanday qiyinchilik yoki shubhalarni oʻzaro kelishuv boʻyicha bartaraf qilishga harakat qiladilar. Ular, shuningdek, mazkur Konvensiyada nazarda tutilmagan hollarda ikki yoqlama soliq solishni bartaraf etish maqsadida bir-biri bilan maslahatlashishlari mumkin.

3. Ahdlashuvchi Davlatlarning vakolatli organlari oldingi bandlar jihatidan kelishuvga erishish maqsadida bir-biri bilan bevosita aloqaga kirishishlari mumkin.

27-modda Axborot almashish

1. Ahdlashuvchi Davlatlarning vakolatli organlari mazkur Konvensiyaning bajarilishi yoki maʼmuriy boshqarish yoxud Ahdlashuvchi Davlatlar yoki ularning siyosiy boʻlinmalari yoki mahalliy hokimiyat organlari nomidan undiriladigan har qanday tur va tavsifdagi soliqlarga taalluqli ichki qonunchilikni qoʻllash uchun oldindan muhim boʻlgan maʼlumotni bunday soliq solish mazkur Konvensiyaga zid boʻlmagan darajada almashadilar. Maʼlumot almashish 1 va 2-moddalar bilan cheklanmaydi.

2. Ahdlashuvchi Davlatlarning biri tomonidan 1-bandga muvofiq olingan har qanday maʼlumot ushbu Davlatning ichki qonunchiligiga muvofiq olingan maʼlumot qancha maxfiy boʻlsa shuncha maxfiy hisoblanadi va faqat 1-bandda aytib oʻtilgan soliqlarga taalluqli baholash yoki toʻplash, majburiy undirish yoki sud taʼqibi yoki apellatsiyalarni koʻrib chiqish bilan, hamda barcha yuqorida qayd etilganlarni nazorat qilish bilan shugʻullangan shaxslar yoki organlarga (shu jumladan sudlar va maʼmuriy organlarga) bildiriladi. Bunday shaxslar yoki organlar ushbu maʼlumotdan faqat koʻrsatib oʻtilgan maqsadlarda foydalanishi lozim. Ular ushbu maʼlumotni ochiq sud majlisida yoki sud qarorlarida oshkor qilishlari mumkin.

3. 1 va 2-bandlarning qoidalari hech bir holatda Ahdlashuvchi Davlatga quyidagi majburiyatlarni yuklovchi sifatida talqin qilinmaydi:

a) ushbu yoki boshqa Ahdlashuvchi Davlatning qonunchiligi va maʼmuriy amaliyotiga zid keluvchi maʼmuriy tadbirlar oʻtkazish;

b) ushbu yoki boshqa Ahdlashuvchi Davlatning qonunchiligi boʻyicha yoki odatdagi maʼmuriy boshqaruv jarayonida olish mumkin boʻlmagan maʼlumotni taqdim etish;

c) savdo, tadbirkorlik, sanoat, tijorat yoki kasb sirini yoxud savdo jarayonini oshkor qilishi mumkin boʻlgan maʼlumotni yoki oshkor qilinishi davlat siyosatiga (ordre public) zid boʻlishi mumkin boʻlgan maʼlumotni taqdim etish;

4. Agar, maʼlumot bir Ahdlashuvchi Davlat tomonidan mazkur moddaga muvofiq soʻralgan boʻlsa, boshqa Ahdlashuvchi Davlat hatto bunday maʼlumot ushbu boshqa Davlatga uning soliq maqsadlari uchun talab etilmasa ham, soʻralgan maʼlumotni olish uchun oʻzining maʼlumot toʻplash boʻyicha tadbirlaridan foydalanishi lozim. Oldingi gapda boʻlgan majburiyat 3-bandning qoidalari bilan cheklangan, lekin bunday cheklashlar hech qaysi holatda Ahdlashuvchi Davlatga faqat maʼlumotdan ichki manfaatdorlik yoʻqligi sababli uni taqdim etishni rad qilish uchun ruxsat beruvchi sifatida talqin qilinishi mumkin emas.

5. Hech qaysi holatda 3-bandning qoidalari bank, boshqa moliya muassasasi, nominal ega yoxud agent yoki ishonchli vakil boʻlgan shaxs maʼlumot egasi boʻlgani sababligina yoki maʼlumot shaxsning mulk huquqiga taalluqli boʻlgani sababligina Ahdlashuvchi Davlatga maʼlumotni taqdim etishni rad qilish uchun ruxsat beruvchi sifatida talqin qilinmaydi.

28-modda Diplomatik agentlar va konsullik xizmatchilari

Mazkur Konvensiyaning hech qaysi qoidasi diplomatik agentlar yoki konsullik xizmatchilarining xalqaro huquqning umumiy normalari boʻyicha yoki maxsus kelishuvlarning qoidalariga muvofiq berilgan soliq imtiyozlariga daxl qilmaydi.

29-modda Kuchga kirish

1. Har bir Ahdlashuvchi Davlat mazkur Konvensiyaning kuchga kirishi uchun milliy qonunchilikka muvofiq talab qilinadigan protsedura yakunlangani toʻgʻrisida diplomatik kanallar orqali boshqasini xabardor qiladi.

2. Mazkur Konvensiya oxirgi bunday bildirish olingan kunda kuchga kiradi va shundan keyin quyidagilarga nisbatan amal qila boshlaydi:

a) Oʻzbekistonda:

(i) mazkur Konvensiya kuchga kiradigan yildan keyingi kalendar yilning birinchi yanvaridan boshlab yoki shu sanadan keyin olinadigan daromadga solinadigan manbadan undiriladigan soliqlarga nisbatan;

(ii) mazkur Konvensiya kuchga kiradigan yildan keyingi kalendar yilning birinchi yanvaridan boshlab yoki mazkur sanadan keyin olinadigan har bir kalendar yili uchun undiriladigan boshqa daromad va mol-mulk soliqlariga nisbatan.

b) Irlandiyada:

(i) mazkur Konvensiya kuchga kirgan yildan keyingi kalendar yilining birinchi yanvari yoki birinchi yanvaridan keyin hisoblab chiqilgan, istalgan yil davomidagi daromad soligʻi, universal ijtimoiy toʻlov hamda kapital qiymati qoʻshimcha oʻsishiga soliqqa nisbatan;

(ii) mazkur Konvensiya kuchga kirgan yildan keyingi kalendar yilining birinchi yanvari yoki birinchi yanvaridan keyin boshlanadigan, istalgan moliya yili davomidagi korporativ soliqqa nisbatan.

30-modda Amal qilishni toʻxtatish

Mazkur Konvensiyaning amal qilishi Ahdlashuvchi Davlatlardan biri tomonidan uning toʻxtatilgunga qadar kuchida qoladi. Har bir Ahdlashuvchi Davlat Konvensiya kuchga kirgan sanadan 5 yil oʻtgandan soʻng boshlanadigan har bir kalendar yili tugashidan kamida olti oy oldin amal qilishni toʻxtatish toʻgʻrisida diplomatik kanallar orqali xabar berish yoʻli bilan Konvensiyaning amal qilishini toʻxtatishi mumkin.

Bunday holatda Konvensiya amal qilishni toʻxtatadi:

a) Oʻzbekistonda:

(i) manbada, bildirish xati berilgan yildan keyin keladigan kalendar yilning birinchi yanvaridan boshlab yoki ushbu sanadan keyin olinadigan daromaddan undiriladigan soliqlarga nisbatan;

(ii) bildirish xati berilgan yildan keyin keladigan kalendar yilining birinchi yanvaridan boshlab yoki ushbu sanadan keyin har bir kalendar yili uchun olinadigan boshqa daromad soligʻi va mol-mulk soligʻiga nisbatan;

b) Irlandiyada:

(i) toʻxtatish toʻgʻrisida bildirish xati berilgan yildan keyin keluvchi kalendar yilining birinchi yanvaridan boshlab yoki birinchi yanvaridan keyin istalgan yil davomida hisoblab chiqilgan daromad soligʻi, universal ijtimoiy toʻlov hamda kapital qiymatining ortishidan olinadigan soliqqa nisbatan;

(ii) toʻxtatish toʻgʻrisida bildirish xati berilgan yildan keyin keladigan kalendar yilining birinchi yanvarida yoki birinchi yanvaridan keyin boshlanadigan har bir moliya yili davomida, korporativ soliqqa nisbatan.

Barchasini tasdiqlash maqsadida, tegishli tarzda vakolatga ega boʻlgan quyida qoʻl qoʻyuvchilar mazkur Konvensiyani imzoladilar.

Dublin shahrida 2012-yil 11-iyulda har biri oʻzbek va ingliz tillarida boʻlgan ikki nusxada tuzildi, bunda har ikki matn bir xil kuchga ega.

Mazkur Konvensiya qoidalarini talqin qilishda ixtiloflar yuzaga kelsa ingliz tilidagi matn asos qilib olinadi.

(imzolar)