Savdo-iqtisodiy, ilmiy-texnik va madaniy hamkorlik boʻyicha hukumatlararo qoʻshma komissiya tuzish toʻgʻrisida

24.12.1996

Oʻzbekiston Respublikasi va Qirgʻiziston Respublikasi oʻrtasida

Protokol

Oʻzbekiston Respublikasi Prezidenti I. Karimov va Qirgʻiziston Respublikasi Prezidenti A. Akayev 1996-yil 24-25-dekabrida Qirgʻiziston Respublikasi Prezidenti A. Akayevning Oʻzbekiston Respublikasiga qilgan rasmiy tashrifi davomida erishilgan ikki tomonlama shartlashuvlar natijalarini roʻyobga chiqarish, Oʻzbekiston Respublikasi bilan Qirgʻiziston Respublikasi oʻrtasidagi hamkorlikni faollashtirish maqsadida,

quyidagilar haqida ahdlashdilar:

1-modda

Savdo-iqtisodiy, ilmiy-texnik va madaniy hamkorlik boʻyicha hukumatlararo qoʻshma komissiya (keyingi oʻrinlarda Qoʻshma komissiya deyiladi) tuzilsin, uning maqsadi:

iqtisodiyot, savdo, ilm-fan va texnologiya, aloqa, transport kommunikatsiyalari, axborot, taʼlim, turizm va madaniyat sohasidagi oʻzaro manfaatlarni ifodalovchi masalalarni oʻrganish;

yuqorida aytib oʻtilgan sohalardagi hamkorlikni rivojlantirishga oid takliflar ishlab chiqish;

ikkala mamlakat oʻrtasidagi oʻzaro foydali hamkorlikka tegishli boʻlgan boshqa masalalarni koʻrib chiqish hisoblanadi.

2-modda

Ikkala mamlakat hukumatlariga tenglik asoslarida komissiya tarkibini tasdiqlash, Qoʻshma komissiya toʻgʻrisidagi nizomni ishlab chiqish va tasdiqlash topshirilsin.

3-modda

Mazkur Protokolga, zarur boʻlgan hollarda, Tomonlarning roziligiga koʻra oʻzgartirish va qoʻshimchalar kiritilishi mumkin.

4-modda

Mazkur Protokol imzolangan kundan boshlab kuchga kiradi va besh yil davomida amalda boʻladi. Agar Tomonlardan biri uning navbatdagi muddati tugagunga qadar 6 oy oldin uning amalda boʻlishini toʻxtatmoqchi boʻlganligi haqidagi oʻz niyatini yozma ravishda ikkinchi Tomonga xabar qilmasa, mazkur Protokolning amalda boʻlish muddati oʻz-oʻzidan keyingi besh yillik davrga uzayaveradi.

1996-yil 24-dekabrda, Toshkent shahrida, ikki asl nusxada, har biri oʻzbek, qirgʻiz va rus tillarida tuzildi, bunda barcha matnlar bir xil kuchga egadir. Mazkur Protokol qoidalarini talqin qilish uchun rus tilidagi matndan foydalaniladi.

(imzolar)