Oʻzbekiston Respublikasi Jinoyat kodeksining va Oʻzbekiston Respublikasi Maʼmuriy huquqbuzarlik toʻgʻrisidagi kodeksining ayrim moddalarini qoʻllanish tartibi toʻgʻrisida (752-XII-son)

09.12.1992

Oʻzbekiston Respublikasi Oliy Kengashining

Qarori

Oʻzbekiston Respublikasi Oliy Kengashi qaror qiladi:

1. Oʻzbekiston Respublikasi Jinoyat kodeksi qator moddalarida nazarda tutilgan koʻp miqdorda, koʻp zarar, ancha zarar jiddiy ziyon deyilganda belgilangan eng kam oylik ish haqining ellik barobaridan ortiq miqdordagi moddiy zarar, juda koʻp miqdor deyilganda esa belgilangan eng kam oylik ish haqining yuz barobaridan ortiq miqdordagi moddiy zarar tushunilishi uqtirilsin;

2. Oʻzbekiston Respublikasi Maʼmuriy huquqbuzarlik toʻgʻrisidagi kodeksining 56-moddasida nazarda tutilgan talon-toroj qilingan davlat yoki jamoat mulkining qiymati eng kam oylik ish haqining yarmidan oshmasa, oz miqdorda talon-toroj qilganlik hisoblanadi. Bunda talon-toroj qilingan buyumlarning natura shaklidagi miqdori (vazni, hajmi) va xalq xoʻjaligi uchun zarur ahamiyati hisobga olinadi.

4. Aldash orqasidan topilgan mablagʻ miqdori eng kam oylik ish haqining ikki yuzdan bir qismidan oshmasa, u Oʻzbekiston Respublikasi Maʼmuriy huquqbuzarlik toʻgʻrisidagi kodeksining 166-1-moddasida nazarda tutilgan xaridorlar va buyurtmachilarni uncha koʻp boʻlmagan miqdorda aldash deb hisoblanadi.

Aldash orqasidan topilgan mablagʻ miqdori eng kam oylik ish haqidan ortiq boʻlsa, u Oʻzbekiston Respublikasi Jinoyat kodeksi 177-moddasining ikkinchi qismida nazarda tutilgan xaridorlar va buyurtmachilarni koʻp miqdorda aldash deb hisoblanadi. Bunda qilingan jinoyatga baho berish masalasini hal etish va sotilgan tovarlarning turi va qiymati, bajarilgan buyurtmachilarning turi va qiymati, aholiga koʻrsatilgan xizmatning turi ham hisobga olinadi.

5. Belgilangan eng kam oylik ish haqi miqdoridan ortiq miqdorda qonunsiz olingan haq Oʻzbekiston Respublikasi Jinoyat kodeksining Jinoyat kodeksi 177-1-moddasida nazarda tutilgan koʻp miqdorda qonunsiz haq olganlik deb hisoblanadi.

6. Yuqorida bayon etilganlar munosabati bilan:

Oʻzbekiston Respublikasi Oliy Soveti Prezidiumining 1981-yil 27-oktabridagi “Oʻzbekiston Respublikasi Jinoyat kodeksining 177-1-moddasida qoʻllanish tartibi toʻgʻrisida”gi qarorining 5-bandi (Oʻzbekiston Respublikasi Oliy Sovetining Vedomostlari, 1981-yil № 31, 598-modda);

Oʻzbekiston Respublikasi Oliy Soveti Prezidiumining 1983-yil 19-dekabridagi “Oʻzbekiston Respublikasi Jinoyat kodeksining 175-moddasi hamda Oʻzbekiston Respublikasi Oliy Soveti Prezidiumining “Mayda spekulatsiya uchun javobgarlik toʻgʻrisida”gi 1957-yil 11-dekabr Farmonini qoʻllanish tartibi toʻgʻrisida”gi qarori (Oʻzbekiston Respublikasi Oliy Sovetining Vedomostlari, 1983-yil, № 36, 544-modda);

Oʻzbekiston Respublikasi Oliy Soveti Prezidiumining 1984-yil 1-martidagi “Oʻzbekiston Respublikasi Jinoyat kodeksining 177-moddasi ikkinchi qismini qoʻllanish tartibi toʻgʻrisida” qarori (Oʻzbekiston Respublikasi Oliy Sovetining Vedomostlari, 1984-yil, № 7, 111-modda) oʻz kuchini yoʻqotgan deb hisoblansin.

7. Mazkur qaror matbuotda eʼlon qilingan kundan boshlab kuchga kiradi hamda ushbu qaror amalga kirgan kunga qadar sudlarning hukmlari qonuniy kuchga kirgan mahkumlarga nisbatan qoʻllanilmaydi.

Oʻzbekiston Respublikasi Oliy Kengashining Raisi Sh. YOʻLDOShEV

Toshkent sh.,

1992-yil 9-dekabr,

752-XII-son