2008-2017-yillarga moʻljallangan iqtisodiy hamkorlik toʻgʻrisida

19.06.2008

Oʻzbekiston Respublikasi bilan Belarus Respublikasi oʻrtasida

Shartnoma

Oʻzbekiston Respublikasi va Belarus Respublikasi, bundan keyin “Tomonlar” deb ataluvchilar,

Oʻzbekiston Respublikasi bilan Belarus Respublikasi oʻrtasida davlatlararo munosabatlar asoslari toʻgʻrisida 1991-yil 6-noyabrdagi Shartnoma, Oʻzbekiston Respublikasi bilan Belarus Respublikasi oʻrtasida savdo munosabatlari toʻgʻrisida 1993-yil 21-yanvardagi Bitim, Oʻzbekiston Respublikasi bilan Belarus Respublikasining doʻstlik va hamkorlikni yanada mustahkamlash toʻgʻrisida 1994-yil 22-dekabrdagi deklaratsiyasiga, shuningdek Tomonlar ishtirokchi boʻlgan boshqa xalqaro shartnomalarga amal qilib,

oʻzaro manfaatli savdo-iqtisodiy va ishlab chiqarish munosabatlarini yanada mustahkamlash va rivojlantirish, ularga uzoq muddatlilik va barqarorlik tusi berish, Tomonlarning iqtisodiy va ilmiy-texnikaviy imkoniyatlaridan samarali foydalanish va ular xalqlarining farovonligini oshirish zarurligini anglab,

iqtisodiyotni izchil rivojlantirish va iqtisodiy islohotlarni oʻtkazishga muhim ahamiyat berib, xalqaro huquqning umumeʼtirof etilgan normalari va prinsiplariga amal qilib,

quyidagilar toʻgʻrisida kelishib oldilar:

1-modda

Tomonlar ushbu Shartnomaning ajralmas qismi hisoblanuvchi Oʻzbekiston Respublikasi bilan Belarus Respublikasi oʻrtasida 2008 — 2017-yillarga moʻljallangan iqtisodiy hamkorlik dasturini (bundan keyin — Dastur) amalga oshiradilar.

2-modda

Tomonlar iqtisodiy hamkorlikni xalqaro huquqning umumeʼtirof etilgan prinsiplariga ogʻishmay rioya etish asosida, shu jumladan davlat boshqaruvi organlari oʻrtasida, bevosita xoʻjalik yurituvchi subyektlar oʻrtasida, mulk shakli va tashkiliy qarashliligidan qatʼi nazar, Tomonlar milliy qonunchiligiga rioya etib, shartnomalar tuzish yoʻli bilan amalga oshiradilar.

Olingan majburiyatlarni bajarish uchun shartnoma tuzgan xoʻjalik yurituvchi subyektlar javobgardirlar.

Tomonlar oʻz zimmalariga boshqa Tomon iqtisodiy manfaatlariga zarar yetkazmaslik majburiyatini oladilar.

3-modda

Tomonlar Oʻzbekiston Respublikasi bilan Belarus Respublikasi oʻrtasidagi ikki tomonlama hamkorlik boʻyicha Hukumatlararo qoʻshma komissiyaga (bundan keyin Komissiya) Dastur bajarilishini muvofiqlashtirish, uning amalga oshirilishini nazorat qilish va zaruriyat tugʻilganda unga oʻzgartirishlar kiritish boʻyicha takliflar ishlab chiqish vazifasini yuklashga kelishib oldilar.

4-modda

Ushbu Shartnoma qoidalarini talqin qilish va qoʻllashda yuzaga keladigan bahslar maslahatlashuvlar va muzokaralar oʻtkazish yoʻli bilan hal qilinadi.

5-modda

Tomonlarning oʻzaro kelishuviga koʻra, mazkur Shartnomaga ushbu Shartnomaning 7-moddasiga muvofiq kuchga kiradigan va kuchga kirgan vaqtdan boshlab Shartnomaning ajralmas qismi boʻlib hisoblanadigan protokollar bilan rasmiylashtiriladigan oʻzgartirish va qoʻshimchalar kiritilishi mumkin.

6-modda

Ushbu Shartnoma Oʻzbekiston Respublikasi bilan Belarus Respublikasi ishtirokchi boʻlgan boshqa xalqaro shartnomalardan kelib chiqadigan Tomonlarning huquq va majburiyatlariga daxl qilmaydi.

7-modda

Ushbu Shartnoma Tomonlardan Shartnomaning kuchga kirishi uchun zarur boʻlgan davlat ichki protseduralari bajarilganini tasdiqlovchi oxirgi yozma xabarnoma olingan sanadan boshlab kuchga kiradi va 2017-yilning 31-dekabriga qadar amal qiladi.

Tomonlardan har biri boshqa Tomonga yozma xabarnoma yuborib, ushbu Shartnoma amalini tugatishi mumkin.

Bu holda Shartnoma bunday yozma xabarnoma olingan sanadan boshlab 6 (olti) oy oʻtgach, oʻz amalini tugatadi.

Ushbu Shartnoma amalining tugatilishi, agar Tomonlar oʻzgacha kelishmagan boʻlsalar, Dasturga muvofiq amalga oshirilayotgan loyihalarga daxl qilmaydi.

Minsk shahrida 2008-yil 19-iyunda ikki nusxada, har biri oʻzbek va rus tillarida tuzildi, bunda ikkala matn ham bir xil kuchga ega. Ushbu Shartnoma qoidalarini talqin qilishda rus tilidagi matndan foydalaniladi.

(imzolar)

Oʻzbekiston Respublikasi bilan Belarus Respublikasi oʻrtasida 2008 — 2017-yillarga moʻljallangan iqtisodiy hamkorlik

DASTURI

Oʻzbekiston Respublikasi va Belarus Respublikasi anʼanaviy iqtisodiy sheriklar hisoblanadi. Ikki mamlakat hamkorligi — Mustaqil Davlatlar Hamdoʻstligida xoʻjalik aloqalarining eng muhim tarkibiy qismidir.

Jahon xoʻjaligi globallashuvi jarayonining jadal rivojlanishi va shuningdek Oʻzbekiston Respublikasi bilan Belarusʼ Respublikasi oʻrtasidagi iqtisodiy munosabatlarni sifat jihatidan yangi bosqichga oʻtkazish zarurati oʻzaro manfaatli ikki tomonlama hamkorlikning uzoq muddatli strategiyasini ishlab chiqishni talab qilmoqda.

Oʻzbekiston Respublikasi bilan Belarus Respublikasi oʻrtasida davlatlararo munosabatlar asoslari toʻgʻrisida 1991-yil 6-noyabrdagi Shartnoma, Oʻzbekiston Respublikasi bilan Belarus Respublikasi oʻrtasida savdo munosabatlari toʻgʻrisida 1993-yil 21-yanvardagi Bitim, Oʻzbekiston Respublikasi bilan Belarus Respublikasining doʻstlik va hamkorlikni yanada mustahkamlash toʻgʻrisida 1994-yil 22-dekabrdagi deklaratsiyasi bu faoliyatni birgalikda olib borish uchun asosdir. Mazkur hujjatlarning qoidalaridan kelib chiqib, Oʻzbekiston Respublikasi bilan Belarus Respublikasi oʻrtasida 2008 — 2017-yillarga moʻljallangan iqtisodiy hamkorlikning ushbu Dasturi (bundan keyin — Dastur) ishlab chiqildi.

I. Dasturning asosiy maqsad va vazifalari

Dasturning maqsadi — ikki davlat oʻrtasida, ularning maʼmuriy-hududiy birliklari va xoʻjalik yurituvchi subyektlari oʻrtasida oʻzaro manfaatli iqtisodiy, ilmiy-texnikaviy va madaniy aloqalarni rivojlantirishga qaratilgan choralar, shu jumladan shartnomaviy-huquqiy xususiyatdagi, majmuini ishlab chiqish, milliy iqtisodiyotlar yetakchi sohalarining ishlab chiqarish sohasidagi hamkorligida yutuqlarga erishish, shu asosda oʻzaro tovar aylanishini oʻstirish va shuningdek xalqlarning maʼnaviy-madaniy ehtiyojlarini qondirish, sogʻlom turmush tarzini shakllantirish va farovonligini oʻstirishdir.

Dastur maqsadlarini amalga oshirish uchun quyidagi vazifalarni bajarish talab qilinadi:

turli koʻrinishdagi va shakllardagi qoʻshma korxonalar tuzish, ishlab chiqarish kooperatsiyasini rivojlantirish uchun qulay shart-sharoitlar yaratish;

tashqi iqtisodiy faoliyat sohasida axborot bazasini yaratish, shu jumladan tovarlar va xizmatlar eksporti masalalari boʻyicha ikki davlat kichik va oʻrta biznes vakillari oʻrtasida amaliy aloqalar oʻrnatish maqsadida tovar ishlab chiqaruvchilar maʼlumotlar bazasini yaratish;

savdo-iqtisodiy va ilmiy-texnikaviy masalalar boʻyicha bir-birini qiziqtiradigan ochiq axborot bilan almashish;

mintaqalararo hamkorlikni rivojlantirish;

madaniyat, sport va turizm sohalarida manfaatli hamkorlik tadbirlarini tayyorlash va amalga oshirish;

xalqaro transport kommunikatsiyalari va aloqasidan samarali foydalanish va rivojlantirish, amaldagi transport koridorlari samaradorligini oshirish hamda yangilarini yaratish;

Oʻzbekiston Respublikasi bilan Belarus Respublikasi tovar va fondlar bozorlarining bahamjihat harakat qilishi.

II. Iqtisodiy hamkorlikni rivojlantirishning asosiy yoʻnalishlari

Oʻzbekiston Respublikasi va Belarus Respublikasi (bundan keyin — Tomonlar) uzoq muddatli iqtisodiy hamkorlikni quyidagi yoʻnalishlar boʻyicha rivojlantiradilar:

Tomonlar xoʻjalik yurituvchi subyektlariga oʻzaro manfaatli sharoitlarni taʼminlovchi huquqiy baza yaratish yoʻli bilan milliy qonunchiliklarni yaqinlashtirish;

normativ-huquqiy bazani uygʻunlashtirish va uning davlatlararo integratsiyalashgan tuzilmalar hamda qoʻshma korxonalar yaratish boʻyicha samarali mexanizmlarini ishlab chiqish;

zarur statistik axborot, statistik nashr va eʼlonlar, metodologik materiallar va ishlanmalar, dasturlar va shuningdek statistik kuzatishlar, roʻyxatga olish, tekshirishlar oʻtkazish tajribasi bilan almashish, tashqi savdo statistikasini shakllantirish prinsiplarini kelishib olish;

noinsof xoʻjalik yurituvchi subyektlarning faoliyatiga va sifatsiz tovarlarning ikkala davlat hududlariga kirishiga yoʻl qoʻymaslik chora-tadbirlarini koʻrish;

ikki tomonlama hamkorlikning shartnomaviy-huquqiy bazasimi kengaytirish;

milliy va xalqaro koʻrgazmalar, yarmarkalar, seminarlar, konferensiyalar hamda axborot almashish va amaliy aloqalar oʻrnatish boʻyicha chora-tadbirlar oʻtkazish;

Oʻzbekiston Respublikasi hududida foydali qazilmalar zaxiralarini birgalikda oʻzlashtirish, tabiatdan foydalanishda iqtisodiy usullarni rivojlantirish, ekologik toza resurslarni tejaydigan texnologiyalardan oʻzaro foydalanish va almashishga koʻmaklashish, bu maqsadlarda ilmiy-tadqiqot, geologik va texnologik ishlar olib borish.

III. Savdo munosabatlarini rivojlantirish va bojxona ishi sohasida hamkorlik

Tomonlar oʻrtasida savdo hamkorligini rivojlantirish va chuqurlashtirish davlatlar oʻrtasida qoʻllaniladigan erkin savdo rejimi doirasida va shuningdek EvrAzES doirasida qabul qilinayotgan majburiyatlarga muvofiq amalga oshiriladi, bunda xalqaro savdoning umumeʼtirof etilgan prinsiplari va qoidalariga bosqichma-bosqich oʻtish hisobga olinadi.

Bojxona siyosatini olib borish, transport vositalari, tovarlar va yoʻlovchilar harakati, bojxona nazoratini optimallashtirish uchun qulay sharoitlar yaratish sohasida bojxona va boshqa organlarning ikki tomonlama tartibga soluvchi hujjatlar va EvrAzES doirasida qabul qilingan hujjatlar asosida bahamjihat harakatini quyidagi yoʻnalishlar boʻyicha asta-sekin va izchil rivojlantirish kutilmoqda:

tovarlarning tranziti uchun qulay sharoitlar yaratib borish, tranzit yuk tashishda bojxona protseduralarini soddalashtirish;

bojxona qonunchiliklarini buzishga qarshi kurashish boʻyicha, xususan narkotik vositalar, psixotrop moddalar, prekursorlar, oʻqotar qurollar, oʻq-dorilar, portlovchi va zaharli moddalarni, shuningdek, aholi salomatligi va atrof-muhit uchun xavfli boʻlgan radioaktiv materiallarni noqonuniy tashishga barham berish sohasida kelishilgan choralar koʻrish;

bojxona ishini dasturiy taʼminlashni takomillashtirish;

aksizlanadigan tovarlar oʻtkazilishi ustidan bojxona nazoratini tashkil etishga kelishilgan yondashuvlar ishlab chiqish;

intellektual mulk obyektiga oid mahsulotni yetkazib berishda bojxona nazoratini takomillashtirish.

IV. Tabiiy va texnogen xususiyatdagi favqulodda vaziyatlarning oldini olish va bartaraf etish sohasida hamkorlik

Tomonlar tabiiy va texnogen xususiyatidagi favqulodda vaziyatlarning oldini olish va ularning oqibatlarini bartaraf etish, yongʻin, sanoat va radiatsiya xavfsizligi, aholini va hududlarni tabiiy va texnogen xususiyatidagi favqulodda vaziyatlardan himoya qilish, shu sohadagi faoliyatni normativ-huquqiy jihatdan tartibga solishni takomillashtirish, yangi texnologiyalarni ishlab chiqish va joriy qilish, shu sohada bir-biriga ruxsat berish yoki boshqa yoʻnalishlar boʻyicha hamkorlikni rivojlantiradilar.

V. Dasturni amalga oshirish mexanizmi

Dastur Tomonlar davlat boshqaruv organlari va xoʻjalik yurituvchi subyektlarining Dasturni amalga oshirish boʻyicha Tadbirlarda belgilanadigan aniq vazifalarni bajarish vositasi bilan amalga oshiriladi, bu tadbirlar Dasturning ajralmas qismi boʻlib hisoblanadi.

Ushbu Dasturni bajarish maqsadida Oʻzbekiston Respublikasi va Belarus Respublikasi oʻrtasida ikki tomonlama hamkorlik boʻyicha Hukumatlararo qoʻshma komissiya doirasida aniq masalalarni hal qilish uchun ishchi guruhlari tuziladi.

Ishchi guruhlar oʻz faoliyatining natijalari toʻgʻrisida Oʻzbekiston Respublikasi va Belarus Respublikasi oʻrtasida ikki tomonlama hamkorlik boʻyicha Hukumatlararo qoʻshma komissiya majlislarida maʼlumot beradilar.