Oʻzbekiston Respublikasi Hukumati bilan Rossiya Federatsiyasi Hukumati oʻrtasida 2013-2017-yillarga moʻljallangan iqtisodiy hamkorlik

13.04.2013

Dasturi

Oʻzbekiston Respublikasi Hukumati va Rossiya Federatsiyasi Hukumati (keyingi oʻrinlarda “Tomonlar” deb ataluvchilar),

strategik sheriklar hisoblangan holda, shu jumladan iqtisodiyotni rivojlantirish sohasida,

oʻzaro manfaatdorlik va teng huquqlilik asosida ikki tomonlama iqtisodiy munosabatlarni saqlab qolish va rivojlantirish zaruriyatini anglagan holda,

Oʻzbekiston Respublikasi bilan Rossiya Federatsiyasi oʻrtasida strategik sherikchilik toʻgʻrisida 2004-yil 16-iyundagi Shartnoma hamda Oʻzbekiston Respublikasi bilan Rossiya Federatsiyasi oʻrtasida ittifoqchilik munosabatlari toʻgʻrisida 2005-yil 14-noyabrdagi Shartnomaga tayangan holda, shuningdek Oʻzbekiston Respublikasi bilan Rossiya Federatsiyasi oʻrtasida strategik sherikchilikni chuqurlashtirish toʻgʻrisida 2012-yil 4-iyundagi Deklaratsiya qoidalarini amalga oshirish maqsadida,

quyidagilar toʻgʻrisida oʻzaro anglashuvga keldilar:

1. Dasturning asosiy maqsad va vazifalari

Mazkur Dastur Tomonlar tarafidan oʻzaro manfaatli iqtisodiy munosabatlarni rivojlantirish, ikki mamlakat iqtisodiyotining yetakchi tarmoqlarida yuqori texnologiyali ishlab chiqarish sohalarida hamkorlikni kengaytirish, shu asosda oʻzaro tovar ayirboshlash va investitsiyaviy hamkorlikni kuchaytirish boʻyicha kelishilgan chora-tadbirlar kompleksining bajarilishini taʼminlash maqsadida ishlab chiqildi.

Ushbu maqsadni amalga oshirish uchun Tomonlar quyidagi vazifalarni bajarishga intiladilar:

oliy darajadagi uchrashuvlar, shuningdek iqtisodiy hamkorlik boʻyicha Hukumatlararo komissiya yigʻilishlarida savdo-iqtisodiy va investitsiyaviy hamkorlik sohasida erishilgan kelishuvlarning keng koʻlamda amalga oshirilishini taʼminlash;

ikkala davlat iqtisodiyotini yuksaltirishga qaratilgan iqtisodiy hamkorlikning barqaror rivojlanishini taʼminlash;

teng huquqlilik va oʻzaro manfaatdorlik asosida savdo-iqtisodiy hamkorlikni yanada rivojlantirish va investitsiyaviy hamkorlikni diversifikatsiya qilish;

Tomonlarning xalqaro majburiyatlarini keng koʻlamda amalga oshirish asosida ikki mamlakat oʻrtasida toʻlaqonli amal qiluvchi erkin savdo rejimini shakllantirish, shuningdek oʻzaro manfaatli savdoni rivojlantirish uchun qulay shart-sharoitlar yaratish;

savdo-iqtisodiy, investitsiyaviy, shuningdek ilmiy-texnikaviy xususiyatdagi oʻzaro ahamiyatga molik boʻlgan ochiq maʼlumotlar bilan almashish;

ishlab chiqarishning oʻsishi, uning rivojlanishi uchun investitsiyalar kiritish, fanning eng yangi yutuqlari va ilgʻor texnologiyalarni joriy qilish hamda ishlab chiqarilayotgan mahsulotlarning sifati va raqobatbardoshligini oshirish uchun ragʻbatlantiruvchi omillar yaratish;

transport-kommunikatsiya sohasida oʻzaro manfaatli sherikchilikni amalga oshirish;

ikkala davlat hududida joylashgan xoʻjalik yurituvchi subyektlar faoliyati uchun, shu jumladan Oʻzbekiston Respublikasi Hukumati bilan Rossiya Federatsiyasi Hukumati oʻrtasida investitsiyalarni ragʻbatlantirish va oʻzaro himoya qilish toʻgʻrisida 2013-yil 15-apreldagi Bitimga muvofiq oʻzaro investitsiyalarni kengaytirish maqsadida qulay shart-sharoitlar yaratish.

2. Iqtisodiy hamkorlikni rivojlantirishning asosiy yoʻnalishlari

Tomonlar quyidagi yoʻnalishlar boʻyicha dasturiy tadbirlarni amalga oshiradilar:

savdo-iqtisodiy va investitsiyaviy hamkorlikni kengaytirish va diversifikatsiya qilish;

iqtisodiy hamkorlik sohasida ikki tomonlama shartnomaviy-huquqiy bazani rivojlantirish;

amaldagi transport yoʻlaklarining raqobatbardoshligini oshirish uchun ikkala Tomon davlatlarining qulay geografik oʻrnidan foydalangan holda, transport-kommunikatsiya sohasidagi hamkorlikni rivojlantirish;

sanoatning turli tarmoqlarida, xususan yoqilgʻi-energetika kompleksi, kimyo, mashinasozlik, elektrotexnika, yengil sanoat, aviatsiya, togʻ-kon va qayta ishlash sanoatlarida hamda qurilish materiallari ishlab chiqarish sohalarida hamkorlikni kengaytirish;

ilmiy-texnikaviy hamkorlik va axborot-kommunikatsiya texnologiyalari sohasida oʻzaro manfaatli hamkorlikni rivojlantirishdagi urinishlarni muvofiqlashtirish;

qishloq va suv xoʻjaligi, atrof-muhitni muhofaza qilish sohasida hamkorlikni mustahkamlash;

bojxona ishi sohasida hamkorlikni yanada rivojlantirish.

3. Dasturni amalga oshirish mexanizmi

Mazkur Dastur Tomonlar davlatlarining tegishli vazirliklari, idoralari va xoʻjalik yurituvchi subyektlari tarafidan, Oʻzbekiston Respublikasi bilan Rossiya Federatsiyasi oʻrtasidagi iqtisodiy hamkorlik boʻyicha Hukumatlararo komissiyasi tasdiqlaydigan Tadbirlar rejasida belgilanadigan muayyan harakatlarning bajarilishi orqali amalga oshiriladi.

Mazkur Dastur va Tadbirlar rejasining bajarilishini muvofiqlashtirish va nazorat qilish Oʻzbekiston Respublikasi bilan Rossiya Federatsiyasi oʻrtasidagi iqtisodiy hamkorlik boʻyicha Hukumatlararo komissiyasi tomonidan amalga oshiriladi.

Moskva shahrida 2013-yil 13-aprelda har biri oʻzbek va rus tillarida boʻlgan ikki nusxada imzolandi.

(imzolar)