Sogʻliqni saqlash va tibbiyot fani sohasida hamkorlik toʻgʻrisida

05.04.2012

Oʻzbekiston Respublikasi Hukumati bilan Kipr Respublikasi Hukumati oʻrtasida

Bitim

Oʻzbekiston Respublikasi Hukumati va Kipr Respublikasi Hukumati, bundan keyingi oʻrinlarda “Tomonlar” deb ataluvchilar,

har ikki Tomonning sogʻliqni saqlash va tibbiyot fani sohasidagi oʻzaro foydali va teng huquqli hamkorlikdan manfaatdorligini eʼtiborga olib,

quyidagilar toʻgʻrisida kelishib oldilar:

1-modda

Tomonlar quyidagi sohalarda oʻzaro samarali hamkorlikni rivojlantirishga imkoniyat yaratadilar:

1) dastlabki tibbiy-sanitariya va ixtisoslashtirilgan tibbiy yordam koʻrsatish;

2) ona va bola sogʻligʻini saqlash;

3) profilaktik tibbiyot va atrof-muhitni muhofaza qilish;

4) farmatsevtika mahsulotlari va tibbiy texnika;

5) favqulodda vaziyatlar va epidemiologik ahvol boʻyicha tezkor maʼlumotlar bilan almashish;

6) ilmiy va tibbiy xodimlarni oʻqitish;

7) talabalar, oʻqituvchilar almashinuvi va vrachlarning kasbiy malakasini oshirish;

8) shartnoma asosida ishlaydigan vrachlar almashinuvi.

2-modda

Tomonlar favqulodda vaziyatlarda oʻzaro bepul shoshilinch tibbiy-konsultativ yordam, surunkali kasalga chalingan (shoshilinch boʻlmagan) bemorlarga esa oʻzaro maqbul shartlarda yoki tijorat asosida yordam koʻrsatadilar.

3-modda

Tomonlar sogʻliqni saqlash tizimini yaxshilashda hamda mutaxassislar bilan almashish, konferensiyalar, simpoziumlar va seminarlar oʻtkazish shaklida tibbiyot boʻlinmalari va tashkilotlari oʻrtasida bevosita aloqalarni tashkil etishda oʻzaro yordam koʻrsatadilar.

4-modda

Tomonlar farmatsevtika va tibbiyot uskunalarini ishlab chiqarish boʻyicha qoʻshma korxonalarni tashkil etish, shuningdek ularni roʻyxatdan oʻtkazish va har tomonlama qoʻllab-quvvatlash uchun imkoniyat yaratadilar.

5-modda

Sogʻliqni saqlash sohasidagi hamkorlikning alohida shakllari va muddati tegishli vakolatli davlat organlari oʻrtasidagi maxsus bitimlar bilan tartibga solinadi.

6-modda

Tomonlar zarur hollarda mazkur Bitimni amalga oshirish va uning bajarilishini nazorat qilish, shuningdek oʻzaro hamkorlikni yaxshilash yuzasidan tavsiyalar tayyorlash boʻyicha qoʻshma komissiyalar tashkil qilishlari mumkin.

7-modda

Ushbu Bitimga Tomonlarning oʻzaro kelishuviga koʻra uning ajralmas qismlari hisoblanadigan alohida protokollar bilan rasmiylashtiriladigan oʻzgartish va qoʻshimchalar kiritilishi mumkin.

8-modda

Mazkur Bitimni talqin qilish yoki qoʻllash bilan bogʻliq nizolar yuzaga kelgan holda Tomonlar ularni maslahatlashuvlar va muzokaralar oʻtkazish yoʻli bilan hal etadilar.

9-modda

Tomonlar mazkur Bitimning kuchga kirishi uchun milliy qonunchilik tomonidan talab etiladigan davlat ichki protseduralarining bajarilganligi haqida diplomatik kanallar orqali bir-birlarini xabardor qilishlari lozim.

Mazkur Bitim Tomonlarning uni kuchga kiritish uchun zarur davlat ichki protseduralarining bajarilganligi toʻgʻrisida yozma ravishda oxirgi bildirishnoma olingan sanadan boshlab kuchga kiradi va besh yil davomida amal qiladi hamda, agar Tomonlardan hech biri oʻzining uning amal qilishini toʻxtatish maqsadi toʻgʻrisida tegishli muddatning tugashidan kamida olti oy oldin boshqa Tomonni yozma shaklda xabardor qilmasa, keyingi besh yillik muddatlarga oʻz-oʻzidan uzaytiriladi.

2012-yil 5-aprelda Toshkent shahrida har biri oʻzbek, grek va ingliz tillarida boʻlgan ikki nusxada tuzildi, bunda barcha matnlar bir xil kuchga ega. Matnlar boʻyicha kelishmovchiliklar yuzaga kelgan holda ingliz tilidagi matn ustuvor hisoblanadi.

(imzolar)