Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi toʻgʻrisidagi Nizomni tasdiqlash haqida (238-son)
13.08.2015
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “2015 — 2019-yillarda iqtisodiyot tarmoqlari va ijtimoiy sohada energiya sarfi hajmini qisqartirish, energiyani tejaydigan texnologiyalarni joriy etish chora-tadbirlari dasturi toʻgʻrisida” 2015-yil 5-maydagi PQ-2343-son qaroriga muvofiq Vazirlar Mahkamasi qaror qiladi:
1. Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi toʻgʻrisidagi nizom 1-ilovaga muvofiq tasdiqlansin.
2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.
3. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2015-yil 13-avgust,
238-son
Vazirlar Mahkamasining 2015-yil 13-avgustdagi 238-son qaroriga 1-ILOVA
Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi toʻgʻrisida
NIZOM
I. Umumiy qoidalar
1. Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi (keyingi oʻrinlarda Respublika komissiyasi deb ataladi) iqtisodiyot tarmoqlari va ijtimoiy sohani barqaror rivojlantirish va ularning faoliyat koʻrsatishi uchun shart-sharoitlar yaratish maqsadida energiya samaradorligi, energiyaning tiklanadigan manbalarini joriy etish va rivojlantirish, yoqilgʻini qazib olish, ishlab chiqarish, qayta ishlash, saqlash, tashish va isteʼmol qilish (keyingi oʻrinlarda ishlab chiqarish va isteʼmol qilish deb ataladi), energiya va uning manbalari sohasida davlat va xoʻjalik boshqaruvi organlarini nazorat qilish va ularning oʻzaro hamkorligini taʼminlash boʻyicha muvofiqlashtiruvchi organ hisoblanadi.
2. Respublika komissiyasi oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga hamda boshqa qonun hujjatlariga muvofiq amalga oshiradi.
3. Respublika komissiyasi oʻz faoliyatida Oʻzbekiston Respublikasi Vazirlar Mahkamasiga hisobot beradi.
Respublika komissiyasi Qoraqalpogʻiston Respublikasi, Oʻzbekiston Respublikasi viloyatlari va Toshkent shahrining energiya samaradorligi va energiyaning tiklanadigan manbalarini rivojlantirish masalalari boʻyicha hududiy komissiyalaridan (keyingi oʻrinlarda hududiy komissiyalar deb ataladi) iborat.
Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari hududiy komissiyalarning rahbarlari hisoblanadilar.
Hududiy komissiyalarning namunaviy tarkibi, vazifalari, funksiyalari va huquqlari Respublika komissiyasining raisi tomonidan tasdiqlanadi.
Oʻzbekiston Respublikasi Iqtisodiyot vazirligi Respublika komissiyasining ishchi organi (keyingi oʻrinlarda komissiyaning Ishchi organi deb ataladi) hisoblanadi.
II. Respublika komissiyasining vazifalari
4. Quyidagilar boʻyicha chora-tadbirlarni tashkil etish Respublika komissiyasining asosiy vazifalari va faoliyati yoʻnalishlari hisoblanadi:
yalpi ichki mahsulotning energiya sarfi hajmini qisqartirish, iqtisodiyot tarmoqlari va ijtimoiy sohada energiyani tejaydigan texnologiyalar va tizimlarni joriy etish;
faqat zamonaviy energiya jihatidan samarali va energiyani tejaydigan texnologiyalar bazasida yangi ishlab chiqarish quvvatlarini tashkil etish va mavjudlarini modernizatsiyalashni davom ettirish yoʻli bilan ishlab chiqariladigan mahsulotning energiya sarfi hajmini pasaytirish;
yoqilgʻi-energetika resurslarini tejash boʻyicha tashkiliy-texnik tadbirlarni va energiyani tejash dasturlarini ishlab chiqish va bajarish;
korxonalar va tashkilotlarni xalqaro amaliyotga muvofiq energetik tekshirish (energetik audit);
iqtisodiyot tarmoqlari va ijtimoiy sohada energiyaning tiklanadigan manbalarini, shu jumladan quyosh energiyasidan foydalanishning sinab koʻrilgan texnologiyalarini rivojlantirish, joriy etishni jadallashtirish;
energiyani tejaydigan asbob-uskunalar, priborlar va materiallarning yangi turlarini, shuningdek yoqilgʻi-energetika resurslari sarfini hisobga olishning avtomatlashtirilgan tizimlarini ishlab chiqishni kengaytirish, ularni hamma joyda iqtisodiyot tarmoqlari va ijtimoiy sohada joriy etish;
zamonaviy arxitektura-qurilish yechimlarini va qurilish konstruksiyalarining yangi, energiyani tejaydigan turlarini, shuningdek izolatsiyalovchi materiallarni qoʻllash orqali turar joy va maʼmuriy binolarni, sanoat obyektlarini qurishda va mavjudlarini rekonstruksiya qilishda energiya samaradorligini taʼminlash;
energiya samaradorligini va energiyaning tiklanadigan manbalarini joriy etish va rivojlantirish sohasida asosiy yoʻnalishlarni ishlab chiqish va amalda roʻyobga chiqarish yuzasidan davlat va xoʻjalik boshqaruvi organlarining kelishilgan harakatlarini taʼminlash;
energiya samaradorligini va energiyaning tiklanadigan manbalarini joriy etish va rivojlantirish sohasida huquqiy tartibga solishni takomillashtirishning asosiy yoʻnalishlarini ishlab chiqish, shuningdek ularning amalga oshirilishini muvofiqlashtirish;
energiya jihatidan samarali iqtisodiyotni shakllantirishga va energiya tejalishini ragʻbatlantirish uchun zarur shart-sharoitlar yaratishga yoʻnaltirilgan takliflarni koʻrib chiqish;
energiya samaradorligi, energiyaning tiklanadigan manbalarini joriy etish va rivojlantirish sohasida davlat va xoʻjalik boshqaruvi organlari faoliyatini muvofiqlashtirish, energiyani tejashning tarmoq, mintaqaviy dasturlarini, shuningdek yoqilgʻi va energiyaning muqobil turlarini faol qoʻllagan holda yoqilgʻi-energetika resurslarini diversifikatsiyalash chora-tadbirlarini amalga oshirish;
tabiiy monopoliyalar subyektlarining energiya jihatidan samarali texnologiyalarni va energiyaning muqobil manbalarini joriy etishga yoʻnaltirilgan rivojlanishning ustuvor dasturlari va investitsiya dasturlari amalga oshirilishi monitoringini olib borish, oʻz ehtiyojlari va texnologik ehtiyojlar uchun ishlab chiqarish va isteʼmol qilishda yoqilgʻi va energiya sarflarini maqbullashtirish;
ichki bozorning yoqilgʻi-energetika resurslariga boʻlgan ehtiyojlarini, shu jumladan yoqilgʻi va energiyaning muqobil turlarini jalb etgan holda yoqilgʻi-energetika balanslarini diversifikatsiyalash yoʻli bilan qondirish;
energiya samaradorligini, energiyaning tiklanadigan va muqobil manbalarini rivojlantirish va joriy etishni ragʻbatlantiruvchi tarif siyosati masalalari boʻyicha takliflarni koʻrib chiqish;
iqtisodiyot tarmoqlari va ijtimoiy sohada energiya samaradorligi va energiyaning tiklanadigan manbalari prinsiplari va texnologiyalarini joriy etishda maʼmuriy toʻsiqlarni kamaytirish;
iqtisodiyot tarmoqlari va ijtimoiy sohada energiya samaradorligi va energiyaning tiklanadigan manbalarini joriy etish va rivojlantirish sohasida tarmoq, mintaqaviy uzoq muddatli dasturlarni ishlab chiqish, ularning samaradorligi va bajarilishi natijalari holatini tahlil qilish;
energiya samaradorligini, energiyaning tiklanadigan va muqobil manbalarini joriy etish va rivojlantirishni ragʻbatlantirish maqsadida qonun hujjatlarini takomillashtirish boʻyicha takliflarni koʻrib chiqish;
yoqilgʻi-energetika resurslaridan samarali foydalanish yuzasidan nazoratni amalga oshiruvchi organlar faoliyatini muvofiqlashtirish hamda energetik tekshirishlar (energetik audit) boʻyicha xizmatlar koʻrsatuvchi korxonalar va tashkilotlarning energiya samaradorligi boʻyicha tavsiyalari bajarilishi monitoringini olib borish;
hududiy komissiyalar faoliyatini nazorat qilish va muvofiqlashtirish.
III. Respublika komissiyasining huquqlari
5. Respublika komissiyasi:
oʻz majlislarida Respublika komissiyasining vakolatiga tegishli boʻlgan masalalar boʻyicha Respublika komissiyasi aʼzolarining, hududiy komissiyalar, davlat va xoʻjalik boshqaruvi organlari, tashkilotlar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari rahbarlarining hisobotlarini eshitish;
iqtisodiyot tarmoqlari va ijtimoiy sohada energiya sarfi hajmini qisqartirishga, energiyani tejaydigan texnologiyalarni joriy etishga yoʻnaltirilgan chora-tadbirlar bajarilishini taʼminlash boʻyicha tegishli qarorlar qabul qilish, hududiy komissiyalar, davlat va xoʻjalik boshqaruvi organlari, tashkilotlar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari rahbarlariga topshiriqlar berish;
Ishchi organ orqali soʻrovlar yuborish yoʻli bilan Respublika komissiyasi vakolatlariga tegishli masalalar boʻyicha hududiy komissiyalar, davlat va xoʻjalik boshqaruvi organlari, tashkilotlardan zarur materiallarni soʻrash va olish;
zaruriyat boʻlganda Respublika komissiyasi ishiga ilmiy-tadqiqot muassasalari, jamoat birlashmalarining, shuningdek boshqa tashkilotlarning mutaxassislarini jalb etish;
yoqilgʻi-energetika resurslaridan oqilona foydalanish sohasida qonun hujjatlariga rioya etilishi, yoqilgʻi-energetika resurslarini ishlab chiqarishning samaradorligini taʼminlash va isteʼmol qilishning holati, energiya samaradorligi, energiyaning tiklanadigan manbalarini joriy etish va rivojlantirish, yoqilgʻi va energiyaning muqobil turlarini jalb etgan holda yoqilgʻi-energetika balanslarini diversifikatsiyalash chora-tadbirlari amalga oshirilishi ustidan nazorat qilish masalalarida davlat va xoʻjalik boshqaruvi organlari, shuningdek hududiy komissiyalar faoliyatini muvofiqlashtirish;
harakati yoki harakatsizligi yoqilgʻi-energetika resurslaridan oqilona foydalanish, energiyaning tiklanadigan manbalarini joriy etish va rivojlantirish sohasida qonun hujjatlari buzilishiga olib kelgan rahbarlar va mansabdor shaxslarga nisbatan chora-tadbirlar koʻrish toʻgʻrisida tavsiyalar berish huquqiga ega.
Respublika komissiyasi amaldagi qonun hujjatlariga muvofiq boshqa huquqlarga ham ega boʻlishi mumkin.
6. Respublika komissiyasining raisi yoki uning oʻrinbosarining topshirigʻi boʻyicha energiyani ishlab chiqarish va isteʼmol qilish sohasida normativ-huquqiy hujjatlarni qabul qilish zarur boʻlganda vazirliklar va idoralar Respublika komissiyasiga belgilangan tartibda takliflar kiritadilar.
7. Respublika komissiyasining oʻz vakolatlari doirasida qabul qilingan qarorlari davlat va xoʻjalik boshqaruvi organlari hamda tashkilotlar tomonidan bajarilishi majburiydir.
IV. Respublika komissiyasining funksiyalari
8. Respublika komissiyasi oʻziga yuklangan vazifalarga muvofiq:
iqtisodiyot tarmoqlari va ijtimoiy sohada energiya samaradorligi va energiyaning tiklanadigan manbalarini joriy etish va strategik rivojlantirishni tadqiq qilish masalalari boʻyicha respublikada ishlarni bajaruvchi hududiy komissiyalar, korxonalar va tashkilotlar, shuningdek xalqaro tashkilotlar missiyalarining faoliyatini muvofiqlashtiradi;
yoqilgʻi-energetika resurslarini tejash boʻyicha tashkiliy-texnik tadbirlar va energiyani tejash, energiyaning tiklanadigan manbalarini joriy etishning tarmoq dasturlari ishlab chiqilishini tashkil qiladi, shuningdek ularning bajarilishi monitoringini olib boradi;
xalqaro amaliyotga muvofiq korxonalar va tashkilotlarni energetik tekshirishlarni (energetik auditlarni) tashkil etish va oʻtkazishga koʻmaklashadi;
Respublika komissiyasining vakolatlariga tegishli masalalar boʻyicha hududiy komissiyalarning, shuningdek korxonalar va tashkilotlarning faoliyati oʻrganilishini tashkil etadi;
energiyani hisobga olish, nazorat qilish va boshqarish asboblarini, energiya jihatidan samarali va ekologik xavfsiz energetika qurilmalarini ishlab chiqarish boʻyicha sanoat bazasi rivojlanishiga koʻmaklashadi;
energiyani ishlab chiqarish va isteʼmol qilishda undan oqilona foydalanish, energetik tekshirishlarni (energetik auditlarni) tashkil etish va oʻtkazish masalalari boʻyicha hududiy komissiyalar, davlat va xoʻjalik boshqaruvi organlari, tashkilotlarning faoliyatini muvofiqlashtiradi;
korxonalar, tashkilotlar, davlat va xoʻjalik boshqaruvi organlari tomonidan yoqilgʻi-energetika resurslaridan oqilona foydalanish masalalarini oʻrganish boʻyicha ishlarni belgilangan tartibda tashkil etadi;
respublikada iqtisodiyot tarmoqlarida va ijtimoiy sohada energiya samaradorligini hamda energiyaning tiklanadigan manbalarini strategik rivojlantirishni joriy etish va tadqiq qilish, kam uglerodli energiyani rivojlantirish strategiyasini ishlab chiqish va amalga oshirish masalalari boʻyicha ishlarni bajaradigan tashkilotlarning, xalqaro tashkilotlar missiyalarining (dastlabki, oraliq, yakuniy) hisobotlarini eshitadi;
davlat va xoʻjalik boshqaruvi organlarining, tashkilotlarning iqtisodiyot tarmoqlarida va ijtimoiy sohada energetika boʻyicha tekshiruvlarni (energetika boʻyicha auditlarni), obyektlarni energetika boʻyicha pasportlashtirishni tashkil etish, oʻtkazish va ularning samaradorligi masalalari boʻyicha hisobotlarini eshitadi;
Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining tegishli qarorlarining bajarilishi haqida hududiy komissiyalar rahbarlarining energiya samaradorligini va energiyaning tiklanadigan manbalarini joriy etish va rivojlantirishga doir tadbirlarning ular tomonidan amalga oshirilishi boʻyicha hisobotlarini eshitadi;
energiyani tejaydigan loyihalar hamda energiyaning muqobil manbalarini ishlab chiqarishga jalb etishni taʼminlovchi loyihalar boʻyicha loyihaoldi va loyiha hujjatlarini ishlab chiqishni moliyalashtirish, energiyani tejaydigan texnologiyalar va ishlab chiqarishlarning joriy etilishini nazarda tutadigan loyihalarning investitsiya jalb etuvchanligini oshirish, yoqilgʻi-energetika resurslarini isteʼmol qilish va ulardan foydalanishni hisobga olish, ularning rejimlarini nazorat qilish va boshqarish tizimlarini, shuningdek energiyani tejashning normativ-huquqiy bazasini takomillashtirish uchun Oʻzbekiston Respublikasi Iqtisodiyot vazirligi va Moliya vazirligining taqdimnomalari boʻyicha energiya taʼminotining maxsus respublika tarmoqlararo hisob raqamidagi pul mablagʻlaridan maqsadli foydalanish yuzasidan qarorlar qabul qiladi;
hududiy komissiyalarning namunaviy tuzilmasini, vazifalari, huquqlari va funksiyalarini tasdiqlaydi.
V. Respublika komissiyasi ishlarini tashkil etish
9. Respublika komissiyasiga rais boshchilik qiladi, u Respublika komissiyasi faoliyatiga rahbarlikni ishchi organ orqali amalga oshiradi.
10. Respublika komissiyasi raisi:
Respublika komissiyasi ishlarini tashkil qiladi;
Respublika komissiyasi faoliyatining istiqbolli va joriy rejalarini belgilaydi;
Respublika komissiyasi majlisining kun tartibini tasdiqlaydi, shuningdek Respublika komissiyasi majlisini chaqiradi va boshqaradi;
Respublika komissiyasi va hududiy komissiyalar aʼzolariga, ijro etuvchi hokimiyat organlariga Respublika komissiyasiga yuklangan vazifalarni amalga oshirish bilan bogʻliq masalalar boʻyicha topshiriqlar beradi;
Respublika komissiyasi majlisi protokollarini tasdiqlaydi.
11. Respublika komissiyasi raisining oʻrinbosari boʻladi, u Respublika komissiyasi raisi boʻlmagan vaqtda uning vazifalarini bajaradi va:
Respublika komissiyasi raisining topshirigʻiga binoan Respublika komissiyasi majlisini boshqaradi;
Respublika komissiyasining oʻzi oʻtkazgan majlislari natijalari boʻyicha qabul qilingan protokollarni tasdiqlaydi.
Respublika komissiyasi raisining oʻrinbosari Respublika komissiyasi raisining boshqa topshiriqlarini ham bajarishi mumkin.
12. Respublika komissiyasi ishlarni Respublika komissiyasi raisi tomonidan tasdiqlanadigan har yilgi ish rejasi asosida tashkil qiladi.
Respublika komissiyasi majlislari tasdiqlangan ish rejasiga muvofiq, lekin har chorakda kamida bir marta oʻtkaziladi.
13. Ish rejasiga muvofiq Respublika komissiyasi tomonidan energiyani ishlab chiqarish va isteʼmol qilishda uning samaradorligini va undan oqilona foydalanilishini oʻrganish, yoqilgʻi va energiya ishlab chiqaradigan asbob-uskunalarning, energiya taʼminoti tizimlari va tarmoqlarining texnik holati, energiyaning tiklanadigan manbalari rivojlanishi bilan bogʻliq masalalar, shuningdek Respublika komissiyasi funksiyalariga muvofiq boshqa masalalar belgilangan tartibda koʻrib chiqiladi.
Tasdiqlangan ish rejasiga muvofiq kun tartibidagi masalalarni oʻrganish Respublika komissiyasi aʼzosi boshchilik qiladigan ishchi guruh tomonidan, joyiga borgan holda tashkil etiladi. Ishchi guruhlarning tarkiblari Respublika komissiyasi raisi yoki uning oʻrinbosari tomonidan tasdiqlanadi.
Ishchi guruhlar masalalarni oʻrganish natijalari boʻyicha umumlashtirilgan maʼlumotnomani keyinchalik umumlashtirish va Respublika komissiyasiga taqdim etish uchun Respublika komissiyasining ishchi organiga topshiradi, maʼlumotnomaga oʻrganilgan masalalar boʻyicha Respublika komissiyasining kelishilgan qarorini ilova qiladi.
Tasdiqlangan ish rejasiga muvofiq Respublika komissiyasi majlisining kun tartibidagi masala boʻyicha materiallar ishchi organga masala koʻrib chiqiladigan oyning 20-kunidan kechikmay, lekin majlisning tegishli xabarnomada koʻrsatilgan oʻtkaziladigan sanasidan uch kun oldin taqdim etiladi.
14. Respublika komissiyasi majlisida masalalar hududiy komissiyalar, davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklari, korxonalar va tashkilotlar rahbarlarini taklif etgan holda koʻrib chiqiladi.
Majlisga taklif etilgan shaxslarning roʻyxati Respublika komissiyasining raisi yoki Respublika komissiyasining oʻrinbosari tomonidan tasdiqlanadi.
15. Qabul qilingan qarorlar Respublika komissiyasi majlisining protokoli bilan rasmiylashtiriladi va tegishli bajaruvchilarga yetkaziladi.
16. Respublika komissiyasining ishchi organiga quyidagilar yuklanadi:
Respublika komissiyasi qarorlarining bajarilishi yuzasidan tizimli nazoratni tashkil qilish;
Oʻzbekiston Respublikasi Prezidentining 2015-yil 5-maydagi PQ-2343-son qarori bilan tasdiqlangan 2015 — 2019-yillarda iqtisodiyot tarmoqlarida va ijtimoiy sohada energiya sarfi hajmini qisqartirish, energiyani tejaydigan texnologiyalarni joriy etish chora-tadbirlari Dasturining — “yoʻl xaritasi”ning, energiya samaradorligini oshirish, energiyaning tiklanadigan manbalarini joriy etish va rivojlantirish, yoqilgʻi-energetika resurslaridan oqilona foydalanish sohasidagi boshqa tegishli qonun hujjatlarining oʻz vaqtida bajarilishini taʼminlashga doir amaliy chora-tadbirlar rejasining roʻyobga chiqarilishi yuzasidan oʻz vaqtida va sifatli, faktlarga asoslangan monitoringni amalga oshirish;
hududiy komissiyalar, tashkilotlar, shuningdek iqtisodiyot tarmoqlarida va ijtimoiy sohada energiya samaradorligini hamda energiyaning tiklanadigan manbalarini strategik rivojlantirishni joriy etish va tadqiq qilish, kam uglerodli energiyani rivojlantirish strategiyasini ishlab chiqish va amalga oshirish masalalari boʻyicha ishlarni bajaradigan xalqaro tashkilotlar missiyalari faoliyatini muvofiqlashtirish;
iqtisodiyot tarmoqlarida va ijtimoiy sohada energiya sarfini qisqartirish, energiyani tejaydigan texnologiyalarni va energiyaning tiklanadigan manbalarini joriy etish boʻyicha hududiy va tarmoq dasturlarining bajarilishi yuzasidan monitoringini amalga oshirish;
Oʻzbekiston Respublikasi hududida energetika tekshiruvlarini (energetika auditini) oʻtkazish xizmatlari koʻrsatadigan yuridik shaxslarni akkreditatsiya qilishni va ularning reyestrini yuritishni, energetika tekshiruvi (energetika auditi) natijalari, mahsulotlar va xizmatlarning energiya sarfi boʻyicha energetika pasportlari maʼlumotlari bazasini shakllantirishni tashkil etish;
davlat va xoʻjalik boshqaruvi organlarining energiya samaradorligini hamda energiyaning tiklanadigan manbalarini joriy etish va rivojlantirish sohasidagi faoliyatini muvofiqlashtirish;
Respublika komissiyasining har yilgi ish rejalari loyihasini, shuningdek Respublika komissiyasi majlislari materiallarini tayyorlash.
17. Respublika komissiyasining ishchi organi oʻz funksiyalarini amalga oshirish doirasida quyidagi huquqlarga ega:
hududiy komissiyalardan, Qoraqalpogʻiston Respublikasi Vazirlar Kengashidan, viloyatlar va Toshkent shahri hokimliklaridan, davlat va xoʻjalik boshqaruvi organlaridan, tashkilotlardan Respublika komissiyasi vakolatiga kiradigan masalalar boʻyicha axborotlarni soʻrash va olish;
energiya samaradorligini, energiyaning muqobil va qayta tiklanadigan manbalarini rivojlantirish va joriy etishni ragʻbatlantirish masalalari boʻyicha takliflarni koʻrib chiqish va kiritish;
Respublika komissiyasiga yuklangan vazifalarni hal etish bilan bogʻliq ayrim muammolar boʻyicha takliflarni, shu jumladan tartibga solib borilishi Respublika komissiyasi vakolatiga kiradigan masalalar boʻyicha respublikada ishlayotgan xalqaro tashkilotlarni jalb etgan holda ishlab chiqish uchun vaqtinchalik va doimiy ishlaydigan ekspert hamda ishchi guruhlar tashkil etish;
joylarda ishchi guruhlarning kun tartibidagi masalalarini oʻrganish, Respublika komissiyasi majlisiga materiallarni tayyorlash ishlarini tashkil etish va muvofiqlashtirish, ularning natijadorligini taʼminlash maqsadida qoʻshimcha oʻrganishlar oʻtkazish;
hududiy komissiyalarda, davlat va xoʻjalik boshqaruvi organlarida, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarida, tashkilotlarda Respublika komissiyasi vakolatiga kiradigan masalalar boʻyicha materiallar bilan tanishish, ulardan Respublika komissiyasi faoliyatini amalga oshirish, energiya samaradorligi va energiyaning tiklanadigan manbalarini joriy etish boʻyicha koʻrib chiqiladigan masalalar yuzasidan qarorlar qabul qilish uchun zarur boʻlgan axborot va materiallarni olish.
18. Respublika komissiyasi kotibi quyidagilarni taʼminlaydi:
Respublika komissiyasining ish rejasini ishlab chiqish, uning bajarilishini nazorat qilish, shuningdek tasdiqlangan ish rejasiga muvofiq Respublika komissiyasining joriy ishlarini tashkil etish;
joylardagi energiya samaradorligining holati masalalarini oʻrganuvchi ishchi guruhlar bilan birgalikda Respublika komissiyasi majlisiga materiallar tayyorlashni tashkil etish;
hududiy komissiyalar, vazirliklar, idoralar, mahalliy davlat hokimiyati organlari bilan birgalikda Respublika komissiyasi tomonidan qabul qilingan qarorlarning bajarilishi yuzasidan nazoratni amalga oshirish, Respublika komissiyasi raisiga tegishli axborot va takliflarni kiritish;
tushgan xat-xabarlarni koʻrib chiqish hamda Respublika komissiyasi vakolatiga kiradigan masalalar boʻyicha qarorlar tayyorlash;
yoqilgʻi-energetika resurslaridan oqilona foydalanishni taʼminlash boʻyicha takliflar tayyorlash va Vazirlar Mahkamasiga kiritishni tashkil etish.
19. Respublika komissiyasi kotibi oʻz funksiyalarini amalga oshirish doirasida quyidagi huquqlarga ega:
hududiy komissiyalar, vazirliklar, idoralar va tashkilotlardan Respublika komissiyasining faoliyati, Respublika komissiyasi topshiriqlarining bajarilishi va ularning holati bilan bogʻliq masalalar boʻyicha axborotlar soʻrash;
hududiy komissiyalar, davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi va Toshkent shahri hokimliklaridagi Respublika komissiyasi vakolatiga kiradigan masalalar boʻyicha materiallar bilan tanishish, shuningdek ulardan Respublika komissiyasi faoliyatini amalga oshirish uchun zarur boʻlgan axborot va materiallarni olish.
Vazirlar Mahkamasining 2015-yil 13-avgustdagi 238-son qaroriga 2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining 1994-yil 9-martdagi 124-son qarori (Oʻzbekiston Respublikasi QT, 1994-y., 3-son, 15-modda) bilan tasdiqlangan Yoqilgʻi-energetika resurslaridan foydalanish qoidalarini buzganlik uchun iqtisodiy jazolarni qoʻllash toʻgʻrisidagi nizom III boʻlimining 7-bandi quyidagi tahrirda bayon qilinsin:
“Energiya taʼminotining maxsus respublika tarmoqlararo hisob raqamidagi pul mablagʻlaridan keyinchalik soliq solinmasdan, Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasining qaroriga koʻra belgilangan maqsadlar boʻyicha Oʻzbekiston Respublikasi Iqtisodiyot vazirligi hamda Moliya vazirligining taqdimnomasiga koʻra, energiyani tejaydigan loyihalar hamda energiyani tejaydigan texnologiyalar va ishlab chiqarishlarni joriy etish, yoqilgʻi-energetika resurslari isteʼmoli hamda ulardan foydalanish rejimlarini hisobga olish, nazorat qilish va boshqarish tizimlarini, energiya tejamkorligining normativ-huquqiy bazasini takomillashtirishni nazarda tutuvchi energiyaning muqobil manbalarini ishlab chiqarishga jalb etish, loyihalarning investitsiyaviy jozibadorligini oshirishni taʼminlaydigan loyihalar boʻyicha loyihaoldi va loyiha hujjatlarini ishlab chiqishni moliyalashtirish uchun foydalaniladi”.
2. Vazirlar Mahkamasining “Budjetdan mablagʻ bilan taʼminlanadigan tashkilotlarda xizmat yengil avtotransportdan foydalanishni tartibga solish toʻgʻrisida” 1999-yil 2-apreldagi 154-son qarorining 8-bandi quyidagi tahrirda bayon qilinsin:
“Oʻzneftmahsulot” aksiyadorlik kompaniyasi Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi ishchi organining soʻrovnomasi boʻyicha neft mahsulotlari, suyultirilgan va siqilgan gazning belgilangan limitdan ortiqcha sarflanishi toʻgʻrisidagi maʼlumotni keyinchalik ortiqcha sarflanishga yoʻl qoʻygan korxonalarga javobgarlik choralari koʻrish boʻyicha takliflar kiritish uchun taqdim etadi”.
4. Vazirlar Mahkamasining “Oʻzbekiston Respublikasi Prezidentining farmonlari va Oʻzbekiston Respublikasi Vazirlar Mahkamasining qarorlari bilan tashkil etilgan respublika komissiyalari va kengashlari rahbarlari tarkibi toʻgʻrisida” 2004-yil 9-fevraldagi 60-son qaroriga 1-ilovaning 6-bandi quyidagi tahrirda bayon qilinsin:
“6. Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi Oʻzbekiston Respublikasi Prezidentining 2015-yil 5-maydagi PQ-2343-son qarori”
5. Vazirlar Mahkamasining 2006-yil 7-avgustdagi 164-son qarori (Oʻzbekiston Respublikasi QT, 2006-y., 8-son, 61-modda) bilan tasdiqlangan Yoqilgʻi-energetika resurslari isteʼmolchilarini energetika tekshiruvidan va ekspertizadan oʻtkazish Qoidalarining 3-bandidagi “Yoqilgʻi-energetika resurslarini tejash boʻyicha komissiya” soʻzlari “Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi” soʻzlari bilan almashtirilsin.
6. Vazirlar Mahkamasining “2015-yil uchun elektr energiyasi ishlab chiqarish va isteʼmol qilish balansi toʻgʻrisida” 2015-yil 12-martdagi 58-son qarorining 3-bandidagi “Yoqilgʻi-energetika resurslarini tejash boʻyicha komissiya” soʻzlari “Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi” soʻzlari bilan almashtirilsin.
Vazirlar Mahkamasining 2015-yil 13-avgustdagi 238-son qaroriga 3-ILOVA
Oʻzbekiston Respublikasi Hukumatining oʻz kuchini yoʻqotgan qarorlari
roʻyxati
1. Vazirlar Mahkamasining “Yoqilgʻi-energetika resurslarini tejash komissiyasi tarkibini tasdiqlash toʻgʻrisida” 2003-yil 18-noyabrdagi 518-son qarori (Oʻzbekiston Respublikasi QT, 2003-y., 11-son, 122-modda)
2. Vazirlar Mahkamasining “Respublika komissiya va kengashlari tarkibini tasdiqlash toʻgʻrisida” 2004-yil 26-iyuldagi 358-son qaroriga 6-ilova.
3. Vazirlar Mahkamasining “Oʻzbekiston Respublikasi Hukumatining ayrim qarorlarini oʻz kuchini yoʻqotgan deb hisoblash hamda baʼzilariga oʻzgartirishlar kiritish toʻgʻrisida” 2005-yil 22-fevraldagi 73-son qaroriga (Oʻzbekiston Respublikasi QT, 2005-y., 2-son, 13-modda) 2-ilova 36-bandining toʻrtinchi xatboshi.
4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻzbekiston Respublikasi Vazirlar Mahkamasining ijro etuvchi tuzilmasini takomillashtirish toʻgʻrisida” 2007-yil 12-martdagi PQ-601-son hamda “Oʻzbekiston Respublikasi Vazirlar Mahkamasining ijro etuvchi tuzilmasini tasdiqlash toʻgʻrisida” 2007-yil 22-martdagi PQ-607-son qarorlari)” 2007-yil 11-maydagi 96-son qaroriga (Oʻzbekiston Respublikasi QT, 2007-y., 5-son, 26-modda) 1-ilova 6-bandining “a” kichik bandi.
5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining ijro etuvchi tuzilmasini qisman oʻzgartirish toʻgʻrisida” 2008-yil 8-avgustdagi 174-son qarori)” 2008-yil 20-sentabrdagi 213-son qaroriga ilova 5-bandining “a” kichik bandi.
6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasini tashkil etish toʻgʻrisida” 2012-yil 13-noyabrdagi PF-4483-son Farmoni)” 2013-yil 9-sentabrdagi 244-son qaroriga (Oʻzbekiston Respublikasi QT, 2013-y., 9-son, 64-modda) 1-ilova 45-bandining “a” kichik bandi.