Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Keksalarni eʼzozlash yili” Davlat dasturi toʻgʻrisida” 2015-yil 18-fevraldagi PQ–2302-son qarori) (185-son)

09.07.2015

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2015-yil 18-fevraldagi PQ–2302-son qarori bilan tasdiqlangan “Keksalarni eʼzozlash yili” Davlat dasturining 60-bandi ijrosini taʼminlash, fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika, viloyatlar, tumanlar va shaharlar kengashlari faoliyatini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 9-iyul,

185-son

Vazirlar Mahkamasining 2015-yil 9-iyuldagi 185-son qaroriga ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2013-yil 30-sentabrdagi 267-son qarori (Oʻzbekiston Respublikasi QT, 2013-y., 9-son, 68-modda) bilan tasdiqlangan Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi toʻgʻrisidagi Nizomning 6-bandida:

a) quyidagi mazmundagi oʻn birinchi xatboshi qoʻshilsin:

“hududda keksalar va nogironlarning ijtimoiy, shu jumladan pensiya va tibbiy taʼminoti sifatini yaxshilash masalalarida fuqarolarning oʻzini oʻzi boshqarish organlari tomonidan jamoatchilik nazoratini oʻrnatish hamda ularning roli va taʼsirini kengaytirishga doir takliflar ishlab chiqadi va amalga oshirilishiga koʻmaklashadi”;

b) oʻn birinchi — oʻn oltinchi xatboshilar tegishli ravishda oʻn ikkinchi — oʻn yettinchi xatboshilar deb hisoblansin.

2. Vazirlar Mahkamasining “Qoraqalpogʻiston Respublikasi, viloyatlar va Toshkent shahri hamda tumanlar va shaharlar fuqarolarning oʻzini oʻzi boshqarish organlari faoliyatini muvofiqlashtirish boʻyicha hududiy kengashlarining namunaviy nizomlarini va tarkiblarini tasdiqlash toʻgʻrisida” 2013-yil 13-dekabrdagi 329-son qarorida:

a) 3-ilovaning 6-bandida:

quyidagi mazmundagi oʻn toʻrtinchi xatboshi qoʻshilsin:

“hududda keksalar va nogironlarning ijtimoiy, shu jumladan pensiya va tibbiy taʼminoti sifatini yaxshilash masalalarida fuqarolarning oʻzini oʻzi boshqarish organlari tomonidan jamoatchilik nazoratini oʻrnatish hamda ularning roli va taʼsirini kengaytirishga koʻmaklashadi va bu borada tumanlar va shaharlar kengashlarining faol ishtirokini taʼminlaydi”;

oʻn toʻrtinchi — oʻn toʻqqizinchi xatboshilar oʻn beshinchi — yigirmanchi xatboshilar deb hisoblansin;

b) 4-ilovaning 6-bandida:

quyidagi mazmundagi oʻn toʻrtinchi xatboshi qoʻshilsin:

“hududda keksalar va nogironlarning ijtimoiy, shu jumladan pensiya va tibbiy taʼminoti sifatini yaxshilash masalalarida fuqarolarning oʻzini oʻzi boshqarish organlari tomonidan jamoatchilik nazoratini oʻrnatish hamda ularning roli va taʼsirini kengaytirishga koʻmaklashadi”;

oʻn toʻrtinchi — oʻn toʻqqizinchi xatboshilar tegishli ravishda oʻn beshinchi — yigirmanchi xatboshilar deb hisoblansin.