Oʻzbekiston Respublikasi Hukumati bilan Hindiston Respublikasi Hukumati oʻrtasida 2015-2017-yillarga moʻljallangan madaniy Hamkorlik Dasturi

06.07.2015

Oʻzbekiston Respublikasi Hukumati bilan Hindiston Respublikasi Hukumati, bundan keyin “Tomonlar” deb ataluvchilar,

1994-yil 5-yanvarda Nyu-Deli shahrida imzolangan Oʻzbekiston Respublikasi Hukumati bilan Hindiston Respublikasi Hukumati oʻrtasida madaniy hamkorlik toʻgʻrisidagi Bitimga asoslanib,

2015 — 2017-yillarga moʻljallangan madaniy almashinuv Dasturini tuzishga intilib,

quyidagilar toʻgʻrisida kelishdilar:

1-modda

Tomonlar mazkur Dastur doirasida oʻzlarining madaniy tashkilotlari oʻrtasida bevosita aloqalar oʻrnatishga va hamkorlikni kengaytirishga koʻmaklashadilar.

2-modda

Oʻzbekiston Badiiy Akademiyasi va Hindistonning madaniy aloqalar Kengashi/boshqa manfaatdor tashkilotlari sanʼatkorlar, sanʼatshunoslar va olimlar oʻrtasida har yili ikki hafta muddat mobaynida tajriba va bilim almashishni tashkil etadilar.

3-modda

Oʻzbekiston Badiiy Akademiyasi va Hindistonning madaniy aloqalar Kengashi/boshqa manfaatdor tashkiloti har yili ikki hafta davomida masʼul shaxs boshchiligida rassomchilik/sanʼat buyumlari/haykaltaroshlik koʻrgazmalari bilan almashadilar.

4-modda

Oʻzbek tomoni Hindiston bolalar rasmlari qoʻmitasi tomonidan tashkil etiladigan Shankar xalqaro bolalar tanloviga Oʻzbekiston Badiiy Akademiyasi orqali rasm/suratlar, ularning annotatsiya va boshqa maʼlumotlarini yuboradi, hind tomoni esa Oʻzbekiston Badiiy Akademiyasi tomonidan tashkil etiladigan “Toshkent quvonchlari” Xalqaro bolalar rasmlari Biyennalesiga; yosh sanʼat ustalari ijodiy ishlarini yuboradi.

5-modda

Oʻzbekiston Badiiy Akademiyasi va Hindiston Zamonaviy sanʼat milliy galereyasi yoki Lalit Kala akademiyasi mashhur milliy rassom va sanʼatkorlar ishtirokida boshqa davlat hududida qoʻshma guruh koʻrgazmalarini tashkil etadilar.

6-modda

Hindistonning madaniy aloqalar Kengashi/boshqa tashkiloti ushbu Dasturning amal qilish muddati davomida Oʻzbekistonda oʻtkaziladigan “Sharq taronalari” Xalqaro musiqa festivalida mazkur tadbir shartlariga muvofiq ishtirok etadi va Oʻzbekistonning tegishli tashkilotlari tomonidan madaniy tadbirlarda ishtirok etish uchun yuboriladigan musiqa va ijro guruhlarini qabul qiladi.

7-modda

Tomonlar ikkala davlat kutubxonalari fondida saqlanayotgan nodir qoʻlyozmalarni raqamlashtirish va hujjatlashtirish sohalarida mutaxassislar bidan almashadilar.

8-modda

Oʻzbekiston Respublikasi Vazirlar Mahkamasi huzuridagi “Oʻzarxiv” agentligi va Hindiston Milliy arxivi tegishli ravishda Hindiston va Oʻzbekistonda arxiv hujjatlari koʻrgazmasini tashkil etadilar.

9-modda

Alisher Navoiy nomidagi Oʻzbekiston milliy kutubxonasi va Hindistonning Kalkutta milliy kutubxonasi oʻzaro hamkorlik maqsadida kitoblar va boshqa tegishli materiallar bilan almashadilar. Mazkur kutubxonalar Oʻzbekiston va Hindistonda kitoblar va elektron axborot materiallari koʻrgazmasini tashkil etadilar.

10-modda

Tomonlar xar yili oʻzaro qulay muddatlarda 12-16 aʼzodan iborat ijrochilik sanʼati guruhlari bilan almashadilar.

11-modda

Tomonlar quyidagi sohalarni rivojlantirishda hamkorlik qiladilar:

(i) Oʻzbekiston hududida joylashgan qadimiy yodgorliklar, ayniqsa Kushon davri va undan keyingi davrlarga oid yodgorliklarni oʻrganish va qazish;

(ii) Arxeologiya, epigrafika, arxiv, muzeyshunoslik” yodgorliklarni qayta tiklash va ilmiy saqlash sohalarida bilim, tajriba, mutaxassis va olimlar bilan almashish;

(iii) Oʻzbekiston va Hindiston hududlarida joylashgan Temuriylar, Safaviylar va Moʻgʻullar davriga oid yodgorliklarni tiklash, saqlash va arxitekturasini oʻrganish;

(iv) Oʻzbekiston muzeylarida saqlanayotgan mavjud tarixiy madaniy buyumlar va antikvarlar haqida kataloglar chop etish;

(v) Oʻzbekistonlik taniqli olimlar tomonidan tayyorlangan oʻzaro qiziqish uygʻotadigan asarlarni rus tilidan ingliz tiliga tarjima qilish;

(vi) Arxeologiya, epigrafika, muzeyshunoslik, yodgorliklarni tarkibiy va ilmiy saqlashga oid nashrlar bilan almashish.

12-modda

Oʻzbekiston Arxeologiya instituti va Hindiston Arxeologiya tashkiloti sanʼat, arxeologiya va arxitektura sohalarida hamkorlik qiladilar hamda oʻzaro kelishuv asosida mazkur sohada 3 oygacha boʻlgan muddat mobaynida 2-3 nafar mutaxassislar bilan almashadilar.

13-modda

Oʻzbekiston davlat sanʼat muzeyi va Hindiston milliy muzeyi oʻzaro kelishuv asosida 3 oygacha boʻlgan muddatga muzey eksponatlarini nazorat qiluvchi 2-3 nafar mutaxassislar bilan almashadilar.

14-modda

Oʻzbekiston Respublikasi Madaniyat va sport ishlari vazirligi, Oʻzbekiston Badiiy Akademiyasi va Hindiston Saxitiya Akademiyasi madaniyat, sanʼat va sanʼatshunoslik sohalaridagi hamkorlikni quyidagilar orqali qoʻllab-quvvatlaydilar:

(i) Mutaxassis va amaliyotchilar almashinuvi;

(ii) Oʻzaro qiziqish uygʻotadigan mavzularda seminarlar tashkil etish, hujjat hamda nashrlar almashinuvi;

(iii) Qoʻshma ilmiy-tadqiqot loyihalarini amalga oshirish;

(iv) 5 nafargacha yozuvchilardan iborat delegatsiyaning Tomonlar davlatlariga tashriflarini tashkil qilish.

15-modda

Tomonlar sport tashkilotlari oʻrtasida ikki tomonlama aloqalarni rivojlantirishni, shuningdek sportchi va murabbiylar almashinuvini qoʻllab-quvvatlaydilar.

16-modda

Barcha qoʻshimcha takliflar diplomatik kanallar orqali oʻzaro kelishiladi.

17-modda

Tomonlar imkoniyat darajasida har yili navbat bilan Toshkent va Nyu-Delida ushbu Dastur bajarilishini baholash boʻyicha yigʻilishlar oʻtkazadilar.

18-modda

Ushbu Dasturning ilovasida koʻrsatilgan umumiy qoidalar uning ajralmas qismi hisoblanadi.

Ushbu Dastur doirasida amalga oshiriladigan tadbirlar bilan bogʻliq moliyaviy masalalar Tomonlar ijrochi idoralari oʻrtasida diplomatik kanallar orqali oʻzaro kelishuv asosida hal etiladi.

19-modda

Ushbu Dastur imzolangan sanadan boshlab kuchga kiradi va 2017-yil 31-dekabrgacha yoki yangi Dastur imzolangunga qadar amal qiladi.

Toshkent shahrida 2015-yil 6-iyulda ikki asl nusxada, har biri oʻzbek, hind va ingliz tillarida tuzildi, bunda barcha matnlar bir xil kuchga ega.

Ushbu Dastur qoidalarini talqin qilishda kelishmovchiliklar yuzaga kelgan holda, Tomonlar ingliz tilidagi matnga murojaat qiladilar.

(imzolar)

ILOVA

Oʻzbekiston Respublikasi Hukumati bilan Hindiston Respublikasi Hukumati oʻrtasida madaniy hamkorlik Dasturi doirasida almashinuvni tartibga soladigan umumiy

qoidalar

1. Shaxslar Koʻrgazmalar, delegatsiyalar almashinuvi:

a) Har bir Tomon boshqa Tomonga ushbu Dastur doirasida tanlangan shaxslarning tashrif kunidan kamida ikki oy oldin, shuningdek ijodiy delegatsiya va koʻrgazmalarning oʻtkazilishidan toʻrt oy avval tarjimai hol, rejalashtirilgan safar yoʻnalishi, kelish va ketish muddatlarini taqdim etadi;

b) Qabul qiluvni Tomon taklifni olgan vaqtdan boshlab bir oy mobaynida qabul qilishi yoki oʻzgacha holat toʻgʻrisida boshqa Tomonga maʼlum qiladi;

v) Yuboruvchi Tomon ijobiy javob olgandan soʻng qabul qiluvchi Tomonga kamida uch hafta oldin shaxs yoki shaxslardan iborat delegatsiya tashrifining aniq muddati va transport turi toʻgʻrisidagi maʼlumotlarni taqdim etadi;

g) Taklif etilgan shaxslar qabul qiluvchi Tomon davlat tilini yoki ingliz tilini bilishi kerak.

2. Tomonlar taklif etilgan shaxslar yoki delegatsiya aʼzolari uchun qabul qiluvchi Tomon davlati madaniyati va hayot tarzini tushunishiga qulay sharoitlar yaratadilar.

3. Tomonlar oʻz ekspertlarining qabul qiluvchi Tomon davlatida boʻlish muddati mobaynida ularning hayoti va sogʻligʻini sugʻurtalash boʻyicha amalda boʻlgan hujjatlar bilan taʼminlash toʻgʻrisida maslahatlar beradilar.