Tuman mahalliy budjeti toʻgʻrisida (114/27-son)

17.12.2014

Jizzax viloyati Yangiobod tuman Xalq deputatlari Kengashining

Qarori

Oʻzbekiston Respublikasi Budjet kodeksining 27, 99-moddalari, Oʻzbekiston Respublikasi Oliy Majlisi Qonunchilik palatasining “Oʻzbekiston Respublikasining 2015-yilgi Davlat budjeti, maqsadli davlat jamgʻarmalarining budjetlari hamda soliq va budjet siyosatining asosiy yoʻnalishlari toʻgʻrisida”gi 2014-yil 22-oktabrdagi 991-II-sonli, Oʻzbekiston Respublikasi Oliy Majlisi Senatining “Oʻzbekiston Respublikasining 2015-yilgi Davlat budjeti, maqsadli davlat jamgʻarmalarining budjetlari hamda soliq va budjet siyosatining asosiy yoʻnalishlari toʻgʻrisida”gi 2014-yil 13-noyabrdagi SQ-453-II-sonli va Oʻzbekiston Respublikasi Prezidentining “Oʻzbekiston Respublikasining 2015-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi 2014-yil 4-dekabrdagi PQ-2270-sonli qarorlari ijrosini taʼminlash maqsadida Yangiobod tuman mahalliy budjetining 2014-yilgi daromadlari va xarajatlari hajmlari boʻyicha asosiy koʻrsatkichlaridan kutilayotgan ijrosi hamda 2015-yilga belgilangan mahalliy budjetini muhokama qilib, Oʻzbekiston Respublikasining “Mahalliy davlat hokimiyati toʻgʻrisida”gi Qonuni 24-moddasiga binoan, xalq deputatlari tuman Kengashi qaror qiladi:

1. Tuman mahalliy budjetining 2014-yilgi daromadlar va xarajatlar hajmlari boʻyicha asosiy koʻrsatkichlaridan kutilayotgan ijrosi toʻgʻrisidagi tuman hokimining hisoboti maʼlumot uchun qabul qilinsin.

2. Tuman mahalliy budjeti 2015-yil asosiy koʻrsatkichlarining daromadlar qismi 7 mlrd 623,9 mln soʻm, xarajatlar hajmlari qismi 16 mlrd 136,4 mln soʻm, maqsadli subvensiya miqdori 8 mlrd 512,6 mln soʻm qilib belgilanganligi maʼqullansin.

3. Tuman hokimining oʻrinbosari D. Mamadazimov, tuman davlat soliq inspeksiyasi (Sh. Jurayev) va moliya boʻlimi (B. Normatov) birgalikda tuman mahalliy budjeti daromadlar qismini soliq turlari boʻyicha belgilangan rejalarini oshirib bajarishni taʼminlasin.

4. Tuman hokimligi moliya boʻlimi (B. Normatov)ga:

2015-yilning “Keksalarni eʼzozlash yili” deb eʼlon qilinishi munosabati bilan tuman mahalliy budjetining 2015-yil birinchi choragi, yarim yillik va toʻqqiz oylik ijrosi yakunlariga muvofiq rejadan ortiqcha tushadigan daromadlar hisobidan tuman aholisini ijtimoiy himoya qilishga qaratilgan zaruriy tuzatishlarni kiritib borish;

budjet mablagʻlaridan maqsadli foydalanilishi va ularning asossiz sarflanishini bartaraf etish yuzasidan gʻaznachilik ijrosi tizimi vositasida qatʼiy nazorat qilinishini taʼminlash vazifalari yuklatilsin.

5. Tuman hokimi oʻrinbosari D. Mamadazimov, tegishli mutasaddi tashkilotlar rahbarlariga:

budjet daromadlarining tasdiqlangan koʻrsatkichlari bajarilishini taʼminlash,

hududlarning soliq solish bazasi kengaytirilishi va moliyaviy salohiyati mustahkamlanishi yuzasidan zaruriy chora-tadbirlar koʻrish,

budjet mablagʻlaridan maqsadli foydalanilishi ustidan qatʼiy nazorat oʻrnatish vazifalari topshirilsin.

6. Mazkur qaror “Yangiobod tongi” gazetasida eʼlon qilinsin.

7. Ushbu qarorning ijrosini nazorat qilish xalq deputatlari tuman Kengashining mahalliy budjetni shakllantirish va ijro etish, mahalliy soliqlar, yigʻimlarni belgilash, iqtisodiy islohotlarni amalga oshirish va tadbirkorlikni rivojlantirish masalalari doimiy komissiyasi zimmasiga yuklatilsin.

8. Ushbu qaror 2015-yil 1-yanvardan eʼtiboran kuchga kiradi.

Tuman Xalq deputatlari Kengashi raisi A. QOʻLDOShOV

Yangiobod t.,

2014-yil 17-dekabr,

114/27-son