Oʻzbekiston Respublikasi Oliy Majlisi Qonunchilik palatasining Normativ-huquqiy atamalar komissiyasi toʻgʻrisidagi nizom haqida (472-II-son)

18.04.2012

Oʻzbekiston Respublikasi Oliy Majlisi Qonunchilik palatasi Kengashining

Qarori

Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining Normativ-huquqiy atamalar komissiyasi toʻgʻrisidagi nizom tasdiqlansin (ilova qilinadi).

2. Oʻzbekiston Respublikasi Oliy Majlisi Qonunchilik palatasi Kengashining 2008-yil 16-apreldagi “Oʻzbekiston Respublikasi Oliy Majlisi Qonunchilik palatasi Normativ-huquqiy atamalar komissiyasining nizomi toʻgʻrisida”gi 776-I-sonli qarori (Oʻzbekiston Respublikasi Oliy Majlisi palatalarining Axborotnomasi, 2008-yil, № 4, 241-modda) oʻz kuchini yoʻqotgan deb topilsin.

3. Ushbu qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri D. TOShMUHAMEDOVA

Toshkent sh.,

2012-yil 18-aprel,

472-II-son

Oʻzbekiston Respublikasi Oliy Majlisi Qonunchilik palatasi Kengashining 2012-yil 18-apreldagi 472-II-sonli qarori bilan TASDIQLANGAN

Oʻzbekiston Respublikasi Oliy Majlisi Qonunchilik palatasining Normativ-huquqiy atamalar komissiyasi toʻgʻrisidagi

NIZOM

1-modda. Oʻzbekiston Respublikasi Oliy Majlisi Qonunchilik palatasining Normativ-huquqiy atamalar komissiyasi (bundan buyon matnda Komissiya deb yuritiladi) qonun loyihalarida normativ-huquqiy atamalarning ular mazmuniga muvofiq yagona shaklda va toʻgʻri qoʻllanilishini, qonun loyihalarida yuridik, texnik talablarga va adabiy til normalariga aniq rioya etilishini taʼminlash maqsadida tuziladi.

2-modda. Komissiya Oʻzbekiston Respublikasi Oliy Majlisining Qonunchilik palatasi (bundan buyon matnda Palata deb yuritiladi) qarori bilan uning deputatlari orasidan rais, rais oʻrinbosari, kotib va aʼzolardan iborat 15 kishigacha boʻlgan tarkibda tuziladi.

Komissiyaning ishchi organi Oʻzbekiston Respublikasi Oliy Majlisi Qonunchilik palatasi Devonining Matbuot va tahririyat boʻlimidir.

Komissiya zimmasiga yuklatilgan vazifalarni inobatga olgan holda va uning faoliyatini tashkiliy jihatdan taʼminlash uchun Komissiya tarkibiga Oʻzbekiston Respublikasi Oliy Majlisi Qonunchilik palatasining Devoni (bundan buyon matnda Devon deb yuritiladi) tegishli boʻlimlarining xodimlari kiritilishi mumkin.

3-modda. Komissiyaning asosiy vazifalari quyidagilardir:

qonun loyihalarini tayyorlash jarayonida davlat tili qoidalariga rioya etish;

qonun loyihalarini tayyorlash chogʻida normativ-huquqiy atamalarni qoʻllash izchilligini saqlash;

qonun loyihalarida normativ-huquqiy atamalarning yagona shaklda va toʻgʻri qoʻllanilishini taʼminlash;

tegishli maʼnoni anglatuvchi soʻzlarni barcha qonun loyihalarida bir xil shaklda qoʻllash;

turli tillarning qoidalari tufayli kelib chiqadigan nomuvofiqliklarni normaga ziyon yetkazilmagan holda tahrir qilish.

4-modda. Komissiya:

qonun loyihalarining matnlari va ularga ilova qilinadigan materiallarni Palata qoʻmitalaridan va Devon boʻlimlaridan oldindan olishga;

normativ-huquqiy atamalarning qoʻllanilishi masalalari boʻyicha Palata qoʻmitalari va Devon boʻlimlari bilan birgalikda ishlashga;

normativ-huquqiy atamalarning qoʻllanilishi masalalari boʻyicha Oʻzbekiston Respublikasi Oliy Majlisining Senati qoʻmitalari va uning Devoni boʻlimlari bilan hamkorlik qilishga;

normativ-huquqiy atamalarning toʻgʻri qoʻllanilishi masalalari boʻyicha Palata va uning qoʻmitalari majlislarida soʻzga chiqishga, shuningdek Komissiya xulosasini taqdim etishga;

tegishli sohada qoʻllaniladigan normativ-huquqiy atamalar yuzasidan yuzaga kelishi mumkin boʻlgan masalalarni hal etish uchun Komissiya majlislariga ekspertlar va mutaxassislarni taklif etishga haqlidir.

Komissiya ushbu Nizomga, Palataning va uning Devonining boshqa lokal hujjatlariga muvofiq oʻzga huquqlarga ham ega boʻlishi mumkin.

5-modda. Komissiya:

“Davlat tili haqida”gi, “Normativ-huquqiy hujjatlar toʻgʻrisida”gi Oʻzbekiston Respublikasi qonunlarining, ushbu Nizomning, shuningdek Palata va uning Devonining boshqa lokal hujjatlari talablariga rioya etishi;

qonun loyihalarining lingvistik ekspertizasi oʻtkazilishini tashkil etishi;

qonun loyihalarida normativ-huquqiy atamalarning, ularning amaldagi qonun hujjatlarida qabul qilingan maʼnosiga muvofiq, turlicha izohlashni istisno etadigan tarzda yagona shaklda qoʻllanilishini taʼminlashi;

oʻziga taqdim etilgan qonun loyihalarini oʻz vaqtida koʻrib chiqishi, ular yuzasidan oʻz xulosalarini tayyorlashi;

qonunning qonun loyihasining matni loʻnda, oddiy va ravon tilda bayon etilishi kerakligi haqidagi talabiga rioya etishi;

eskirgan hamda koʻp maʼnoni anglatadigan soʻzlar va iboralar, majoziy taqqoslashlar, sifatlashlar, kinoyalar qoʻllanilishiga yoʻl qoʻymasligi;

qonun loyihalarida ilmiy qoidalarning, grammatika qoidalarining, shuningdek adabiy til qoidalari va normalarining talablariga, ularning yuridik va boshqa atamashunoslik talablarini hisobga olgan holda aniq yozilishini taʼminlagan holda, rioya etishi shart.

Komissiya ushbu Nizomga, Palata va uning Devonining boshqa lokal hujjatlariga muvofiq oʻzga majburiyatlarga ham ega boʻlishi mumkin.

6-modda. Komissiya aʼzosi:

qonun loyihalari matnlarini va ularga ilova qilinadigan materiallarni oldindan toʻla hajmda olishga;

normativ-huquqiy atamalarning qoʻllanilishi masalalari boʻyicha Palataning barcha qoʻmitalari va Devonning boʻlimlari bilan birgalikda ishlashga;

Komissiya qaroriga rozi boʻlmagani taqdirda oʻz nuqtai nazarini qonun loyihasini koʻrib chiqishning keyingi bosqichlarida bayon etishga haqlidir.

Komissiya aʼzosi ushbu Nizomga, Palata va Devonning boshqa lokal hujjatlariga muvofiq oʻzga huquqlarga ham ega boʻlishi mumkin.

7-modda. Komissiya aʼzosi:

“Davlat tili haqida”gi, “Normativ-huquqiy hujjatlar toʻgʻrisida”gi Oʻzbekiston Respublikasi qonunlarining, shuningdek Palata va Devonning boshqa lokal hujjatlari talabalariga rioya etishi;

Komissiya ishida, shu jumladan qonun loyihalarini koʻrib chiqishning barcha bosqichlarida ishtirok etishi;

taqdim etilgan qonun loyihalari va unga ilova qilinadigan boshqa materiallarni oʻz vaqtida koʻrib chiqishi;

qonun loyihalarida ilmiy qoidalarning, grammatika qoidalarining, shuningdek adabiy til qoidalari va normalarining talablariga, ularning yuridik va boshqa atamashunoslik talablarini hisobga olgan holda aniq yozilishini taʼminlagan holda, rioya etishi;

taqdim etilgan qonun loyihalari va ularga ilova qilinadigan materiallar bilan tanishib chiqishi, ular yuzasidan qonun loyihasi boʻyicha Komissiyaning xulosasi asosini tashkil etishi mumkin boʻlgan takliflar tayyorlashi shart.

Komissiya aʼzosi ushbu Nizomga, Palata va Devonning boshqa lokal hujjatlariga muvofiq oʻzga majburiyatlarga ham ega boʻlishi mumkin.

8-modda. Komissiya oʻziga taqdim etilgan qonun loyihasini besh ish kuni ichida koʻrib chiqishi va Komissiya majlisini oʻtkazishi kerak. Zarur boʻlgan hollarda mazkur muddat masʼul qoʻmita bilan kelishuvga koʻra Komissiyaning ishchi organi tomonidan oʻzgartirilishi mumkin. Komissiya majlisi unda Komissiya aʼzolarining koʻpchiligi hozir boʻlgan taqdirda vakolatli hisoblanadi.

9-modda. Komissiyaning Palata majlisiga ikkinchi oʻqishda, zaruratga qarab esa, uchinchi oʻqishda kiritilayotgan qonun loyihasining muhokamasiga bagʻishlangan majlisida masʼul qoʻmita raisi va qonun loyihasi boʻyicha maʼruzachi hozir boʻlishi shart. Komissiya majlisida masʼul qoʻmitaning boshqa aʼzolari ishtirok etishi ham maqsadga muvofiqdir.

Komissiya majlisida normativ-huquqiy atamalarning qoʻllanilishi masalalarini hal etish uchun tegishli vazirliklar va idoralarning ekspertlari va mutaxassislari, olimlar va mutaxassislar ham ishtirok etishi mumkin.

10-modda. Devonning Matbuot va tahririyat boʻlimi:

qonun loyihalarining tarjima va tahrir qilinishini taʼminlashi, shuningdek ularning lingvistik ekspertizasini amalga oshirishda ishtirok etishi;

qonun loyihalarining davlat tilidagi matnlarini tahririy tuzatish uchun faqat masʼul qoʻmita raisi tomonidan tasdiqlangan variantini qabul qilishi;

masʼul qoʻmita qonun loyihasini koʻrib chiqqanidan keyingina uni Komissiyaga taqdim etishi;

Komissiya qabul qilgan tuzatishlarni uch ish kuni ichida qonun loyihasiga kiritishi va tuzatilgan qonun loyihasini masʼul qoʻmitaga taqdim etishi shart.

11-modda. Komissiya muhokamasidan oʻtgan qonun loyihasiga normativ-huquqiy atamalarga doir oʻzgarishlarni Komissiya hamda masʼul qoʻmitaning roziligisiz kiritishga yoʻl qoʻyilmaydi.

12-modda. Komissiya muhokamadan oʻtgan qonun loyihalarida qoʻllanilgan normativ-huquqiy atamalar boʻyicha kelib chiqishi mumkin boʻlgan barcha masalalar yuzasidan Palata oldida masʼul qoʻmita bilan birga javobgar boʻladi.