2015/2016 oʻquv yilida Oʻzbekiston Respublikasining oʻrta maxsus, kasb-hunar taʼlimi muassasalariga oʻqishga qabul qilish toʻgʻrisida (145-son)

03.06.2015

Oʻzbekiston Respublikasi Vazirlar Mahkamasining

qarori

Qayd etib oʻtilsinki, mustaqillik yillarida Kadrlar tayyorlash milliy dasturini amalga oshirish natijasida mamlakatda uzluksiz 12 yillik taʼlimning zamonaviy tizimi yaratildi, respublikaning barcha mintaqalaridagi umumtaʼlim maktablarining 9-sinflari bitiruvchilarining toʻliq qamrab olinishini taʼminlaydigan kasb-hunar kollejlari va akademik litseylarning keng tarmogʻi shakllantirildi, bunda bitiruvchilarni oʻrta maxsus, kasb-hunar kollejlari va litseylarda tanlagan mutaxassisliklari boʻyicha oʻqitish nazarda tutilgan.

Kasb-hunar kollejlarining zamonaviy oʻquv-laboratoriya asbob-uskunalari va ishlab chiqarish ustaxonalari bilan jihozlangan moddiy-texnika bazasi kollej oʻquvchilarining ikki-uchta kasb-hunarni egallashini taʼminlaydi.

Shu bilan birga, kelgusida tarmoqlar va hududlar boʻyicha oʻrta maxsus maʼlumotli aniq kasb-hunar mutaxassislariga boʻlgan real ehtiyojni aniqlash, kasb-hunar kollejlarini ehtiyoj katta boʻlgan ixtisosliklar boʻyicha mutaxassislar tayyorlashga oʻz vaqtida qayta ixtisoslashtirish ishlari sust olib borilmoqda. Natijada kollej bitiruvchilarini ish oʻrinlari bilan toʻliq qamrab olishda ularni tanlagan ixtisosidan boshqa ishlarga joylashtirish holatlari mavjud. Ixtisosidan boshqa ishlarga joylashtirilgan kollejlar bitiruvchilarining eng koʻp soni Surxondaryo, Sirdaryo, Jizzax viloyatlari va Qoraqalpogʻiston Respublikasidadir. Qashqadaryo va Surxondaryo viloyatlaridagi kollejlarda, ayniqsa ularning filiallarida oʻqiyotganlarning smenalilik koeffitsiyenti yuqoriligicha qolmoqda.

Umumtaʼlim maktablarining 9-sinf bitiruvchilarini kasb-hunar kollejlari va akademik litseylarda oʻqitish bilan toʻliq qamrab olishni, respublika iqtisodiyoti tarmoqlari va sohalarida hamda hududlarida talab yuqori boʻlgan kasblar boʻyicha oʻrta maxsus maʼlumotli mutaxassislarni tayyorlashni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan Mehnat va aholini ijtimoiy muhofaza qilish vazirligi, Xalq taʼlimi vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, boshqa manfaatdor vazirliklar va idoralar, aksiyadorlik kompaniyalari va uyushmalar bilan birgalikda 2015/2016 oʻquv yilida umumtaʼlim maktablarining 9-sinf bitiruvchilarini aniq kasblar va mutaxassisliklar boʻyicha kasb-hunar kollejlari va akademik litseylarga qabul qilish yuzasidan takliflar ishlab chiqarishlarni modernizatsiya qilish, texnik va texnologik jihatdan qayta jihozlashga doir amalga oshirish moʻljallangan investitsiya loyihalari, hududlarni ijtimoiy-iqtisodiy rivojlantirish dasturlaridan kelib chiqqan holda har bir viloyat, shahar va tumanda 2018-yilda yangi ish oʻrinlari yaratish yuzasidan balans hisob-kitoblari asosida ishlab chiqilganligi maʼlumot uchun qabul qilinsin.

2. Oʻzbekiston Respublikasi Iqtisodiyot vazirligi, Mehnat va aholini ijtimoiy muhofaza qilish vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining iqtisodiyot tarmoqlari va sohalarida aniq kasblar boʻyicha kasb-hunar kollejlari bitiruvchilariga amaldagi ehtiyojni tanqidiy tahlil qilish asosida tayyorlangan, 2015/2016 oʻquv yilidan boshlab respublika hududlarida 1-ilovaga* muvofiq 35 ta kasb-hunar kollejini, kasblar va mutaxassisliklarni kengaytirib va birxillashtirib qayta ixtisoslashtirishga doir takliflari maʼqullansin.

3. Iqtisodiyot tarmoqlari va sohalarining oʻrta maxsus, kasb-hunar taʼlimi maʼlumotiga ega mutaxassislarga boʻlgan real ehtiyojlaridan kelib chiqqan holda 2015/2016 oʻquv yilida umumtaʼlim maktablarining 9-sinf bitiruvchilarini kasb-hunar kollejlari va akademik litseylarga oʻqishga qabul qilish parametrlari 2 va 2.1 — 2.14-ilovalarga* muvofiq tasdiqlansin.

* 1, 2 va 2.1 — 2.14-ilovalar rus tilidagi matnda berilgan.

4. Oʻzbekiston Respublikasi taʼlim muassasalariga oʻqishga qabul qilish boʻyicha Davlat komissiyasi umumtaʼlim maktablarining 9-sinf bitiruvchilarini respublikaning kasb-hunar kollejlari va akademik litseylariga 2015/2016 oʻquv yilida oʻqishga qabul qilish parametrlari hamda Oʻzbekiston Respublikasi Iqtisodiyot vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflari asosida viloyatlar, shaharlar va tumanlar boʻyicha har bir kasb-hunar kolleji va akademik litseyga oʻqishga qabul qilish parametrlarini bir hafta muddatda tasdiqlasin.

Bunda soʻnggi yillarda kasb-hunar kollejlari bitiruvchilari ishga joylashtirilishining puxta tahlilini, mehnat bozorining jadal oʻzgarayotgan talablarini hisobga olgan holda umumtaʼlim maktablarining 9-sinf bitiruvchilari hududlar boʻyicha iqtisodiyot tarmoqlari va sohalarida talab yuqori boʻlgan oʻrta maxsus, kasb-hunar taʼlimi yoʻnalishlariga va mutaxassisliklariga muvozanatli qabul qilinishi taʼminlansin.

Davlat komissiyasiga, zarurat boʻlganda, iqtisodiyot tarmoqlari va sohalari ehtiyojining balansini hamda umumtaʼlim maktablarining 9-sinflari bitiruvchilarini oʻrta maxsus, kasb-hunar taʼlimi muassasalarida oʻqitish bilan toʻliq qamrab olinishini hisobga olgan holda oʻqishga qabul qilish koʻrsatkichlariga oʻzgartirishlar kiritish huquqi berilsin.

5. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi viloyatlar, shaharlar va tumanlar hokimliklari, bandlikka koʻmaklashish va aholini ijtimoiy muhofaza qilish hududiy markazlari, salohiyatli ish beruvchilar, boshqa manfaatdor tashkilotlar va korxonalar koʻmagida 9-sinf oʻquvchilari va ularning ota-onalari bilan oʻqitish ixtisosliklari yoʻnalishlarini puxta tanlashni shakllantirish boʻyicha faol kasbga yoʻnaltirish ishlari amalga oshirilishini taʼminlasinlar, bunda mintaqada iqtisodiyot tarmoqlarini rivojlantirish istiqbollarini va bitiruvchilarning keyinchalik ishga joylashtirilishini, taʼlim muassasalarida zarur moddiy-texnika bazasining mavjudligini hisobga olsinlar.

6. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi oʻz tasarrufida oʻrta maxsus, kasb-hunar taʼlimi muassasalari boʻlgan vazirliklar va idoralar bilan birgalikda 2015/2016 oʻquv yilida umumtaʼlim maktablarining 9-sinf bitiruvchilarini kasb-hunar kollejlari va akademik litseylarga oʻqishga qabul qilishning belgilangan parametrlari soʻzsiz bajarilishini taʼminlasin hamda oʻqishga qabul qilish natijalari boʻyicha Oʻzbekiston Respublikasi Vazirlar Mahkamasiga shu yil 10-avgustgacha boʻlgan muddatda yakuniy axborot taqdim etsin.

7. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri, shaharlar va tumanlar hokimlari, Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda ularning hududiy boʻlinmalari rahbarlari zimmasiga:

umumtaʼlim maktablarining 9-sinf bitiruvchilarini kasb-hunar kollejlari va akademik litseylarda oʻqitish bilan toʻliq qamrab olishni taʼminlash;

oʻquvchilarni kasb-hunar kollejiga oʻqishga kirgan kundan boshlab, kelgusida ularning tanlagan kasbi boʻyicha toʻliq ishga joylashishini taʼminlash maqsadida tashkilotlar va korxonalarga biriktirish boʻyicha oʻz vaqtida aniq chora-tadbirlar koʻrish yuzasidan shaxsiy masʼuliyat yuklansin.

Umumtaʼlim maktablarining 9-sinf bitiruvchilarini kasb-hunar kollejlariga va akademik litseylarga oʻqishga qabul qilishda bitiruvchi qizlarni oʻqitish bilan qamrab olishga, alohida taʼlimga ehtiyojmand boʻlgan bolalar va “Mehribonlik” uylari bitiruvchilariga taʼlim muassasalarini tanlashi uchun shart-sharoitlar va huquqiy kafolatlar yaratishga alohida eʼtibor qaratilsin.

8. Oʻzbekiston Respublikasi Moliya vazirligi 2015/2016 oʻquv yili uchun oʻrta maxsus, kasb-hunar taʼlimi muassasalariga oʻqishga qabul qilishning tasdiqlangan parametrlarini hisobga olgan holda kasb-hunar kollejlari va akademik litseylar taʼminoti uchun Oʻzbekiston Respublikasi Davlat budjetidan belgilangan tartibda zarur mablagʻlar ajratilishini taʼminlasin.

9. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi manfaatdor vazirliklar va idoralar, mahalliy davlat hokimiyati organlari bilan birgalikda qayta ixtisoslashtirilayotgan, shuningdek yangidan foydalanishga topshirilayotgan oʻrta maxsus, kasb-hunar taʼlim muassasalarida 2015/2016 oʻquv yili boshlangunga qadar oʻquv-tarbiya jarayonini sifatli tashkil etish, ularni yuqori malakali oʻqituvchi kadrlar bilan toʻldirish, kadrlar tayyorlash yoʻnalishlariga muvofiq zarur oʻquv-laboratoriya asbob-uskunalari, kompyuter texnikasi, oʻquv-normativ hujjatlar, oʻquv va metodik adabiyotlar bilan taʼminlash chora-tadbirlarini koʻrsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2015-yil 3-iyun,

145-son