Oʻzbekiston Respublikasi Markaziy banki tomonidan jismoniy shaxslar-rezidentlarga naqd xorijiy valyutani Oʻzbekiston Respublikasi hududidan tashqariga olib chiqishga ruxsatnomalar berish tartibi toʻgʻrisidagi nizomni tasdiqlash haqida (2678-son)

03.06.2015

OʻZBEKISTON RESPUBLIKASI MARKAZIY BANKI BOShQARUVINING

Qarori

[Oʻzbekiston Respublikasi Adliya vazirligi tomonidan 2015-yil 3-iyunda roʻyxatdan oʻtkazildi, roʻyxat raqami 2678]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Valyutani tartibga solish toʻgʻrisida”gi qonunlariga va Oʻzbekiston Respublikasi Prezidentining 2013-yil 30-yanvardagi PQ-1914-son “Jismoniy shaxslarga xorijiy valyutani sotish tartibini yanada liberallashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki tomonidan jismoniy shaxslar-rezidentlarga naqd xorijiy valyutani Oʻzbekiston Respublikasi hududidan tashqariga olib chiqishga ruxsatnomalar berish tartibi toʻgʻrisidagi nizom ilovaga muvofiq tasdiqlansin.

2. Quyidagilar oʻz kuchini yoʻqotgan deb topilsin:

Oʻzbekiston Respublikasi Markaziy banki Boshqaruvining 2003-yil 21-iyundagi 13/7-son “Oʻzbekiston Respublikasi Markaziy banki Boshqaruvining 2000-yil 5-iyuldagi 12/1-son qarori bilan tasdiqlangan “Oʻzbekiston Respublikasi Markaziy banki tomonidan jismoniy shaxslar-rezidentlarga naqd xorijiy valyutani respublika hududidan tashqariga olib chiqishga ruxsatnomalar berish tartibi toʻgʻrisida”gi nizomning yangi tahririni tasdiqlash toʻgʻrisida”gi qarori (roʻyxat raqami 1253, 2003-yil 3-iyul) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2003-y., 13-14-son);

Oʻzbekiston Respublikasi Markaziy banki Boshqaruvining 2003-yil 23-avgustdagi 20/1-son “Oʻzbekiston Respublikasi Markaziy banki Boshqaruvining 2000-yil 5-iyuldagi 12/1-son qarori bilan tasdiqlangan Oʻzbekiston Respublikasi Markaziy banki tomonidan jismoniy shaxslar-rezidentlarga naqd xorijiy valyutani mamlakat hududidan tashqariga olib chiqishga ruxsatnomalar berish tartibi toʻgʻrisida nizomning yangi tahririni tasdiqlash toʻgʻrisidagi” Boshqaruv qaroriga oʻzgartirishlar kiritish toʻgʻrisida”gi qarori (roʻyxat raqami 1253-1, 2003-yil 9-sentabr) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2003-y., 17-18-son).

3. Mazkur qaror rasmiy eʼlon qilingan kundan eʼtiboran kuchga kiradi.

Markaziy bank raisi F. MULLAJONOV

Toshkent sh.,

2015-yil 16-may,

12/6-son

Oʻzbekiston Respublikasi Markaziy banki Boshqaruvining 2015-yil 16-maydagi 12/6-sonli qaroriga ILOVA

Oʻzbekiston Respublikasi Markaziy banki tomonidan jismoniy shaxslar-rezidentlarga naqd xorijiy valyutani Oʻzbekiston Respublikasi hududidan tashqariga olib chiqishga ruxsatnomalar berish tartibi toʻgʻrisidagi

NIZOM

Mazkur Nizom Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi hamda “Valyutani tartibga solish toʻgʻrisida”gi qonunlariga muvofiq jismoniy shaxslar-rezidentlarga 5000 AQSh dollari ekvivalenti miqdoridan oshgan naqd xorijiy valyutani Oʻzbekiston Respublikasi hududidan tashqariga olib chiqishga ruxsatnoma berish tartibini belgilaydi.

1. Jismoniy shaxslar-rezidentlar tomonidan 5000 AQSh dollari ekvivalenti miqdoridan oshgan naqd xorijiy valyutani Oʻzbekiston Respublikasi hududidan tashqariga olib chiqish uchun Oʻzbekiston Respublikasi Markaziy bankining Qoraqalpogʻiston Respublikasi, viloyatlar yoki Toshkent shahar boʻyicha bosh boshqarmasining (bundan buyon matnda Markaziy bankning hududiy Bosh boshqarmasi deb yuritiladi) ruxsatnomasi (bundan buyon matnda ruxsatnoma deb yuritiladi) olinishi shart.

2. Jismoniy shaxslar-rezidentlarga ruxsatnomalar quyidagi maqsadlar uchun beriladi:

a) Oʻzbekiston Respublikasi Prezidentining hamda Vazirlar Mahkamasining qaror va farmoyishlari asosida hukumat delegatsiyalari tarkibida xorijiy davlatlarga chiqish uchun;

b) xorijiy davlatlarda doimiy yashash maqsadida xorijiy davlatlarga chiqish uchun;

v) xizmat safari yuzasidan xorijiy davlatlarga chiqish uchun;

g) taʼlim olish maqsadida xorijiy davlatlarga chiqish uchun;

d) boshqa maqsadlar uchun (sayyohlik safarlari, davolanish, qarindoshlarni koʻrib-kelish, sport musobaqalari va h.k.).

3. Jismoniy shaxslar-rezidentlar ruxsatnoma olish uchun Markaziy bankning hududiy Bosh boshqarmasiga quyidagi hujjatlarni taqdim etadilar:

a) mazkur Nizomning 1-ilovasiga muvofiq shaklda ariza;

b) quyidagi maʼlumotlar koʻrsatilgan holda pasport nusxasi:

pasport seriyasi, raqami va berilgan sanasi;

pasport bergan organ nomi;

Oʻzbekiston Respublikasi hududidan chiqish huquqini beruvchi ruxsatnoma belgisi (agar talab qilinsa);

xorijiy davlatga chiqish vizasi (agar viza rejimi belgilangan boʻlsa);

Oʻzbekiston Respublikasi hududida doimiy roʻyxatdan oʻtganligi toʻgʻrisidagi belgi;

v) Oʻzbekiston Respublikasi hududidan chiqish huquqini beruvchi ruxsatnoma nusxasi (agar talab qilinsa);

g) naqd xorijiy valyuta kelib chiqishining manbasini tasdiqlovchi hujjatlarning asl nusxalari koʻrsatilgan holda ularning nusxalari (ilgari naqd xorijiy valyuta sotib olinganligini tasdiqlovchi bank maʼlumotnomasi, jismoniy shaxs — rezidentning tijorat bankida ochilgan hisobvaraqlariga xorijdan kelib tushgan valyuta mablagʻlarini echilganligini tasdiqlovchi bank maʼlumotnomasi yoki naqd xorijiy valyutani xorijiy davlatlardan olib kelganligini tasdiqlovchi bojxona deklaratsiyasi);

d) xizmat safariga yuborilayotgan shaxslar uchun — xorijga xizmat safariga yuborish toʻgʻrisidagi buyruqning, taklif etayotgan taraf xatlarining nusxasi;

e) hukumat delegatsiyalari tarkibida xorijga borayotgan shaxslar uchun — Oʻzbekiston Respublikasi Vazirlar Mahkamasi farmoyishining nusxasi;

j) xorijga chiqish maqsadini tasdiqlovchi boshqa hujjatlar — agar mavjud boʻlsa.

4. Jismoniy shaxslar-rezidentlarning arizalarini koʻrib chiqish va ularga ruxsatnomalarni berish yoki ruxsatnomalar berishni rad etish ariza kelib tushgan sanadan boshlab oʻn kundan kechiktirmasdan amalga oshiriladi.

5. Markaziy bankning hududiy Bosh boshqarmasi tomonidan ruxsatnomalar berishda:

a) jismoniy shaxslar-rezidentlar mazkur Nizomning 2-bandida koʻrsatilgan maqsadlarda chet elga chiqayotganligi;

b) jismoniy shaxslar-rezidentlar tomonidan mazkur Nizomning 3-bandida koʻrsatilgan hujjatlar tegishliligi boʻyicha toʻliq taqdim etilganligi asos boʻladi.

6. Jismoniy shaxs-rezident tomonidan mazkur Nizomning 5-bandida koʻrsatilgan talablarga rioya qilinmagan taqdirda Markaziy bankning hududiy Bosh boshqarmasi ruxsatnoma berishni rad etadi va bu haqda jismoniy shaxs-rezidentga yozma ravishda javob beradi.

7. Taqdim etilgan hujjatlar mazkur Nizom talablariga muvofiq boʻlganda, Markaziy bankning hududiy Bosh boshqarmasi tomonidan ushbu Nizomning 2-ilovasida keltirilgan 09006-1 shakl boʻyicha ruxsatnoma rasmiylashtiriladi.

09006-1-son shakl ruxsatnoma qatʼiy hisobot blanki hisoblanib Markaziy bankning tegishli hududiy Bosh boshqarmasi buyurtmasi boʻyicha “Davlat belgisi” DIChBda tayyorlanadi va zarur himoyalash darajalariga ega boʻladi. Bunda har bir blank yagona seriya va tartib raqamiga ega boʻlgan ikki nusxadan tashkil topadi;

Ruxsatnoma jismoniy shaxslar — rezidentlar doimiy yashab turgan joydagi Markaziy bankning hududiy Bosh boshqarmasi boshligʻi tomonidan imzolanadi hamda olib chiqilayotgan jami summaga beriladi;

Ruxsatnomaning rasmiylashtirilishi va berilishi uchun toʻlov undirilmaydi.

8. Ruxsatnoma ikki nusxada rasmiylashtiriladi, birinchi nusxasi jismoniy shaxs — rezidentga beriladi, ikkinchi nusxasi Markaziy bankning hududiy Bosh boshqarmasida qoldiriladi.

Ruxsatnoma arizada koʻrsatilgan naqd xorijiy valyutani bir marta Oʻzbekiston Respublikasi hududidan tashqariga olib chiqish huquqini beradi va u faqat unda koʻrsatilgan muddat mobaynida amal qiladi.

9. Ruxsatnoma jismoniy shaxslar-rezidentlar tomonidan bojxona organlariga topshirilishi shart.

10. Ruxsatnoma berilgan sanadan boshlab uch oy davomida haqiqiy hisoblanadi.

11. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladilar.

Oʻzbekiston Respublikasi Markaziy banki tomonidan jismoniy shaxslar-rezidentlarga naqd xorijiy valyutani Oʻzbekiston Respublikasi hududidan tashqariga olib chiqishga ruxsatnomalar berish tartibi toʻgʻrisidagi nizomga 1-ILOVA

(1-ilova Oʻzbekiston Respublikasi Markaziy banki Boshqaruvining 2017-yil 2-dekabrdagi 33/3-sonli (roʻyxat raqami 2678-1, 14.12.2017-y.) qarori tahririda — Qonun hujjatlari maʼlumotlari milliy bazasi, 15.12.2017-y., 10/17/2678-1/0415-son)

Oʻzbekiston Respublikasi Markaziy banki tomonidan jismoniy shaxslar-rezidentlarga naqd xorijiy valyutani Oʻzbekiston Respublikasi hududidan tashqariga olib chiqishga ruxsatnomalar berish tartibi toʻgʻrisidagi nizomga 2-ILOVA

(2-ilova Oʻzbekiston Respublikasi Markaziy banki Boshqaruvining 2018-yil 27-yanvardagi 3/5-sonli qarori (roʻyxat raqami 2678-2, 12.03.2018-y.) tahririda — Qonun hujjatlari maʼlumotlari milliy bazasi, 12.03.2018-y., 10/18/2678-2/0878-son)