“Maʼnaviy hayot” jurnali tahririyatini tashkil qilish toʻgʻrisida (141-son)

29.05.2015

Oʻzbekiston Respublikasi Vazirlar Mahkamasining

qarori

Milliy gʻoyamizning asosiy tushuncha va tamoyillarini, Oʻzbekistonda barpo etilayotgan zamonaviy demokratik davlat va kuchli fuqarolik jamiyatining maʼnaviy asoslarini chuqur oʻrganish va keng targʻib etish maqsadida Milliy gʻoya va mafkura ilmiy-amaliy markazining jurnali sifatida tashkil etilgan “Maʼnaviy hayot” jurnalini nashr qilish ishlarini takomillashtirish maqsadida Vazirlar Mahkamasi qaror qiladi:

1. Respublika “Maʼnaviyat va maʼrifat” kengashi, Milliy gʻoya va mafkura ilmiy-amaliy markazi va Oʻzbekiston matbuot va axborot agentligining Milliy gʻoya va mafkura ilmiy-amaliy markazi muassisligida yuridik shaxs maqomiga ega boʻlgan “Maʼnaviy hayot” jurnali tahririyatini tashkil etish toʻgʻrisidagi taklifi maʼqullansin.

2. “Maʼnaviy hayot” jurnali tahririyatining asosiy vazifalari etib quyidagilar belgilansin:

Milliy gʻoya va mafkura ilmiy-amaliy markazi bilan kelishilgan mavzular rejasiga asosan jurnal uchun materiallar toʻplash, ular asosida ilmiy maqola va taxliliy materiallar tayyorlash, jurnalni har chorakda bir marta nashr etish va tarqatish;

xalqimizning boy tarixi va madaniy merosini, milliy gʻoyamizning asosiy tushuncha va tamoyillarini, Oʻzbekistonda barpo etilayotgan zamonaviy demokratik davlat va fuqarolik jamiyatining maʼnaviy asoslarini chuqur oʻrganish va keng targʻib etish;

jamiyatimizning mafkuraviy immunitetini kuchaytirishga qaratilgan samarali usul-uslublarga bagʻishlangan ilmiy maqolalarni chop etish, milliy urf-odat, anʼana va qadriyatlarning hayotimizdagi oʻrni va ahamiyatini har tomonlama yoritib borish;

mamlakatimizda amalga oshirilayotgan davlat siyosatining ustuvor yoʻnalishlari, keng koʻlamli islohotlarning mohiyati, qabul qilingan qonunchilik va davlat dasturlarining ahamiyatini atroflicha sharhlash va tushuntirish.

3. Milliy gʻoya va mafkura ilmiy-amaliy markazi:

oʻn besh kun muddatda “Maʼnaviy hayot” jurnali tahririyatini tashkil qilish va uning moddiy-texnika bazasini shakllantirish, jurnalning muntazam nashr qilinishini taʼminlash boʻyicha kompleks chora-tadbirlar ishlab chiqilishini;

“Maʼnaviy hayot” jurnali tahririyatining nizomining ishlab chiqilishi va oʻrnatilgan tartibda davlat roʻyxatidan oʻtkazilishini;

Oʻzbekiston Respublikasi Mehnat va aholini ijtimoiy muhofaza qilish vazirligi va Moliya vazirligi bilan kelishilgan holda jurnal tahririyati xodimlari mehnatiga haq toʻlash boʻyicha razryadlar va shtatlar jadvali tasdiqlanishini;

bir oy muddatda jurnalda chop etiladigan maqolalar uchun mualliflik haqi toʻlashni tartibga soluvchi tegishli meʼyoriy-huquqiy hujjat ishlab chiqilishini;

jurnal tahririyati faoliyati uchun zarur shart-sharoitlar yaratilishini taʼminlasin.

4. “Maʼnaviy hayot” jurnali tahririyati bosh muharriri Milliy gʻoya va mafkura ilmiy-amaliy markazi rahbari tomonidan tayinlanishi va vazifasidan ozod etilishi belgilab qoʻyilsin.

5. “Maʼnaviy hayot” jurnali tahririyati Toshkent shahar, Mirobod tumani, Buyuk Turon koʻchasi, 42-uy manzilida joylashgan Oʻzbekiston Milliy axborot agentligi binosiga ijara toʻlovi undirilmasdan joylashtirilsin.

6. “Maʼnaviy hayot” jurnali tahririyatining pul mablagʻlari quyidagilar hisobiga shakllantirilishi inobatga olinsin:

jurnalni sotishdan tushadigan mablagʻlar;

yuridik va jismoniy shaxslarning xayriya ehsonlari, xorijiy va xalqaro tashkilotlar, xorijiy davlatlarning grantlari;

budjet mablagʻlari (subsidiya);

qonunchilikda taqiqlanmagan boshqa tushumlar.

7. Belgilab qoʻyilsinki, budjet mablagʻlari (subsidiya) “Maʼnaviy hayot” jurnali tahririyatining oʻz daromadlari bilan qoplanmagan saqlash xarajatlarining tegishli qismini moliyalashtirish uchun ajratiladi.

8. Oʻzbekiston Matbuot va axborot agentligi jurnalni muntazam ravishda imtiyozli narxlarda chop etish boʻyicha choralar koʻrsin.

9. Oʻzbekiston Respublikasi Axborot texnologiyalari va kommunikatsiyalarni rivojlantirish vazirligi:

“Maʼnaviy hayot” jurnali tahririyatini xizmat telefonlari, jumladan, shahar telefoni, internet va boshqa aloqa vositalari bilan taʼminlasin;

jurnalni muntazam ravishda obunachilarga imtiyozli narxlarda yetkazilishi boʻyicha choralar koʻrsin;

jurnalning veb-saytini yaratishda koʻmaklashsin.

10. Oʻzbekiston Respublikasi Moliya vazirligi:

“Maʼnaviy hayot” jurnali tahririyatining asoslangan hisob-kitoblari boʻyicha uning oʻz daromadlari bilan qoplanmagan xarajatlar qismini moliyalashtirish uchun mablagʻlarni (subsidiya) Oʻzbekiston Respublikasi Davlat budjetining “Madaniyat” sohasi uchun koʻzda tutilgan mablagʻlar doirasida ajratsin;

“Maʼnaviy hayot” jurnali tahririyatiga bitta xizmat yengil avtomobilini saqlash uchun limit ajratsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. Ikramov zimmasiga yuklatilsin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 29-may,

141-son