Tumanda 2015-yil davomida haq toʻlanadigan jamoat ishlarini tashkil qilish toʻgʻrisida (360-son)

11.03.2015

Jizzax viloyati Baxmal tuman hokimining

qarori

Oʻzbekiston Respublikasining “Aholini ish bilan taʼminlash toʻgʻrisida”gi Qonunining 22-moddasi (Oʻzbekiston Respublikasi qonun hujjatlari toʻplami, 2009-y., 52-son, 553-modda) hamda Oʻzbekiston Respublikasi Vazirlar Mahkamasining 1999-yil 19-iyuldagi 353-son “Haq toʻlanadigan jamoat ishlarini tashkil qilish toʻgʻrisidagi nizomni tasdiqlash haqida”gi qarori (Oʻzbekiston Respublikasi Hukumatining qarorlari toʻplami, 1999-y., 7-son, 40-modda) ijrosini taʼminlash, ish qidirayotgan shaxs sifatida tuman Bandlikka koʻmaklashish va aholini ijtimoiy himoya qilish markazida roʻyxatga olingan fuqarolarga ularning vaqtincha ish haqi olishi va ish qidirayotgan davrida ularni moddiy jihatdan qoʻllab-quvvatlash, Markaz tomonidan “ishsiz” deb eʼtirof etilgan fuqarolarni vaqtincha ish bilan taʼminlash uchun shart-sharoitlar yaratish, ishsizlar oʻrtasida boqimandalikning oldini olish, birinchi marotaba ish qidirayotgan hamda kasbi boʻlmagan shaxslarni mehnat faoliyatiga jalb qilish maqsadida, Oʻzbekiston Respublikasining “Mahalliy davlat hokimiyati toʻgʻrisida”gi Qonunining (Oʻzbekiston Respublikasi Oliy Kengashning Axboratnomasi, 1993-y., 9-son, 320-modda) 6-moddasiga asosan qaror qilaman:

1. Oʻzbekiston Respublikasi “Aholini ish bilan taʼminlash toʻgʻrisida”gi Qonunining 22-moddasiga asosan tumanda 2015-yil davomida haq toʻlanadigan jamoat ishlari ilovada koʻrsatilgan korxona, muassasa va tashkilotlarda amalga oshirilishi tasdiqlansin.

2. Tuman Bandlikka koʻmaklashish va aholini ijtimoiy muhofaza qilish markazi (I. Xolmirzayev)ga ish qidirayotgan va ishsiz shaxslar tarkibi va sonini hisobga olgan holda ishchi kuchiga boʻlgan talab va takliflarni tahlil qilish asosida aholini ish bilan taʼminlash mintaqaviy dasturining maxsus boʻlimiga kiritiladigan haq toʻlanadigan jamoat ishlarini tashkil qilish boʻyicha takliflarni tayyorlash va tuman hokimligiga taqdim etish vazifasi yuklatilsin.

3. Haq toʻlanadigan jamoat ishlarini tashkil etuvchi korxona, muassasa va tashkilotlar rahbarlariga:

ilovada qayd etilgan haq toʻlanadigan jamoat ishlarini tashkil etish taʼminlansin;

jamoat ishlariga jalb qilingan fuqarolar mehnatiga haq toʻlash Oʻzbekiston Respublikasi Vazirlar Mahkamasining 1999-yil 19-iyuldagi 353-son qarori bilan tasdiqlangan “Haq toʻlanadigan jamoat ishlarini tashkil qilish toʻgʻrisida”gi nizomning 23-bandiga muvofiq, mahalliy davlat hokimiyati organlariga qarashli korxonalar, muassasalar va tashkilotlar boʻyicha — ellik foizi ish beruvchilar mablagʻlari va ellik foizi mahalliy budjet va Ish bilan taʼminlashga koʻmaklashish davlat jamgʻarmasi mablagʻlari hisobiga;

boshqa korxonalar, muassasalar va tashkilotlar boʻyicha — yetmish besh foizi ish beruvchilar mablagʻlari va yigirma besh foizi Ish bilan taʼminlashga koʻmaklashish davlat jamgʻarmasi mablagʻlari hisobiga amalga oshirilishi belgilab qoʻyilsin.

4. Tuman Bandlikka koʻmaklashish va aholini ijtimoiy muhofaza qilish markazi yoʻllanmasi boʻyicha haq toʻlanadigan jamoat ishlariga yuborilgan fuqarolarning haq toʻlanadigan jamoat ishiga qabul qilinganligi toʻgʻrisidagi maʼlumot 3 kun muddatda markazga yozma ravishda xabar qilinsin.

5. Oʻzgalar parvarishiga muhtoj yolgʻiz keksalar, pensionyerlar va nogironlarning uyiga borib ijtimoiy xizmat koʻrsatish boʻyicha haq toʻlanadigan jamoat ishlariga jalb etilgan, mehnat boʻlimlarida roʻyxatga olingan ishsiz fuqarolarga ish haqi toʻlash xarajatlari toʻliq Ish bilan taʼminlashga koʻmaklashish davlat jamgʻarmasi mablagʻlari hisobidan amalga oshirilishi belgilab qoʻyilsin.

6. Tuman Bandlikka koʻmaklashish va aholini ijtimoiy muhofaza qilish markazi (I. Xolmirzayev):

korxona, muassasa va tashkilotlar rahbarlari tomonidan mazkur qarorning toʻliq bajarilishi yuzasidan qatʼiy nazorat oʻrnatilsin;

haq toʻlanadigan jamoat ishlariga yuborilgan va ish bilan taʼminlangan fuqarolar belgilangan tartibda hisobga olinsin.

7. Mazkur qaror qabul qilinishi munosabati bilan tuman hokimining 2014-yil 8-apreldagi 209-sonli qarori oʻz kuchini yoʻqotgan deb hisoblansin.

8. Ushbu qarorning ijrosini nazorat qilish tuman hokimining oʻrinbosari O. Abduraximov zimmasiga yuklatilsin.

9. Mazkur qaror rasmiy eʼlon qilingan kundan eʼtiboran kuchga kiradi.

Hokim B. IZBASAROV

Baxmal t.,

2015-yil 11-mart,

360-son

Tuman hokimining 2015-yil 11-martdagi 360-sonli qaroriga ILOVA

Tumanda haq toʻlanadigan jamoat ishlarining turlari hamda mazkur ishlarni 2015-yil davomida amalga oshiradigan korxona, tashkilot va muassasalar

ROʻYXATI

T/r Korxona va tashkilotlar nomi Ish turlari Ish mazmuni 1. Tuman Obodonlashtirish boshqarmasi Mahalla, shirkat, xoʻjalik va boshqa qishloq xoʻjaligi korxonalari, dam olish zonalari hamda koʻchalarni obodonlashtirish Tumandagi korxonalar va dam olish zonalaridagi obodonlashtirish ishlarida qatnashish, hududlarni tozalash, yozgi yigʻishtirish, hududlarni supurish va axlatlarni toʻplash, koʻkalamzorlashtirish, oʻtkazilgan daraxtlarni parvarish qilish (sugʻorish, shakl berish, organik va maʼdanli oʻgʻitlar bilan qoʻshimcha oziqlantirish) hududlarni tozalash, qor va qor muzini koʻchirish 2. Oʻrmon xoʻjaligi Koʻchatlar ekish va dorivor giyohlar terish Dorivor oʻsimliklar yigʻish, mevali va manzarali koʻchatlarga shakl berish 3. Baxmal tuman Yoʻl xoʻjaligi taʼmirlash, foydalanish pudrat korxonasi Turli xil taʼmirlash ishlari, yoʻl atroflarini tozalash Yoʻl atroflarini tozalash va boshqa obodonlashtirish ishlari 4. Tuman Pilla korxonasi Pilla yetishtirish Tut bargi terib kelish