Tijorat banklarining moliyaviy barqarorligini yanada oshirish va ularning resurs bazasini rivojlantirish chora-tadbirlari toʻgʻrisida (PQ-2344-son)

06.05.2015

Oʻzbekiston Respublikasi Prezidentining

Qarori

Bank tizimining moliyaviy barqarorligi va ishonchliligini yanada oshirish, tijorat banklarining resurs bazasini mustahkamlash va rivojlantirish uchun qulay shart-sharoitlar yaratish, ularning investitsiyaviy faolligini ragʻbatlantirish, shuningdek umum qabul qilingan xalqaro meʼyor va standartlarga muvofiq bank faoliyatini tashkil etishni yanada yuqori darajaga chiqishini taʼminlash maqsadida:

1. Oʻzbekiston Respublikasi Markaziy banki tomonidan Oʻzbekiston Banklar uyushmasi va mamlakatning tijorat banklari bilan birgalikda Tijorat banklarining moliyaviy barqarorligi va likvidliligini yanada oshirish, ularning resurs bazasini rivojlantirish boʻyicha ishlab chiqilgan kompleks chora-tadbirlar ilovaga* muvofiq maʼqullansin, unda:

* Ilova rus tilidagi matnda berilgan

xalqaro meʼyor va standartlarga muvofiq, shu jumladan depozit va kredit siyosati sohasida respublika banklariga nisbatan qoʻyilayotgan meʼyoriy talablarni yanada takomillashtirish;

tijorat banklarining resurs bazasini mustahkamlash, omonat va depozitlarning yangi jozibador turlarini joriy qilish yoʻli bilan aholi va xoʻjalik subyektlarining boʻsh pul mablagʻlarini bank aylanmasiga keng koʻlamda jalb etish chora-tadbirlarini amalga oshirish;

yetakchi xorijiy banklar va moliya institutlarida boshqaruvni tashkil etish tizimini chuqur oʻrganish asosida tijorat banklarida korporativ boshqaruv usullari, shu jumladan xatarlarni boshqarish va ichki nazoratni yaxshilash usullarini takomillashtirish;

ilgʻor axborot-kommunikatsiya texnologiyalarini keng tatbiq etgan holda koʻrsatilayotgan bank xizmatlari koʻlamini kengaytirish va sifatini oshirish, shuningdek bank plastik kartochkalaridan foydalangan holda naqd pulsiz hisob-kitoblar tizimini kengaytirish.

Masʼul ijrochilar — Markaziy bank, tijorat banklari, vazirlik va idoralar Chora-tadbirlar kompleksida nazarda tutilgan tadbirlarning belgilangan muddatlarda sifatli bajarilishini taʼminlasin.

2. Bank nazorati boʻyicha Bazel qoʻmitasi tomonidan tijorat banklariga nisbatan qoʻyiladigan meʼyoriy talabalarni yanada takomillashtirishni, jumladan, kapitalning yetarliligi va likvidlilik koʻrsatkichi boʻyicha yangi talablarni nazarda tutgan yangi standartlar va tavsiyalar (Bazel-III standartlari) ishlab chiqilganligi maʼlumot uchun qabul qilinsin.

Oʻzbekiston Respublikasi Markaziy banki:

yuqorida koʻrsatilgan bank nazorati boʻyicha Bazel qoʻmitasining standart va tavsiyalarini (Bazel-III standartlari) 2015 — 2019-yillarda bosqichma-bosqich joriy etilishini taʼminlasin;

Banklar uyushmasi va tijorat banklari bilan birgalikda bir oy muddatda Markaziy bankning qayta moliyalashtirish stavkalarini, keyingi yillarda inflatsiya darajasi izchil pasayishini, shuningdek boshqa makroiqtisodiy koʻrsatkichlarning barqarorligini hisobga olgan holda tijorat banklari jalb qilayotgan depozitlar foiz stavkalarini belgilash mexanizmini ishlab chiqib, tasdiqlasin.

3. Oʻzbekiston Respublikasi Prezidentining “Tijorat banklarining investitsiya loyihalarini moliyalashtirishga yoʻnaltiriladigan uzoq muddatli kreditlari ulushini koʻpaytirishni ragʻbatlantirish borasidagi qoʻshimcha chora-tadbirlar toʻgʻrisida” 2009-yil 28-iyuldagi PQ-1166-sonli qarori bilan tijorat banklariga kredit portfeli tarkibidagi uzoq muddatli investitsiyaviy moliyalashtirish ulushiga qarab tabaqalashtirilgan stavkalar boʻyicha foyda soligʻini toʻlash yuzasidan berilgan imtiyozlarning amal qilish muddati 2020-yilning 1-yanvariga qadar uzaytirilsin.

4. Belgilangan tartibda tasdiqlanadigan roʻyxatlar boʻyicha dasturiy taʼminot, bankomat va plastik kartochkalar orqali toʻlovlarni amalga oshirish uchun foydalaniladigan boshqa uskunalar import boʻyicha olib kirilganida tijorat banklari va chakana toʻlov tizimlarining protsessing markazlari boj toʻlovlarini toʻlashdan (bojxona rasmiylashtiruvi yigʻimlaridan tashqari) 2020-yilning 1-yanvariga qadar ozod etilsin.

5. Oʻzbekiston Respublikasi Markaziy banki Adliya vazirligi, boshqa manfaatdor vazirliklar hamda idoralar bilan birgalikda bir oy muddatda

qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

6. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R. Azimov va Oʻzbekiston Respublikasi Markaziy banki raisi F. Mullajonov zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2015-yil 6-may,

PQ-2344-son